Kholofelo ya Tsogo—E Bolela’ng go Wena?
Kholofelo ya Tsogo—E Bolela’ng go Wena?
“O khupurolla ’atla sa xaxo, ’me ka moka tše di phelaxo O di horiša lethabô.”—PSALME 145:16.
1-3. Ke kholofelo efe ka bokamoso yeo ba bangwe ba nago le yona? Bontšha.
CHRISTOPHER wa nywaga e senyane le mogolo’agwe ba feditše nako ya mesong ba e na le malome wa bona, mogatša-malome wa bona le barwa ba babedi ba bona, ba sepela ka ntlo le ntlo bodireding bja bona bja Bokriste kgaufsi le Manchester, Engelane. Makasine wa rena wa Phafoga! o hlalositše se se diregilego. “Thapameng yeo ba ile ba tšea leeto ba le gotee la go yo bogela mafelo a kgahlišago kua Blackpool, lefelo la kgaufsi la maikhutšo leo le bapilego le lewatle. Batho ba 6 go ba 12 ba ile ba hwa le semeetseng kotsing ya koloi yeo e hlalositšwego ke maphodisa e le ‘polao ya molokwana-rite.’”
2 Bošegong bja pele ga kotsi ye, lapa le be le le Thutong ya Puku ya Phuthego, moo go ilego gwa boledišanwa ka taba ya lehu. Tatagwe o hlalosa gore: “Christopher ka mehla e be e le mošemane yo a naganišišago kudu. Bošegong bjoo, o boletše ka mo go kwagalago mabapi le lefase le lefsa le kholofelo ya gagwe ka bokamoso. Ke moka, ge poledišano ya rena e dutše e tšwela pele, Christopher kapejana o ile a re: ‘Selo se se kgahlišago mabapi le go ba yo mongwe wa Dihlatse tša Jehofa ke gore le ge lehu le re kweša bohloko, re a tseba gore re tla bonana gape lefaseng ka letšatši le lengwe.’ Ga go le o tee wa rena bao re bego re le gona yo a ilego a lemoga gore mantšu ao e be e tla ba a gopolegago gakaakang.” *
3 Nywageng e mentši pejana, ka 1940, Franz e lego Hlatse ya kua Austria, o be a tseba gore o tlo bolawa ka motšhene wa go kgaola hlogo ka baka la go gana ga gagwe go se botegele Jehofa. Franz o ngwaletše mmagwe a le kgolegong ya Berlin gore: “Ka seo ke bego ke se tseba, ge nkabe ke ile ka dira keno [ya tša bohlabani], ke be ke tla ba ke dirile sebe seo se swanetšwego ke lehu. E be e tla ba mo gobe go nna. Ke be nka se ke ka tsoga. . . . Bjale, mma yo a rategago le bana bešo ka moka le dikgaetšedi, lehono ke boditšwe kahlolo ya-ka, gomme le se ke la tšhoga, ke lehu, gomme ke tla bolawa gosasa mesong. Ke na le matla ao a tšwago go Modimo, ona ao ka mehla Bakriste ka moka ba therešo mehleng ya morago e fetilego ba bego ba e-na le ona. . . . Ge e ba le tla ema le tiile go fihla lehung, re tla gahlana gape tsogong. . . . Go fihlela re gahlana gape.” *
4. Diphihlelo tšeo di boletšwego mo di go kgoma bjang, gomme ke’ng seo re tlago go se ahla-ahla?
4 Kholofelo ya tsogo e be e bolela mo gontši go Christopher le Franz. E be e le ya kgonthe go bona. Ke therešo gore dipego tše di re kgoma pelo! E le gore re godiše tebogo ya rena ya go leboga Jehofa le go matlafatša kholofelo ya rena tsogong, anke re ahla-ahleng lebaka leo ka lona tsogo e tlago go direga le kamoo e swanetšego go re kgoma ka gona re le motho ka noši.
Pono Mabapi le Tsogo ya Lefaseng
5, 6. Pono yeo e begilwego ke moapostola Johane go Kutollo 20:12, 13 e utolla’ng?
