O se ke wa Lapa go Dira Botse

MOAPOSTOLA PETRO o kgothaleditše gore: “Tsela ye Le tšeaxo ka yôna Lè le xare xa ba-ntlê, a e bê e botse.” (1 Petro 2:12) Lentšu la Segerika leo le fetoletšwego e le “botse” le bolela ka selo “se se bogegago, se se retegago, se se hlomphegago le se se kgahlišago.” Mehleng yeno, go letela gore batho ka kakaretšo ba itshware ka tsela e lemogegago goba e hlomphegago go ka bonagala go sa kwagale e le ruri. Lega go le bjalo, lehono batho ba Jehofa ka kakaretšo ba ile ba atlega tabeng ya go latela kgothatšo ya Petro. Ge e le gabotse, ba tsebja lefaseng ka bophara ka boitshwaro bja bona bjo bobotse.

Se se lemogega kudu ge re nagana ka dikgateletšo le mathata ao re lebeletšanago le ona ‘dinakong tše tše hlobaetšago tšeo go lego thata go lebeletšana le tšona.’ (2 Timotheo 3:1, bapiša le NW.) Diteko ke karolo ya bophelo bja rena bja letšatši le letšatši, gomme go ganetšwa ga tsela ya Mokriste ya bophelo ke mo go tlwaelegilego. Go oketša moo, gaešita le ge diteko tše dingwe e le tša nakwana, tše dingwe di ba gona ka nako e telele, gaešita le go tšwela pele di gola. Lega go le bjalo, moapostola Paulo o eleditše ka gore: “A re se kê ra lapa xo dira botse; xobane xe re sa lesetše, re tlo buna ka lebaka la xôna.” (Ba-Galatia 6:9) Eupša o ka kgona bjang go dira botse—le go tšwela pele o dira botse—mola o dutše o lebeletšane le diteko tše di kwešago bohloko gotee le bonaba bjo bo phegelelago?

Dilo Tšeo di ka re Thušago go Dira Botse

Go molaleng gore go ba “yo a retegago, yo a hlomphegago le yo a kgahlišago” go akaretša motho wa ka gare, e lego boemo bja pelo. Ka gona, go kgomarela boitshwaro bjo bobotse ge re lebeletšane le diteko le mathata ga se selo seo se itiragalelago feela, eupša go tlišwa ke go latela melao ya motheo ya Beibele letšatši le letšatši le go e diriša dikarolong ka moka tša bophelo. Ke dilo dife tše dingwe tšeo di ka thušago tabeng ye? Ela hloko tše di latelago.

Hlagolela boemo bja kgopolo bja Kriste. Go kgotlelela selo seo se ka bonagalago e se toka go nyaka boikokobetšo. Ga go bonagale motho yo a nago le boithati a ka kgona go kgotlelela go swarwa gampe. Lega go le bjalo, Jesu o ile “a ikokobetša a ba e a kwaxo le xo iša lehung.” (Ba-Filipi 2:5, 8) Ka go mo ekiša, re ka se ke ra ‘lapa goba go lesetša’ tirelong ya rena e kgethwa. (Ba-Hebere 12:2, 3) E-kwa ka boikokobetšo ka go dirišana ka go rata le bao ba etelelago pele ka phuthegong ya geno. (Ba-Hebere 13:17) Ithute go lebelela ba bangwe e le bao ‘ba go fetago,’ o bea dikgahlego tša bona pele ga tša gago.—Ba-Filipi 2:3, 4, bapiša le PK.

Gopola gore Jehofa o a go rata. Re swanetše go kgodišega gore Jehofa “ba ba Mo nyakaxo ó a ba putsa.” (Ba-Hebere 11:6) O kgomega e le ka kgonthe ka rena gomme o nyaka gore re hwetše bophelo bjo bo sa felego. (1 Timotheo 2:4; 1 Petro 5:7) Go gopola gore ga go na selo seo se ka fedišago lerato la Modimo go rena go tla re thuša gore re se ke ra lapa go dira botse ge re le ka tlase ga teko.—Ba-Roma 8:38, 39.

Bota Jehofa ka mo go feletšego. Go bota Jehofa go bohlokwa, kudu-kudu ge go bonagala diteko di sa fele goba di bea bophelo bja rena kotsing. Re swanetše go ba le kholofelo e  feletšego ya gore Jehofa a ka se ke a dumelela teko le ge e le efe ‘e kago re palela,’ le gore ka mehla o tla “bea sebaka sa xo tlo efoxa.” (1 Ba-Korinthe 10:13) Re ka lebeletšana ka sebete gaešita le kotsi ya lehu ge e ba re bota Jehofa.—2 Ba-Korinthe 1:8, 9.

Phegelela thapelong. Thapelo e tšwago pelong e bohlokwa. (Ba-Roma 12:12) Thapelo ya kgonthe ke e nngwe ya ditsela tšeo ka tšona re batamelago kgaufsi le Jehofa. (Jakobo 4:8) Ka diphihlelo tša motho ka noši, re lemoga gore “ó a re kwa xe re kxopêla.” (1 Johane 5:14) Ge e ba Jehofa a dumelela diteko gore di tšwele pele di leka potego ya rena, re rapelela thušo ya gagwe gore re kgotlelele. (Luka 22:41-43) Thapelo e re ruta gore le ka mohla ga re noši le gore ge re thekgwa ke Jehofa, re tla dula re le bafenyi.—Ba-Roma 8:31, 37.

Mediro e Mebotse—‘E a Ratega le go Tumišega’

Nako le nako, Bakriste ka moka ba “hlokofatšwa . . . melekong ya mehuta-huta.” Lega go le bjalo, re swanetše gore “re se kê ra lapa xo dira botse.” Ge o gateletšegile, matlafatšwa ke taba ya go tseba gore potego ya gago e tla feleletša “è ratêxa, è tumišêxa, è na le letaxô.” (1 Petro 1:6, 7) Diriša ditokišetšo tša moya tšeo di tšwago go Jehofa ka mo go feletšego bakeng sa go imatlafatša tumelong. Ge o nyaka thušo ya motho ka noši, e-ya go bao ba hlankelago e le badiši, barutiši le baeletši ka phuthegong ya Bokriste. (Ditiro 20:28) E-ba gona ka mehla dibokeng ka moka tša phuthego, tšeo di ‘re išago leratong le medirong e mebotse.’ (Ba-Hebere 10:24) Lenaneo la go bala Beibele ka mehla le thuto ya motho ka noši di tla go thuša gore o dule o phafogile e bile o matlafetše moyeng; go tšea karolo ka mehla bodireding bja Bokriste le gona go tla go matlafatša moyeng.—Psalme 1:1-3; Mateo 24:14.

Ge o tšwela pele o lemoga lerato le tlhokomelo ya Jehofa, o tla tšwela pele o kganyoga go ba ‘seroto medirong e mebotse.’ (Tito 2:14) Gopola gore “e a tl’o xo tiišetša xo fihla bofelong, ké yêna a tl’o xo phološwa.” (Mateo 24:13) Ee, ikemišetše gore ‘o se ke wa lapa go dira botse’!

[Ntlhakgolo go letlakala 29]

Re swanetše go ba le kholofelo e feletšego ya gore Jehofa a ka se ke a dumelela teko le ge e le efe ‘e kago re palela,’ le gore ka mehla o tla “bea sebaka sa xo tlo efoxa”

[Diswantšho go letlakala 30]

Go dula re swaregile medirong ya pušo ya Modimo go ka thuša go re hlamela go lebeletšana le diteko