‘Bontšha Boitshwaro ge o Lebeletšane le Bobe’
‘Bontšha Boitshwaro ge o Lebeletšane le Bobe’
“Mohlanka wa Morêna xa a swanêlwa ke dintwa. Se se mo swanetšexo ké xe bohle a ba dira ka botho, . . . mo-kxôtlêlêla-bošula [“wa go itshwara bobeng,” NW].”—2 TIMOTHEO 2:24.
1. Ge re le modirong wa Bokriste, ke ka baka la’ng ka dinako tše dingwe re gahlana le batho bao ba bolelago le rena ka bogale?
O ARABELA bjang ge o gahlana le batho bao ba sa go ratego goba bao ba sa ratego seo o se emelago? Ge a hlalosa mehla ya bofelo, moapostola Paulo o boletše e sa le pele gore batho e be e tla ba “ba maroxa, . . . e tlo ba dihwirihwiri, le ba ba sa tsebexo xo ithswara, manaba a tše boló.” (2 Timotheo 3:1-5, 12) O ka gahlana le batho ba ba bjalo ge o le bodireding goba o dira mediro e mengwe.
2. Ke mangwalo afe ao a ka re thušago gore re dirišane ka bohlale le batho bao ba bolelago le rena ka bogale?
2 Ga se batho ka moka ba ba bolelago ka bogale bao ba tlogago ba sa kgahlegele se se lokilego. Mathata a magolo goba kgakanego a ka dira gore batho ba galefele motho le ge e le ofe yo a lego kgaufsi le bona. (Mmoledi 7:7) Ba bantši ba dira dilo ka tsela ye ka gobane ba phela e bile ba šoma tikologong yeo go yona batho ba tlwaetšego go bolela ka bogale. Se ga se dire gore polelo e bjalo e be e amogelegago go rena bjalo ka Bakriste, eupša se re thuša go kwešiša lebaka leo ka lona batho ba bangwe ba e dirišago. Re swanetše go arabela bjang ge batho ba bolela le rena ka bogale? Diema 19:11 e re: “Molemoxi xa a na sebefedi.” Le gona Ba-Roma 12:17, 18 e re lemoša gore: “Le se kê la lefetša motho bobe ka bobe. . . . Xe xo kxônêxa ka thokô ya lena, Le phedišanê xa-botse le batho ka moka.”
3. Go ba le khutšo go akaretšwa bjang molaetšeng wo re o bolelago?
3 Ge e ba ruri re e-na le khutšo, se se tla bonagatšwa ke boemo bja kgopolo bjoo re bo bontšhago. Se tla bonagatšwa ke seo re se bolelago le seo re se dirago, mohlomongwe gape sa bonagatšwa ke diponagalo tša rena tša sefahlego le segalo sa rena sa lentšu. (Diema 17:27) Ge a be a roma baapostola ba gagwe gore ba yo dira boboledi, Jesu o ile a ba eletša ka gore: “E re xe Le tsêna lapeng, Le dumedišê ba xôna [“le ba lakaletše khutšo,” The New English Bible]. Xomme xe lapa leo le swanetše, xôna moláô wa lena o tlo le tlêla; fêla, xe le s’a swanêla, xôna moláô wa lena o tlo boêla xo lena.” (Mateo 10:12, 13) Molaetša wo re o rwelego ke ditaba tše dibotse. Beibele e o bitša “ditaba tše dibotse tša khutšo,” “ditaba tše dibotse tša mabapi le botho bjo bo sa swanelago bja Modimo” le “ditaba tše tše dibotse tša Mmušo.” (Ba-Efeso 6:15, NW; Ditiro 20:24, NW; Mateo 24:14, NW) Pakane ya rena ga se go swaya ditumelo tša motho yo mongwe diphošo goba go ngangišana le yena mabapi le dipono tša gagwe, eupša ke go boledišana le yena ka ditaba tše dibotse tše di tšwago Lentšung la Modimo.
4. O ka re’ng ge o botšwa gore “ga ke thabele” gaešita le pele ga ge o ka hwetša sebaka sa go bolela lebaka leo ka lona o etilego?
