Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Lebaka la go kgethwa ga December 25 e le letšatši-kgwedi la go keteka matswalo a Jesu e be e le lefe?

Lentšu la Modimo ga le re nee letšatši-kgwedi la matswalo a Jesu. Enciclopedia Hispánica e bolela gore: “Go binwa ga letšatši-kgwedi la December 25 e le letšatši la Keresemose ga se gwa thewa ka go lebanya matswalong a Jesu, eupša go tšerwe menyanyeng yeo e dirilwego ya Bokriste ya letšatši la mafelelo la marega leo le bego le binwa kua Roma.” Ba-Roma ba bogologolo ba be ba binela go hlaba ga letšatši leratadimeng la marega ka go dira menyanya, meletlo le ka go neana dimpho.—12/15, matlakala 4-5.

• Na Ditiro 7:59 e bolela gore Stefano o ile a rapela Jesu?

Aowa. Beibele e bontšha gore thapelo e swanetše go lebišwa go Jehofa Modimo a nnoši. Go molaleng gore ge Stefano a bona Jesu ponong, o ile a ikwa a lokologile go ipiletša go yena ka go lebanya, ka gore: “Morêna Jesu! Amoxêla môya wa-ka.” Stefano o be a tseba gore Jesu o neilwe matla a go tsoša bahu. (Johane 5:27-29) Ka go rialo Stefano o ile a kgopela, goba go lopa, Jesu gore a šireletše matla a gagwe a bophelo go ba go fihla ge a tsošwa.—1/1, letlakala 31.

• Re tseba bjang gore pheletšo ya motho ga se ya rulaganywa e sa le pele?

Modimo o neile motho tokologo ya boikgethelo, yeo e sa akaretšego pheletšo yeo e rulagantšwego e sa le pele. Jehofa e be e tla ba yo a se nago lerato le yo a se nago toka ge nkabe a ile a rulaganyetša e sa le pele tsela yeo re tlago go sepela ka yona gomme a dira gore re ikarabele bakeng sa ditiro tša rena. (Doiteronomio 32:4; 1 Johane 4:8)—1/15, matlakala 4-5.

• Ke ka baka la’ng e be e tla ba mo go sa swanelago go bolela gore mehlolo ga e kgonege?

Ka go lemoga gore ba fo ba le karolo e nyenyane ya tsebo ya tša thutamahlale mabapi le dilo tše di kgahlišago tše di hwetšwago tlholong ya Modimo, bo-rathutamahlale ba bangwe ba dumela gore ba ka se sa hlwa ba bolela ka kgodišego gore go na le selo se se sa kgonegego. Ge e le gabotse, ba rata go bolela gore mohlomongwe se a kgonega.—2/15, matlakala 5-6.

• Ke ka baka la’ng Moahlodi Simisone a ile a botša batswadi ba gagwe gore o nyaka go tšea morwedi wa ba-Filisita gore e be mosadi wa gagwe? (Baahlodi 14:2)

Go nyala morapedi wa maaka go be go le kgahlanong le molao wa Modimo. (Ekisodo 34:11-16) Lega go le bjalo, mosadi yo wa mo-Filisita o be a ‘kgahlile’ Simisone. Simisone ‘o be a tsoma go hlohla ba-Filisita,’ ka gona o be a kgahlegela mosadi yo ka morero woo. Modimo o ile a thekga Simisone ka moya wa Gagwe. (Baahlodi 13:25; 14:3, 4, 6)—3/15, letlakala 26.

• Na Mokriste o swanetše go nea mohlankedi wa mmušo tšhelete goba mpho ya mohuta o itšego bakeng ditirelo tša gagwe?

Ke mo go fošagetšego go nea mohlankedi letsogo-le-kobong, go mo nea selo se itšego sa bohlokwa e le gore a dire selo se se sego molaong, gore toka e se ke ya phethwa goba gore o swarwe ka tsela e kgethegilego. Eupša ga se go nea letsogo-le-kobong ge o nea mohlankedi wa setšhaba tšhelete goba mpho e le ge a dira modiro wa gagwe goba a dira tirelo e lego molaong goba e le ge o phema go swarwa ka tsela e sa lokago.—4/1, letlakala 29.