Batswadi, Šireletšang Bohwa bja Lena bjo Bohlokwa
Batswadi, Šireletšang Bohwa bja Lena bjo Bohlokwa
‘Bohlale ke tšhireletšo. Bo phediša mong wa bjona.’—MMOLEDI 7:12.
1. Ke ka baka la’ng batswadi ba swanetše go lebelela bana ba bona e le dimpho?
BATSWADI ba tliša ngwana yo a nago le dika gotee le semelo se se swanago le sa bona lefaseng. Beibele e bitša bana ba bjalo gore “ké neô [“bohwa,” NW] ya Morêna.” (Psalme 127:3) Ka ge Jehofa e le Monei wa kgonthe wa Bophelo, ruri o nea batswadi seo ge e le gabotse e lego sa gagwe. (Psalme 36:9) Batswadi, le lebelela bjang taba ya go amogela mpho e bjalo e bohlokwa yeo e tšwago go Modimo?
2. Manoa o ile a arabela bjang ka morago ga go kwa gore e be e tla ba tate?
2 Ke therešo gore mpho e bjalo e swanetše go amogelwa ka boikokobetšo le ka tebogo. Nywageng ya ka godimo ga e 3 000 e fetilego, Manoa wa mo-Isiraele o ile a arabela ka tsela ye ge mosadi wa gagwe a be a botšwa ke morongwa gore o tla ba le ngwana. Ka morago ga go kwa ditaba tše tše dibotse, Manoa o ile a rapela ka gore: “Hlê Mong’a-ka! A monna eo wa Modimo e O mo romilexo a kê a boêlê a tlê xo rena, a re rutê ka mo re swanetšexo xo dira lesoxanyana leo le tl’o xo bêlêxwa.” (Baahlodi 13:8) Batswadi, le ka ithuta’ng mohlaleng wa Manoa?
Lebaka Leo ka Lona Thušo ya Modimo e Nyakegago mo Nakong ye
3. Ke ka baka la’ng thušo ya Modimo e tloga e nyakega mo nakong ye ge o godiša bana?
3 Mo nakong ye go feta le ge e le neng pele, batswadi ba nyaka thušo ya Jehofa ge ba godiša bana ba bona. Ka baka la’ng? Sathane Diabolo le barongwa ba gagwe ba rakilwe legodimong gomme ba lahletšwe lefaseng. Beibele e lemoša ka gore: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” (Kutollo 12:7-9, 12) Beibele e hlalosa gore “bo-ka tau e bôpaxo,” Sathane “ó nyaka yo a kaxo mo metša.” (1 Petro 5:8) Ditau gantši di hlasela diphoofolo tše dinyenyane tše di tlogago di sa kgone go iphemela. Ka gona, batswadi ba Bakriste ka bohlale ba lebelela go Jehofa bakeng sa tlhahlo yeo e ka ba thušago go šireletša bana ba bona. O dira maiteko a makaaka’ng a go leka go ba šireletša?
4. (a) Go tseba ga batswadi gore tau e itshepelela ka bolokologi tikologong yeo ba lego go yona go swanetše go ba tutueletša go dira’ng? (b) Bana ba nyaka’ng bakeng sa tšhireletšo?
4 Ge e ba o be o tseba gore tau e itshepelela ka bolokologi tikologong yeo o lego go yona, go šireletša bana ba gago ruri e tla ba selo se o tshwenyegago kudu ka sona. Sathane ke sebata. O nyaka go senya batho ba Modimo, e le gore Modimo a se ke a ba amogela. (Jobo 2:1-7; 1 Johane 5:19) Bana ba hlaselega gabonolo. E le gore bana ba phonyokge melaba ya Diabolo, ba swanetše go tseba Jehofa gomme ba mo kwe. Tsebo ya Beibele ke ya bohlokwa. Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Go oketša moo, bana ba nyaka bohlale—bokgoni bja go kwešiša le go diriša seo ba ithutilego sona. Ka ge “bohlale bo phediša mong wa byôna,” lena batswadi le swanetše go nweletša therešo ka dipelong tša bana ba lena. (Mmoledi 7:12) Le ka dira se bjang?
