Jehofa o Šireletša Bao ba Mmotago
Jehofa o Šireletša Bao ba Mmotago
“Ka mehla ke tlo šireletšwa ke botho bya xaxo le pôtêxô y’axo.”—PSALME 40:11.
1. Kgoši Dafida o ile a kgopela’ng go Jehofa, gomme kgopelo yeo e phethagatšwa bjang mo nakong ye?
KGOŠI DAFIDA wa Isiraeleng ya bogologolo o be a ‘bota Jehofa e le ruri’ gomme o ile a tutueletšega go bolela gore Jehofa o ile a ‘mo sekegela tsebe, gomme a kwa kgoeletšo ya gagwe.’ (Psalme 40:1) Nako le nako o be a bona ka noši kamoo Jehofa a bego a šireletša bao ba Mo ratago. Ka gona, Dafida o be a ka kgopela gore Jehofa a mo šireletše ka mehla. (Psalme 40:11) Ka ge Dafida a be a le gare ga banna le basadi ba botegago bao ba holofeditšwego “tsoxô e lexo kaone,” mo nakong ye o šireletšegile ka kgopolong ya Jehofa e le yo a tlago go amogela moputso woo. (Ba-Hebere 11:32-35) Ka gona, bokamoso bja gagwe bo kgonthišeditšwe ka tsela e kaone ka mo go kgonegago. Leina la gagwe le ngwadilwe ka ‘pukung ya Jehofa ya kgopotšo.’—Maleaki 3:16.
2. Mangwalo a re thuša bjang go kwešiša seo se bolelwago ke go šireletšwa ke Jehofa?
2 Gaešita le ge batho ba ba botegago bao go boletšwego ka bona go Ba-Hebere kgaolo 11 ba phetše pele ga ge Jesu Kriste a ka tla lefaseng, ba ile ba phela ka go dumelelana le seo Jesu a se rutilego ge a be a re: “E a rataxo bophelô bya xaxwe, ó tlo bo timetša. Xomme e a hloilexo bophelô bya xaxwe lefaseng leno, ó tlo bo lôtêla bophelô byo bo sa felexo.” (Johane 12:25) Ka gona, go molaleng gore go šireletšwa ke Jehofa ga go bolele gore re ka se ke ra tlaišega goba ra tlaišwa. Ge e le gabotse go bolela gore motho o šireleditšwe ka tsela ya moya e le gore a kgone go tšwela pele a le boemong bjo bobotse pele ga Modimo.
3. Ke bohlatse bofe bjo re nago le bjona bja gore Kriste Jesu o be a šireleditšwe ke Jehofa, gomme mafelelo e bile afe?
3 Jesu ka boyena e be e le motho yo a bego a tlaišwa ka tsela e sehlogo le go rogakwa, gomme manaba a gagwe mafelelong a ile a kgona go mmolaya ka tsela e nyatšegago le e bohloko. Lega go le bjalo, se ga se ganetšane le kholofetšo ya Modimo ya gore o tla šireletša Mesia. (Jesaya 42:1-6) Go tsoga ga Jesu ka letšatši la boraro ka morago ga lehu la gagwe le le nyatšegago go bontšha gore Jehofa o kwele sello sa gagwe ge a kgopela thušo—go etša ge Jehofa a ile a kwa sello sa Dafida ge a kgopela thušo. Jehofa o ile a arabela ka go nea Jesu matla a gore a tšwele pele a botega. (Mateo 26:39) Ka ge a šireleditšwe ka tsela ye, Jesu o neilwe bophelo bja go se hwe legodimong, gomme batho ba dimilione bao ba bontšhitšego tumelo topollong ba na le kholofelo ya go phela ka mo go sa felego.
