Mo-Afrika yo a Ikokobeditšego yo a Bego a Rata Lentšu la Modimo

BAENG ba ba etelago Afrika gantši ba makatšwa ke gore go bonolo go thoma poledišano ka ditaba tša Beibele le batho ba tikologong yeo. Batho ba theetša gabonolo dipotšišo tše bjalo ka tše di rego, “Mmušo wa Modimo ke eng?” goba “Na go na le tharollo ya sa ruri ya mathata a go swana le go hlaela ga dijo, bolwetši, ntwa le bosenyi?” Ba bantši ba thabela gore moeng a ba bontšhe dikarabo go tšwa Beibeleng. Se gantši se lebiša thutong ya ka mehla ya Beibele. Le gona ge barutwana ba dira tšwelopele ya moya, e ba Bakriste ba ba kolobeditšwego.

Ka Beibeleng go Ditiro 8:26-40 go bolelwa ka yo mongwe wa ma-Afrika a pele ao a ilego a arabela ka tsela yeo. E be e le monna wa Ethiopia yo a bego a le leetong la go ya Jerusalema go yo rapela Modimo wa therešo e lego Jehofa.

Go etša ge go bontšhitšwe seswantšhong se se lego ka mo tlase, monna wa Ethiopia o boela gae ka karikana ya gagwe, gomme o bala mangwalo a go phuthwa. Motho yo a sa mo tsebego o a mmatamela gomme o mmotšiša gore: “Afa tše O di balaxo O a di kwa?” Monna wa Ethiopia ka boikokobetšo o dumela gore o nyaka thušo gomme o kgopela motho yo a sa mo tsebego, moebangedi wa Mokriste e lego Filipi, gore a namele ka karikaneng. Ke moka o kgopela Filipi gore a mo hlalosetše seo se bolelwago ke temana ya Lengwalo leo a sa tšwago go le bala. Filipi o hlalosa gore ke boporofeta bjo bo bolelago ka lehu leo le sa tšwago go direga la Mesia, e lego Jesu Kriste. Le gona Filipi o hlalosa dilo tše dingwe tše di tswalanago le “Ebangedi [“ditaba tše dibotse,” NW] ya Jesu,” gomme ka ntle le pelaelo o akaretša le tsogo ya Jesu.

Ka morago ga go kwa ditherešo tše tše di kgahlišago, mo-Ethiopia yo o nyaka go ba morutiwa wa Jesu gomme o botšiša gore: “Ke sa dibya ke’ng xo kolobetšwa?” Ka morago ga go kolobetšwa ga gagwe, mo-Afrika yo yo a ikokobeditšego o wela tsela ya go boela gae a thabile, gomme Beibele ga e sa bolela selo ka yena.

Lehono, Dihlatse tša Jehofa di thuša batho ba dimilione go dikologa lefase go ithuta ka “ditaba tše dibotse” tše di swanago le tše. Go swarwa dithuto tše di sa lefelelwego tša magae tša Beibele tše ka bago tše dimilione tše tshela.