Go ba le Sebete ge o Lebeletšane le Kganetšo

LEŠABA le le galefilego le be le gapeleditše Gayo le Aristareko, e lego bagwera ba babedi ba Paulo, gore ba tsene ka lefelong la dipontšho la kua Efeso. Gona moo, lešaba le le galefilego le ile la tlatša mašata ka diiri tše pedi le re: “Diana wa Ba-Efeso ké e moxolo!” (Ditiro 19:28, 29, 34) Na bagwera ba Paulo ba ile ba ema ba tiile ge ba lebeletšane le kganetšo ye? Le gona ke’ng se se bakilego boemo bjo?

Paulo o be a dirile boboledi ka katlego motseng wa Efeso ka nywaga e ka bago e meraro. Ka baka leo, ba-Efeso ba bantši ba be ba kgaoditše go rapela medimo ya diswantšho. (Ditiro 19:26; 20:31) Modimo wa seswantšho yo a tlwaelegilego wa Efeso e be e le modingwana wa silifera e lego Diana, modimogadi wa pelego, yo tempele ya gagwe e botse e bego e okametše motse. Diswantšho tše tše dinyenyane tša medingwana ya tempeleng di be di rwalwa molaleng bjalo ka dipheko goba di be di bewa ka dintlong bakeng sa go kgabiša. Go ba gona, Bakriste ba be ba ka se reke medimo ye ya diswantšho.—1 Johane 5:21.

Demetrio, e lego yo mongwe wa barudi ba silifera, o be a dumela gore bodiredi bja Paulo bo wiša kgwebo ya bona ye e bušetšago kudu. Ka go bolela ditherešo tše di sa felelago le go feteletša dilo, o ile a kgodiša ditsebi-gotee le yena tša mediro ya diatla gore batho go dikologa Asia Minor ba be ba tla tlogela go rapela Diana. Gatee-tee ge barudi ba silifera bao ba galefilego ba be ba thoma go tlatša mašata ba reta Diana, go ile gwa tsoga moferefere gomme motse ka moka o ile wa hlakahlakana.—Ditiro 19:24-29.

Go be go bokane batho ba dikete ka lefelong la dipontšho, leo go lona go bego go ka lekana babogedi ba 25 000. Paulo o ile a ithapela go boledišana le lešaba le le le sa laolegego, eupša balaodi bao ba nago le bogwera ba ile ba mo kgodiša gore a se ke a bolela le lona. Mafelelong, mokgomana wa motse o ile a atlega go homotšeng lešaba, gomme Gayo le Aristareko ba ile ba ngwega ba sa gobatšwa.—Ditiro 19:35-40.

Lehono, batho ba Modimo le bona ba ka lebeletšana le baganetši gaešita le meferefere ge ba dutše ba tšwetša pele bodiredi bja bona. Gantši ba bolela ditaba tše dibotse metseng yeo go yona go nago le borapedi bja medimo ya diswantšho, boitshwaro bjo bo gobogilego le bathong bao ba se nago taba. Lega go le bjalo, ka sebete ba ekiša moapostola Paulo, yo a sa kago a ‘kgaotša go ruta phatlalatša le ka ntlo le ntlo’ motseng wa Efeso. (Ditiro 20:20, bapiša le NW.) Le gona ba a thaba ge ba bona gore ‘lentšu la Jehofa le tšwela pele le gola e bile le ata.’—Ditiro 19:20, bapiša le NW.

[Seswantšho go letlakala 30]

Marope a lefelo la dipontšho kua Efeso