Dipotšišo tše Tšwago go Babadi

Na moapostola Paulo ga se a ka a kwanantšha tumelo ya gagwe ya Bokriste ge a be a bolela pele ga lekgotla la Sanhedrine gore: “Nna ke mofarisei”?

Gore re kwešiše mantšu a Paulo a hwetšwago go Ditiro 23:6, re swanetše go ela hloko taba ye e a dikologilego.

Ka morago ga go hlaselwa ke lešaba la ba-Juda kua Jerusalema, Paulo o ile a bolela le lešaba. O boletše gore o ile a ‘golela Jerusalema e le morutiwa wa Gamaliele, a rutwa Molao wa bo-rakgolokhukhu’agwe ka go tia.’ Gaešita le ge lešaba le ile la theetša ka nakwana ge a be a ipolelela, mafelelong ge le be le thoma go galefa, molaodi wa bahlabani yo e lego mofelegetši o ile a iša Paulo mo bahlabani ba bego ba dula gona. Ge a be a le kgaufsi le go bethwa, Paulo o itše: “A Le dumeletšwe xo ôtla motho wa Mo-Rôma Lè sešo la mo sekiša?”—Ditiro 21:27–22:29.

Letšatšing le le latetšego, molaodi o ile a iša Paulo lekgotleng le le phagamego la ba-Juda la Sanhedrine. Paulo o ile a ba lebeledišiša gomme a bona gore lekgotla la Sanhedrine le be le bopša ke Basadutsei le Bafarisei. Ke moka o ile a bolela gore: “Nna ke mofarisei; ke morwa wa mofarisei. Ke bexwa ka xe ke holofetše xo tsoxa xa bahu.” Ka baka leo, go ile gwa tsoga ngangišano e kgolo magareng ga Bafarisei le Basadutsei, “xobane basadutsei ba re: Bahu xa ba tsoxe; xa xo Morongwa le xe e le Môya; bafarisei bôná ba êma ka la xo re, di xôna tšohle ka dipedi.” Ba bangwe bao e bego e le ba sehlopha sa Bafarisei ba ile ba bolela ba galefile gore: “Rena xa re bone bobe xo motho é.”—Ditiro 23:6-10.

Ka ge a be a tsebja e le Mokriste yo a fišegago kudu, Paulo o be a ka se kgodiše lekgotla la Sanhedrine gore e be e le Mofarisei yo mafolofolo. Bafarisei bao ba bego ba le gona ba be ba ka se amogele Mofarisei le ge e le ofe yo a bego a kwanantšha dithuto tša bona ka moka. Ka baka leo, mantšu a Paulo mabapi le go ba Mofarisei a ka ba a ile a ba le mo a felelago gona, le gona Bafarisei bao ba bego ba le gona ba swanetše go ba ba ile ba kwešiša mantšu a Paulo tabeng yeo.

Ge a be a bolela gore o be a ahlolwa ka baka la ge a e-na le kholofelo ya go tsošwa ga bahu, Paulo o ile a bontšha gabotse gore tabeng ye o be a le bjalo ka Bafarisei. Ngangišanong le ge e le efe mabapi le taba ye, Paulo o be a tla tsebja e le yo mongwe wa Bafarisei go e na le go tsebja e le yo mongwe wa Basadutsei, bao ba bego ba sa dumele tsogong.

Seo Paulo a bego a se dumela bjalo ka Mokriste se be se sa thulane le ditumelo tša Bafarisei ditabeng tše bjalo ka tsogo, barongwa le dintlha tše dingwe tša Molao. (Ba-Filipi 3:5) Ka gona, ditekanyetšong tše, Paulo o be a ka itswalanya le Bafarisei, le gona lekgotla la Sanhedrine le le bego le le gona le ile la kwešiša mantšu a gagwe ditekanyetšong tšeo. Ka gona o be a diriša setlogo sa gagwe gore a lebeletšane le lekgotla le le phagamego la ba-Juda leo le nago le kgethollo.

Lega go le bjalo, bohlatse bjo bogolo kudu bja gore Paulo ga se a ka a kwanantšha tumelo ya gagwe bo bonagala ge Jehofa a ile a tšwela pele a mo amogela. Bošegong bjo Paulo a ilego a bolela mantšu a re a ahla-ahlago, Jesu o itše: “Beta pelo! Xobane le kwa Rôma O tlo ba hlatse ya-ka byalo ka xe O nthlatsetše fá Jerusalêma.” Ka ge Paulo a ile a amogelwa ke Modimo, re swanetše go phetha ka gore Paulo ga se a ka a kwanantšha tumelo ya gagwe ya Bokriste.—Ditiro 23:11.