Bafsa, Retang Jehofa!
Bafsa, Retang Jehofa!
“Rêtang Morêna mono lefaseng, . . . Lena masoxana le lena basetsana.”—PSALME 148:7, 12.
1, 2. (a) Ke dithibelo tša mohuta ofe tšeo bafsa ba bantši ba di tsebago? (b) Ke ka baka la’ng bafsa ba sa swanela go hloya dithibelo tšeo batswadi ba bona ba ba beelago tšona?
BAFSA gantši ba tloga ba tseba seo ba sego ba tšwa ba dumelelwa go se dira. Ba bantši ba bona ba ka go botša kapejana gore ba swanetše go ba ba e-na le nywaga e mekae pele ba ka dumelelwa go tshela setarata ba nnoši goba go dula go fihla iring e itšego ya bošego goba go otlela koloi. Ka dinako tše dingwe, mofsa a ka nagana gore dikgopelo tša gagwe tše dintši kudu di arabja ka karabo e swanago ya gore, “Ema go fihlela ge o gotše.”
2 Lena bafsa le a tseba gore batswadi ba lena ba nagana gore ke gabohlale gore ba le beele dithibelo tše di bjalo, mohlomongwe bakeng sa go le šireletša. Le gona, le tloga le tseba gore Jehofa o thabišwa ke ge le theetša batswadi ba lena. (Ba-Kolose 3:20) Lega go le bjalo, na le ka mohla le ikwa eka bophelo bja lena ga se bja tšwa bo thoma? Na dilo ka moka tša bohlokwa di thibetšwe go ba go fihlela ge le gotše? Se e tloga e se therešo! Go na le modiro wo o dirwago lehono wo o lego bohlokwa kudu go feta tokelo le ge e le efe e nngwe yeo le ka bago le e letetše. Na lena bafsa le dumeletšwe go tšea karolo modirong woo? Se sekaone le go feta ke gore—ge e le gabotse Modimo yo a Phagamego Kudu ke yena a le laletšago gore le dire bjalo!
3. Jehofa o laletša bafsa gore ba be le tokelo efe, gomme ke dipotšišo dife tšeo re tlago go di ahla-ahla ga bjale?
3 Ke modiro wa mohuta ofe woo re bolelago ka wona? Ela hloko mantšu a temana ya sehlogo se a rego: “Rêtang Morêna mono lefaseng, . . . Lena masoxana le lena basetsana, ba baxolo le ba bafsa.” (Psalme 148:7, 12) Yeo ke tokelo e kgolo ye o ka bago le yona: O ka reta Jehofa. Bjalo ka mofsa, na o thabišwa ke go tšea karolo modirong woo? Ba bantši ba thabišwa ke seo. E le gore re bone lebaka leo ka lona e lego mo go swanetšego go ikwa ka tsela yeo, anke re ahla-ahleng dipotšišo tše tharo. Ya pele, ke ka baka la’ng o swanetše go reta Jehofa? Ya bobedi, o ka mo reta bjang ka tsela e atlegago? Ya boraro, ke neng moo e lego nako e swanetšego ya go thoma go reta Jehofa?
Ke ka Baka La’ng o Swanetše go Reta Jehofa?
4, 5. (a) Go ya ka Psalme ya bo-148, re boemong bofe bjo bo kgahlišago? (b) Tlholo yeo e sa bolelego goba yeo e sa neego mabaka e ka tšwela pele bjang e reta Jehofa?
4 Lebaka le legolo la go reta Jehofa ke ka gobane ke yena Mmopi. Psalme ya bo-148 e re thuša go lebiša tlhokomelo therešong ye. Akanya feela: Ge e ba o be o ka batamela sehlopha se segolo sa batho bao ba opelago kopelo e kgahlišago le e tutuetšago ba le boteeng, o be o ka ikwa bjang? Go thwe’ng ge e ba o be o tseba gore mantšu a kopelo yeo ke a therešo, a hlalosa dikgopolo tšeo o bego o tseba gore ke tše bohlokwa, tše di thabišago le tše di agago? Na o be o ka ikwa o nyaka go ithuta mantšu ao le go tšea karolo kopelong? Ba bantši ba rena ba be ba tla nyaka go dira bjalo. Ge e le gabotse, Psalme ya bo-148 e bontšha gore o boemong bjo bo swanago eupša bjo bo kgahlišago ka go fetišiša. Psalme yeo e hlalosa ka lešaba le legolo leo ka moka le retago Jehofa le le boteeng. Lega go le bjalo, ge o dutše o bala psalme ye, o ka lemoga selo se sengwe seo se sa tlwaelegago. Selo seo ke’ng?