5 Ponong ya ditiragalo tšeo di tlago go direga nakong ya Pušo ya Kriste Jesu ya Nywaga e Sekete, moapostola Johane o bone tsogo ya lefaseng e direga. O begile gore: “Ka bôna bahu . . . ba banyane le ba baxolo. . . . Xomme lewatlê la nthša bahu ba lôna; le lehu, le bo-dula-bahu [“Hades,” NW] tša nthša bahu ba xo tšôna. Bohle ba sekišwa xò iwa ka medirô ya bôná.” (Kutollo 20:12, 13) Go sa šetšwe maemo a bona—e ka ba “ba baxolo” goba “ba banyane”—bao ka moka ba golegilwego kua Hades (Sheol), e lego bodula-bahu, ba tla lokollwa. Bao ba lahlegetšwego ke maphelo a bona lewatleng le bona ba tla boela ba phela ka nako yeo. Tiragalo ye e kgahlišago ke karolo ya morero wa Jehofa.
6 Pušo ya Kriste ya nywaga e sekete e thoma ka go tlengwa ga Sathane le go lahlelwa ga gagwe sekoting. Ga go na le o tee wa bao ba tsošitšwego goba mophologi le ge e le ofe wa baphologi ba masetla-pelo a magolo yo a tlago go arošwa ke Sathane nakong ya pušo yeo, ka gobane o tla ba a sa kgone go dira selo. (Kutollo 20:1-3) Nywaga e sekete go wena e ka bonagala e le nako e telele, eupša ge e le gabotse, Jehofa o e lebelela e le “letšatši le tee.”—2 Petro 3:8.
7. Ke’ng seo se tla dirišwago e le motheo wa kahlolo nakong ya Pušo ya Kriste ya Nywaga e Sekete?
7 Go ya ka pono ye, Pušo ya Kriste ya Nywaga e Sekete e tla ba nako ya kahlolo. Moapostola Johane o ngwadile gore: “Ka bôna bahu bà eme pele xa Modimo, ba banyane le ba baxolo. Xwa phutollwa mangwalô; xwa bulwa le lengwê e lexo Puku ya Bophelô. Bahu ba sekišwa ka tše di ngwadilwexo mangwalong, xò iwa ka medirô ya bôná. . . . Bohle ba sekišwa xò iwa ka medirô ya bôná.” (Kutollo 20:12, 13) Ela hloko gore motheo wa kahlolo ye ga se seo motho a se dirilego goba seo a sego a se dira pele a e-hwa. (Ba-Roma 6:7) Go e na le moo, kahlolo ye e tswalanywa le “mangwalô” ao a tlago go phuthollwa. Ditiro tšeo motho a di dirilego ka morago ga go ithuta dikagare tša mangwalo e tla ba motheo wo o dirišwago bakeng sa go tseba ge e ba leina la gagwe le ngwadilwe ka ‘pukung ya bophelo.’
Go ‘Tsogela go Phela’ Goba go ‘Tsogela go Lahlwa’
8. Ke dilo dife tše pedi tšeo di ka diragalelago bao ba tsošitšwego?
8 Pejana ponong ya Johane, Jesu o hlalositšwe e le yo a nago le “dikxonyu tša bo-dula-bahu le tša lehu.” (Kutollo 1:18) O hlankela e le “Mong ’a bophelô” yo Jehofa a mo neilego matla a gore a ahlole “ba ba phelaxo le ba ba hwilexo.” (Ditiro 3:15; 2 Timotheo 4:1) O tla dira se bjang? Ka go tsoša bao ba robetšego lehung. Jesu o ile a botša mašaba ao a bego a dira boboledi go ona gore: “Di se kê tša Le tlaba; xobane xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa.” Ke moka a oketša ka gore: “Ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.” (Johane 5:28-30) Ka gona, ke bokamoso bofe bjoo bo letetšego banna gotee le basadi ba ba botegago ba mehleng ya bogologolo?