4. Ke kgonthišetšo efe yeo e neilwego Bakriste ba ba tloditšwego le “dinku tše dingwê”?
4 Re ka kgodišega gore Jehofa o sa dutše a ikemišeditše go šireletša bahlanka ba gagwe ba mehleng yeno le gore o kgona go dira bjalo go etša ge a be a dira bjalo mehleng ya Dafida le ya Jesu. (Jakobo 1:17) Bana babo Jesu ba sego kae ba ba tloditšwego bao ba sa dutšego ba le lefaseng ba ka ithekga ka kholofetšo ya Jehofa ya gore: “Xore re jê bohwa byo bo sa bolexo, byo bo se naxo senyalô, byo bo sa ônalexo, byo Le bo-boloketšwexo lexodimong. Lena ba Le lôtêxaxo ka matla a Modimo ka tumêlô, xore Le fihlêlê phološô ye e lokišeditšwexo xo tlo utollwa lebakeng la bofêlô.” (1 Petro 1:4, 5) “Dinku tše dingwê,” tšeo di nago le kholofelo ya go phela lefaseng, le tšona ka mo go swanago di ka bota Modimo le kholofetšo ya gagwe yeo a e boletšego ka mopsalme ge a re: “Ratang Morêna, lena Baxauxêlwa ba xaxwe bohle. Morêna ó leta ba ba bôtêxaxo.”—Johane 10:16; Psalme 31:23.
Ba Šireleditšwe Moyeng
5, 6. (a) Batho ba Modimo ba šireleditšwe bjang mehleng yeno? (b) Ke tswalano efe yeo ba ba tloditšwego ba nago le yona le Jehofa, gomme go thwe’ng ka bao ba nago le kholofelo ya go phela lefaseng?
5 Mehleng yeno, Jehofa o dirile ditokišetšo tša go šireletša batho ba gagwe ka tsela ya moya. Le ge a sa ba šireletše tlaišong goba mathateng le manyaming ao a tlwaelegilego bophelong, ka potego o ba neile thušo le tutuetšo e nyakegago bakeng sa gore ba šireletše tswalano ya bona ya kgaufsi le yena. Motheo wo ba agilego tswalano ye go ona ke tumelo yeo ba nago le yona tokišetšong ya Modimo e lerato ya topollo. Ba bangwe ba Bakriste ba bao ba botegago ba tloditšwe ka moya wa Modimo e le gore e be babuši-gotee le Kriste legodimong. Ba tsebaditšwe e le ba lokilego bjalo ka bana ba Modimo ba moya, gomme mantšu a a šoma go bona a rego: “Ké Yêna a re ubutšexo matleng a lefsifsi, a re khudušetša mmušong wa Morwa-moratwa wa xaxwe. Yo re hweditšexo topollô ka Yêna ka madi a xaxwe, e lexo xo lebalêlwa dibe.”—Ba-Kolose 1:13, 14.
6 Bakriste ba bangwe ba ba botegago ba dimilione ba kgonthišeditšwe gore le bona ba tla holwa ke tokišetšo ya Modimo ya topollo. Re bala gore: “Yêna Morwa-motho xa a ka a tlêla xo dirêlwa; ó tlile xo dirêla le xo neêla bophelô bya xaxwe xore e bê topollô ya ba bantši.” (Mareka 10:45) Bakriste bao ba lebeletše pele gore ka nako e swanetšego ba tla thabela “tokoloxô ya xe bana ba Modimo bà e-ya letaxong.” (Ba-Roma 8:21) Go sa dutše go le bjalo, ba tšeela godimo tswalano ya bona ya motho ka noši le Modimo gomme ba tloga ba katanela go matlafatša tswalano yeo.
