Lefase Leo le se Nago Bodiidi le Kgaufsi

DISWANTŠHO tša Paradeise, tše bjalo ka se se lego letlakaleng la ka ntle la makasine wo, di ipiletša go batho ba diilago. Paradeise e be e le selo sa kgonthe go banyalani ba pele ba batho, e lego Adama le Efa. Legae la bona e be e le tšhemo ya Edene. (Genesi 2:7-23) Gaešita le ge Paradeise yeo e ile ya lahlega, go dumela paradeiseng e tlago—lefaseng le lefsa leo le se nago bodiidi—ga se toro feela. E theilwe ka mo go tiilego dikholofetšong tšeo di lego ka Beibeleng.

Nagana ka kholofetšo yeo Jesu Kriste a e holofeditšego letšatšing la mafelelo la bophelo bja gagwe mo lefaseng. Se sengwe sa disenyi tšeo di hwilego le Jesu se ile sa bontšha tumelo bokgoning bja Modimo bja go rarolla mathata a batho. Se ile sa re: “Morêna! O nkxopolê xe O e-tla ka mmušô wa xaxo.” Mantšu a a bontšha gore sesenyi se se be se dumela gore Jesu o tla buša bjalo ka Kgoši le gore bahu ba tla tsoga. Jesu o ile a araba ka gore: “Ruri, ke a Xo botša lehono O tlo ba le Nna Paradiseng.”—Luka 23:42, 43.

Ge e bolela ka bao ba tlago go phela Paradeiseng, Beibele e re: “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna.” (Jesaya 65:21) Ee, “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.”—Mika 4:4.

Lega go le bjalo, ke ka baka la’ng bodiidi bo dumeletšwe gore bo be gona lehono? Ke thušo efe yeo Modimo a e neago badiidi? Bodiidi bo tla fela neng?

Ke ka Baka La’ng Bodiidi bo Dumeletšwe Gore bo be Gona?

Paradeise yeo Adama le Efa ba bego ba dula go yona e ile ya lahlega ka baka la borabele bjoo bo ilego bja thongwa ke morongwa yo kgopo, Sathane Diabolo. A diriša noga e le mmoleledi wa gagwe, Sathane o ile a goketša Efa gore a robe molao wa Modimo o lego kgahlanong le go ja seenywa sa sehlare se itšego. O ile a mo fora gore a dumele gore go ipuša ntle le Modimo go tla mo tlišetša bophelo bjo bokaone. Ge Efa a nea Adama seenywa se se ileditšwego, le yena o ile a se ja, ka go rialo a furalela Modimo e le ge a thekga mosadi wa gagwe.—Genesi 3:1-6; 1 Timotheo 2:14.

Banyalani ba ba marabele ba ile ba rakwa Paradeiseng ka mo go swanetšego, gomme go tloga ka nako yeo go ya pele ba ile ba swanelwa ke go šoma ka thata gore ba tšwele pele ba phela. Go fihlela lehono, Jehofa o dumeletše Sathane gore a buše batho ba sebe, e le go pepentšha mafelelo a go se kwe  Modimo. Histori e hlatsetše gore batho ba ka se kgone go tliša Paradeise lefaseng. (Jeremia 10:23) Go e na le moo, go ipuša ntle le Modimo go feleleditše ka mathata a bakago tshenyo, ao a akaretšago bodiidi.—Mmoledi 8:9.

Lega go le bjalo, badiidi ga se ba tlogelwa feela lefaseng le le tletšego mathata. Lentšu la Modimo le le buduletšwego, Beibele, le na le keletšo e kwagalago bakeng sa bona.

