Ga se ba Phološwa ka Mediro Feela, Eupša le ka Botho bjo bo sa Swanelago
Ga se ba Phološwa ka Mediro Feela, Eupša le ka Botho bjo bo sa Swanelago
“Le baphološwa . . . ka tumêlô; . . . Xa L’a ka la e bôna ka medirô, xore xo se bê le e a kaxo itumiša.”—BA-EFESO 2:8, 9.
1. Bakriste ba fapana bjang le batho ka kakaretšo ge e le mabapi le dilo tšeo ba di fihleletšego, gomme ka baka la’ng?
BATHO lehono ba kgahlwa kudu ke dilo tšeo ba di fihleletšego, gomme gantši ba akgofela go ikgantšha ka tšona. Bakriste ke ba fapanego. Ba phema go bolela kudu ka dilo tšeo ba di fihleletšego, gaešita le tšeo di lego mabapi le borapedi bja therešo. Le ge ba thabišwa ke dilo tšeo batho ba Jehofa ba di fihleletšego e le sehlopha, ga ba ikgantšhe ka tema yeo ba e kgathilego go tšona. Ba lemoga gore tirelong ya Jehofa, maikemišetšo a swanetšego ke a bohlokwa kudu go feta seo motho a se fihleletšego. Motho le ge e le ofe yoo mafelelong a newago mpho ya bophelo bjo bo sa felego o tla ba a se a e hwetša ka dilo tšeo a di fihleletšego, eupša ka tumelo le ka botho bjo bo sa swanelago bja Modimo.—Luka 17:10; Johane 3:16.
2, 3. Paulo o ile a ikgantšha ka’ng, gomme ka baka la’ng?
2 Moapostola Paulo o be a tseba taba ye gabotse. Ka morago ga go rapela ka makga a mararo gore a fodišwe “phatša nameng,” Jehofa o ile a mo araba ka gore: “Kxauxêlô ya-ka a e Xo lekanê, xobane matla a-ka a iphêtha phokolong.” E le ge a amogela phetho ya Jehofa ka boikokobetšo, Paulo o ile a re: “Ké xôna ke rexo xo kaone xe nka kxahlwa ke xo kxanthša diphôkôlô tša-ka, xore matla a Kriste a axê mo xo nna.” Boemo bja Paulo bja kgopolo bja boikokobetšo ke bjona bjo re swanetšego gore re nyake go bo ekiša.—2 Ba-Korinthe 12:7-9.
3 Gaešita le ge Paulo a be a e-na le bokgoni bjo bogolo tabeng ya go dira mediro ya Bokriste, o ile a lemoga gore dilo tšeo a di fihleletšego ga se a di fihlelela ka bokgoni le ge e le bofe bjo itšego bjo a nago le bjona. O ile a bolela ka boikokobetšo gore: “Nna, ke lexo e monyenyane xo bakxêthwa bohle, ke séditšwe ka kxauxêlô yé ya xo re ba-ntlê ke ba anêxêlê Ebangedi ya lehumô le le sa latišexexo la Kriste.” (Ba-Efeso 3:8) Bjo e be e se boemo bja kgopolo bja boikgantšho goba bja boikgogomošo bja bao ba ikgodišago. “Modimo ó lwa le baikxodiši; ba xo ikokobetša ó ba sétša ka dikxauxêlô.” (Jakobo 4:6; 1 Petro 5:5) Na re latela mohlala wa Paulo, ka go itebelela ka boikokobetšo re le ba banyenyane go bana babo rena?
‘Go Lekanya Gore ba Bangwe ba a re Feta’