7. Ke ka tsela efe Jehofa lehono a šireletšago boemo bjo bobotse bja moya bja batho ba gagwe?
7 Tsela e nngwe yeo ka yona Jehofa a šireletšago boemo bjo bobotse bja moya bja batho ba gagwe ke ka go ba nea lenaneo la tlwaetšo e tšwelago pele. Tlwaetšo ye e ba thuša gore ba hwetše tsebo e nepagetšego kudu ya therešo. Le gona, Jehofa Mateo 24:45.
o ba nea tlhahlo e tšwelago pele ka Lentšu la gagwe, ka mokgatlo wa gagwe le ka moya wa gagwe o mokgethwa. Ka tlase ga tlhahlo ya “molaki e a bôtêxaxo yo bohlale,” batho ba Modimo go dikologa lefase ba swana le lapa leo le bopšago ke batho ba tšwago ditšhabeng tše di fapa-fapanego. Sehlopha sa molaki se hlokomela dinyakwa tša moya gomme ge go nyakega se hlokomela gaešita le dinyakwa tša nama tša lapa la bahlanka ba Jehofa—go sa šetšwe setlogo sa setšhaba sa bona goba boemo bja bona setšhabeng.—8. Ke kholofelo efe yeo Jehofa a nago le yona go batho ba gagwe bao ba mmotegelago ka go se kwanantšhe, gomme o ba kgonthišetša’ng?
8 Go etša ge Jehofa a se a ka a šireletša Jesu ka tsela ya kgonthe ditlhaselong tša manaba a gagwe, ga A šireletše Bakriste ka tsela yeo lehono. Eupša se ga se bolele gore Modimo ga a re rate. Ga go bjalo le gatee! Go e na le moo, se se bonagatša kholofelo yeo a nago le yona go bona ya gore ba tla dula ba le ka lehlakoreng la gagwe tabeng ya kgang e kgolo ya legohle. (Jobo 1:8-12; Diema 27:11) Jehofa a ka se ke a lahla bao ba mmotegelago ka go se kwanantšhe, “xobane Morêna ó rata tša tokô; baxauxêlwa ba xaxwe xa’ ba lahle; ó tlo ba lôtôla neng le neng.”—Psalme 37:28.
Ba Šireleditšwe ka Botho bjo Lerato le Potego
9, 10. (a) Go botega ga Jehofa go šireletša batho ba gagwe bjang? (b) Beibele e bontšha bjang gore Jehofa ka botho bja gagwe bjo lerato o šireletša batho ba gagwe bao ba botegago ka go se kwanantšhe?
9 Thapelong ya gagwe yeo e begilwego go Psalme 40, Dafida o kgopetše gore a šireletšwe ka botho bja Jehofa bjo lerato le potego ya Gagwe. Go botega ga Jehofa le go rata ga gagwe toko go nyaka gore a bolele ditekanyetšo tša gagwe ka tsela e kwagalago. Bao ba phelago ka ditekanyetšo tše ba šireleditšwe ka tekanyo e kgolo ditlalelong, dipoifong le mathateng ao bao ba di hlokomologago ba lebeletšanago le ona. Ka mohlala, re ka itšhireletša gomme ra šireletša le bao re ba ratago mathateng a mantši ao a kwešago bohloko ge e ba re phema go diriša dihlare-tagi le dino-tagi gampe, re phema boitshwaro bjo bo gobogilego bja tša botona le botshadi le tsela ya bophelo e šoro. Le gona, gaešita le bao ba arogago tseleng ya Jehofa ya potego—go etša ge Dafida ka dinako tše dingwe a ile a dira bjalo—ba na le kgonthišetšo ya gore bafoši bao ba itsholago ba sa dutše ba ka “khuta” ka Modimo. Batho ba bjalo ba ka goeletša ka lethabo gore: “O ntwêla kotsing.” (Psalme 32:7) Ruri a ke mantšu a bontšhago botho bja Modimo bjo lerato!