“Lesang xo Belaêla”

Ge a be a bolela le batheetši ba bantši bao ba bego ba akaretša badiidi, Jesu o ile a re: “Lebêlêlang dinonyana tša sebakeng xa di byale, xa di bune, xa di kxobêlele dišexong; ’me Tata-weno ó a di otla. Afa lena xa Le di fetiše xa-xolo? . . . Ké xôna lesang xo belaêla la re: Re tlo ja’ng? Re tlo nwa’ng? Re tlo apara’ng? Tšeo ka moka ké tše badithšaba ba di tsomaxo ka kudu. Xe e le Tataweno wa maxodimong ó tseba xobane le lena tšeo ka moka Le phela ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:26-33.

Ga go nyakege gore modiidi a utswe. (Diema 6:30, 31) O tla hlokomelwa ge e ba a bea Modimo pele bophelong bja gagwe. Nagana ka taba ya Tukiso, monna wa kua Lesotho. Ka 1998, madira a tšwago dinageng tše dingwe a ile a tsena Lesotho go yo fediša bofetogedi bja batho kgahlanong le mmušo. Ka baka la ntwa yeo, mabenkele a ile a thubja, batho ba lahlegelwa ke mešomo, gomme go be go e-na le tlhaelelo e šoro ya dijo.

Tukiso o be a dula tikologong ya batho ba ba diilago kudu ya motse-mošate. Baagišani ba gagwe ba bantši ba be ba utswitše mabenkeleng e le gore ba iphediše. Ge Tukiso a boa legaeng la gagwe la phapoši e tee, o ile a hwetša gore Maseiso, mosadi yoo a bego a dula le yena, o be a e-na le dijo tše dintši tšeo a bego a di utswitše. Tukiso o ile a hlalosa gore go utswa go thulana le molao wa Modimo gomme a re: “Ntšhetša dilo tše ka ntle.” Maseiso o ile a theetša. Baagišani ba bona ba ile ba ba kwera gomme ba itšeela dijo tšeo di utswitšwego.

Tukiso o ile a gata mogato wo ka baka la seo a bego a ithutile sona thutong ya gagwe ya Beibele le Dihlatse tša Jehofa. Na ba ile ba bolawa ke tlala ka baka la go kwa ga gagwe molao wa Modimo? Le gatee. Nako e itšego ka morago, bagolo ba phuthego ya Dihlatse tša Jehofa yeo a bego a kopanela le yona ba ile ba ikgokaganya le Tukiso gomme ba mo tlišetša dijo. Ge e le gabotse, Dihlatse tša Jehofa tša Afrika Borwa e lego kgaufsi le Lesotho di be di rometše ditoni tše fetago tše pedi bakeng sa go thuša bana babo tšona le dikgaetšedi ba Bakriste kua Lesotho. Go kwa Modimo ga Tukiso le thušo e lerato ya phuthego di ile tša kgahla Maseiso kudu. Le yena o ile a thoma go ithuta Beibele. Mafelelong, ba ile ba nyalana ka molao gomme ka go  rialo ba swanelegela go kolobetšwa e le Dihlatse tša Jehofa. Ba sa dutše ba hlankela Modimo ka potego.

Jehofa Modimo o tshwenyega ka badiidi. (Bona lepokisi le le nago le sehlogo se se rego, “Modimo o Lebelela Badiidi Bjang?”) Ka lerato o dirile tokišetšo ya go thuša batho ba bangwe ba bjalo ka Tukiso le Maseiso gore ba ithute mo go oketšegilego ka yena. Le gona, ka Lentšung la gagwe o neile keletšo e šomago bakeng sa bophelo bja letšatši le letšatši.

Tokišetšo e Botse

Dihlatse tša Jehofa ka mehla di lekile go bonagatša go tshwenyega ga Modimo ka badiidi. (Ba-Galatia 2:10) Gantši ge naga e welwa ke kotsi gomme Bakriste ba therešo ba akaretšwa moo, go dirwa ditokišetšo bakeng sa gore ba hwetše thušo e nyakegago. Sa bohlokwa le go feta, Dihlatse di tshwenyegile ka dinyakwa tša moya tša batho ka moka, go akaretša le badiidi. (Mateo 9:36-38) Nywageng e 60 e fetilego, badiredi ba dikete ba tlwaeditšwego ba ithapetše go hlankela e le baromiwa dinageng dišele. Ka mohlala, e bile banyalani ba baromiwa ba tšwago Finland bao ka go ithuta leleme la Sesotho ba ilego ba kgona go ruta Tukiso le Maseiso gore e be barutiwa ba Jesu. (Mateo 28:19, 20) Gantši modiro o bjalo wa boromiwa o akaretša go tlogela bophelo bja manobonobo nageng e tšwetšego pele le go hudugela nageng e diilago.

