Tsogo—Thuto Yeo e go Kgomago
Tsogo—Thuto Yeo e go Kgomago
“[Ke na le] kholofêlô ye ke holofetšexo Modimo ka yôna . . . ya xo re: Bahu ba tlo tsoxa, bohle, baloki le ba s’a lokaxo.”—DITIRO 24:15.
1. Ke ka tsela efe tsogo e ilego ya ba kgang lekgotleng la Sanhedrine?
MAFELELONG a leeto la gagwe la boraro la boromiwa ka 56 C.E., moapostola Paulo o be a le Jerusalema. Ka morago ga go golegwa ke ba-Roma, o ile a dumelelwa gore a tšwelele pele ga lekgotla le le phagamego la ba-Juda la Sanhedrine. (Ditiro 22:29, 30) Ge Paulo a be a lebelela batho bao e lego ditho tša lekgotla leo, o ile a lemoga gore ba bangwe e be e le Basadutsei gomme ba bangwe e le Bafarisei. Dihlopha tše tše pedi di be di fapana ka tsela e tee e lemogegago. Basadutsei ba be ba gana tsogo; Bafarisei ba be ba e amogela. E le go bontšha mo a emego gona tabeng yeo, Paulo o ile a bolela gore: “Nna ke mofarisei; ke morwa wa mofarisei. Ke bexwa ka xe ke holofetše xo tsoxa xa bahu.” Ka go bolela bjalo, o ile a gakantšha lekgotla!—Ditiro 23:6-9.
2. Ke ka baka la’ng Paulo a be a ikemišeditše go emela tumelo ya gagwe ya go dumela tsogong?
2 Nywageng e mentši pejana, ge a be a le tseleng ya go ya Damaseko, Paulo o ile a bona pono yeo go yona a ilego a kwa lentšu la Jesu. Paulo o ile a ba a botšiša Jesu gore: “O rata xe nka dira’ng?” Jesu o ile a araba ka gore: “Tsoxa O yê Damaseko; xôna-fao O tlo botšwa se O laetšwexo xo se dira.” Ge Paulo a fihla Damaseko, o ile a hwetšwa ke morutiwa yo a nago le thušo wa Mokriste e lego Anania, yo a ilego a hlalosa gore: “Modimo wa bô-tatawešo ó Xo swere ka seatla xore O tsebê thatô ya xaxwe, O bônê Yêna Moloki [Jesu yo a tsošitšwego], O kwê Lentšu la molomo wa xaxwe.” (Ditiro 22:6-16) Ka gona, ga go makatše gore Paulo o be a ikemišeditše go emela tumelo ya gagwe ya go dumela tsogong.—1 Petro 3:15.
Go Tsebatša Kholofelo ya Tsogo Phatlalatša
3, 4. Paulo o ile a itlhatsela bjang e le moemedi yo matla wa thuto ya tsogo, gomme re ka ithuta’ng mohlaleng wa gagwe?
3 Paulo ka morago o ile a tšwelela pele ga Mmušiši Felikisi. Tiragalong yeo, “monna e mongwê wa seboledi” e lego Teritulo, yo a ilego a bega taba yeo ba-Juda ba bego ba e-na le yona kgahlanong le Paulo, o ile a mo phara ka molato wa go ba moetapele wa sehlotswana sa bohlanogi le wa go lwantšha mmušo. Paulo ge a araba ka ntle le go dika-dika o ile a re: “Se ke sa se xanetšexo fá pele xa xaxo sé-sé: Ke dirêla Modimo wa bô-tata-wešo ka yôna tsela ye ba rexo ké bokxeloxi.” Ke moka, ge a bolela ka kgang ya motheo o ile a tšwela pele ka gore: “[Ke na le] kholofêlô ye ke holofetšexo Modimo ka yôna è le yôna ye le bôná ba naxo nayô’, ya xo re: Bahu ba tlo tsoxa, bohle, baloki le ba s’a lokaxo.”—Ditiro 23:23, 24; 24:1-8, 14, 15.
