Dipotšišo tše Tšwago go Babadi

Ke ka baka la’ng Dafida le Batseba ba sa ka ba bolaelwa go dira bohlotlolo eupša morwa wa bona wa lesea a ile a hwa?

Molao wa Moše o be o re: “Xe monna a ka hwetšwa à robetše le mosadi e a tšerwexo ke monna e mongwê, xôna ba bolawê bobedi bya bôná, monna eo a robetšexo le mosadi, le mosadi eo. Bobe mo xo Isiraele bo fedišwê ka mokxwa o byalo.” (Doiteronomio 22:22) Ge nkabe Jehofa Modimo a be a dumeletše gore molato wa sebe sa Dafida le Batseba o ahlolwe ke baahlodi ba batho ka tlase ga Molao, batho ba ba babedi bao ba dirilego bohlotlolo ba ka be ba ile ba bolawa. Ka ge baahlodi ba batho ba be ba sa kgone go bona dipelo, ba be ba swanetše go ahlola go ya ka seo se dirilwego ke bafoši go etša ge bohlatse bo bontšha. Kahlolo ya bohlotlolo e be e le lehu. Baahlodi ba ba-Isiraele ba be ba sa newa matla a go swarela sebe seo.

Ka lehlakoreng le lengwe, Modimo wa therešo o kgona go bona dipelo gomme a ka swarela motho dibe ge e ba a bona lebaka la go dira bjalo. Ka ge taba ye e be e le mabapi le Dafida, yoo Modimo a bego a dirile kgwerano ya Mmušo le yena, Jehofa o ile a kgetha go dira dilo ka tsela e fapanego gomme a kgetha go ahlola taba yeo ka boyena. (2 Samuele 7:12-16) “Moahlodi wa lefase ka moka” o na le tshwanelo ya go dira kgetho e bjalo.—Genesi 18:25.

Jehofa o ile a bona’ng ge a hlahloba pelo ya Dafida? Mantšu a ketapele go Psalme 51 a bontšha kamoo Dafida a ilego a ikwa ka gona “mola moporofeta Nathane à tlile xo yêna ka xe a tsene xo Batseba.” Psalme 51:1-4 e re: “Modimo, nthšôkêlwê, ka xobane O yo botho. Mphomolê bosenyi, ka xobane kxauxêlô y’axo ké e kxolo. Napa O nthlatswê molato, O nthseketšê, ke tšwê dibe. Xobane nna, bosenyi bya-ka ke a bo tseba, ’me sebe sa-ka xa se tloxe pele xa-ka. Ké senyeditše Wêna, Wêna fêla; ke dirile sa xo Xo befêla; ké xôna, O tlo loka, x’O bolêla, O tlo rereša x’O ahlola.” Jehofa o swanetše go ba a ile a bona manyami a ao a bego a le pelong ya Dafida e le bohlatse bja go itshola ga gagwe e le ka kgonthe gomme a phetha ka gore go na le lebaka la go gaugela bafoši bao. Go feta moo, Dafida ka boyena e be e le motho wa kgaugelo, gomme Jehofa o gaugela bao ba nago le kgaugelo. (1 Samuele 24:4-7; Mateo 5:7; Jakobo 2:13) Ka gona, eitše ge Dafida a amogela sebe sa gagwe, Nathane a mmotša gore: “Xôna Morêna ó Xo lebalela sebe sa xaxo; O ka se kê wa hwa.”—2 Samuele 12:13.

Dafida le Batseba ba be ba ka se tšhabele ditla-morago ka moka tša sebe sa bona. Nathane o ile a botša Dafida gore: “Fêla, xo tlo hwa ngwana é e a Xo belexetšwexo, ka xobane O nyaditše . . . Morêna xe O dira tše byalo.” Ngwana wa bona o ile a babja gomme a hwa go sa šetšwe maiteko a Dafida a go ikona dijo le go lla ka matšatši a šupago.—2 Samuele 12:14-18.

Batho ba bangwe ba thatafalelwa ke go kwešiša gore ke ka baka la eng morwa yo a ile a swanelwa ke go hwa ka ge Doiteronomio 24:16 e re: ‘Bana ba se ke ba bolawa bakeng sa bo-tatago bona.’ Eupša re swanetše go gopola gore ge nkabe molato woo o ile wa ahlolwa ke baahlodi ba batho, batswadi ba ba ka be ba ile ba bolawa gotee le lesea leo le bego le le ka mpeng. Go hwa ga morwa yo mohlomongwe go ile gwa thuša Dafida go lemoga gabotse kamoo a nyamišitšego Jehofa ka gona ka sebe sa gagwe le Batseba. Re ka kgodišega gore Jehofa o ile a ahlola taba yeo ka toka, ka gobane “tsela ya’xwe ké xo loka.”—2 Samuele 22:31.

[Seswantšho go letlakala 31]

Dafida o ile a itshola go tšwa pelong