Kamoo re ka Dirišago Letšatši le Lengwe le le Lengwe ka Tsela e Holago

“RE RUTÊ xo bala matšatši a rena, re fiwê pelo tše bohlale.” (Psalme 90:12) Ye e be e le thapelo e bontšhago boikokobetšo ya mongwadi wa Beibele e lego Moše. Ge e le gabotse o be a kgopela’ng? Na re swanetše go dira dikgopelo tša borapedi tše di swanago le tšeo?

Go temana ya 10, Moše o be a tshwentšwe ke taba ya gore nako ya bophelo bja motho ke e kopana. Tiragalong e nngwe, o begile mantšu a Jobo, yo a itšego: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:1) Go molaleng gore Moše o be a kwešitšwe bohloko ke go lemoga gore nako ya bophelo bja motho yo a sa phethagalago ke e kopana. Ka gona, o be a lebelela letšatši le lengwe le le lengwe la bophelo e le selo sa bohlokwa. Ge a lebiša kgopelo ye go Modimo, Moše o ile a hlalosa kganyogo ya gagwe ya go rata go phela matšatši a gagwe a šetšego ka bohlale, ka tsela yeo e tlago go thabiša Mmopi wa gagwe. Na le rena ga se ra swanela go nyaka go diriša matšatši a rena ka tsela e holago? Bjoo e tla ba boikemišetšo bja rena ge e ba re nyaka go amogelwa ke Modimo mo nakong ye.

Go be go e-na le taba e nngwe yeo e ilego ya tutuetša Moše le Jobo, taba yeo le rena e swanetšego go re tutuetša. Banna ba ba babedi bao ba boifago Modimo ba be ba lebeletše pele moputsong o tlago—go phela lefaseng maemong a kaone. (Jobo 14:14, 15; Ba-Hebere 11:26) Ge nako yeo e fihla, ga go yoo ditiro tša gagwe tše dibotse di tlago go fedišwa ke lehu. Mmopi wa rena o rera gore batho ba botegago ba tle ba phele ka mo go sa felego lefaseng la paradeise. (Jesaya 65:21-24; Kutollo 21:3, 4) Le wena tebelelo ye e ka ba ya gago ge e ba o ‘bala matšatši a gago ka tsela yeo e tlago go go nea pelo e bohlale.’