4 Nywageng e ka bago e mebedi ka morago, mohlatlami wa Felikisi e lego Porotio Fesito, o ile a laletša Kgoši Herode Agaripa gore a tlo mo tlatša tabeng ya go botšološiša mogolegwa Paulo. Fesito o ile a hlalosa gore balatofatši ba be ba ganetšana le taba ya Paulo ya gore “motho e mongwê e a hwilexo, yo ba rexo ké Jesu, . . . ó a phela.” Paulo ge a ikemela o ile a botšiša gore: “Modimo ó tsoša bahu, a ké taba ye e sa dumelwexo xo lena?” Ke moka o ile a bolela gore: “Ké xo thušwa ke Modimo xe lehono kè sa eme kè hlatsêla ba banyane le ba baxolo, kè sa bolele tše dingwê, xe e se tše baporofeta ba di boletšexo ba re di tlo ba xôna, le Mošê a r’yalo, xwa thwe: Kriste e tlo ba wa xo tlaišwa, wa xo tlo ba mo-êta-pele wa bahu ba tsoxaxo, wa xo tlo tsebatša seetša sethšabeng sa xešo le xo ba-ntlê.” (Ditiro 24:27; 25:13-22; 26:8, 22, 23) Ruri Paulo e be e tloga e le moemedi yo matla wa thuto ya tsogo! Go etša Paulo, le rena re ka tsebatša ka kgodišego gore tsogo e tla ba gona. Eupša re ka letela karabelo efe? Mohlomongwe e swanago le yeo Paulo a ilego a e hwetša.
5, 6. (a) Go emela ga baapostola thuto ya tsogo go ile gwa tsoša karabelo efe? (b) Selo sa bohlokwa ke sefe ge re dutše re bolela ka kholofelo ya rena tsogong?
5 Ela hloko seo se ilego sa direga pejana ga leeto la Paulo la bobedi la boromiwa (mo e ka bago ka 49-52 C.E.) ge a be a etile kua Athene. O ile a boledišana le batho bao ba bego ba dumela go medimo e mentši, gomme a ba kgothaletša gore ba ele hloko morero wa Modimo wa gore a ahlole lefase leo go agilwego go lona ka toka ka monna yoo A mo kgethilego. Monna yo e be e se yo mongwe ge e se Jesu. Paulo o ile a hlalosa gore Modimo o neile kgonthišetšo ya se ka go tsoša Jesu bahung. Batho ba ile ba arabela bjang? Re bala gore: “Xe ba e-kwa à bolêla tsoxô ya bahu, ba bangwê ba kwêra. Ba bangwê ba re: Re tlo buša rè Xo kwa ka mohla o mongwê tabeng yeo.”—Ditiro 17:29-32.
6 Karabelo yeo e be e swana le ye Petro le Johane ba ilego ba e hwetša nakwana ka morago ga Pentekoste ya 33 C.E. Le gona mo, Basadutsei ba ile ba kgatha tema e kgolo kganetšong ye. Ditiro 4:1-4 e hlalosa seo se diregilego ge e re: “Ya re bà sa bolêla le sethšaba, xwa fihla baperisita ba êma moo bà na le tona ya Ntlo-kxêthwa [“le Basadutsei,” NW], Ba tla bà tletše pelo ka xe baapostola bà ruta sethšaba bá bolêla Jesu ba re ó tsoxile bahung.” Lega go le bjalo ba bangwe ba ile ba arabela gabotse. “Xa bála ba xo kwa Lentšu, ba bantši ba dumêla; palô ya banna ya ba dikete tše thlano.” Go molaleng gore re ka letela gore batho ba arabele ka ditsela tše di fapa-fapanego ge re bolela ka kholofelo ya tsogo. Ka baka leo, ke gabohlokwa gore re matlafatše tumelo ya rena thutong ye.
Tumelo le Tsogo
7, 8. (a) Go etša ge go bontšhitšwe lengwalong le le yago phuthegong ya lekgolong la pele la nywaga ya Korinthe, ke bjang tumelo e ka bago ya lefeela? (b) Kwešišo e nepagetšego mabapi le kholofelo ya tsogo e hlaola bjang Bakriste ba therešo?