5 Bareti ba bantši bao ba hlalositšwego go Psalme 148 ga ba kgone go bolela goba go nea mabaka. Ka mohlala, re bala ka letšatši, ngwedi, dinaledi, lehlwa, moya, dithaba le meboto tšeo di retago Jehofa. Tlholo ye yeo e sa phelego e ka reta Jehofa bjang? (Ditemana 3, 8, 9) Ke therešo gore e mo reta ka tsela e swanago le yeo dihlare, dibopiwa tša ka lewatleng le diphoofolo di mo retago ka yona. (Ditemana 7, 9, 10) Na o kile wa bogela go sobela mo go kgahlišago ga letšatši goba wa lebelela ngwedi o tletšego wo o lego leratadimeng leo le tletšego ka dinaledi goba wa sega diphoofolo tšeo di bapalago o tletše lethabo goba wa kgahlwa kudu ke sebopego se sebotse sa naga? Gona o “kwele” kopelo ya theto yeo e tšwago tlholong. Dilo ka moka tšeo Jehofa a di dirilego di re gopotša gore ke Mmopi yo matla ohle, gomme ga go na motho le o tee legohleng ka moka yo a nago le matla a makaalo, bohlale bjo bokaalo goba lerato le lekaalo.—Ba-Roma 1:20; Kutollo 4:11.
6, 7. (a) Psalme ya bo-148 e hlalosa mabapi le dibopiwa dife tše bohlale tšeo di retago Jehofa? (b) Ke ka baka la’ng re ka tutueletšega go reta Jehofa? Bontšha.
6 Psalme ya bo-148 e hlalosa gape ka tlholo e bohlale e le yeo e retago Jehofa. Go temana 2, re bona “dirá” tša Jehofa tša legodimong e lego barongwa, di mo reta. Go Ps 148 temana 11, batho ba matla le bao ba nago le tutuetšo, ba bjalo ka dikgoši le baahlodi, ba laletšwa gore le bona ba tšee karolo tabeng ya go mo reta. Ge e ba barongwa ba matla ba thabišwa ke go reta Jehofa, na motho yo a lego maemong a tlasana a ka bolela ka mo go swanetšego gore yena o bohlokwa kudu gore a ka dira bjalo? Ke moka, go ditemana 12 le 13, lena bafsa le laletšwa gore le tšee karolo go reteng Jehofa. Na le tutueletšega gore le nyake go dira seo?
7 Ela hloko papišo ye. Ge e ba o be o e-na le mogwera yo o ntšhanago sa inong le yena yo a nago le bokgoni bjo bo makatšago—mohlomongwe go tša dipapadi, go tša bokgabo goba go tša mmino—na o be o ka bolela ka yena go ba lapa leno goba go bagwera ba bangwe ba gago? Ga go pelaelo gore o be o ka dira bjalo. Ee, go ithuta ka dilo ka moka tšeo Jehofa a di dirilego go ka re kgoma ka tsela e swanago. Ka mohlala, Psalme e bolela gore magodimo ao a tletšego dinaledi ‘a dira gore re anege ka taba ye.’ Ge re nagana ka dilo tše di kgahlišago tšeo Jehofa a di fihleletšego, re ka se lese go botša ba bangwe ka Modimo wa rena. 19:1, 2
8, 9. Ke mabaka afe ao ka ona Jehofa a nyakago gore re mo rete?
8 Lebaka le lengwe le legolo la go reta Jehofa ke ka gobane a kganyoga gore re dire bjalo. Ka baka la’ng? Na ke ka gobane a nyaka go retwa ke batho? Aowa. Rena batho re ka ba re nyaka go retwa ka dinako tše dingwe, eupša Jehofa ke yo a phagamego kudu go re feta. (Jesaya 55:8) Ga a na dipelaelo mabapi le yena ka noši goba dika tša gagwe. (Jesaya 45:5) Lega go le bjalo, o kganyoga gore re mo rete gomme o thabišwa ke ge re dira bjalo. Ka baka la’ng? Ela hloko mabaka a mabedi. La pele, o tseba gore re swanetše go mo reta. O re hlamile re e-na le senyakwa sa moya, sa go nyaka go rapela. (Mateo 5:3) Jehofa o thabišwa ke ge a bona re kgotsofatša senyakwa seo, go swana le kamoo batswadi ba gago ba thabago ka gona ge ba bona o e-ja dijo tšeo ba tsebago gore di tla go fepa.—Johane 4:34.
9 La bobedi, Jehofa o tseba gore batho ba bangwe ba nyaka go re kwa re mo reta. Moapostola Paulo o ngwaletše lesogana Timotheo mantšu a a rego: “Itôtê O lôtê le thutô. Xe O dira byalo O tlo iphološa, wa phološa le bao ba Xo kwaxo.” (1 Timotheo 4:16) Ee, ge o ruta ba bangwe ka Jehofa Modimo e bile o mo reta, le bona ba ka thoma go tseba Jehofa. Tsebo e bjalo e ka ba lebiša phološong ya ka mo go sa felego!—Johane 17:3.