4. Ke ka baka la’ng ka dinako tše dingwe re ka hwetša go le thata go lekanya gore bangwe ba a re feta?
4 Moapostola Paulo o eleditše Bakriste gore: “Le se ke la dira selo ka kgang, le ga e le ka go nyaka tumišo ya lefela, eupša ka go ipoetša e mongwe le e mongwe a lekanye goba ba bangwe ba a mo feta.” (Ba-Filipi 2:3, PK) Se e ka ba tlhohlo, kudu-kudu ge e ba re le boemong bja boikarabelo. Mohlomongwe bothata bo rotoga ka gobane re tutueditšwe, go fihla bokgoleng bjo itšego, ke moya wa phadišano woo o apareditšego kudu lefaseng lehono. Ge re be re le bana re ka ba re ile ra rutwa gore re phadišane le ba bangwe, e ka ba bana babo rena ka gae goba bao re tsenago le bona ka klaseng kua sekolong. Mohlomongwe ka mehla re be re kgothaletšwa gore re katanele gore re newe tlhompho ya go ba naletšana ya sekolo ya tša dipapadi goba ya go ba morutwana wa sona yo a kgonago kudu. Ka kgonthe, go dira sohle seo re ka se kgonago modirong le ge e le ofe o swanetšego ke selo se se retegago. Lega go le bjalo, Bakriste ga ba dire bjalo bakeng sa gore ba newe tlhokomelo e sa swanelago, eupša ba dira bjalo e le gore ba holwe ka mo go feletšego ke modiro woo gomme mohlomongwe gore ba hole le ba bangwe. Eupša, go ka ba kotsi go nyaka go retwa ka mehla ka gobane o lebelelwa o le motho yo kaone. Go bjalo bjang?
5. Ge e ba moya wa phadišano o sa laolwe, o ka feleletša ka’ng?
5 Ge e ba moya wa phadišano goba wa boikgodišo o sa laolwe, o ka dira gore motho a se hlomphe ba bangwe le gore a be le makoko. A ka thoma go hufegela bokgoni bja ba bangwe le ditokelo tša bona. Diema 28:22 e re: “Motho wa ’ihlô la mexabaru ó kxanyêlêla xo huma; xa a tsebe xe a tlo tlêlwa ke bohloki.” A ka ba a katanela ka boikgogomošo go hwetša maemo ao a sa mo swanelego. E le go lokafatša ditiro tša gagwe, a ka thoma go ngongorega le go swaya ba bangwe diphošo—e lego ditshekamelo tšeo Bakriste ba swanetšego go di phema. (Jakobo 3:14-16) Boemong le ge e le bofe, o kotsing ya go ba le boemo bja kgopolo bja boithati.
6. Beibele e lemoša bjang malebana le moya wa phadišano?
6 Ka gona, Beibele e kgothatša Bakriste gore: “Re se kê ra ba ba xo kxanthša lefêla, le ba xo rumolana, le ba xo tsebafêlana.” (Ba-Galatia 5:26) Moapostola Johane o boletše ka Mokriste-gotee le yena yoo go lego molaleng gore o ile a ba le moya wa mohuta wo. Johane o itše: “Phuthêxô ke e ngwaletše lengwalô; fêla Dioterefe, e a rataxo xo ba moxolo wa bôná, xa a re amoxele. Xe ke e-tla ké mo ke tl’o xo mo xopotša medirô ye a e diraxo ka xo re phara ka dipolêlô tše mpe.” A boemo bjo bobe gakaakang bjoo Mokriste a ka welago go bjona!—3 Johane 9, 10.
7. Mokriste o tla rata go phema’ng lefelong la mošomo la lehono leo le tletšego phadišano?
7 Ee, ke mo go sa kwagalego go nagana gore Mokriste a ka phema ka mo go feletšego mediro ka moka ya phadišano. Ka mohlala, modiro wa gagwe wa boiphedišo o ka akaretša taba ya go phadišana ka tša boiphedišo le batho ba bangwe goba dikgwebo tše dingwe tšeo di tšweletšago dilo tše di swanago le tša gagwe goba tšeo di neago ditirelo tše di swanago le tša gagwe. Lega go le bjalo, gaešita le maemong a bjalo, Mokriste o tla rata go sepediša kgwebo ya gagwe ka moya wa tlhompho, wa lerato le wa go naganela. O tla gana mekgwa e sego molaong goba e sego ya Bokriste gomme a phema go ba motho yo a tsebegago kudu ka boemo bja kgopolo bja phadišano le bja boithati. A ka se nagane gore go ba kaone go feta ba bangwe—modirong le ge e le ofe—ke selo sa bohlokwa kudu bophelong. Ge e ba seo e le sa therešo ka mediro ya boiphedišo, gona e tloga e le sa bohlokwa kudu gakaakang lefelong la borapedi!
‘E Sego ka go Ipapetša le yo Mongwe’
8, 9. (a) Ke ka baka la’ng bagolo ba Bakriste ba se na lebaka la go phadišana? (b) Ke ka baka la’ng 1 Petro 4:10 e šoma go bahlanka ba Modimo ka moka?