7 Ga se bohle bao e ilego ya ba Bakriste lekgolong la pele la nywaga C.E. bao ba ilego ba hwetša go le bonolo go amogela kholofelo ya tsogo. Ba bangwe bao ba ilego ba hwetša go le thata ba be ba kopanela le phuthego ya Korinthe. Paulo o ile a ba ngwalela gore: “Taba-kxolo ye ke Le neilexo yôna, ye le nna ke e neilwexo, ké yé: Kriste ó hwile ka ’baka la dibe tša rena ka mo mangwalô a bolêlaxo. O fihlilwe, a tsoxa ka letšatši la boraro ka mo mangwalô a bolêlaxo.” Ke moka Paulo o ile a hlatsela therešo ye ka go bolela gore Kriste yo a tsošitšwego o ile “a bônwa ke bana bešo ba ba fetaxo makxolo a mahlano,” gomme Paulo o okeditše ka gore, bao ba bantši ba bona ba sa dutšego ba phela. (1 Ba-Korinthe 15:3-8) O ile a oketša ka go nea mabaka ka gore: “Byale xe xo tsebatšwa Kriste, xore ó tsoxile bahung, ba bangwe ba lena ba bolêla bya’ng xe ba re: Tsoxô ya bahu xa eyô’? Xe tsoxô ya bahu è se xôna, xôna le Kriste xa a tsoxa. Xomme xe Kriste à s’a tsoxa, xôna se re se tsebatšaxo ké lefêla, ’me le tumêlô ya lena ké ya lefêla.”—1 Ba-Korinthe 15:12-14.
8 Ee, thuto ya tsogo ke ya motheo kudu moo e lego gore tumelo ya Bakriste ke ya lefeela ge e ba tsogo e sa amogelwe e le selo sa kgonthe. Ruri kwešišo e nepagetšego mabapi le tsogo e hlaola Bakriste ba therešo go ba maaka. (Genesi 3:4; Hesekiele 18:4) Ka gona, Paulo o akaretša thuto ya tsogo go “mathômô a thutô” ya Bokriste. Eka boikemišetšo bja rena e ka ba gore “re išê pele ka tša phêthêxô.” Le gona Paulo o re kgothatša ka gore: “A re direng ka mokxwa woo, xe Modimo a ka re dumêlêla.”—Ba-Hebere 6:1-3.
Kholofelo ya Tsogo
9, 10. Beibele e bolela’ng ge e bolela ka tsogo?
9 E le gore re tšwele pele re matlafatša tumelo ya rena ya go dumela tsogong, anke re hlahlobeng dipotšišo tše bjalo ka tše: Beibele e bolela’ng ge e bolela ka tsogo? Thuto ya tsogo e godiša bjang lerato la Jehofa? Dikarabo tša dipotšišo tše di tla re batametša kgaufsi le Modimo gomme ka nako e swanago di tla re thuša go ruta ba bangwe.—2 Timotheo 2:2; Jakobo 4:8.
10 “Tsogo” ke phetolelo ya lentšu la Segerika leo ka go lebanya le bolelago “go emelela gape.” Polelwana yeo e akaretša’ng? Go ya ka Beibele, kholofelo ya tsogo ke tumelo ya go dumela gore motho yo a hwilego a ka boela a phela. Beibele e tšwela pele go bontšha gore motho o tsošwa ka mmele wa nama goba wa moya, go ithekgile ka gore o na le kholofelo ya lefaseng goba ya legodimong. Re makatšwa ke lerato la Jehofa, bohlale bja gagwe le matla a gagwe ao a bonagatšwago ke kholofelo ye e kgahlišago ya tsogo.