10. Ke ka baka la’ng re ikwa re tutueletšega go reta Modimo wa rena?
10 Go sa na le lebaka le lengwe la go reta Jehofa. Gopola papišo ya mabapi le mogwera wa gago yo a nago le bokgoni. Ge e ba o kwele ba bangwe ba bolela maaka ka yena, ba mo senya leina, na o be o ka se ikemišetše go mo reta le go feta? Ee, leina la Jehofa le senywa gohle lefaseng le. (Johane 8:44; Kutollo 12:9) Ka gona, bao ba mo ratago ba ikwa ba tutueletšega go bolela therešo ka yena e le gore ba hlatswe leina la gagwe. Na le wena o be o tla rata go bonagatša lerato la gago le tebogo ya gago go Jehofa gomme wa bontšha gore o nyaka gore e be Mmuši wa gago go e-na le gore o bušwe ke lenaba la gagwe le legolo e lego Sathane? O ka dira dilo tšeo ka moka ka go reta Jehofa. Ke moka, potšišo e latelago ke gore o ka dira seo bjang.
Kamoo Bafsa ba Bangwe ba Ilego ba Reta Jehofa
11. Ke mehlala efe ya ka Beibeleng yeo e bontšhago gore bafsa ba ka atlega kudu tabeng ya go reta Jehofa?
11 Beibele e bontšha gore bafsa gantši ba atlega kudu tabeng ya go reta Jehofa. Ka mohlala, go be go e-na le ngwanenyana wa mo-Isiraele yo a bego a thopilwe ke ba-Siria. O ile a nea bohlatse ka sebete go mong wa gagwe wa mosadi mabapi le moporofeta wa Jehofa e lego Elisa. Mantšu a gagwe a ile a feleletša ka gore go dirwe mohlolo, gomme go ile gwa newa bohlatse bjo matla. (2 Dikxoši 5:1-17) Jesu le yena o ile a nea bohlatse ka sebete ge e be e sa le ngwana. Ditiragalong ka moka tša bofseng bja gagwe tšeo di ka bago di ile tša begwa ka Mangwalong, Jehofa o ile a kgetha e tee, nakong ya ge Jesu wa nywaga e 12 a be a botšiša barutiši ba bodumedi dipotšišo ka sebete tempeleng ya Jerusalema gomme a ba tlogela ba makaditšwe ke kwešišo ya gagwe mabapi le ditsela tša Jehofa.—Luka 2:46-49.
12, 13. (a) Jesu o ile a dira’ng tempeleng pejana ga lehu la gagwe, gomme seo se ile sa ba le mafelelo afe bathong ba moo? (b) Jesu o ile a ikwa bjang ka theto yeo e bego e bolelwa ke bašemane ba banyenyane?
Mateo 21:15, 16; Johane 12:42.
12 Le gona, ge Jesu e be e šetše e le monna yo a ipheditšego, o ile a tutueletša bana gore ba rete Jehofa. Ka mohlala, matšatšing a sego kae pele ga lehu la gagwe, Jesu o ile a fetša nako a le tempeleng ya Jerusalema. Beibele e re, o ile a dira “matete” moo. O ile a raka bao ba bego ba dira lefelo le lekgethwa gore e be legolo la bahlakodi. O ile a ba a fodiša difofu le digole. Batho ka moka moo, kudu-kudu baetapele ba bodumedi, ba be ba swanetše go tutueletšega go reta Jehofa le Morwa wa gagwe, Mesia. Lega go le bjalo, se se nyamišago ke gore batho ba bantši mehleng yeo ga se ba ka ba bolela ditheto tše bjalo. Ba be ba tseba gore Jesu o be a romilwe ke Modimo, eupša ba be ba boifa baetapele ba bodumedi. Lega go le bjalo, sehlopha se sengwe sa batho se ile sa bolela ka sebete. Na o tseba gore e be e le bomang? Beibele e re: “Xe baperisita ba baxolo le bamangwalô ba bôna matete ao [Jesu] a a diraxo, bà bôna le bana ba bexo ba xoeletša moo Ntlong-kxêthwa ba re: Hosiana Morwa wa Dafida! ba hlonama ka kudu. Ba botšiša Jesu ba re: Tše ba di bolêlaxo a O a di kwa?”—13 Baperisita bao ba be ba letetše gore Jesu o tla homotša bašemane bao ba bego ba mo reta. Na o ile a ba homotša? O ile a dira se se fapanego! Jesu o ile a araba baperisita ka gore: “E! A xa L’ešo la bala mo xo rexo: O itheetše thêtô ka melomo ya bana ba masea?” Go molaleng gore Jesu le Tatagwe ba be ba thabišitšwe ke theto ya bašemane ba ba banyenyane. Bana bao ba be ba dira dilo ka moka tšeo batho ba bagolo ba moo ba bego ba swanetše go ba ba di dira. Menaganong ya bona ya bjana, dilo tšeo ka moka di swanetše go ba di be di bonagala di kwagala kudu. Ba be ba bona monna yo a dira dilo tše di makatšago, a bolela ka sebete le ka tumelo, gomme a bontšha lerato le le tseneletšego go Modimo le bathong ba gagwe. E be e le yo a bego a ipolela e le yena—“Morwa wa Dafida” yo a holofeditšwego, e lego Mesia. E le ge ba šegofatšwa ka baka la tumelo ya bona, bašemane ba ba ile ba ba le tokelo e nngwe gape ya go phethagatša boporofeta.—Psalme 8:2.