8 Boemo bja kgopolo bjoo Bakriste ba swanetšego go ba le bjona borapeding bja bona bo hlalositšwe mantšung a ao a buduletšwego a rego: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša [“ka go ipapetša le,” NW] e mongwê.” (Ba-Galatia 6:4) Ka ge bagolo ka phuthegong ba tseba gore ga ba phadišane seng sa bona, ba a dirišana gotee le go šoma gotee e le sehlopha. Ba thabela tema yeo yo mongwe le yo mongwe wa bona a ka e kgathago bakeng sa go hola phuthego ka moka. Ka gona, ba phema phadišano e sa laolegego gomme ba beela phuthego ka moka mohlala o mobotse wa botee.
9 Ka baka la nywaga, phihlelo goba bokgoni bja tlhago, bagolo ba bangwe ba ka dira dilo ka tsela e atlegago kudu go feta ba bangwe, goba ba ka ba ba e-na le temogo e kgolo kudu. Ka baka leo, bagolo ba na le maikarabelo a sa swanego ka mokgatlong wa Jehofa. Go e na le go ipapetša le ba bangwe, ba gopola keletšo ye e rego: “Le dirêlanê ka mo e mongwê le e mongwê a séditšwexo ka xôna ka xo xauxêlwa; le bê balaki ba botse ba dikabêlô tša mehuta-huta tša kxauxêlô ya Modimo.” (1 Petro 4:10) Ge e le gabotse, temana ye e šoma go bahlanka ba Jehofa ka moka, ka gobane go fihla bokgoleng bjo itšego ka moka ba neilwe mpho ya tsebo e nepagetšego gomme ka moka ba thabela tokelo ya go tšea karolo bodireding bja Bokriste.
10. Ke ka tsela efe feela yeo ka yona tirelo ya rena e kgethwa e tlago go amogelega go Jehofa?
10 Tirelo ya rena e kgethwa e thabiša Jehofa ge feela re e dira ka lerato le ka boineelo, e sego bakeng sa gore re phale ba bangwe. Ka gona ke gabohlokwa gore re be le pono e leka-lekanego ka modiro wa rena tabeng ya go thekga borapedi bja therešo. Le ge go se na yo a ka ahlolago maikemišetšo a ba bangwe ka mo go nepagetšego, Jehofa ‘o fenyeka dipelo.’ (Diema 24:12; 1 Samuele 16:7) Ka gona, re dira gabotse ge re ipotšiša nako le nako gore, ‘Boikemišetšo bja-ka bja go dira mediro ya tumelo ke bofe?’—Psalme 24:3, 4; Mateo 5:8.
Pono e Nepagetšego ka Modiro wa Rena
11. Ke dipotšišo dife mabapi le modiro wa rena bodireding tšeo re ka naganišišago ka tšona ka mo go kwagalago?
11 Ge e ba maikemišetšo e le a bohlokwa kudu tabeng ya gore re amogelwe ke Jehofa, gona ke go fihla bokgoleng bofe moo re swanetšego go tshwenyega ka mediro ya rena ya tumelo? Ge feela re dira bodiredi bja rena ka boikemišetšo bjo bo swanetšego, na e tloga e le gabohlokwa gore re boloke pego ya seo re se dirago goba gore re se dira ka tekanyo e kaaka’ng? Dipotšišo tše di a kwagala, ka ge re sa nyake go lebelela dipalo e le tša bohlokwa kudu go feta mediro ya tumelo goba go dumelela pego e botse e e-ba selo se segolo seo re tshwenyegilego ka sona mabapi le modiro wa rena wa Bokriste.
12, 13. (a) A mangwe a mabaka ao ka ona re bolokago pego ya tirelo ya rena ya tšhemo ke afe? (b) Ke mabaka afe ao a dirago gore re thabe ge re lebelela pego ka moka ya modiro wa rena wa boboledi?