5. (a) Motho a ka rutwa bohlale bjang? (b) Puku ya Diema e hlalosa bjang go ba bohlokwa ga bohlale?
5 O ka balela bana ba gago Lentšu la Modimo gomme o swanetše go dira bjalo. Eupša go ba thuša go rata Jehofa le go mo kwa go nyaka se se oketšegilego go feta go fo ba balela—go nyaka gore ba kwešiše. Ka mohlala: Ngwana a ka ba a boditšwe gore a se ke a tshela setarata pele ga ge a ka lebelela ka mahlakoreng a mabedi. Lega go le bjalo, bana ba bangwe ga ba kwe. Ka baka la’ng? Mafelelo a go thulwa ke koloi a ka no ba a sa hlaloswa gantši ka mo go lekanego goba ka tsela yeo e dirago gore ngwana a kwešiše ka mo go feletšego kotsi ya go dira seo, e le gore a fenye “bošilo” bjo bo ka mo lebišago kotsing. Go ruta motho bohlale go nyaka nako gotee le go se fele pelo mo go oketšegilego. Eupša bohlale ruri bo bohlokwa! Beibele e re: “’Tsela tša byôna ké ’tsela-thatexi; ’me yohle mebila ya byôna ké ya kaxišô. Bohlale ké sehlare sa bophêlô sa ba bo swerexo; wà swara wa tiiša, O tlo ba wa mahlatse.”—Diema 3:13-18; 22:15.
Thuto Yeo e Rutago Motho Bohlale
6. (a) Ke ka baka la’ng bana gantši ba dira dilo ka tsela e sego ya bohlale? (b) Ke ntwa efe yeo e lwewago?
6 Gantši bana ba dira dilo ka tsela e fošagetšego, e sego ka gobane ba sa rutwa go dira se se nepagetšego, eupša ka gobane thuto e se ya fihla dipelong tša bona—motho yo ba lego yena ka gare. Diabolo o lwela gore a thope dipelo tša bana. O loga maano e le go kgonthišetša gore ba lebeletšana le ditutuetšo tša lefase la gagwe la batho ba sa boifego Modimo. Le gona o leka go diriša gampe tshekamelo ya bona yeo ba e abetšego ya sebe ya gore ba dire dilo tše mpe. (Genesi 8:21; Psalme 51:5) Batswadi ba swanetše go lemoga gore go lwewa ntwa ya kgonthe ya gore go thopše dipelo tša bana ba bona.
7. Ke ka baka la’ng go botša ngwana se se nepagetšego goba se se fošagetšego go sa lekana?
7 Batswadi gantši ba botša ngwana se se nepagetšego goba se se fošagetšego, e le ge ba dumela gore ba mo rutile molao o itšego wa motheo wa boitshwaro. Ba ka botša ngwana gore go fošagetše go bolela maaka, go utswa goba go ba le dikopano tša botona le botshadi le motho yo a sa nyalanago le yena. Lega go le bjalo, ngwana o swanetše go ba le tutuetšo e matla ya gore a kwe go e na le go fo dira bjalo ka gobane batswadi ba gagwe ba re a dire bjalo. Ye ke melao ya Jehofa. Ngwana o swanetše go tseba gore tsela e bohlale ke go theetša melao ya Modimo.—Diema 6:16-19; Ba-Hebere 13:4.
8. Ke thuto ya mohuta mang yeo e ka thušago bana go dira dilo ka bohlale?
8 Go raragana ga legohle, go se swane ga diphedi, go fetoga ga dihla—dilo tše di bjalo ka moka di ka thuša ngwana gore a kwešiše go ba gona ga Mmopi yo bohlale ka go fetišiša. (Ba-Roma 1:20; Ba-Hebere 3:4) Go oketša moo, ngwana o swanetše go rutwa gore Modimo o a mo rata gomme o dirile tokišetšo ka sehlabelo sa Morwa wa Gagwe gore a mo nee bophelo bjo bo sa felego le gore a ka thabiša Modimo ka go kwa seo A se bolelago. Ka gona mohlomongwe ngwana o tla nyaka go hlankela Jehofa, go sa šetšwe maiteko a Diabolo a go nyaka go mo thibela.—Diema 22:6; 27:11; Johane 3:16.