9. (a) Ka ntle le pelaelo, ba bantši bao ba tsogago ba tla ithuta’ng? (b) Ke modiro ofe o mogolo wa go ruta woo o tlago go dirwa?
9 Ge batho ba bao ba botegago ba bogologolo ba tsoga, go se go ye kae ba tla lemoga gore dikholofetšo tšeo ba bego ba di holofetše, mo nakong ye di a phethagala. Ba tla thabela gakaakang go tseba yo e lego Peu ya mosadi wa Modimo, yo go boletšwego ka yena boporofeteng bja mathomo bja Beibele go Genesi 3:15! Ba tla thabišwa gakaakang ke go kwa gore Mesia yo yo a holofeditšwego e lego Jesu, o ipontšhitše a botega go fihla lehung, gomme ka go rialo a neela bophelo bja gagwe e le sehlabelo sa topollo! (Mateo 20:28) Bao ba ba amogelago gape bophelong ba tla thabišwa kudu ke go ba thuša go kwešiša gore tokišetšo ye ya topollo ke ponagatšo ya botho bja Jehofa bjo bo sa swanelago le kgaugelo ya gagwe. Ge bao ba tsošitšwego ba lemoga seo Mmušo wa Modimo o se fihlelelago ka go phetha morero wa Jehofa ka lefase, dipelo tša bona ka ntle le pelaelo di tla tlala ka mantšu a theto a yago go Jehofa. Ba tla ba le nako e ntši ya go bontšha lerato la bona go Tatago bona yo lerato wa legodimong le go Morwa wa gagwe. Yo mongwe le yo mongwe yo a tla bago a phela ka nako yeo o tla thabela go tšea karolo modirong o mogolo wa go ruta wo o nyakegago bakeng sa go ruta ba dikete tše dimilione bao ba boago ba e-tšwa mabitleng, bao le bona ba tla swanelwago ke go amogela tokišetšo ya Modimo ya topollo.
10, 11. (a) Nywaga e Sekete e tla nea bohle bao ba lego lefaseng dibaka dife? (b) Se se swanetše go re kgoma bjang?
10 Aborahama yo a tsošitšwego o tla hwetša khomotšo e kgolo ka go phela bophelo bja kgonthe tlase ga pušo ya “motse” woo a bego a o letetše. (Ba-Hebere 11:10) Jobo yo a botegago wa bogologolo o tla thaba gakaakang ge a lemoga gore tsela ya gagwe ya bophelo e matlafaditše bahlanka ba bangwe ba Jehofa bao ba ilego ba lebeletšana le diteko tšeo di lekago potego ya bona! Le gona Daniele o tla fišegela gakaakang go tseba mabapi le go phethagala ga diporofeto tšeo a ilego a budulelwa gore a di ngwale!
11 Ka kgonthe, bohle bao ba hwetšago bophelo lefaseng le lefsa la go loka, e ka ba ka tsogo goba ka go phologa masetla-pelo a magolo, ba tla ithuta mo gontši ka morero wa Jehofa bakeng sa lefase le badudi ba lona. Tebelelo ya go phela ka mo go sa felego le go tumiša Jehofa ka mo go sa felego ruri e tla dira gore lenaneo la thuto la Nywaga e Sekete e be le le thabišago e le ka kgonthe. Lega go le bjalo, seo re se dirago re le batho ka o tee ka o tee ge re dutše re ithuta dikagare tša mangwalo e tla ba sona sa bohlokwa le go feta. Na re tla diriša seo re ithutago sona? Na re tla naganišiša le go diriša tsebišo ye ya bohlokwa yeo e tlago go re matlafatša e le gore re ganetše maiteko a Sathane a mafelelo a go leka go re aroša therešong?
12. Ke’ng seo se tlago go thuša yo mongwe le yo mongwe gore a tšee karolo ka mo go feletšego modirong wa go ruta le wa go fetola lefase ka moka gore e be paradeise?