4 Ka ntle le go theetša ka kelohloko, mong wa ntlo a ka bolela a galefile gore, “Ga ke thabele.” Maemong a mantši o ka re, “Ke be ke kganyoga go go balela temana ye e tee feela e kopana e tšwago Beibeleng.” A ka no se gane o dira bjalo. Maemong a mangwe, e ka ba mo go swanetšego gore: “Ke be ke kganyoga go go botša mabapi le nako yeo ka yona go ka se sa bago le go hloka toka le nako yeo ka yona batho bohle ba tlago go ithuta go ratana.” Ge e ba mong wa ntlo a sa bontšhe kgahlego gatee-tee ya go nyaka go tseba mo go oketšegilego, o ka oketša ka gore: “Eupša go bonagala ye e se nako e swanetšego go wena.” Gaešita le ge karabelo ya mong wa ntlo e se ya khutšo, na re swanetše go phetha ka gore ga a ‘swanelege’? Go sa šetšwe gore karabelo ke efe, gopola keletšo ya Beibele ya gore re ‘dire bohle ka botho, re itshware bobeng.’—2 Timotheo 2:24, bapiša le NW.
O be a le Bogale Eupša ka Tsela e Fošagetšego
5, 6. Saulo o ile a swara balatedi ba Jesu bjang, gomme ke ka baka la’ng a ile a dira dilo ka tsela yeo?
5 Lekgolong la pele la nywaga, monna yo a bitšwago Saulo o be a tsebega kudu ka go bolela ga gagwe ka bogale, gaešita le ka boitshwaro bja gagwe bjo bo šoro. Beibele e bolela gore o be “à rata xo thšošetša le xo bolaya barutiwa ba Morêna.” (Ditiro 9:1, 2) Ka morago o ile a dumela gore e be e le “moroxaki le mohlokofatši, wa xo dira batho ka boxale.” (1 Timotheo 1:13) Gaešita le ge ba bangwe ba leloko la gabo e ka ba e be e šetše e le Bakriste, o ile a bolela mabapi le boemo bja gagwe ka noši bja kgopolo malebana le balatedi ba Kriste gore: “Kè ba xalefetše wa xo hlakana hlôxô, kè ba hlômarêla le metseng ya ka ntlê.” (Ditiro 23:16; 26:11; Ba-Roma 16:7, 11) Ga go na bohlatse bja gore barutiwa ba ile ba leka go ngangišana le Saulo phatlalatša ge a be a itshwere ka tsela yeo.
6 Ke ka baka la’ng Saulo a ile a dira dilo ka tsela yeo? Nywaga e mentši ka morago, o ile a ngwala gore: “Dilô tšeo ke di dirile kè sa tsebe, kè sešo ka ba modumedi.” (1 Timotheo 1:13) E be e le Mofarisei, a rutilwe ‘Molao wa bo-rakgolokhukhu’agwe ka go tia.’ (Ditiro 22:3) Le ge go be go le molaleng gore morutiši wa Saulo e lego Gamaliele ka tsela e itšego o be a e-na le kgopolo e bulegilego, moperisita yo a phagamego e lego Kayafa, yoo Saulo a ilego a gwerana le yena, o ile a ipontšha a fišegela thoko. Kayafa e be e kile ya ba moetapele wa sehlopha seo se ilego sa loga maano ao a ilego a feleletša ka go bolawa ga Jesu Kriste. (Mateo 26:3, 4, 63-66; Ditiro 5:34-39) Ka morago ga moo, Kayafa o ile a kgonthišetša gore baapostola ba Jesu ba a bethwa, gomme a ba laela ka go tia gore ba tlogele go bolela ka leina la Jesu. Kayafa o ile a etelela pele lekgotla la Sanhedrine kgorong ya tsheko ye e ilego ya dira gore batho ba be le maikwelo a tseneletšego, yeo go yona Stefano a ilego a tšewa gomme a yo thungwa ka mafsika. (Ditiro 5:27, 28, 40; 7:1-60) Saulo o be a le gona ge Stefano a be a thungwa ka mafsika, gomme Kayafa o ile a mo laela gore a tšwele pele a dira maiteko a oketšegilego a go gatelela balatedi ba Jesu ka go ba golega kua Damaseko. (Ditiro 8:1; 9:1, 2) Ka tlase ga tutuetšo ye, Saulo o be a nagana gore boitshwaro bja gagwe bo be bo bonagatša go fišegela ga gagwe Modimo, eupša ge e le gabotse o be a se na tumelo ya kgonthe. (Ditiro 22:3-5) Ka baka leo, Saulo o ile a palelwa ke go lemoga gore Jesu e be e le Mesia wa kgonthe. Eupša Saulo o ile a boelwa ke kgopolo ge Jesu yo a tsošitšwego a be a bolela le yena ka tsela ya mohlolo tseleng ya go ya Damaseko.—Ditiro 9:3-6.
