Bagoeledi ba Mmušo ba a Bega

Batho ba ba Botegago ba Tumiša Jehofa

LEFASENG ka bophara, Dihlatse tša Jehofa—bafsa le batho ba bagolo—di tsebja ka potego ya tšona. Ela hloko mehlala e tšwago dikontinenteng tše tharo.

Olusola wa nywaga e 17, yo a dulago Nigeria, ka letšatši le lengwe ge a be a lebile gae a e-tšwa sekolong o ile a topa sekhwama sa tšhelete. O ile a se iša go hlogo ya sekolo, yeo e ilego ya bala tšhelete yeo gomme ya hwetša e le ₦6 200 (mo e ka bago R280). Hlogo ya sekolo e ile ya bušetša sekhwama seo go morutiši yoo a bego a se timeditše. Morutiši o ile a nea Olusola ₦1 000 (mo e ka bago R7) e le go mo leboga, gomme a mmotša gore a lefelele ditefo tša gagwe tša sekolo ka yona. Ge barutwana ba bangwe ba e-kwa seo se diregilego, ba ile ba kwera Olusola. Dibeke tše mmalwa ka morago, morutwana yo mongwe o ile a bega gore tšhelete ya gagwe e utswitšwe, ka gona barutiši ba ile ba kgopelwa gore ba phuruphutše barutwana ka moka. Morutiši o ile a botša Olusola gore: “Wena ema mo, ke a tseba gore ka ge o le yo mongwe wa Dihlatse tša Jehofa o ka se ke wa utswa.” Tšhelete e ile ya hwetšwa go ba babedi ba bašemane bao ba ilego ba kwera Olusola, gomme ba ile ba otlwa o šoro. Olusola o ngwadile gore: “Ke thabile kudu ka ge ke tsebja ke le yo mongwe wa Dihlatse tša Jehofa yo a ka se kego a utswa, ka go rialo ke nea Jehofa letago.”

Ge Marcelo, modudi wa setlogo wa Argentina, a be a e-tšwa ka gae ka letšatši le lengwe, o ile a hwetša mokotla wa dipuku (briefcase) o le mo fase dimithara tše sego kae go tloga mojakong wa ka morago wa ntlo ya gagwe. O ile a tsena le wona ka ntlong gomme yena le mosadi wa gagwe ba o bula ka kelohloko. Ba ile ba makala kudu ge ba hwetša tšhelete e ntši, dikarata tša mokitlana le ditšheke tše mmalwa tše saennwego, tšeo e nngwe ya tšona e bego e le ya diranta tše dimilione tše pedi. Ba ile ba hwetša nomoro ya mogala lenaneong-theko leo le bego le le ka gare ga mokotla woo. Ba ile ba leletša mong wa mokotla mogala gomme ba rulaganyetša gore ba mmušetše wona le dikagare tša wona moo Marcelo a šomago gona. Mong wa mokotla o be a bonala a tšhogile ge a fihla. Eupša mothwadi wa Marcelo o ile a mmotša gore a iše maswafo fase ka gobane Marcelo ke yo mongwe wa Dihlatse tša Jehofa. Mong wa mokotla o ile a nea Marcelo di-peso tše 20 feela (mo e ka bago R40), e le moputso wa go hwetša mokotla. Seo se ile sa galefiša mothwadi wa Marcelo ka ge a be a kgahlilwe kudu ke potego ya gagwe. Se se ile sa nea Marcelo sebaka sa go hlalosa gore bjalo ka yo mongwe wa Dihlatse tša Jehofa, o nyaka go botega ka dinako tšohle.

Phihlelo e latelago e tšwa Kyrgyzstan. Rinat, e lego mošemane wa nywaga e tshela, o ile a topa sekhwama sa tšhelete sa mosadi yo a bego a dula kgaufsi le gagabo. Sekhwama seo se be se e-na le di-som tše 1 100 (mo e ka bago R150). Ge Rinat a bušetša mosadi yoo sekhwama se se bego se timetše, mosadi o ile a bala tšhelete gomme a botša mmago Rinat gore tšhelete yeo e hlaela ka di-som tše 200 (mo e ka bago R30). Rinat o ile a bolela gore ga se a tšea tšhelete yeo. Ke moka, bohle ba ile ba ya go nyaka tšhelete yeo e hlaelago gomme ba e hwetša kgaufsi le moo sekhwama se hweditšwego gona. Mosadi yoo o ile a makala. O ile a leboga Rinat gotee le mmagwe, sa pele bakeng sa go tliša tšhelete yeo e bego e timetše gomme sa bobedi, bakeng sa go godišwa ga gagwe ka tsela ya Bokriste.