12 Se se sa swanelwago go lebalwa ke ditšhegofatšo tše di kgahlišago tšeo di tlago go tlišwa ke go dirišwa ga mehola ya sehlabelo sa Kriste sa topollo. Bao ba bušeditšwego bophelong ka tsogo ba ka se ke ba ba le mehuta ya malwetši goba bogole bjoo ba nago le bjona ga bjale. (Jesaya 33:24) Mmele o phetšego gabotse le tebelelo ya boemo bjo bo phethagetšego bja tša maphelo di tla dumelela badudi ka moka ba lefaseng le lefsa gore ba tšee karolo ka mafolofolo modirong wa go ruta ba dikete tše dimilione bao ba tsošeditšwego tseleng ya bophelo. Le gona badudi bao ba tla tšea karolo modirong o mogolo o fetago mediro yohle yeo e kilego ya dirwa lefaseng—go fetola polanete ka moka gore e be paradeise bakeng sa go tumiša Jehofa.
13, 14. Morero wa go lokollwa ga Sathane bakeng sa teko ya mafelelo ke ofe, gomme mafelelo a rena e ka ba afe re le motho ka o tee ka o tee?
13 Ge Sathane a lokollwa sekoting bakeng sa teko ya mafelelo, o tla leka go aroša batho gape. Go ya ka Kutollo 20:7-9, ‘ditšhaba ka moka tše di arošitšwego,’ goba dihlopha tša batho, tšeo di lego ka tlase ga tutuetšo e kgopo ya Sathane di tla ahlolelwa phedišo: ‘Mollo wo o tšwago legodimong o tla di fediša.’ Phedišo ye e tla dira gore tsogo ya bao ba lego gare ga tšona bao ba tsošitšwego nakong ya Nywaga e Sekete e be ya go ahlolelwa go yo lahlwa. Ka mo go fapanego, babotegi bao ba tsošitšwego ba tla amogela mpho ya bophelo bjo bo sa felego. Ka kgonthe, tsogo ya bona e tla ba ya ‘go tsogela go phela.’—Johane 5:29.
14 Kholofelo ya tsogo e ka re homotša bjang gaešita le mo nakong ye? Ge e le gabotse, re swanetše go dira’ng e le go kgonthišetša gore re tla amogela mehola ya yona ya nakong e tlago?
Dithuto Tšeo re ka Ithutago Tšona ga Bjale
15. Go dumela tsogong go ka go thuša bjang gona bjale?
15 O ka ba o sa tšwa go lahlegelwa ke moratiwa wa gago lehung gomme o ka ba o lebeletšane le phetogo e kgolo yeo e bakwago ke tahlegelo e bjalo e kgolo. Kholofelo ya tsogo e go thuša gore o hwetše boiketlo bja ka gare gotee le matla ao bao ba sa tsebego therešo ba se nago ona. Paulo o kgothaditše ba-Thesalonika ka gore: “Xa ke rate xe Le hlôka tsebô tabeng ya ba ba ithôbaletšexo, xore Le se kê la hlokofala boka ba bangwê bao ba hlôkaxo kholofêlô.” (1 Ba-Thesalonika 4:13) Na o ipona o le lefaseng le lefsa, o bona batho ba tsoga? Ga bjale ikhomotše ka go naganišiša ka tebelelo ye ya go gahlana le baratiwa ba gago gape.
16. Maikwelo a gago e ka ba afe ge tsogo e direga?
16 Ga bjale o ka ba o tlaišwa mmeleng ke ditla-morago tša borabele bja Adama, tšeo mohlomongwe di lego ka tsela ya bolwetši bjo bo bolayago. O se ke wa dumelela kgateletšego yeo di go bakelago yona e go lebatša tebelelo e thabišago ye o nago le yona ya gore o tla tsoga gomme wa boela bophelong o na le boemo bjo bo tsošološitšwego bja tša maphelo le mafolofolo lefaseng le lefsa. Ke moka ge mahlo a gago a bulega gomme o bona batho bao ba thabilego bao ba fagahletšego go abelana le wena lethabo la bona tsogong ya gago, ka kgonthe o tla leboga Modimo bakeng sa botho bja gagwe bjo lerato.