7. Saulo o diragaletšwe ke’ng ka baka la go gahlana ga gagwe le Jesu tseleng ya go ya Damaseko?
7 Go se go ye kae ka morago ga se, morutiwa Anania o ile a rongwa gore a yo nea bohlatse go Saulo. Na o ka ba o ile wa fišegela go ya go yena? Anania o be a tšhogile, eupša o ile a bolela le Saulo ka tsela e botho. Boemo bja Saulo bja kgopolo bo be bo fetogile ka baka la go gahlana ga gagwe le Jesu ka tsela ya mohlolo tseleng ya go ya Damaseko. (Ditiro 9:10-22) Ka morago o ile a tsebja e le moapostola Paulo, moromiwa yo mafolofolo wa Mokriste.
Yo Boleta Eupša a E-na le Sebete
8. Jesu o ile a bonagatša bjang boemo bja kgopolo bja Tatagwe go batho bao ba dirilego dilo tše mpe?
8 Jesu e be e le mogoeledi yo mafolofolo wa Mmušo yo a bego a le boleta eupša a le sebete ge a dirišana le batho. (Mateo 11:29) O be a bonagatša boemo bja kgopolo bja Tatagwe wa legodimong, yo a kgothaletšago ba kgopo gore ba furalele ditsela tša bona tše mpe. (Jesaya 55:6, 7) Ge a be a dirišana le badiradibe, Jesu o be a kgona go bona ge ba kaonefatša, gomme o be a kgothatša batho ba bjalo. (Luka 7:37-50; 19:2-10) Go e na le go ahlola batho ba bangwe motheong wa ponagalo ya bona ya ka ntle, Jesu o ile a ekiša botho bja Tatagwe, kgotlelelo le go se fele pelo ka kholofelo ya go ba lebiša tshokologong. (Ba-Roma 2:4) Jehofa o rata gore batho ba mehuta ka moka ba sokologe gomme ba phološwe.—1 Timotheo 2:3, 4.
9. Re ka ithuta’ng tseleng yeo Jesaya 42:1-4 e ilego ya phethagala ka yona go Jesu?
9 Ge a bolela mabapi le pono ya Jehofa ka Jesu Kriste, mongwadi wa Ebangedi e lego Mateo o tsopola mantšu a a boporofeta a rego: “Mohlanka wa-ka šó, yo ke mo hlaotšexo, moratwa wa-ka e a kxahlaxo pelo ya-ka. Ke tlo bea Môya wa-ka mo xo Yêna, ’me ó tlo tsebiša dithšaba kahlolô. A ka se kê a ômana, a ka se kê a xoa, xo ka se kê xwa ba e a kwaxo lentšu la xaxwe mekxotheng. Lehlaka le le thinyexilexo a ka se kê a le thokxêla ruri; ’me lebônênyana le le kunyêlêlaxo a ka se le timêle ruri, a tlo ba a tšweletša phenyô kahlolong. ’Me dithšaba di tlo holofêla ’ina l’axwe.” (Mateo 12:17-21; Jesaya 42:1-4) Ka go dumelelana le mantšu ao a boporofeta, Jesu ga se a ka a tšea karolo dingangišanong tša lešata. Gaešita le ge a be a gateletšegile, o ile a bolela therešo ka tsela yeo e bego e kgahla ba dipelo tše di botegago.—Johane 7:32, 40, 45, 46.
10, 11. (a) Gaešita le ge Bafarisei ba be ba le gare ga baganetši ba bagolo ba Jesu bao ba bolelago ka go se pepetletše, ke ka baka la’ng a ile a nea bohlatse go ba bangwe ba bona? (b) Ke dikarabo tša mohuta ofe tšeo Jesu ka dinako tše dingwe a bego a di nea baganetši, eupša ke’ng seo a sa kago a se dira?