10 Mohlala o mongwe wa botho bja Modimo bjo lerato ke gore Modimo o lemoša bahlanka ba gagwe gore ba dule ba ikarotše lefaseng le kgopo, leo go se go ye kae a tlago go le fediša. Re bala gore: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng.” Ka go kwa keletšo ye le ka go dira dilo ka go dumelelana le yona, re ka šireletša maphelo a rena ka tsela ya kgonthe ka mo go sa 1 Johane 2:15-17.
felego, ka gobane ditemana tše di tšwela pele ka gore: “Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”—Ba Šireleditšwe ke Bokgoni bja go Nagana, Temogo le Bohlale
11, 12. Hlalosa kamoo bokgoni bja go nagana, temogo le bohlale di re šireletšago ka gona.
11 Go bao ba nyakago go amogelwa ke Modimo, morwa wa Dafida e lego Salomo o ile a budulelwa gore a ngwale gore: “Xôna keleletšô [“matla a go nagana,” NW] e tlo Xo lôtôla; O tlo namolêlwa ke temoxô.” O ile a kgothaletša gape gore: ‘Rua bohlale o se bo tlogele; bo go lotole. Bo rate, bo go šireletše.’—Diema 2:11; 4:5, 6.
12 Re diriša matla a rena a go nagana ge e ba re naganišiša ka seo re ithutago sona go tšwa Lentšung la Modimo. Go dira bjalo go re thuša gore re be le temogo e kgolo kudu e le gore re ka kgona go ipeela dilo tšeo di tlago pele tše di swanetšego. Se ke sa bohlokwa, ka ge bontši bja rena re tseba—mohlomongwe go tšwa phihlelong yeo re bilego le yona—gore mathata a rotoga ge batho ka boomo goba ka ntle le maikemišetšo ba ipeela dilo tše di tlago pele tšeo di sa bontšhego bohlale. Lefase la Sathane le bea ka pele ga rena dipakane tša mahumo a dilo tše di bonagalago, botumo le matla, mola Jehofa a re kgothaletša gore re lebiše tlhokomelo ya rena dilong tša moya tšeo di lego bohlokwa kudu. Go palelwa ke go etiša dilo tša moya pele ga dilo tša nama go ka dira gore malapa a arogane, segwera se senyege le gore dipakane tša moya di nyamelele. Ka baka leo, motho a ka buna feela therešo e kwešago bohloko yeo e bontšhitšwego ke mantšu a Jesu a rego: “Motho xo tlo mo hola’ng xe a ka rua lefase ka moka, ’me a senyêxêlwa le môya wa xaxwe?” (Mareka 8:36) Bohlale bo nyaka gore re kwe keletšo ya Jesu e rego: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:33.
Kotsi ya go ba Baithati
13, 14. Boithati bo bolela’ng, gomme ke ka baka la’ng go ba baithati e se gabohlale?
13 Batho ka tlhago ba a ithata. Lega go le bjalo, ge dikganyogo le dikgahlego tša motho e e-ba tša bohlokwa kudu bophelong, se se baka kotsi. Ka gona, e le gore re šireletše segwera sa rena le yena, Jehofa o re laela gore re pheme go ba baithati. Boithati bo bolela gore “motho o tshwenyega feela ka dikganyogo tša gagwe, dinyakwa tša gagwe goba dikgahlego tša gagwe.” Na seo ga se re nee tlhaloso e nepagetšego ka batho ba bantši lehono? Ke mo go lemogegago gore Beibele e bolela e sa le pele gore “mehleng ya bofêlô” ya tshepedišo e kgopo ya Sathane, “batho e tlo ba ba xo ithata.”—2 Timotheo 3:1, 2.
Luka 10:27; Ba-Filipi 2:4) Batho ka kakaretšo ba ka lebelela se e le se se sa kwagalego, lega go le bjalo se ke sa bohlokwa ge e ba re nyaka go thabela manyalo a atlegago, ditswalano tša lapa tše di thabilego le segwera se se kgotsofatšago. Ka gona, mohlanka wa therešo wa Jehofa le ka mohla ga se a swanela go dumelela boithati bja tlhago gore bo laole bophelo bja gagwe gomme bo mo dire gore a hlokomologe mediro ya bohlokwa kudu. Selo sa bohlokwa kudu ke gore se se bolela mediro yeo a e neilwego ke Jehofa, e lego Modimo yo a mo rapelago.