17, 18. Ke dithuto dife tše pedi tša bohlokwa tšeo re swanetšego go di gopola?
17 Ge nako e dutše e e-ya, ela hloko dithuto tše pedi tšeo re swanetšego go di gopola. Ya pele ke bohlokwa bja tirelo ya pelo ka moka go Jehofa mo nakong ye. Ge re ekiša Mong wa rena e lego Kriste Jesu, bophelo bja rena bja boikgafo bo bontšha lerato la rena la go rata Jehofa le magagabo rena. Ge e ba kganetšo goba tlaišo e re amoga lethabo la rena goba tokologo ya rena, re phetha ka go dula re tiile tumelong go sa šetšwe diteko tšeo re ka lebeletšanago le tšona. Ge e ba baganetši ba re tšhošetša ka lehu, gona kholofelo ya tsogo e a re homotša e bile e a re matlafatša e le gore re dule re botegela Jehofa le Mmušo wa gagwe ka go se kwanantšhe. Ee, phišego ya rena ya go fišegela modiro wa go bolela ka Mmušo le wa go dira barutiwa e re thuša gore re hwetše ditšhegofatšo tša ka mo go sa felego tšeo Jehofa a di beetšego baloki.
18 Thuto ya bobedi e tswalana le kamoo re lebeletšanago ka gona le diteko tšeo di bakwago ke go se phethagale. Go tseba ga rena ka kholofelo ya tsogo le go leboga ga rena botho bja Jehofa bjo bo sa swanelago go matlafatša boikemišetšo bja rena bja gore re dule re tiile tumelong. Moapostola Johane o lemošitše ka gore: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:15-17) Kgoketšo ya lefase ya go rata dilo tše di bonagalago e ka se re kgahle kudu ge re e bapetša le “bophelô bya ruri.” (1 Timotheo 6:17-19) Ge e ba re lekega gore re itshware ka tsela e gobogilego, re tla gana ka go tia. Re a tseba gore ge re ka hwa pele ga Haramagedone, go tšwela pele re itshwara ka tsela e sa thabišego Jehofa go ka re bea boemong bjo bo swanago le bja bao ba se nago kholofelo ya tsogo.
19. Ke tokelo efe e kgolo yeo re sa swanelago go e lebala?
19 Ka godimo ga moo, le ka mohla ga se ra swanela go lebala tokelo e kgolo ya gore re thabiše pelo ya Jehofa ga bjale le ka mo go sa felego. (Diema 27:11) Go botega ga rena go fihla lehung goba go tšwela pele ga rena re botega go fihla bofelong bja tshepedišo ye e kgopo ya dilo go bontšha Jehofa gore re eme ka lehlakoreng la mang tabeng ya bogoši bja legohle. Ka nako yeo e tla ba mo go thabišago gakaakang go phela lefaseng la Paradeise mohlomongwe ka go phologa masetla-pelo a magolo goba ka go tsošwa ka tsela ya mohlolo!
Go Kgotsofatša Dinyakwa tša Rena
20, 21. Ke’ng seo se tla re thušago gore re dule re botega gaešita le ge re e-na le dipotšišo tšeo di sego tša arabja tša mabapi le tsogo? Hlalosa.
20 Go ahla-ahla ga rena taba ya tsogo go tlogela dipotšišo tše dingwe di se tša arabja. Jehofa o tla rulaganya ditaba bjang bakeng sa bao ge ba e-hwa ba bego ba nyetše goba ba nyetšwe? (Luka 20:34, 35) Na tsogo e tla direga lefelong leo batho ba hwetšego go lona? Na bao ba tsošitšwego ba tla boela bophelong kgaufsi le moo malapa a bona a dulago gona? Dipotšišo tše dingwe tše dintši tša mabapi le ditokišetšo tša tsogo ga se tša arabja. Lega go le bjalo, re swanetše go gopola mantšu a Jeremia a rego: “Morêna ó setša ba ba mmotilexo, le pelo ye e mo nyakaxo. Ké mo xo botse xe motho a hutša à ikhomoletše, a bá a hlakodišwa ke Morêna.” (Dillo tša Jeremia 3:25, 26) Jehofa ka nako ya gagwe yeo a e beilego, o tla re utollela dilo ka moka go fihlela re kgotsofala ka mo go feletšego. Ke ka baka la’ng re ka kgodišega ka se?