10 Nakong ya bodiredi bja gagwe, Jesu o ile a boledišana le Bafarisei ba bantši. Le ge ba bangwe ba bona ba be ba leka go mo tanya ka polelo ya gagwe, Jesu ga se a ka a phetha ka gore ka moka ga bona ba be ba e-na le maikemišetšo a mabe. Simone e lego Mofarisei yo ka tsela e itšego a bego a rata go swaya diphošo, go bonagala a be a nyaka go tseba Jesu gomme o ile a mo laletša dijong. Jesu o ile a amogela taletšo gomme a dira boboledi go bao ba bego ba le gona. (Luka 7:36-50) Ka nako e nngwe, Mofarisei yo a tumilego yo a bitšwago Nikodemo o ile a tla go Jesu ka sephiring e le bošego. Jesu ga se a ka a mo sola ka baka la go ema go ba go fihla go fsifala. Go e na le moo, o ile a nea bohlatse go Nikodemo mabapi le lerato leo le bontšhitšwego ke Modimo ka go romela Morwa wa gagwe bakeng sa go bula tsela ya go phološa bao ba bego ba tla bontšha tumelo. Le gona, Jesu ka botho o ile a šupa bohlokwa bja go dira dilo ka go dumelelana le thulaganyo ya Modimo. (Johane 3:1-21) Nikodemo ka morago o ile a emelela Jesu ge pego e botse ya mabapi le Jesu e be e nyatšwa ke Bafarisei ba bangwe.—Johane 7:46-51.
11 Ga se gore Jesu o be a sa bone boikaketši bja bao ba bego ba leka go mo tanya. Ga se a ka a dumelela baganetši gore ba mo lebiše ngangišanong e se nago mohola. Lega go le bjalo, ge go be go swanela o ile a nea dikarabo tše kopana le tše matla ka go bolela ka molao wa motheo, ka go diriša seswantšho goba ka go tsopola lengwalo. (Mateo 12:38-42; 15:1-9; 16:1-4) Ka dinako tše dingwe, Jesu o be a no se arabe ge go be go le molaleng gore go dira bjalo go ka se mo hole ka selo.—Mareka 15:2-5; Luka 22:67-70.
12. Gaešita le ge batho ba be ba mo hlabela mašata, Jesu o ile a kgona bjang go ba thuša?
12 Ka dinako tše dingwe, Jesu o be a hlabelwa mašata ke batho bao ba lego ka tlase ga taolo ya meoya e mebe. Ge seo se be se direga, o ile a bontšha boitshwaro a ba a diriša gaešita le matla a gagwe ao a a neilwego ke Modimo gore a ba thuše. (Mareka 1:23-28; 5:2-8, 15) Ge e ba batho ba bangwe ba re galefela e bile ba re hlabela mašata ge re le bodireding, le rena ka mo go swanago re swanetše go bontšha boitshwaro, gomme re swanetše go katanela go lebeletšana le boemo bjo bo bjalo ka tsela e botho le e bohlale.—Ba-Kolose 4:6.
Ka Lapeng
13. Ke ka baka la’ng batho ka dinako tše dingwe ba ganetša setho sa lapa seo se thomago go ithuta Beibele le Dihlatse tša Jehofa?
13 Go nyakega ga gore balatedi ba Jesu ba bontšhe boitshwaro gantši go bonagala kudu ka lapeng. Motho yoo pelo ya gagwe e kgomilwego kudu ke therešo ya Beibele o hlologelwa gore lapa la gagwe le arabele ka tsela e swanago. Eupša go etša ge Jesu a boletše, ditho tša lapa di ka bontšha bonaba. (Mateo 10:32-37; Johane 15:20, 21) Go na le mabaka a fapa-fapanego a go dira se. Ka mohlala, le ge dithuto tša Beibele di ka re thuša gore re be batho ba botegago, bao ba nago le boikarabelo le bao ba hlomphegago, Mangwalo le ona a re ruta gore boemong le ge e le bofe re ikarabela kudu go Mmopi wa rena. (Mmoledi 12:1, 13; Ditiro 5:29) Setho sa lapa seo se naganago gore tutuetšo ya sona ka lapeng e fokodišitšwe ka tsela e itšego ke go botegela ga rena Jehofa ka go se kwanantšhe se ka kgopišega. Ge re lebeletšana le boemo bjo bo bjalo, ruri e tloga e le gabohlokwa gore re latele mohlala wa Jesu wa go bontšha boitshwaro!—1 Petro 2:21-23; 3:1, 2.
14-16. Ke’ng seo se ilego sa dira gore ba bangwe bao pele ba bego ba ganetša ditho tša malapa a bona ba fetoge?
