Dipotšišo tše Tšwago go Babadi

Na Mokriste o swanetše go nea mohlankedi wa mmušo tšhelete goba mpho bakeng ditirelo tša gagwe, goba na seo se ka lebelelwa e le letsogo-le-kobong?

Bakriste ba tsoma go bonagatša bohlale bjo bo šomago ge ba lebeletšana le maemo a moo ba dulago gona, ba gopola gore selo se se amogelegago le seo se lego molaong nageng e nngwe se ka no se amogelwe ka mo go feletšego le go se be molaong nageng e nngwe. (Diema 2:6-9 ) Go ba gona, Mokriste o swanetše go dula a gopola gore mang le mang yo a nyakago go ‘dula ngwakong wa Jehofa’ o swanetše go phema letsogo-le-kobong.—Psalme 15:1, 5; Diema 17:23.

Letsogo-le-kobong ke eng? Go ya ka The World Book Encyclopedia, “letsogo-le-kobong ke go nea selo se itšego se se nago le mohola . . . go motho yo a hlankelago setšhaba, yo ka morago a tlago go dira se se sa dumelelanego le mošomo wa gagwe goba go roba molao bakeng sa go hola monei.” Ka gona, go sa šetšwe moo motho a dulago gona, ke letsogo-le-kobong go nea moahlodi goba lephodisa tšhelete goba mpho bakeng sa gore toka e se ke ya phethwa goba go di nea mohlahlobi e le gore a tshediše phošo mahlo le go hlokomologa go tshelwa ga molao. Le gona, go diriša mpho bakeng sa go swarwa ka tsela e kgethegilego, e bjalo ka go bewa boemong bja pele lenaneong la bao ba letetšego go thušwa goba go tsenelela ba bangwe mothalading ke letsogo-le-kobong. Le gona, tiro e bjalo e tla utolla go hloka lerato.—Mateo 7:12; 22:39.

Lega go le bjalo, na ke letsogo-le-kobong go nea mohlankedi wa setšhaba mpho goba tšhelete bakeng sa gore o hwetše tirelo ya molao goba gore o pheme go swarwa gampe? Ka mohlala, dinageng tše dingwe bahlankedi ba mmušo ba ka gana go ngwadiša bana sekolong, go amogela motho sepetlele goba go saena dipampiri tša bofaladi pele ga ge ba ka hwetša tšhelete. Goba ba ka diega go šomana le dikgopelo tša go mpshafatša mangwalo a tumelelo.

Mekgwa ya go nea batho tšhelete ya ditebogo le boemo bja kgopolo bja batho ka kakaretšo mekgweng ye, di fapana go ya ka dinaga. Moo ditefo tše bjalo di tlwaelegilego goba di letetšwego, Bakriste ba bangwe ba ka ikwa ba sa tshele molao wa Beibele ge ba nea mohlankedi tšhelete bakeng sa gore a dire mošomo wa gagwe ge feela se se sa robe molao. Dinageng tše dingwe batho ba ka ba ba lebelela ditefo tše bjalo e le mpho ya go tlaleletša mogolo wo mohlomongwe e lego o monyenyane wa mohlankedi wa setšhaba. Dula o gopola gore go na le phapano magareng ga go nea mpho bakeng sa tirelo yeo e dumelelwago ke molao le go nea letsogo-le-kobong bakeng sa tirelo e sa dumelelwego ke molao.

Ka lehlakoreng le lengwe, Dihlatse tše dingwe tša Jehofa di ile tša gana go nea bahlahlobi, bahlankedi ba lekgetho goba batho ba bangwe tšhelete, ešita le mafelong ao go wona dimpho tše bjalo di tlwaelegilego. Ka ge Dihlatse di tsebja tikologong ya gabo tšona ka go ba tšeo di hlahlwago kudu ke letswalo le ka potego ya tšona, ka dinako tše dingwe di swarwa ka tsela yeo batho ba bantši ba swarwago ka yona ge feela ba ntšha tšhelete.—Diema 10:9; Mateo 5:16.

Ka bokopana, mohlanka yo mongwe le yo mongwe wa Jehofa o swanetše go itirela phetho ya ge e ba a tla ntšha tšhelete bakeng sa go hwetša tirelo yeo e dumelelwago ke molao goba go phema go se swarwe gabotse. Ka godimo ga tšohle, o swanetše go phegelela tsela yeo e tlago go mo tlogela a e-na le letswalo le lebotse, ye e sa tlišego kgobošo leineng la Jehofa le ye e sa kgopišego ba bangwe.—Mateo 6:9; 1 Ba-Korinthe 10:31-33; 2 Ba-Korinthe 6:3; 1 Timotheo 1:5.