“Thušo Ya-ka E Tšwa Go Jehofa”

Malapa a Matlafatšwa ke go Tseba Modimo

“LEBOTO la Berlin.” Ke ka tsela yeo banyalani ba kua Argentina ba ilego ba bitša leboto la kgonthe leo ba bego ba le agetše go arola ntlo ya bona ka diripa tše pedi! Ba be ba e-na le dikgohlano tšeo di sa rarollegego; ba be ba hloyane.

Se se nyamišago ke gore ga se banyalani ba feela bao ba lebeletšanego le boemo bjo. Malapa a mantši a hlasetšwe ke dingangišano, go se botegelane le go hloyana ka mo go feletšego. Se se a nyamiša ka ge lapa e le thulaganyo yeo e hlamilwego ke Modimo ka boyena. (Genesi 1:27, 28; 2:23, 24) Mpho ye yeo e tšwago go Modimo ke thulaganyo e botse kudu ya go bontšhana lerato le le tseneletšego. (Ruthe 1:9) Ka go phetha boikarabelo bja tšona bjoo di bo neilwego ke Modimo, ditho tša lapa di tumiša Jehofa e bile di tlišetšana lethabo. *

Ka ge Modimo e le yena yoo a thomilego thulaganyo ya lapa, re swanetše go dumelela pono ya gagwe gore e tutuetše kwešišo ya rena ya kamoo lapa le swanetšego go sepedišwa ka gona. Lentšu la gagwe le nea dikeletšo tše dintši tše šomago tšeo di hlametšwego go thuša malapa gore a atlege, kudu-kudu ge go tšwelela mathata. Beibele ge e bolela ka karolo ya monna e re: “Banna a ba tsebê xe xo ba swanetše xe ba rata basadi ba bôná, ka mokxwa wo ba rataxo mebele ya bôná ka wôna.” Ge monna a phethagatša boikarabelo bjo, mosadi wa gagwe o thabela go ‘boifa monna.’—Ba-Efeso 5:25-29, 33.

Ge e le tabeng ya tswalano magareng ga batswadi le bana, moapostola Paulo o ngwadile gore: “Le lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Ge se se dirwa, go ba le borutho ka lapeng gomme se se nolofaletša bana go kwa batswadi ba bona.—Ba-Efeso 6:1.

Dintlha tše tše di lego ka mo godimo ke mehlala ya keletšo e kwagalago ya Beibele mabapi le bophelo bja lapa. Ka go diriša melao ya Modimo ya motheo, ba bantši ba thabile ka lapeng. Ka mohlala, nagana ka banyalani ba kua Argentina bao go boletšwego ka bona mathomong. Ka morago ga gore ba ithute Beibele le Dihlatse tša Jehofa ka dikgwedi tše tharo, ba ile ba thoma go diriša keletšo ya yona e bohlale mabapi le lenyalo. Ba ile ba šoma ka matla go kaonefatša mokgwa wa bona wa go boledišana, go kwelana bohloko le go lebalelana. (Diema 15:22; 1 Petro 3:7; 4:8) Ba ile ba ithuta go laola kgalefo ya bona le go kgopela thušo ya Modimo ge go bonala eka dilo di tšwa taolong. (Ba-Kolose 3:19) Go se go ye kae, “Leboto la Berlin” le ile la thubja!

Modimo a ka Matlafatša Lapa

Go tseba ditekanyetšo tša Modimo le go di diriša go ka matlafatša lapa gore le kgone go lebeletšana le dikgateletšo. Se se bohlokwa kudu, ka gobane go ile gwa porofetwa gore thulaganyo ya lapa e be e tla hlaselwa o šoro mehleng ya rena. Paulo o ile a bolela e sa le pele ka go phuhlama ga boitshwaro le go šwalalana ga setšhaba mo go lego gona mehleng yeno. O boletše gore ‘mehla ya bofelo’ e be e tla hlaolwa ka go se botege, go hlaela ga ‘lerato’ le go se hlomphe batswadi gaešita le gare ga bao ba ‘e lego ba borapedi.’—2 Timotheo 3:1-5.