14 Bakriste ba kwešiša gore ke gabohlale go ela hloko taelo ya Beibele ya gore ba naganele ba bangwe, gomme ba ba rate ka tsela yeo ba ithatago ka yona. (15, 16. (a) Boemo bja kgopolo bja boithati bo ka feleletša ka’ng, go etša ge bo bontšhitšwe ke bomang? (b) Ge e le gabotse, motho o dira’ng ge a akgofela go ahlola ba bangwe?
15 Boemo bja kgopolo bja boithati bo ka dira motho gore a itire moloki, e lego seo ka morago se ka dirago gore motho a se be le kgopolo e bulegilego, a ikgogomoše. Beibele e bolela ka go lebanya gore: “Wene motho, le xe O ka ba mang, wene O ahlolaxo tša ba bangwê, xa O na mo O kaxo phêma; xobane xe O ahlola tša e mongwê, e ba xo ipea molato, ka xe le wêna O dira tše O di sôlaxo.” (Ba-Roma 2:1; 14:4, 10) Baetapele ba bodumedi ba mehleng ya Jesu ba be ba kgodišegile kudu gore ke baloki moo ba ilego ba ikwa ba swanelega go ahlola Jesu le balatedi ba gagwe. Ka go dira bjalo, ba ile ba ipea e le baahlodi. Ka ge ba be ba sa lemoge mafokodi a bona ka noši, ge e le gabotse ba be ba ikahlola.
16 Judase e lego molatedi wa Jesu yo a ilego a mo eka, o ile a itumelela gore a be moahlodi wa ba bangwe. Tiragalong ya kua Bethania ge Maria e lego kgaetšedi ya Latsaro a be a tlotša Jesu ka setlolo se se nkgago bose, Judase o ile a ganetša seo ka go tia. O ile a bonagatša pefelo ya gagwe ka go nea mabaka ka gore: “Ké xo re’ng setlôlô seo sè sa ka sa rekišwa ka mašeleng a makxolo a mararo, a newa badiitšana?” Eupša pego e tšwela pele ka go hlalosa gore: “Xe a r’yalo ó be a sa boledišwe ke xo setša badiitšana, ké ka xobane e be e le lehodu, à swere sekhwama sa tše ba bexo ba di fiwa.” (Johane 12:1-6) Anke le ka mohla re se ke ra swana le Judase goba baetapele ba bodumedi, bao ba bego ba akgofela go ahlola ba bangwe, e le ge ba ikahlola.
17. Bontšha kotsi yeo e bakwago ke go ikgodiša goba go ipota ka mo go feteletšego.
17 Ke mo go nyamišago gore Bakriste ba bangwe ba pele, le ge e be e se mahodu go swana le Judase, ba ile ba fetoga baikgogomoši, gomme ba ba le boikgodišo. Jakobo o ngwadile ka bona gore: “Le kxanthša boikxoxomošô.” Ke moka o ile a oketša ka gore: “Boikxanthšô byoo kê byo bobe ka moka xa byôna.” (Jakobo 4:16) Go ikgantšha ka dilo tšeo re di dirilego goba ka ditokelo tšeo re nago le tšona tirelong ya Jehofa ka tsela ya go ipota ke go ipolaya. (Diema 14:16) Re gopola seo se diragaletšego moapostola Petro, yoo ka nako ya ge a be a ipota ka mo go feteletšego a ilego a ikgantšha ka gore: “Le xe bohle ba ka xakanêxa ka tše O tl’o xo di dirwa, nna nka se kê ka bá ka xakanêxa. . . . Le xe nka thwe ke hwê naxô’, nka se latole ka r’yalo.” Ge e le gabotse, ga re na selo seo re ka ikgantšhago ka sona. Dilo ka moka tšeo re di thabelago e fo ba ka baka la botho bja Jehofa bjo lerato. Go gopola se go tla re thuša gore re se ke ra ikgodiša.—Mateo 26:33-35, 69-75.