12 Ela hloko seo puku ya Go Rulaganyetšwa go Dira Thato ya Jehofa e se bolelago ge e re: “Balatedi ba pele ba Jesu Kriste ba be ba kgahlegela dipego tša tšwelopele modirong wa boboledi. (Mareka 6:30) Puku ya Beibele ya Ditiro e re botša gore go be go e-na le batho ba ka bago 120 ge moya o mokgethwa o be o tšhollelwa barutiwa ka Pentekoste. Go se go ye kae palo ya barutiwa e ile ya golela go ba 3 000 gomme ka morago ga moo ya golela go ba 5 000. . . . (Ditiro 1:15; 2:5-11, 41, 47; 4:4; 6:7) Barutiwa ba swanetše go ba ba ile ba kgothatšwa gakaakang ke ditaba tša mabapi le dikoketšego tše!” Ka lebaka le le swanago, Dihlatse tša Jehofa lehono di katanela go boloka dipego tše di nepagetšego tša mabapi le seo di se fihleletšego lefaseng ka bophara e le ge di phethagatša mantšu a Jesu a rego: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:14, NW) Dipego tše di bjalo di bontšha seo se fihleletšwego e le ka kgonthe lefaseng ka bophara. Di bontšha moo go nyakegago thušo, gore ke dipuku dife tšeo di nyakegago le gore go nyakega tše kae bakeng sa go tšwetša pele modiro wa boboledi.
13 Ka gona, go bega modiro wa rena wa boboledi go re dira gore re kgone go phetha thomo ya rena ya go bolela ditaba tše dibotse tša Mmušo ka katlego kudu. Ka ntle le moo, na ga re kgothatšwe ke ge re e-kwa ka modiro woo bana babo rena ba o dirago dikarolong tše dingwe tša lefase? Ditaba tša mabapi le kgolo le koketšego lefaseng ka bophara di a re thabiša, di re tutueletša gore re oketše modiro wa rena gomme di re kgonthišetša gore Jehofa o a re šegofatša. Le gona, ke mo go kgotsofatšago gakaakang go tseba gore pego ya rena ya motho ka noši e akareditšwe pegong yeo ya lefase ka bophara! Pego ya rena ke e nyenyane ge e bapetšwa le palo-moka ya pego ya lefase ka bophara, eupša Jehofa o lemoga seo re se dirago. (Mareka 12:42, 43) Gopola gore ka ntle le pego ya gago, pego ka moka e be e ka se felele.
14. Ka ntle le go dira boboledi le go ruta, ke’ng seo se akaretšwago borapeding bja rena go Jehofa?
14 Ke therešo gore bontši bja seo Hlatse e nngwe le e nngwe e se dirago bakeng sa go phetha boikarabelo bja yona bjalo ka mohlanka yo a ineetšego wa Jehofa ga se tšwelele pegong ya yona. Ka mohlala, pego ga e akaretše thuto ya ka mehla ya motho ka noši ya Beibele, go ba gona dibokeng tša Bokriste le go tšea karolo go tšona, mediro ya phuthego, go thuša badumedi-gotee ge go nyakega, thekgo ya tša ditšhelete ya modiro wa Mmušo wa lefase ka bophara, bjalo-bjalo. Ka gona, le ge pego ya rena ya tšhemo e kgatha tema e kgolo tabeng ya go re thuša gore re kgomarele phišego ya rena boboleding le gore re pheme go tšwafa, re swanetše go ba le pono e botse ka yona. Ga se ra swanela go e lebelela e le lengwalo la tumelelo goba e le paseporoto, yeo e bontšhago gore re swanelwa ke go hwetša bophelo bjo bo sa felego.
“Dirôtô Medirong e Botse”
15. Le ge mediro ge e le noši e ka se re phološe, ke ka baka la’ng e nyakega?
15 Go molaleng gore gaešita le ge mediro ge e le noši e ka se re phološe, e a nyakega. Ke ka baka leo Bakriste ba bitšwago “sethšaba sa dirôtô medirong e botse” e bile ke ka baka leo ba kgothaletšwago gore ba “išanê leratong le medirong e botse.” (Tito 2:14; Ba-Hebere 10:24) E le go gatelela ntlha yeo, mongwadi yo mongwe wa Beibele e lego Jakobo, o fo bolela gore: “Bo-ka mmele xe e le o hwilexo xe o se n’e môya, le yôna tumêlô e hwile xe e se n’e medirô.”—Jakobo 2:26.