11. Ke ditebelelo dife tša tsogo tšeo di holofetšwago bahlanka ba Modimo ba ba tloditšwego?
11 Tsogo ya Jesu le ya bana babo ba ba tloditšwego e ba nea mebele ya moya yeo e ba dirago gore ba swanelegele go hlankela legodimong. (1 Ba-Korinthe 15:35-38, 42-53) Ba hlankela ba le gotee e le babuši Mmušong wa Mesia, woo o tlago go tliša maemo a Paradeise lefaseng. Ka tlase ga Moperisita yo a Phagamego e lego Jesu, ba ba tloditšwego ba bopa sehlopha sa boperisita bja bogoši. Ba tla diriša mehola ya sehlabelo sa Kriste sa topollo go batho lefaseng le lefsa la go loka. (Ba-Hebere 7:25, 26; 9:24; 1 Petro 2:9; Kutollo 22:1, 2) Mo nakong ye, ba ba tloditšwego bao ba sa dutšego ba phela lefaseng ba kganyoga gore ba dule ba amogelwa ke Modimo. Ge ba e-hwa, ba tla amogela ‘tše ba itiretšego tšona goba moputso’ wa bona ka go tsogela bophelong bja moya bja go se hwe legodimong. (2 Ba-Korinthe 5:1-3, 6-8, 10; 1 Ba-Korinthe 15:51, 52; Kutollo 14:13) Paulo o ngwadile gore: “Xe re hlomaxane naê’ ka xo swana naê’ lehung la xaxwe, xôna re tlo hlomaxana naê’ ka xo swana naê’ le tsoxong ya xaxwe.” (Ba-Roma 6:5) Eupša go thwe’ng ka bao ba tlago go tsošetšwa bophelong lefaseng gape e le batho? Kholofelo ya tsogo e ka ba batametša bjang kgaufsi le Modimo? Re ka ithuta mo gontši mohlaleng wa Aborahama.
Tsogo le go Gwerana le Jehofa
12, 13. Ke motheo ofe o matla wa tumelo wo Aborahama a bego a e-na le wona tabeng ya tsogo?
12 Aborahama yo a hlalositšwego e le “mogwera wa Modimo,” e be e le monna wa tumelo e beago mohlala. (Jakobo 2:23, PK) Paulo o boletše ka tumelo ya Aborahama ka makga a mararo lelokelelong la gagwe la banna le basadi ba botegago bao go begilwego ka bona go kgaolo 11 ya puku ya Ba-Hebere. (Ba-Hebere 11:8, 9, 17) Ge a bolela ka tumelo ya Aborahama ka lekga la boraro o lebiša tlhokomelo tumelong yeo a e bontšhitšego ge ka go kwa a be a ikemišeditše go neela morwa wa gagwe Isaka e le sehlabelo. Aborahama o be a kgodišegile gore kholofetšo ya peu ka Isaka e be e kgonthišeditšwe ke Jehofa. Gaešita le ge Isaka a be a ka hwa e le sehlabelo, Aborahama “mo pelong ya xaxwe a re: Modimo le xo tsoša mohu ó a kxôna.”
13 Go ya kamoo ditiragalo di diregilego ka gona, ge Jehofa a be a bona go tia ga tumelo ya Aborahama, o ile a rulaganyetša gore legatong la Isaka go dirišwe phoofolo e le sehlabelo. Lega go le bjalo, phihlelo ya Isaka e ile ya šoma e le seswantšho sa tsogo, go etša ge Paulo a hlalositše gore: “Taba yeo ké seswanthšô.” (Ba-Hebere 11:19) Go oketša moo, Aborahama o be a šetše a e-na le motheo o tiilego wa go ba ga gagwe le tumelo tsogong. Na Jehofa ga se a ka a bušetša Aborahama matla a go ba le bana ge yena le mosadi wa gagwe e lego Sara ba be ba kopana botšofading bja bona gomme ba e-ba le morwa wa bona, Isaka?—Genesi 18:10-14; 21:1-3; Ba-Roma 4:19-21.
14. (a) Go ya ka Ba-Hebere 11:9, 10, Aborahama o be a letetše’ng? (b) E le gore Aborahama a amogele ditšhegofatšo tša Mmušo lefaseng le lefsa, ke’ng seo se sa swanetšego go mo diragalela? (c) Re ka amogela bjang ditšhegofatšo tša Mmušo?