21 Nagana ka mantšu a buduletšwego a mopsalme ge a be a opela ka Jehofa gore: “O khupurolla ’atla sa xaxo, ’me ka moka tše di phelaxo O di horiša lethabô.” (Psalme 145:16) Ge re dutše re gola, dikganyogo tša rena di a fetoga. Seo re bego re se holofetše ge re be re sa le bana ga se seo re se kganyogago lehono. Tsela yeo re lebelelago bophelo ka yona e kgongwa ke seo re lebeletšanago le sona e bile e kgongwa ke dikholofelo tša rena. Lega go le bjalo, go sa šetšwe gore dikganyogo tša rena tše di swanetšego e tla ba e le dife lefaseng le lefsa, Jehofa ka kgonthe o tla di kgotsofatša.
22. Ke ka baka la’ng re e-na le lebaka le le kwagalago la go tumiša Jehofa?
22 Selo seo se tshwenyago yo mongwe le yo mongwe wa rena ga bjale ke gore re dule re botega. “Se tee se se nyakwaxo xo balaki, ké xore motho a bôtêxê.” (1 Ba-Korinthe 4:2) Re balaki ba ditaba tše dibotse tšeo di kgahlišago tša Mmušo wa Modimo. Phišego ya rena tabeng ya go tsebatša ditaba tše tše dibotse go bohle bao re gahlanago le bona e re thuša gore re tšwele pele re le tseleng e išago bophelong. O se ke wa hlokomologa taba ya gore “nako le ditiragalo tše di sa letelwago” di re wela bohle. (Mmoledi 9:11, NW) E le gore o fokotše dipelaelo le ge e le dife tše di sa nyakegego tšeo di bakwago ke go se kgonthišege bophelong, kgomarela ka go tia kholofelong ya gago e kgahlišago ya tsogo. Tseba gore ge e ba o bona eka o tla hwa pele Pušo ya Kriste ya Nywaga e Sekete e thoma, o ka ikhomotša ka kgonthišetšo ya gore kimollo e tla tla. Ka nako yeo Jehofa a e beilego, o tla kgona go boeletša mantšu ao Jobo a bego a a botša Mmopi a rego: “Wa tlo mpitša ka Xo arabêla.” Tumišo a e-ye go Jehofa, yo a hlologetšwego go bušetša bohle bao ba lego kgopolong ya gagwe bophelong!—Jobo 14:15.
[Mengwalo ya ka tlase]
^ ser. 2 Bona Phafoga! (ya Seisemane) ya July 8, 1988, letlakala 10, yeo e gatišitšwego ke Dihlatse tša Jehofa.
^ ser. 3 Dihlatse tša Jehofa—Bagoeledi ba Mmušo wa Modimo, letlakala 662, yeo e gatišitšwego ke Dihlatse tša Jehofa.
Na o a Gopola?
• Batho ba tla ahlolwa motheong ofe nakong ya Nywaga e Sekete?
• Ke ka baka la’ng ba bangwe ba tla ‘tsogela go phela’ gomme ba bangwe ba ‘tsogela go lahlwa’?
• Kholofelo ya tsogo e ka re homotša bjang mo nakong ye?
• Mantšu a Psalme 145:16 a re thuša bjang go lebeletšana le dipotšišo tšeo di sego tša arabja tša mabapi le tsogo?
[Dipotšišo tša Thuto]
[Diswantšho go letlakala 21]
Go dumela tsogong go ka re thuša bjang mo nakong ye?