O Aga Motheong Ofe?

GO SWARELELA ga moago go ithekgile kudu ka go tia ga motheo wa wona. Beibele ka dinako tše dingwe e diriša molao wo wa motheo ka tsela ya seswantšhetšo.

Ka mohlala, moporofeta Jesaya o bolela ka Jehofa Modimo e le “mo-thea-lefase.” (Jesaya 51:13) Motheo wo o akaretša melao ya Modimo e sa fetogego yeo e laolago mosepelo wa lefase gomme ya le dira gore le se šišinyege. (Psalme 104:5) Le gona, Lentšu la Modimo e lego Beibele le bolela ka “methêô” yeo lekoko la batho le ithekgilego ka yona. Metheo ye ke toka, molao le thulaganyo. Ge e “phušutšwe,” goba e fokodišitšwe ke go hloka toka, kgobogo le bošoro, thulaganyo e a senyega lekokong la batho.—Psalme 11:2-6; Diema 29:4.

Molao wo wa motheo o šoma gape go batho ka o tee ka o tee. Ge a phetha Thuto ya gagwe e tumilego ya Thabeng, Jesu Kriste o itše: “Mang le mang a kwaxo tše ke di bolêlaxo tšé, ’me a di dira, ke mo swanthša ka monna yo bohlale, e a axilexo ngwakô wa xaxwe lwaleng. Xwa theoxa pula, xwa tla lefula, xwa tšutla ledimo, tša wêla ngwakô woo, ’me wa se we, ka xe o theilwe lwaleng. Xomme mang le mang e a kwaxo tše ke di bolêlaxo tšé, ’me a se di dire, ke mo swanthša ka monna wa setlaêla, e a axilexo ngwakô wa xaxwe lešabašabeng. Xwa theoxa pula, xwa tla lefula, xwa tšutla ledimo, tša wêla ngwakô woo, ’me wa wa; xo wa xa wôna ya ba mo xoxolo.”—Mateo 7:24-27.

O aga bophelo bja gago motheong ofe? Na o bo aga lešabašabeng leo le sa tsepamago la difilosofi tša batho bao ba sa boifego Modimo, tšeo di tla feleletšago di dirile gore moago o we? Goba na o bo aga lefsikeng le le tiilego la go kwa dilo tšeo Jesu Kriste a di bolelago, tšeo di tla go šireletšago malebana le ledimo la seswantšhetšo bophelong?