14 Paulo o ile a hlalosa Aborahama e le modiiledi e bile e le modudi wa ditenteng yo a bego “a letetše motse wo o tl’o xo thêwa wa tia, woo mothei le moaxi wa wôna e lexo Modimo.” (Ba-Hebere 11:9, 10) Motse wo e be e se wa kgonthe go swana le Jerusalema, yeo tempele ya Modimo e bego e agilwe go yona. Go e na le moo, wo e be e le motse wa seswantšhetšo. E be e le Mmušo wa Modimo wa legodimong wo o bopšago ke Kriste Jesu le babuši-gotee le yena ba 144 000. Ba 144 000 bao ba lego letagong la bona la legodimong le bona go bolelwa ka bona e le “motse-mokxêthwa wa Jerusalêma o mofsa,” e le “monyalwa” wa Kriste. (Kutollo 21:2) Ka 1914, Jehofa o ile a bea Jesu setulong sa bogoši e le Kgoši Mesia wa Mmušo wa legodimong gomme a mo laela gore a buše gare ga manaba a gagwe. (Psalme 110:1, 2; Kutollo 11:15) E le gore a amogele ditšhegofatšo tša pušo ya Mmušo, Aborahama e lego “mogwera wa Modimo,” o tla swanelwa ke gore a phele gape. Ka mo go swanago, e le gore le rena re amogele ditšhegofatšo tša Mmušo, re swanetše go ba re phela lefaseng le lefsa la Modimo, re le ditho tša lešaba le legolo la baphologi ba Haramagedone goba re le bao ba tsošitšwego bahung. (Kutollo 7:9, 14) Lega go le bjalo, motheo wa kholofelo ya tsogo ke ofe?
Lerato la Modimo—Motheo wa Kholofelo ya Tsogo
15, 16. (a) Boporofeta bja mathomo bja ka Beibeleng bo thea bjang motheo bakeng sa kholofelo ya rena ya tsogo? (b) Go dumela tsogong go ka re batametša bjang kgaufsi kudu le Jehofa?
15 Tswalano ya rena ya kgaufsi le Tatago rena yo lerato wa legodimong, tumelo ya rena e tiilego e swanago le ya Aborahama le go kwa ga rena ditaelo tša Modimo di re dumelela gore re bolelwe re le ba lokilego le go lebelelwa ke Jehofa re le bagwera ba gagwe. Se se re nea sebaka sa gore re holwe ke pušo ya Mmušo. Ee, boporofeta bja mathomo-thomo bjo bo begilwego ka Lentšung la Modimo go Genesi 3:15, bo re nea motheo wa kholofelo ya tsogo le go ba le segwera le Modimo. Ga bo bolele e sa le pele feela ka go pšhatlwa ga Sathane hlogo eupša gape, ka mo go fapanego, bo bolela ka go longwa serethe ga Peu ya mosadi wa Modimo. Go hwela ga Jesu koteng go be go swantšhetša go longwa serethe. Go tsošwa ga gagwe ka letšatši la boraro a fodile ntho yeo go ile gwa bula tsela ya gore go gatwe mogato wa makgaola-kgang kgahlanong le “Diabolo e a bexo a na le matla a lehu.”—Ba-Hebere 2:14.
16 Paulo o re gopotša gore “Modimo, leratô le a re ratilexo ka lôna, ó le bônaxatša ka xe Kriste a re hwêla rè sa le ba-dira-dibe.” (Ba-Roma 5:8) Go leboga botho bjo bjo bo sa swanelago ruri go re batametša kgaufsi kudu le Jesu gotee le Tatago rena yo lerato wa legodimong.—2 Ba-Korinthe 5:14, 15.
17. (a) Ke kholofelo efe yeo Jobo a ilego a bolela ka yona? (b) Jobo 14:15 e utolla’ng ka Jehofa, gomme se se dira gore o ikwe bjang?
17 Jobo, e lego monna yo a botegago wa pele ga mehla ya Bokriste, le yena o be a lebeletše pele tsogong. O ile a tlaišwa kudu ke Sathane. Ka go se swane le bagwera ba gagwe ba maaka, bao ba sa kago ba bolela selo ka tsogo, Jobo o ile a ikhomotša ka kholofelo ye gomme a botšiša gore: “A motho e kabe e re xe a hwile, a bušê a phelê”? E le ge a araba potšišo ya gagwe ka noši, Jobo o ile a bolela gore: “Ké mo nkabexo kè sa holofêla mehla yohle kè le katanong, xwa bá xwa tla xo fetoxa xa-ka.” Ge a bolela le Modimo wa gagwe e lego Jehofa, o ile a dumela ka gore: “Wa tlo mpitša ka Xo arabêla.” Mabapi le maikwelo a Mmopi wa rena yo lerato, Jobo o ile a bolela gore: “Ò hloloxetšwe ’bopya sa diatla tš’axo.” (Jobo 14:14, 15) Ee, Jehofa o letetše ka phagahlo nako yeo ka yona babotegi ba tlago go boela bophelong ka tsogo. Se se re batametša kgaufsi kudu gakaakang le yena ge re naganišiša ka lerato le botho bjo bo sa swanelago bjo a re bontšhago bjona gaešita le ge re sa phethagala!—Ba-Roma 5:21; Jakobo 4:8.
