Na Batho ba ka Fediša Bodiidi?

BATHO ba dimilione ba gotše ba sa tsebe bodiidi. Ga se ba ka ba lala ka tlala goba ba robala ba thothomela ka baka la phefo. Lega go le bjalo, ba bantši ba batho bao ba kwela badiidi bohloko gomme ba dira sohle seo ba ka se kgonago go ba thuša.

Lega go le bjalo, bodiidi e sa dutše e le therešo e kwešago bohloko go batho bao ba tlaišwago ke ntwa ya selegae, mafula, komelelo le mathata a mangwe. Dilo tše ke tšeo di hlobaetšago balemi ba Afrika bao ba katanelago go fepa malapa a bona. Ba bangwe ba ile ba gapeletšega go tlogela magae a bona le go hudugela metseng e megolo goba go phela bjalo ka bafaladi nageng e nngwe. Badudi ba bangwe ba magaeng ba hudugela metseng e megolo ka ge ba goketšwa ke dikholofetšo tša gore ba tla phela bophelo bjo bokaone.

Metse e megolo yeo e tletšego wa go falala gantši e fetoga mafelo a swanetšego bakeng sa bodiidi. Ga go na le ge e le sekgoba se senyenyane seo go sona go ka bjalwago dimela. Gantši go thata go hwetša mošomo. Ba bantši ba fetoga disenyi ka baka la go tlalelwa o šoro. Badudi ba metseng e megolo ba nyaka thušo, eupša mebušo ya batho ga e kgone go rarolla bothata bjo bo golago bja bodiidi. Ge e bolela ka pego ya Ditšhaba tše Kopanego e lokolotšwego ka November 2003, The Independent ya London e itše: “Lefase le tšwela pele le bolawa ke tlala.” E okeditše ka gore: “Lefaseng ka bophara, go akanyetšwa gore batho ba dimilione tše 842 lehono ba na le phepo-mpe—gomme palo yeo e oketšega gape ka batho ba dimilione tše hlano ngwaga o mongwe le o mongwe.

Ofisi ya lekala ya Dihlatse tša Jehofa ya Afrika Borwa ka dinako tše dingwe e amogela mangwalo a tšwago go batho ba diilago. Ka mohlala, monna yo a tšwago Bloemfontein o ile a ngwala gore: “Ga ke šome, gomme ke utswa toropong nako le nako ge go kgonega. Ge ke sa dire bjalo, re bolawa ke tlala ka matšatši a mantši—re sa bolele ka phefo e tonyago kudu. Mošomo o tloga o se gona. Batho ba sepela-sepela ditarateng ba nyaka mošomo goba sa go ya ka maleng. Ke tseba batho ba bangwe bao ba nyakago dijo moo go lahlwago ditlakala. Ba bangwe ba a ipolaya. Ba bantši bjalo ka nna ba gateletšegile e bile ga ba na kholofelo. Go bonagala eka ga go na kholofelo bakeng sa bokamoso. Na Modimo yo a re bopilego re e-na le senyakwa sa go ja le go apara ga a bone se se diregago?”

Go na le dikarabo tše di neago khomotšo mathateng a monna yo. Bjalo ka ge sehlogo se se latelago se tla bontšha, dikarabo tše di hwetšwa Lentšung la Modimo, e lego Beibele.