18. Jehofa o ikwa bjang ka boikgogomošo?
18 Re botšwa gore: “Mafadi a latêlwa ke thôbêxô; xo wa xo etilwe pele ke boipoti.” Ka baka la’ng? Jehofa o araba ka gore: “Ke hloile boikxanthšô, le boikxoxomošô.” (Diema 8:13; 16:18) Ga go makatše gore Jehofa o be a galefišitšwe ke “boipoti bya pelo ya kxoši ya Asuri, xe a kxanthša mahlô a ikxoxomoša.” (Jesaya 10:12) Jehofa o ile a e otla. Go se go ye kae lefase la Sathane ka moka gotee le baetapele ba lona bao ba ikgogomošago le bao ba ikgodišago, bao ba bonagalago le bao ba sa bonagalego, le lona le tla otlwa. Anke le ka mohla re se ke ra ekiša boemo bja kgopolo bja boithati bja manaba a Jehofa!
19. Ke ka kgopolo efe batho ba Modimo ba ikgantšhago le ge ba ikokobeditše?
19 Bakriste ba therešo ba tloga ba e-na le mabaka a go ikgantšha ka go ba bahlanka ba Jehofa. (Jeremia 9:23) Ka nako e swanago, ba tloga ba e-na le mabaka a gore ba dule ba ikokobeditše. Ka baka la’ng? Ka gobane “ba dirile dibe bohle, ba hlaya letaxô la Modimo.” (Ba-Roma 3:23) Ka gona, e le gore re šireletše boemo bja rena re le bahlanka ba Jehofa, re swanetše go ba le boemo bja kgopolo bja moapostola Paulo yo a boletšego gore, “Jesu Kriste ó tlile lefaseng xore a phološê ba-dira-dibe,” ke moka a oketša ka gore: “Bao ke lexo thwadi ya bôná.”—1 Timotheo 1:15.
20. Jehofa o šireletša batho ba gagwe bjang gona bjale, gomme o tla ba šireletša bjang nakong e tlago?
20 Ka ge batho ba Jehofa ka lethabo ba beela dikgahlego tša bona ka thoko e le gore ba etiše dikgahlego tša Modimo pele, re ka kgonthišega gore Jehofa o tla tšwela pele a ba šireletša moyeng. Le gona, re ka kgonthišega gore ge masetla-pelo a magolo a hlasela, Jehofa a ka se šireletše batho ba gagwe moyeng feela eupša o tla ba šireletša le nameng. Ka morago ga go tsena lefaseng le lefsa la Modimo, ba tla kgona go goeletša ka gore: “Bônang, Modimo wa rena šó, yo re mmotilexo ’me a re phološa; ké Yêna Morêna yo re mmotilexo; a re hlalaleng re thabêlê phološô ya xaxwe.”—Jesaya 25:9.
Na o a Gopola?
• Kgoši Dafida le Jesu Kriste ba ile ba šireletšwa bjang?
• Batho ba Jehofa ba šireleditšwe bjang lehono?
• Ke ka baka la’ng re swanetše go phema go ba baithati?
• Ke ka baka la’ng re ka ikgantšhago le ge re ikokobeditše?
[Dipotšišo tša Thuto]
[Diswantšho go letlakala 9]
Jehofa o ile a šireletša Dafida le Jesu bjang?
[Diswantšho go letlakala 10, 11]
Batho ba Modimo ba šireleditšwe bjang moyeng lehono?
[Diswantšho go letlakala 12]
Le ge re ikgantšha ka go hlankela Jehofa, re swanetše go dula re ikokobeditše ka dinako tšohle