Na o Boledišana le Bao o ba Ratago?

MAKASINE wa Sepoliši wa beke le beke wa Polityka o bega gore, “bokgoni bja rena bja go boledišana le bao re ba ratago bo fokotšega kudu.” Kua United States, go akanyetšwa gore banyalani ba fetša metsotso e tshela feela ka letšatši ba boledišana ka tsela e holago. Ditsebi tše dingwe di nagana gore seripa sa dikarogano ka moka le ditlhalo di bakwa ke go fokotšega ga poledišano.

Go thwe’ng ka poledišano magareng ga batswadi le bana? Pego e lego ka mo godimo e hlalositše gore, mabakeng a mantši, “ga e be poledišano, eupša e fetoga nako ya dipotšišo: Go be go le bjang sekolong? Bagwera ba gago ba bjang?” Pego ye e botšiša gore, “bana ba rena ba tla ithuta bjang go aga ditswalano tšeo go tšona go bontšhwago maikwelo ka bolokologi?”

Ka ge bokgoni bja go ba le poledišano e botse bo sa itlele feela, re ka kaonefatša bjang bokgoni bja rena bja go boledišana le ba bangwe? Morutiwa wa Mokriste e lego Jakobo o re neile keletšo e botse e rego: “Motho a a akxofišê xo kwa, a diêxê xo bolêla, a diêxê xo xalefa.” (Jakobo 1:19) Ee, gore re be le poledišano e agago, re swanetše go theetša ka kelohloko re se šitiše ba bangwe ka go fela pelo goba ka go akgofela go fihlelela diphetho. Phema go ntšha diphošo ka gobane seo se ka senya poledišano gabonolo. Go feta moo, Jesu o ile a diriša dipotšišo ka bohlale a sa botšološiše, eupša a fata seo se lego ka dipelong tša batheetši ba gagwe le go matlafatša tlemo magareng ga bona.—Diema 20:5; Mateo 16:13-17; 17:24-27.

E-ba wa pele go boledišaneng le bao o ba ratago le go dirišeng melao ya motheo ye e hwetšwago ka Beibeleng. Seo se ka feleletša ka tswalano e borutho ye e tlago go ratwa ka nywaga e mentši—gaešita le bophelong ka moka.