9. (a) Thuto e phološago bophelo e nyaka’ng? (b) Bo-tate ba laelwa gore ba dire’ng, gomme se se akaretša’ng?
9 Mohuta wa thuto yeo e šireletšago ngwana gomme ya mo tutueletša go dira se se nepagetšego o nyaka nako, tlhokomelo le thulaganyo. O nyaka gore batswadi ba amogele tlhahlo e tšwago go Modimo. Beibele e re: “Lena Bô-tata-xo-bana! . . . sa lena a e bê xo ba etetša [bana ba lena] ka xo ba ruta le xo ba eletša [go ya ka tlhahlo ya monagano, NW] tša Morêna.” (Ba-Efeso 6:4) Seo se bolela’ng? “Tlhahlo ya monagano” ka Segerikeng sa mathomo e na le kgopolo ya “go tsenya monagano go.” Ka gona, bo-tate ge e le gabotse ba kgothaletšwa go tsenya monagano wa Jehofa ka baneng ba bona. Yeo e tla ba tšhireletšo e kgolo gakaakang baneng! Ge e ba dikgopolo tša Modimo, e lego tsela ya gagwe ya go nagana, di nweleditšwe ka menaganong ya bana, gona ba šireletšegile malebana le go dira se se fošagetšego.
Kganyogo Yeo e Tutuetšwago ke Lerato
10. E le gore o rute ngwana wa gago ka katlego, ke selo sefe sa bohlokwa seo o swanetšego go se tseba?
10 Lega go le bjalo, e le gore o kgotsofatše kganyogo ya gago ya go nyaka go godiša ngwana wa gago ka tsela e swanetšego, gona maiteko a gago a swanetše go tutuetšwa ke lerato. Selo sa bohlokwa ke poledišano e botse. Nyakišiša mabapi le seo se diregago bophelong bja ngwana wa gago le gore dipono tša gagwe ke dife. Boemong bja ge le iketlile, ka bohlale kgothaletša ngwana wa gago go ntšha sa mafahleng. Ka dinako tše dingwe, o ka makatšwa ke seo a se bolelago. E ba šedi kudu gore o se ke wa tšewa ke maikwelo. Go e na le moo, theetša ka tsela ya go bontšha kgahlego.
11. Motswadi a ka tsenya bjang monagano wa Modimo ka ngwaneng?
11 Ke therešo gore o ka ba o ile wa balela ngwana wa gago go tšwa Beibeleng mabapi le melao ya Modimo yeo e ganetšago dikopano tša botona le botshadi tše di gobogilego, gomme o ka ba o ile wa dira bjalo ka makga a mmalwa. (1 Ba-Korinthe 6:18; Ba-Efeso 5:5) Se se ka ba se ile sa gatelela ka baneng ba gago dilo tše di thabišago Jehofa le tše di sa mo thabišego. Lega go le bjalo, go tsenya monagano wa Jehofa ka ngwaneng go nyaka se se fetago seo. Bana ba nyaka thušo e le gore ba tsebe lebaka leo ka lona melao ya Jehofa e lego bohlokwa. Ba swanetše go kgodišega gore melao ya gagwe e lokile e bile e a hola le gore go e-kwa ke selo se se nepagetšego le se lerato go se dira. Ke feela ge o boledišana le bana ba gago go tšwa Mangwalong e le gore ba amogele pono ya Modimo moo go ka bolelwago gore o tsentše monagano wa gagwe ka go bona.