16. Ke’ng sa bohlokwa kudu go feta mediro, eupša ke’ng seo re swanetše go ba šedi mabapi le sona?
16 Gaešita le ge mediro e mebotse ka boyona e ka ba e le ya bohlokwa, maikemišetšo a go e dira a bohlokwa kudu. Ka gona ke gabohlale go rena gore nako le nako re hlahlobe maikemišetšo a rena. Lega go le bjalo, ka ge go se na motho yo a ka tsebago maikemišetšo a ba bangwe ka mo go nepagetšego, re swanetše go ba šedi gore re se ahlole ba bangwe. Re botšišwa e bile re newa karabo e lego molaleng, gore: “Wene O mang xe O itira moahlodi wa molata wa e mong? Xe a êma ó êmêla Mong wa xaxwe; xe a e-wa ó wêla Mong wa xaxwe.” (Ba-Roma 14:4) Jehofa e lego Mong wa batho bohle le Moahlodi wa gagwe yo a kgethilwego e lego Kriste Jesu, ba ka se re ahlole motheong wa mediro ya rena feela eupša ba tla re ahlola gape motheong wa maikemišetšo a rena, maemo a rena, lerato la rena le boineelo bja rena. Ke Jehofa feela le Kriste Jesu bao ba ka ahlolago ka mo go nepagetšego ge e ba re dirile seo Bakriste ba kgothaletšwago go se dira, mantšung a moapostola Paulo a rego: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.” (Mongwalo o sekamego ke wa rena.)—2 Timotheo 2:15; 2 Petro 1:10; 3:14.
17. Ge re dutše re leka go dira sohle seo re ka se kgonago, ke ka baka la’ng re swanetše go dula re gopola Jakobo 3:17?
17 Jehofa ke yo a leka-lekanego ge go tliwa dilong tšeo a di letetšego go rena. Go ya ka Jakobo 3:17, (NW) “bohlale bjo bo tšwago godimo,” gare ga dilo tše dingwe, “bo leka-lekane.” Na e be e ka se be tsela ya bohlale, gaešita le katlego ya kgonthe, gore re ekiše Jehofa tabeng ye? Ka gona, rena ka noši ga se ra swanela go ba le ditebelelo tše di sa leka-lekanago le tše di sa fihlelelegego goba go di letela go bana babo rena.
18. Re ka letela’ng ge re e-na le pono e leka-lekanego ka mediro ya rena le ka botho bjo bo sa swanelago bja Jehofa?
18 Ge feela re dutše re kgomarela pono e leka-lekanego ka mediro ya rena ya tumelo le ka botho bjo bo sa swanelago bja Jehofa, re tla dula re e-na le lethabo e lego leswao leo le hlaolago bahlanka ba Jehofa ba therešo. (Jesaya 65:13, 14) Re ka thabišwa ke ditšhegofatšo tšeo Jehofa a di tšhollelago batho ba gagwe e le sehlopha, go sa šetšwe gore rena ka noši re ka ba re kgona go dira dilo go fihla kae. Ge re tšwela pele re ‘kgopela e bile re rapela re e-na le tebogo,’ re tla lopa Modimo gore a re thuše go dira sohle seo re ka se kgonago. Ke moka, ka ntle le pelaelo, ‘khutšo ya Modimo, ye e fetago tlhaologanyo yohle, e tla boloka dipelo tša rena le dikgopolo tša rena go Kriste Jesu.’ (Ba-Filipi 4:4-7) Ee, re ka homotšwa ra ba ra kgothatšwa ke go tseba gore re ka phološwa, e sego ka mediro feela, eupša ka botho bjo bo sa swanelago bja Jehofa!
Na o ka Hlalosa Lebaka Leo ka Lona Bakriste
• ba phemago go ikgantšha ka dilo tšeo ba di fihleletšego?
• ba phemago go bontšha moya wa phadišano?
• ba begago modiro wa bona wa Bokriste wo ba o dirilego bodireding bja tšhemo?
• ba phemago go ahlola Bakriste-gotee le bona?
[Dipotšišo tša Thuto]
[Seswantšho go letlakala 15]
“Kxauxêlô ya-ka a e Xo lekanê”
[Diswantšho go letlakala 16, 17]
Bagolo ba thabela tema yeo yo mongwe le yo mongwe a e kgathago bakeng sa go hola phuthego
[Diswantšho go letlakala 18, 19]
Ka ntle le pego ya gago, pego ka moka e be e ka se felele