14 Ba bantši bao ga bjale ba hlankelago Jehofa ba kile ba ba le molekane wa lenyalo goba setho sa lapa seo se bego se ganetša diphetogo tšeo ba bego ba di dira ge ba be ba thoma go ithuta Beibele. Baganetši ba ka ba ba be ba kwele dipolelo tše di sa kgahlišego ka Dihlatse tša Jehofa, gomme mohlomongwe ba boifa gore seo e tla ba tutuetšo e mpe go ba lapa. Ke’ng seo se ba dirilego gore ba fetoše boemo bja bona bja kgopolo? Maemong a mantši, mohlala o mobotse e be e le lona lebaka le legolo la gore ba dire bjalo. Ka ge modumedi a ile a diriša keletšo ya Beibele ka go tia—go ya dibokeng tša Bokriste ka mehla le go tšea karolo bodireding mola ka nako e swanago a hlokomela boikarabelo bja lapa e bile a bontšha boitshwaro ge batho ba bolela le yena ka bogale—kganetšo ya lapa ka dinako tše dingwe e ile ya fokotšega.—1 Petro 2:12.
15 Le gona moganetši a ka ba a ile a gana go theetša tlhaloso le ge e le efe e tšwago Beibeleng ka baka la kgethollo goba boikgogomošo. Seo e be e le sa therešo ka monna yo mongwe wa United States yo a ilego a bolela gore ke yena morata-naga yo mogolo. Ka letšatši le lengwe ge mosadi wa gagwe a be a le kopanong, monna yo o ile a tšea diaparo tša gagwe ka moka gomme a sepela. Ka nako e nngwe, o ile a tloga gae a swere sethunya gomme a tšhošetša ka gore o tla ipolaya. O ile a bea bodumedi bja mosadi wa gagwe molato bakeng sa boitshwaro le ge e le bofe bja gagwe bjo bo sa swanelago. Eupša mosadi wa gagwe o be a ikemišeditše go diriša keletšo ya Beibele. Nywageng e 20 ka morago ga gore mosadi wa gagwe e be yo mongwe wa Dihlatse tša Jehofa, le yena o ile a ba yo mongwe wa tšona. Kua Albania mosadi yo mongwe o be a galefišitšwe ke gore morwedi wa gagwe o ile a ithuta Beibele le Dihlatse tša Jehofa gomme a kolobetšwa. Mma o ile a senya dikopi tša morwedi wa gagwe tša Beibele ka makga a 12. Ke moka ka letšatši le lengwe o ile a bula Beibele e mpsha yeo morwedi wa gagwe a bego a e tlogetše tafoleng. Go sa letelwa, e ile ya bulega go Mateo 10:36, gomme mma o ile a lemoga gore seo se bego se bolelwa moo se be se šoma go yena. Lega go le bjalo, a tshwenyegile ka bophelo bjo bobotse bja morwedi’agwe, mma yo o ile a mo felegetša seketswaneng seo a bego a tla sepela ka sona le Dihlatse tše dingwe go ya kopanong kua Italy. Ge mma a be a bona lerato, go gokarelana le go myemyela ga sehlopha se e bile a e-kwa lesego la sona, maikwelo a gagwe a ile a thoma go fetoga. Go se go ye kae ka morago ga se, o ile a dumela go ithuta Beibele. Lehono o ikemišeditše go thuša ba bangwe bao mathomong ba ganetšago.
16 Lebakeng le lengwe, monna yo bogale o ile a ya go mosadi wa gagwe, gomme a bolela ditatofatšo tše bogale ge mosadi yo a be a dutše a batamela Holo ya Mmušo. Mosadi o ile a araba ka botho gore: “Tsena ka Holong ya Mmušo, gomme o bone ka noši.” O ile a dira bjalo, gomme ge nako e dutše e e-ya o ile a ba mogolo wa Mokriste.
17. Ge e ba boemo ka dinako tše dingwe e le bjo bo sa thabišego ka lapeng la Bakriste, ke keletšo efe ya Mangwalo yeo e ka thušago?