12. Motswadi a ka thuša bjang ngwana wa gagwe gore a be le pono e nepagetšego ka dikopano tša botona le botshadi?
12 Ge o bolela ka dikopano tša botona le botshadi o ka botšiša gore, “Na o nagana gore go kwa ga motho molao wa Jehofa wa gore a se be le dikopano tša botona le botshadi pele ga lenyalo go tla mo amoga lethabo?” Kgothaletša ngwana wa gago gore a hlalose karabo ya gagwe. Ka morago ga go ahla-ahla tokišetšo ya Modimo e kgahlišago ya gore motho a be le bana, o ka botšiša gore, “Na o nagana gore Modimo wa rena yo lerato o be a ka bea melao bakeng sa go re amoga lethabo bophelong? Goba na o nagana gore melao ya gagwe e beetšwe go re thabiša le go re šireletša?” (Psalme 119:1, 2; Jesaya 48:17) Fatolla seo ngwana wa gago a se naganago ka taba ye. Ke moka o ka lebiša tlhokomelo mehlaleng ya kamoo dikopano tša botona le botshadi tše di gobogilego di ilego tša feleletša ka manyami le mathata. (2 Samuele 13:1-33) Ka go boledišana le ngwana wa gago e le gore a kwešiše a be a amogele pono ya Modimo, o tla ba o dirile mo gontši tabeng ya go tsenya monagano wa Modimo ka gare ga gagwe. Lega go le bjalo, go na le selo se sengwe seo o ka se dirago.
13. Ngwana a ka tutueletšega kudu go kwa Jehofa ge e ba a kwešiša’ng?
13 Ka bohlale, o tla ruta ngwana wa gago e sego feela ditla-morago tša go se theetše Jehofa eupša gape o tla mo hlalosetša kamoo tsela ya rena ya bophelo e kgomago Jehofa ka gona. Bontšha ngwana wa gago go tšwa Beibeleng gore re ka kweša Jehofa bohloko ge re palelwa ke go dira thato ya gagwe. (Psalme 78:41) O ka botšiša gore, “Ke ka baka la’ng o sa nyake go kweša Jehofa bohloko?” gomme wa hlalosa gore: “Lenaba la Modimo e lego Sathane le bolela gore re hlankela Jehofa ka mabaka a boithati e sego ka gobane re mo rata.” Ke moka hlalosa gore Jobo o ile a thabiša pelo ya Modimo ka go dula a botega, ka go rialo a nea Sathane karabo tatofatšong ya gagwe ya maaka. (Jobo 1:9-11; 27:5) Ngwana wa gago o swanetše go kwešiša gore a ka nyamiša Jehofa goba a mo thabiša go ithekgile ka tsela yeo a itshwarago ka yona. (Diema 27:11) Ngwana a ka rutwa thuto ye le tše dingwe tše dintši tša bohlokwa go dirišwa puku ya Ithute go Morutiši yo Mogolo. *
Mafelelo a Kgotsofatšago
14, 15. (a) Ke dithuto dife tšeo di lego ka pukung ya Morutiši tšeo di tutueditšego bana? (b) Ke mafelelo afe a mabotse ao o bilego le ona ge o diriša puku ye? (Bona gape le lepokisi leo le lego go matlakala 18-19.)
14 Rakgolo yo mongwe kua Croatia yo a balago puku ya Morutiši le setlogolo sa gagwe sa nywaga e šupago o ngwadile gore mošemane o mmoditše se se latelago, o itše: “Mma o mpoditše gore ke dire selo se sengwe, eupša ke be ke sa nyake go se dira. Ke moka ke ile ka gopola kgaolo e rego ‘Go kwa go a go Šireletša,’ ka gona ke ile ka boela go yena gomme ka mmotša gore ke tla mo kwa.” Banyalani ba bangwe ba kua Florida ba boletše mabapi le kgaolo e rego “Lebaka Leo ka Lona re sa Swanelago go Bolela Maaka,” gore: “E botšiša dipotšišo tšeo di kgothaletšago bana gore ba ntšhe sa mafahleng gomme ba dumele diphošo tšeo ge e le gabotse ba bego ba ka se dumele gore ba di dirile.”
15 Puku ya Morutiši e na le diswantšho tša ka godimo ga tše 230, gomme go na le dihlogwana, goba mengwalo ye e hlalosago seswantšho se sengwe le se sengwe goba sehlopha sa diswantšho. Mma yo mongwe yo a lebogago kudu o itše: “Gantši morwa wa-ka o dula a tsepeletše diswantšho gomme ga a nyake gore re phetle letlakala. Ga se feela gore diswantšho tše di a gogela eupša gape di ruta dithuto goba bonyenyane di dira gore bana ba botšiše dipotšišo. Morwa wa-ka o ile a botšiša mabapi le seswantšho seo go sona ngwana a lebeletšego thelebišene ka phapošing ya lefsifsi gore, ‘Mma, mošemane yo o dira’ng?’ ka segalo seo se bego se bontšha gore o be a tseba gore go na le selo se itšego se se fošagetšego.” Mongwalo wo o hlalosago seswantšho o balega ka gore: “Ke mang yo a kgonago go bona dilo ka moka tšeo re di dirago?”