 Go leka go kgahliša Modimo go ka thuša go fenya ditla-morago tše bjalo tše bohloko ka lapeng. Malapa a mantši a lemogile gore go nyakega tharollo e tšwago go Modimo bakeng sa go a thuša go lebeletšana ka katlego le mathata ao a nago le wona. Ge e ba malapa a nyaka go ba le tswalano e botse le Modimo, sa bohlokwa kudu ke gore a swanetše go diriša melao ya motheo ya Beibele gomme a lemoge gore “ngwakô wà sa axwa ke Morêna, baaxi ba wôna ba itapiša ka lefêla.” (Psalme 127:1) Katlego e kgolo kudu ya go godiša lethabo la lapa e tlišwa ke go etiša Modimo pele bophelong bja lapa.—Ba-Efeso 3:14, 15.

Monna wa kua Hawaii e lego Dennis, o ile a lemoga kamoo seo e lego sa therešo ka gona. Gaešita le ge a be a ipitša Mokriste, o be a phela ka go rogana le go lwa. Ka morago ga go šoma e le lešole, o ile a thoma go ba šoro le go ba le lehloyo kudu. O gopola gore: “Ke be ke dula ke e-lwa. Ke be ke sa iše felo ka gore go direga eng ka nna, ke be ke sa tšhabe go hwa. Ke ile ka tšwela pele ka go rogana le go lwa. Mosadi wa-ka yoo e bego e le yo mongwe wa Dihlatse tša Jehofa, o ile a nkgothaletša go ithuta Beibele.”

Dennis o ile a ganetša maiteko a mosadi wa gagwe. Lega go le bjalo, boitshwaro bja mosadi wa gagwe bja Bokriste bo ile bja fetoša kgopolo ya gagwe e mpe. Mafelelong Dennis o ile a ya sebokeng sa Bokriste le mosadi wa gagwe le bana. Ka morago ga moo, Dennis o ile a swarelwa thuto ya Beibele gomme a dira tšwelopele e botse. O ile a tlogela mokgwa wa gagwe wa go kgoga wo a bego a e-na le nywaga e 28 a o kgomaretše gomme a kgaotša go sepela le bagwera bao ba bego ba dira dilo tšeo a bego a leka go di tlogela. A leboga Jehofa, Dennis o itše: “Bophelo bja lapa la-ka bo ile bja kaonefala. Re be re e-ya dibokeng le bodireding re le lapa. Bana ba-ka ba babedi ba be ba se sa ntšhaba ka ge ke be ke ithutile go laola kgalefo ya-ka gomme ke se sa rogana. Re ile ra kgona go bolela le go thabela dipoledišano tša Beibele. Ge nkabe e be e se ka ditherešo tša Beibele, lehono nkabe ke se mo; ke be ke le se-fela-pelwana.”

Malapa a ka ba le lethabo ge a šoma ka thata go dira thato ya Jehofa. Phihlelo e bontšhitše gore dilo di ba kaone ge go e-na le motho o tee feela yo a phelago ka melao ya motheo ya Beibele ka lapeng, go feta ge go se na le o tee yo a phelago ka yona. Go aga lapa la Bokriste ke mošomo o thata, woo o nyakago bokgoni le nako. Eupša ditho tša malapa a bjalo di kgodišegile gore Jehofa o tla putsa maiteko a tšona ka katlego. Di ka bolela mantšu a mopsalme a rego: “Thušo ya-ka e tšwa go Jehofa.”—Psalme 121:2, NW.

[Mongwalo wa ka tlase]

[Ntlhakgolo go letlakala 9]

Ke Modimo “yo lapa le lengwe le le lengwe le le lego legodimong le lefaseng le bitšwago ka yena.”—BA-EFESO 3:15, NW

[Lepokisi go letlakala 8]

JEHOFA O TŠEELA GODIMO THULAGANYO YA LAPA

“Modimo a ba šexofatša, a bolêla le bôná a re: Tswalang Le atê, tlalang lefase.”—Genesi 1:28.

“Wa lehlôxônôlô ké e a boifaxo [Jehofa] . . . Mosadi wa xaxo ó etša morara wa dienywa mo lapeng la xaxo; ’me bana ba xaxo ba etša mahloxedi.”—Psalme 128:1, 3.