17 Gaešita le ge motho yo mongwe le yo mongwe ka lapeng la geno e le Mokriste, go ka ba le dinako tše dingwe tšeo ka tšona boemo bja lapa bo sa thabišego gomme go ka boledišanwa ka bogale ka baka la go se phethagale ga batho. Ke mo go lemogegago gore Bakriste ba kua Efeso ya bogologolo ba ile ba eletšwa gore: “Tše e kexo ké sekxoro, le bonaba, le mašata, le maroxa, a di bê kxolê le lena, le bobe byohle.” (Ba-Efeso 4:31) Go molaleng gore Bakriste ba kua Efeso ba ile ba tutuetšwa ke tikologo yeo ba bego ba le go yona, go se phethagale ga bona, gomme maemong a mangwe ba tutuetšwa ke ditsela tša bona tša nakong e fetilego tša bophelo. Ke’ng seo se bego se tla ba thuša gore ba fetoge? Ba be ba swanetše gore ‘ba mpshafatšwe moyeng wo o tutuetšago dipelo tša bona.’ (Ba-Efeso 4:23) Ge ba be ba dutše ba ithuta Lentšu la Modimo, ba naganišiša kamoo le swanetšego go tutuetša maphelo a bona ka gona, ba gwerana le Bakriste-gotee le bona gomme ba rapela go tšwa pelong, dienywa tša moya wa Modimo di be di tla bonagala ka mo go feletšego maphelong a bona. Ba be ba tla ithuta go “dirana ka botho le ka bonôlô, le xo xauxêlana byalo ka xe Modimo le Yêna a [ba] xauxetše ka Kriste.” (Ba-Efeso 4:32) Go sa šetšwe seo ba bangwe ba ka se dirago, re swanetše go bontšha boitshwaro, re be ba botho, ba nago le kwelobohloko le ba lebalelago. Ee, ga se ra swanela go “lefetša motho bobe ka bobe.” (Ba-Roma 12:17, 18) Go bontšha lerato le le tšwago pelong e le ge re ekiša Modimo ke selo seo re swanetšego go se dira ka dinako tšohle.—1 Johane 4:8.
Keletšo go Bakriste ka Moka
18. Ke ka baka la’ng keletšo e hwetšwago go 2 Timotheo 2:24 e be e le e swanetšego bakeng sa mogolo wa kua Efeso ya bogologolo, gomme e ka hola Bakriste ka moka bjang?
18 Keletšo ya gore re dule re “itshwara bobeng” e šoma go Bakriste ka moka. (2 Timotheo 2:24, NW) Eupša mathomong e be e lebišitšwe go Timotheo, yo a bego a e nyaka nakong ya ge a be a hlankela e le mogolo kua Efeso. Ba bangwe ka phuthegong ba be ba tsebega kudu tabeng ya go tsebatša dipono tša bona le go ruta thuto e fošagetšego. Ka ge ba be ba sa kwešiše morero wa Molao wa Moše ka mo go feletšego, ba ile ba palelwa ke go kwešiša bohlokwa bja tumelo, lerato le letswalo le lebotse. Boikgogomošo bo ile bja baka ntwa ge ba dutše ba ngangišana ka mantšu, mola ba palelwa ke go kwešiša ntlha e kgolo ya dithuto tša Kriste le bohlokwa bja go ineela go Modimo. E le gore a lebeletšane le bothata bjo, Timotheo o be a swanetše go tia therešong ya Mangwalo, eupša e be yo botho ge a dirišana le bana babo. Go etša bagolo ba mehleng yeno, o be a tseba gore mohlape ga se wa gagwe le gore o be a swanetše go dirišana le ba bangwe ka tsela yeo e bego e tla godiša lerato le botee bja Bokriste.—Ba-Efeso 4:1-3; 1 Timotheo 1:3-11; 5:1, 2; 6:3-5.
19. Ke ka baka la’ng e le gabohlokwa go rena ka moka gore re “tsomê boikokobetšô”?
19 Modimo o kgothaletša batho ba gagwe gore ba “tsomê boikokobetšô.” (Tsefanya 2:3) Lentšu la Sehebere bakeng sa “boikokobetšô” le bolela boemo bja kgopolo bjoo bo dirago gore motho a kgone go kgotlelela kgobalo a sa fele pelo, ka ntle le go tenega e bile a sa itefeletše. Eka re ka lopa Jehofa go tšwa pelong gore a re thuše gore re kgone go bontšha boitshwaro le gore re mo emele ka tsela e swanetšego, gaešita le ge re lebeletšane le maemo a thata.
O Ithutile’ng?
• Ge batho bao o gahlanago le bona ba bolela le wena ka bogale, ke mangwalo afe ao a ka go thušago?
• Ke ka baka la’ng Saulo a ile a dira dilo ka bogale?
• Mohlala wa Jesu o re thuša bjang go dirišana le batho ba mehuta ka moka ka tsela e swanetšego?
• Ke mehola efe yeo e ka tlišwago ke go bontšha boitshwaro ge re boledišana le ba lapa?
[Dipotšišo tša Thuto]
[Seswantšho go letlakala 26]
Go sa šetšwe botumo bja Saulo, Anania o ile a mo swara ka botho
[Seswantšho go letlakala 29]
Go hlokomela ga Mokriste boikarabelo bja gagwe ka potego go ka fokotša kganetšo ya ba lapa
[Seswantšho go letlakala 30]
Bakriste ba godiša lerato le botee