Thuto ya Bohlokwa Lehono
16. Ke selo sefe sa bohlokwa seo bana ba swanetšego go rutwa sona lehono, gomme ka baka la’ng?
16 Bana ba swanetše go tseba tsela e nepagetšego le e fošagetšego ya go diriša ditho tša bona tša mmele tša ka sephiring. Lega go le bjalo, go bolela ka se ga go bonolo ka dinako tšohle. Mongwadi yo mongwe wa kuranta o boletše gore o gotše mehleng yeo go dirišwa ga mantšu ao a bego a bolela ka ditho tša pelego go bego go lebelelwa e le go hloka tlhompho. O boletše mabapi le go ruta bana ba gagwe gore: “Ke tla swanelwa ke go fenya dihlong tšeo ke nago le tšona.” Ke therešo gore ge batswadi ba lesa go bolela ka taba ya dikopano tša botona le botshadi ka baka la go lewa ke dihlong, se ga se šireletše ngwana. Batho bao ba gobošago ba bangwe ka dikopano tša botona le botshadi ba ikhola ka go se tsebe ga ngwana. Puku ya Ithute go Morutiši yo Mogolo e ahla-ahla taba ye ka tsela e agago le e hlomphegago. Go tsebiša bana ka dikopano tša botona le botshadi ga go ba amoge boemo bja bona bja bohlweki, mola go palelwa ke go dira bjalo go ka feleletša ka gore ba lahlegelwe ke bjona.
17. Puku ya Morutiši e thuša batswadi bjang go ruta bana ba bona ka dikopano tša botona le botshadi?
17 Go kgaolo 10, ge go bolelwa ka barongwa ba kgopo bao ba ilego ba tla lefaseng gomme ba ba le bana, ngwana o botšišwa gore: “O tseba’ng ka dikopano tša botona le botshadi?” Puku ye e nea karabo e bonolo le e hlomphegago. Ka morago, kgaolo 32 e hlalosa kamoo bana ba šireletšwago ka gona bathong bao ba gobošago ba bangwe ka dikopano tša botona le botshadi. Mangwalo a mantši a begile gore thuto e bjalo ke ya bohlokwa. Yo mongwe o itše: “Bekeng ya go feta ge morwa wa-ka e lego Javan a be a ile ngakeng ya gagwe ya malwetši a bana, ngaka e ile ya botšiša ge e ba re šetše re boledišane le yena mabapi le tsela e swanetšego ya go diriša ditho tša mmele tša ka sephiring. E ile ya kgahlwa kudu ke gore re dirile se re diriša puku ya rena e mpsha.”
18. Puku ya Morutiši e hlalosa bjang taba ya go khunamela dika tša setšhaba?
18 Kgaolo e nngwe e ahla-ahla pego ya Beibele ya bafsa ba bararo ba ba-Hebere e lego Sadirake, Mesake le Abedinego, bao ba ilego ba gana go khunamela seswantšho seo se bego se emela Mmušo wa Babele. (Daniele 3:1-30) Ba bangwe ba ka no se bone tswalano magareng ga go khunamela seswantšho le go dumediša folaga, go etša kamoo puku ye ya Morutiši e bontšhago ka gona. Lega go le bjalo, ela hloko seo mongwadi e lego Edward Gaffney a ilego a se bolela poledišanong ya gagwe le ba makasine wa U.S. Catholic. O boletše gore ka morago ga letšatši la pele morwedi wa gagwe a le sekolong sa mmušo o ile a mmotša gore o ithutile “thapelo e mpsha sekolong,” gomme o ile a mo kgopela gore a e boeletše. Gaffney o itše: “O ile a bea seatla sa gagwe pelong gomme ka boikgogomošo a thoma gore, ‘ke holofetša go ineela go folaga . . . ’” Gaffney o tšwetše pele ka gore: “Kapejana, ke ile ka kwešiša selo se sengwe. Dihlatse tša Jehofa di be di nepile. Go na le sebopego se sengwe sa borapedi bja setšhaba seo se kgothaletšwago dikolong tša rena go tloga baneng ba nywaga ya tlase kudu—potego e sa kwanantšhego ka mo go sa belaetšego e le ruri.”
