Go Hlaga Kotsi

OWEN, e lego mošemane wa nywaga e mebedi le seripa, o be a bapala ga gabo ka phapošing ya go hlapela. O ile a kgona go namela godimo mo go nago le raka ya dihlare tša kalafo yeo batswadi ba gagwe ba bego ba dumela gore a ka se e fihlelele. Gare ga dilo tše di bego di le ka gare ga yona, o ile a hwetša lepotlelo leo le ilego la mo kgahla. O ile a le bula gomme a nwa seela seo se bego se le ka gare ga lona. Go ile gwa hlaga kotsi.

Lepotlelo le be le e-na le esiti ye e jago dilo, gomme ka manyami, Owen yo monyenyane o ile a hwa. Batswadi ba gagwe ba ile ba kwa bohloko kudu. Tatagwe e lego Percy o ile a yo tsoma khomotšo kerekeng ye a tsenago go yona. O ile a botšiša gore: “Ke ka baka la’ng se se diregile?” Moruti o ile a araba ka gore, “Modimo o be a nyaka morongwa yo mongwe yo monyenyane legodimong.” A nyamile kudu, motswadi yo a hwetšwego o ile a nagana gore se e tloga e se toka. Na ruri Modimo o ile a rera gore go hlage kotsi e bjalo? A ngenegile marapo, Percy o ile a phetha ka go tlogela go ya kerekeng ye a bego a tsena go yona.

A nagana ka seo se diregilego, Percy o ile a ipotšiša gore: ‘Na mošemanyana wa-ka o sa dutše a e-kwa bohloko? Na ke tla ka ka mmona gape?’

Mohlomongwe le wena o kile wa ipotšiša mabapi le seo se diregago lehung le ge e ba go tla kgonega gore re kopane gape nakong e tlago le baratiwa bao ba hwilego. Lentšu la Modimo e lego Beibele le nea dikarabo tša dipotšišo tše. Le na le dikarabo tše di kwagalago le tše di homotšago bakeng sa bohle bao ba ilego ba hlagelwa ke kotsi e swanago. Go feta moo, le utolla tebelelo e kgahlišago yeo Modimo a e holofeditšego—tsogo.

Hle bala sehlogo se se latelago gore o ithute mo go oketšegilego ka kholofelo ye e kgahlišago.