18, 19. (a) Ke tebelelo efe yeo Daniele a nago le yona ya go phela gape? (b) Re tla hlahloba’ng sehlogong se se latelago?
18 Moporofeta Daniele yo a hlalositšwego ke morongwa wa Modimo e le “monna wa moratexi,” o phetše bophelo bjo botelele a le tirelong ya go botega. (Daniele 10:11, 19) O ile a kgomarela potego ya gagwe go Jehofa ka go tia a le bothopša ka 617 B.C.E. go fihlela ge a e-hwa nakwana ka morago ga ge a sa tšwa go newa pono ka 536 B.C.E., ngwageng wa boraro wa pušo ya Korese, kgoši ya Peresia. (Daniele 1:1; 10:1) Ka nako e nngwe ngwageng wa boraro wa pušo ya Korese, Daniele o ile a newa pono ya tatelano ya mebušo ya lefase yeo e felago nakong ya masetla-pelo a magolo ao a tlago. (Daniele 11:1–12:13) Ka ge a be a sa kgone go kwešiša pono ye ka botlalo, Daniele o ile a kgopela morongwa yo a mo tlišeditšego yona gore: “Mong ’a-ka! ’Taba tše di tlo feletša kae?” Ge morongwa yo a araba o ile a lebiša tlhokomelo go “lebaka la bofêlô,” leo ka lona “xo [tlogo] kwešeša ba ba naxo le thlaoloxanyô.” Ge e le Daniele ka boyena, ditebelelo tša gagwe e be e le dife? Morongwa o ile a dumela ka gore: “O tlo khutša, wa tlo bá wa tsoxa xo tlo amoxêla kabêlô ya xaxo bofelong bya matšatši.” (Daniele 12:8-10, 13) Daniele o tla boa “mohla bahu ba tsoxaxo,” nakong ya Pušo ya Kriste ya Nywaga e Sekete.—Luka 14:14.
19 Re phela gare-gare lebakeng la bofelo gomme re kgaufsi kudu le mathomo a Pušo ya Kriste ya Nywaga e Sekete go feta ge re be re thoma go ba badumedi. Ka gona, re swanetše go ipotšiša gore, ‘Na ke tla ba ke le gona lefaseng le lefsa gore ke gwerane le Aborahama, Jobo, Daniele le banna ba bangwe gotee le basadi ba botegago?’ Re tla ba gona ge e ba re kgomarela Jehofa gomme re e-kwa melao ya gagwe. Sehlogong sa rena se se latelago, re tla hlahloba kholofelo ya tsogo ka mo go oketšegilego e le gore re kgone go tseba bao ba tlago go tsošwa.
Na o a Gopola?
• Ke karabelo efe yeo Paulo a ilego a lebeletšana le yona ge a be a tsebatša ka kholofelo ya gagwe tsogong?
• Ke ka baka la’ng kholofelo ya tsogo e hlaola Bakriste ba therešo go ba maaka?
• Re tseba bjang gore Aborahama, Jobo le Daniele ba be ba dumela tsogong?
[Dipotšišo tša Thuto]
[Seswantšho go letlakala 8]
Ge Paulo a be a tšwelela pele ga Mmušiši Felikisi, o ile a tsebatša kholofelo ya tsogo ka kgodišego
[Seswantšho go letlakala 10]
Ke ka baka la’ng Aborahama a be a e-na le tumelo tsogong?
[Seswantšho go letlakala 12]
Jobo o ile a ikhomotša ka kholofelo ya tsogo
[Seswantšho go letlakala 12]
Daniele o tla tsošwa tsogong ya baloki