Go Swanelwa ke Maiteko ka Moka
19. Ke meputso efe yeo e tlišwago ke go ruta bana?
19 Ke therešo gore go ruta bana ba gago go swanelwa ke maiteko a gago ka moka. Mma yo mongwe wa kua Kansas, U.S.A., o ile a sekiša megokgo ka morago ga go amogela lengwalo le le tšwago go morwa wa gagwe. O ngwadile gore: “Ke ikwa ke le mahlatse kudu gore ke godišitšwe ka tsela yeo e ilego ya nthuša gore ke be yo a tsepamego maikwelong le yo a leka-lekanego. Wena le tate le tloga le swanetše go retwa.” (Diema 31:28) Ithute go Morutiši yo Mogolo e ka thuša batswadi ba bangwe ba bantši gore ba rute bana ba bona e le gore ba šireletše bohwa bjo bjo bohlokwa.
20. Batswadi ba swanetše go dula ba gopola’ng, gomme seo se swanetše go ba kgoma bjang?
20 Bana ba rena ba swanelwa ke nako, tlhokomelo gotee le maiteko ka moka ao re ka ba neago ona. Ke ba banyenyane ka nakwana feela. Diriša sebaka se sengwe le se sengwe ka mo go holago bakeng sa go ba le bona gotee le go ba thuša. O ka se ke wa itshola le ka mohla. Mafelelong ba tla go rata. Ka mehla, gopola gore bana ba gago ke mpho yeo o e neilwego ke Modimo. Ke bohwa bjo bohlokwa gakaakang! (Psalme 127:3-5) Ka gona, ba sware bjalo ka bohwa, bjalo ka ge eka o ikarabela go Modimo bakeng sa tsela yeo o ba godišago ka yona ka gobane therešo ke gore o a ikarabela.
[Mongwalo wa ka tlase]
^ ser. 13 E gatišitšwe ke Dihlatse tša Jehofa. Bona kgaolo 40 e rego, “Kamoo o ka Thabišago Modimo ka Gona.”
O tla Araba Bjang?
• Ke ka baka la’ng batswadi ka mo go kgethegilego ba swanetše go šireletša bana ba bona gona bjale?
• Ke thuto ya mohuta ofe yeo e rutago motho bohlale?
• Ke ditaba dife tša bohlokwa tšeo o swanetšego go boledišana le bana ba gago ka tšona lehono?
• Puku ya Morutiši e thušitše batswadi bjang gore ba rute bana ba bona?
[Dipotšišo tša Thuto]
[Lepokisi/Diswantšho go letlakala 18, 19]
Puku ya Batho ka Moka
Puku ya Ithute go Morutiši yo Mogolo e hlametšwe go thuša batswadi goba batho ba bangwe ba bagolo go bala le go boledišana le bana ka dithuto tša Jesu Kriste. Lega go le bjalo, batho ba bagolo bao ba ipaletšego puku ye ka bobona ba ile ba leboga ka go tšwa pelong seo ba ithutilego sona.
Monna wa kua Texas, U.S.A., o itše: “[Puku ya] Ithute go Morutiši yo Mogolo ke e tutuetšago ka go ba ga yona e bonolo, gomme e re tutuetša ka moka—gaešita le motho wa nywaga e 76, go etša nna. Go tšwa go nna ke hlanketšego Jehofa go tloga bofseng, ke re malebo e le ruri.”
Mmadi yo mongwe wa kua London, Engelane, o a bega: “Diswantšho tša yona tše dibotse ka ntle le pelaelo di tla kgoma dipelo tša batswadi le bana ka mo go swanago. Dipotšišo tša yona le tsela yeo e beakantšwego ka yona di a kgahliša, gomme ke mo go kgahlišago gakaakang go bona ditaba tšeo go lego thata go bolela ka tšona di ahla-ahlwa, go etša go kgaolo 32 yeo e rego, ‘Kamoo Jesu a Ilego a Šireletšwa ka Gona.’” O phethile ka gore: “Gaešita le ge go se pelaelo gore puku ye e hlamilwe go nagannwe kudu ka bana ba Dihlatse tša Jehofa, ke akanya gore barutiši gotee le batho ba bangwe le bona ba tla thabela e le ruri go ikhweletša kopi. Ke lebeletše pele go e dirišeng dikgweding le nywageng e letšego ka pele.”