Go iphediša ka bohodu ga se kgetho ya Bakriste ba therešo. Go e na le moo, ba na le tumelo bokgoning bja Jehofa Modimo bja go ba hlokomela. (Ba-Hebere 13:5, 6) Tsela e nngwe yeo Jehofa a hlokomelago batho ba gagwe ka yona ke ka mokgatlo wa lefase ka bophara wa barapedi ba gagwe bao ba hlokomelanago.

 Tsela e nngwe yeo Jehofa a thušago badiidi ka yona ke ka go ba nea keletšo e šomago ya bophelo bja letšatši le letšatši. Ka mohlala, Beibele e laela gore: “E a utswitšexo a se kê a hlwa a utswa; a a kxothalê a dirê tše botse ka diatla tša xaxwe, a tlê a bê le tše a kaxo abêla mohloki.” (Ba-Efeso 4:28) Batho ba bantši bao ba sa šomego ba ile ba kgona go itirela mešomo, ba šoma mešomo e thata, e bjalo ka go lema le go hlokomela serapa sa merogo. Le gona, Beibele e thuša badiidi go seketša tšhelete ya bona ka go ba ruta go phema mekgwa e kotsi e bjalo ka go diriša dino-tagi gampe.—Ba-Efeso 5:18.

Lefase Leo le se Nago Bodiidi—Neng?

Beibele e bontšha gore re phela “mehleng ya bofelo” ya pušo ya Sathane. (2 Timotheo 3:1) Kgaufsinyane, Jehofa Modimo o tla romela Jesu Kriste go tlo ahlola batho. Go tla direga’ng ka nako yeo? Jesu o neile karabo go se sengwe sa diswantšho tša gagwe. O itše: “Mohla Morwa-motho a tlaxo ka letaxô la xaxwe à na le Barongwa ba xaxwe ka moka, ó tlo dula sedulong sa xaxwe sa boxoši sa letaxô. ’Me dithšaba ka moka di tlo phuthêlwa pele xa xaxwe, ’me ó tlo ba kxêtholoxanya byalo ka modiši xe a kxêtholoxanya dinku le dipudi.”—Mateo 25:31-33.

Dinku tša seswantšhong se ke bao ba ikokobeletšago bogoši bja Jesu. Jesu o ile a ba bapiša le dinku ka gobane ba mo latela bjalo ka Modiši wa bona. (Johane 10:16) Batho ba swanago le dinku ba tla hwetša bophelo ka tlase ga bogoši bja Jesu bjo bo phethagetšego. E tla ba bophelo bjo bo thabišago lefaseng le lefsa leo le se nago bodiidi. Batho ba ba swanago le dipudi, bao ba ganago bogoši bja Jesu, ba tla fedišetšwa ruri.—Mateo 25:46.

Mmušo wa Modimo o tla fediša bokgopo. Ka nako yeo bodiidi bo tla be bo se sa le gona. Go e na le moo, batho ba ratanago le bao ba hlokomelanago ke bona ba tla bego ba phela lefaseng. Gore lefase le bjalo le lefsa le a kgonega go ka bonwa borwarreng bjo lerato bja ditšhaba-tšhaba bja Dihlatse tša Jehofa, gobane Jesu o itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”—Johane 13:35.

[Lepokisi/Diswantšho go letlakala 6, 7]

MODIMO O LEBELELA BADIIDI BJANG?

