Go Fenya ka Tsela e Kgethegilego

NA O lebeletšana le kganetšo tumelong ya gago—mohlomongwe mošomong, sekolong, ka lapeng, goba ka baka la dithibelo tšeo di beilwego ke Mmušo? Ge e ba go le bjalo, o se ke wa nolega moko. Dihlatse tše dintši tša Jehofa di ile tša lebeletšana le diteko tše swanago, eupša di ile tša fenya. Ela hloko mohlala wa Erna Ludolph.

Erna o belegetšwe kua Lübeck, Jeremane, ka 1908. E be e le yena feela yo a bego a hlankela Jehofa lapeng la gabo. Ge pušo ya Hitler e thoma go buša ka 1933, Dihlatse tša Jehofa di ile tša thoma go thatafalelwa ke bophelo. Bašomi-gotee le Erna ba ile ba mo goboša ka baka la go gana go dumediša ka tumedišo ya Hitler, gomme se se ile sa lebiša go golegweng ga gagwe ke ma-Nazi. O ile a fetša nywaga e seswai dikgolegong tše fapa-fapanego le dikampeng tša tshwenyo kua Hamburg-Fuhlsbüttel, Moringen, Lichtenburg le Ravensbrück. Nakong ya ge Erna a be a le Ravensbrück, go ile gwa direga selo se sengwe seo se ilego sa dira gore a fenye.

Mohlwekiši wa Ntlo wa Moswana-noši

Moprofesara Friedrich Holtz le mosadi wa gagwe Alice, ba be ba dula kua Berlin. E be e se ditho tša mokgatlo wa Nazi e bile ba be ba sa thekge dikgopolo tša wona. Lega go le bjalo, ba be ba tswalana le mohlankedi yo mogolo wa ma-SS yoo a bego a ikarabela ka bagolegwa ba itšego ba lego dikampeng tša tshwenyo. Ka gona, ge moprofesara le mosadi wa gagwe ba be ba nyaka mohlwekiši wa ntlo, molaodi yo wa ma-SS o ile a ba dumelela gore ba kgethe mogolegwa wa mosadi. Ka baka leo, ka March 1943, Alice o ile a etela Ravensbrück go tla go kgetha mohlwekiši wa ntlo. O ile a kgetha mang? Erna Ludolph. Erna o ile a hudugela lapeng la ga Holtz, leo le ilego la mo swara gabotse. Ka morago ga ge ntwa e fedile, o ile a huduga le lona lapa leo go ya Halle, yeo e bapilego le noka ya Saale. Ge a le moo, Erna o ile a thulana le kganetšo, mo nakong ye e le yeo e tšwago go babuši ba Masošalise ba Jeremane Bohlabela. Ka 1957 lapa la ga-Holtz le ile la romelwa Jeremane Bodikela, gomme Erna o ile a huduga le lona. Mafelelong, Erna o be a lokologile gore a ka phela go ya ka tumelo ya gagwe.

Ke bjang Erna a ilego a fenya ka tsela e kgethegilego? Ka baka la boitshwaro bjo bobotse bja Erna le bokgoni bja gagwe bja go bolela molaetša wa Beibele, Alice Holtz le bana ba gagwe ba bahlano ba ile ba fetoga Dihlatse tše kolobeditšwego tša Jehofa. Go oketša moo, ba 11 go ditlogolwana tša Alice le bona ke Dihlatse. Ba babedi ba bona ga bjale ba hlankela ofising ya lekala ya Dihlatse tša Jehofa kua Selters, Jeremane. Susanne, yo mongwe wa barwedi ba Alice, o re: “Lapa lešo le therešong kudu-kudu ka baka la mohlala wa Erna.” Kgotlelelo ya Erna e ile ya putswa kudu. Go thwe’ng ka boemo bja gago? Go kgotlelela ga gago ka potego tlase ga maemo a thata go ka ba le mafelelo a putsago ka mo go swanago. Ee, boitshwaro bjo bobotse le go dira boboledi ka bokgoni di ka go thuša gore o fenye ka tsela e kgethegilego. *

[Mongwalo wa ka tlase]

[Seswantšho go letlakala 31]

Erna Ludolph (yo a dutšego fase) le ditho tša lapa la ga-Holtz