Mosadi yo mongwe wa kua Massachusetts, U.S.A., o ile a bolela ka “diswantšho [tše dintši] tše di naganišišitšwego gabotse.” O ngwadile gore: “Ke hlokometše gore gaešita le ge puku ye e hlametšwe bana, ditaba tšeo e di ahla-ahlago di ka thuša le rena batho ba bagolo go naganišiša ka tswalano ya rena ya motho ka noši le Jehofa.”
Mosadi yo mongwe wa kua Maine, U.S.A., o ile a kgotsa ka gore: “A puku e botse gakaakang! Ga se ya bana feela eupša ke ya rena ka moka bjalo ka bana ba Modimo. E tloga e nkgomile bogare-gareng bja pelo, ya tsoša maikwelo a-ka ya ba ya nkhomotša, gomme ka ba le khutšo. Ke ikwa ke le kgaufsi kudu le Jehofa bjalo ka Tate. O tlošitše bohloko ka moka bjoo ke bilego le bjona nywageng ye ka moka gomme a dira gore morero wa gagwe o be molaleng.” O phethile ka gore: “Ke re go motho yo mongwe le yo mongwe, ‘Hle e bale.’”
Mosadi yo mongwe wa kua Kyoto, Japane, o begile gore ge a be a balela ditlogolwana tša gagwe, di be di mmotšiša dipotšišo tše bjalo ka tše di rego: “‘Mošemane yola o dira’ng? Ke ka baka la’ng ngwanenyana yo o monyenyane a kgalemelwa? Mma yo yena o dira’ng? Go thwe’ng ka tau ye?’ E ruta ka dilo tšeo re di kgahlegelago, ka gona ke e rata kudu go feta puku le ge e le efe yeo nka e hwetšago bokgobapukung.”
Tate yo mongwe wa kua Calgary, Canada, o re kapejana ka morago ga go hwetša puku ye, o ile a thoma go e balela morwedi wa gagwe wa nywaga e tshela le morwa wa gagwe wa nywaga e senyane. O bega gore: “Gatee-tee ba ile ba arabela ka tsela e kgahlišago. Bana ba-ka ba be ba theetša ka kelohloko gomme ba araba dipotšišo go tšwa pelong. Ba ile ba ikwa ba akaretšwa thutong gomme se sa ba nea sebaka sa go ntšha sa mafahleng. Ga bjale ba tletše phišego gomme morwedi wa-ka o re o nyaka go ithuta puku ye e mpsha bošego bjo bongwe le bjo bongwe.”
Ka morago ga thuto e nngwe, tate o itše: “Nna le morwa wa-ka re ile ra boledišana ka nako e telele ka Jehofa le ka merero ya gagwe. O be a e-na le dipotšišo tše dintši tše di tšwago tabeng yeo e lego pukung. Mahlo a-ka a ile a seka megokgo ge a be a laelana le nna bošegong bjoo gomme a kgopela ka gore: ‘Na re ka buša re dira se gape, Tate? Ke na le dipotšišo tše dintši kudu gomme ke nyaka go tseba selo se sengwe le se sengwe ka Jehofa.’”
[Seswantšho go letlakala 15]
Batswadi, le ka ithuta’ng mohlaleng wa Manoa?
[Seswantšho go letlakala 16]
Bana, le ka ithuta’ng mohlaleng wa ba-Hebere ba bararo?
[Diswantšho go letlakala 17]
Diswantšho gotee le mengwalo yeo e hlalosago diswantšho yeo e lego ka pukung ya “Morutiši” ke didirišwa tše matla tša go ruta
Ke maaka afe ao Anania a ilego a a botša Petro?
Ke mang yo a kgonago go bona dilo ka moka tšeo re di dirago?