Beibele e hlalosa Mmopi wa batho e le “mo-solêla-ba-tlaleng.” (Psalme 146:7) E na le ditemana tše fetago tše lekgolo tše di gatelelago go tshwenyega ga Modimo ka badiidi.

Ka mohlala, ge Jehofa a be a nea setšhaba sa Isiraele ya bogologolo Molao wa gagwe, o ile a laela balemi ba ba-Isiraele gore ba se ke ba buna mathoko a mašemo a bona ka mo go feletšego. Ba be ba sa swanela go buna dienywa tše di šaletšego ka go kga dienywa tša mohlware goba tša morara ka lekga la bobedi. Melao ye e be e le tokišetšo e lerato bakeng sa badiiledi, ditšhiwana, bahlologadi le ba bangwe bao ba tlaišegago.—Lefitiko 19:9, 10; Doiteronomio 24:19-21.

Ka godimo ga moo, Modimo o ile a laela ba-Isiraele gore: “O se kê wa hlakiša mohloloxadi le sešuana. Xe O ka bá wa ba hlakiša, ’me ba ntelêla, ke tlo kwa sellô sa bôná; ’me boxale bya-ka bo tlo tuka, ka Le bolaiša lerumô, basadi ba lena ba šala e le bahloloxadi, bana ba lena ba šala e le dišuana.” (Ekisodo 22:21-23) Ka manyami, ba-Isiraele ba bantši bao ba humilego ba ile ba hlokomologa mantšu ao. Jehofa Modimo o ile a nea ba-Isiraele ditemošo tša go fapa-fapana ka baporofeta ba gagwe bakeng sa phošo ye gotee le tše dingwe. (Jesaya 10:1, 2; Jeremia 5:28; Amosi 4:1-3) Mafelelong, Modimo o ile a dira gore ba-Asiria, gomme ka morago ba-Babele, ba fenye naga ya Isiraele. Ba-Isiraele ba bantši ba ile ba bolawa, gomme bao ba phologilego ba išwa bothopša dinageng dišele.

Morwa wa Modimo yo a rategago, Jesu Kriste, o ile a bonagatša go tshwenyega ga Tatagwe ka tsela e lerato ka badiidi. Ge a hlalosa morero wa bodiredi bja gagwe, Jesu o itše: “Môya wa Morêna o na le nna, ka xobane ó mpeetše xo bexêla babôtlana ’taba tše di botse.” (Luka 4:18) Eupša se ga se bolele gore bodiredi bja Jesu bo be bo lekanyeditšwe feela go badiidi. Ka lerato o ile a thuša le bahumi. Lega go le bjalo, ge Jesu a be a dira bjalo, gantši o be a bontšha go tshwenyega ga gagwe ka badiidi. Ka mohlala, o ile a nea mmuši yo mongwe yo a humilego keletšo ye: “Ka moka tše O naxo le tšôna di rekišê O abêlê bahloki; ké mo O tl’o xo ba le lehumô lexodimong; ’me O tlê O ntatêlê.”—Luka 14:1, 12-14; 18:18, 22; 19:1-10.

Jehofa Modimo le Morwa wa gagwe ba tshwenyega kudu ka badiidi. (Mareka 12:41-44; Jakobo 2:1-6) E le go bontšha go tshwenyega ga gagwe ka badiidi, Jehofa o bolokile badiidi ba dimilione bao ba hwilego ka kgopolong ya gagwe. Ba bjalo ka moka ba tla tsošetšwa lefaseng le lefsa le se nago bodiidi.—Ditiro 24:15.

[Diswantšho]

Borwarre bja ditšhaba-tšhaba bja Dihlatse tša Jehofa bo bontšha gore lefase le lefsa le a kgonega

[Seswantšho go letlakala 5]

Tukiso le Maseiso ba e-na le moromiwa yoo a ithutilego Beibele le Tukiso

[Seswantšho go letlakala 5]

Maseiso a le mojakong wa ntlo ya gagwe a e-na le moromiwa yo a ithutilego Beibele le yena