14. Dimpho tšeo bafsa ba nago le tšona di ba thuša bjang go reta Modimo?
14 Re ka ithuta’ng mehlaleng e bjalo? Re ka ithuta gore bafsa e ka ba bareti ba atlegago kudu ba Jehofa. Gantši ba na le bokgoni bja go kwešiša therešo gabotse le ka tsela e bonolo, gotee le go bontšha tumelo ya bona ka mafolofolo le ka phišego. Le gona, ba na le mpho yeo e boletšwego go Diema 20:29 ge e re: “Seala sa thsoxana ké matla a bôná.” Ee, lena bafsa le šegofaditšwe ka matla le mafolofolo—dilo tšeo e lego tša bohlokwa e le ka kgonthe tabeng ya go reta Jehofa. Le ka diriša bjang dimpho tše di bjalo ka tsela e atlegago?
O ka Reta Jehofa Bjang?
15. E le gore o rete Jehofa ka katlego, go nyakega boikemišetšo bofe?
15 Go ba yo a atlegago go thoma pelong. O ka se rete Jehofa ka tsela e atlegago ge e ba o dira bjalo ka gobane ba bangwe ba nyaka gore o dire bjalo. Gopola gore molao o mogolo go melao ka moka ke o rego: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” (Mateo 22:37) Na o tloga o tseba Jehofa ka go ithuta ga gago Lentšu la gagwe? Mafelelo a swanetšego a go ithuta mo go bjalo ke go rata Jehofa. Tsela ya tlhago ya go bontšha lerato leo ke ka go mo reta. Ge boikemišetšo bja gago bo šetše bo bonagala e bile bo matlafetše, gona o itokišeleditše go reta Jehofa ka mafolofolo.
16, 17. Ke tema efe yeo boitshwaro bo e kgathago tabeng ya go reta Jehofa? Bontšha.
16 Mo nakong ye, gaešita le pele o ka naganišiša ka seo o tlago go se bolela, ela hloko kamoo o tlago go gata mogato ka gona. Ge e ba ngwanenyana yola wa mo-Isiraele wa mehleng ya Elisa ka tlwaelo a be a se na mekgwa, a sa hlomphe goba a sa botege, o nagana gore bathopi ba gagwe ba ba-Siria ba ka ba ba ile ba theetša seo a bego a se bolela mabapi le moporofeta wa Jehofa? Ga go bonagale bjalo. Ka mo go swanago, go na le kgonagalo ya gore batho ba go theetše ka mo go oketšegilego ge e ba ba bona gore o a hlompha, o a botega e bile o itshwere gabotse. (Ba-Roma 2:21) Ela hloko mohlala wo.
17 Ngwanenyana wa nywaga e 11 kua Portugal o ile a lebeletšana le kgateletšo sekolong ya gore a keteke matšatši a maikhutšo ao a bego a ganetšana le letswalo la gagwe leo le tlwaeditšwego ka Beibele. Ka tlhompho o ile a hlalosetša morutišigadi wa gagwe lebaka leo ka lona a swanetšego go gana go dira bjalo, eupša morutišigadi o ile a mo kwera. Ge nako e dutše e e-ya, morutišigadi o ile a leka leboelela go mo nyamiša, ka go kwera bodumedi bja gagwe. Lega go le bjalo, ngwanenyana yo yo monyenyane o ile a dula a bontšha tlhompho. Nywaga e mentši ka morago, kgaetšedi yoo yo monyenyane o be a hlankela e le mmulamadibogo wa ka mehla, modiredi wa nako e tletšego. Kopanong, o ile a bogela ge batho ba be ba kolobetšwa gomme a tseba yo mongwe wa bona. E be e le motho yo e kilego ya ba morutišigadi wa gagwe! Ka morago ga go gokarelana ba sekišitše megokgo, mosadi yo a godilego o ile a botša yo monyenyane gore ga se a ka a lebala boitshwaro bjo bo hlomphegago bja morutwana wa gagwe. Hlatse e ile ya mo etela, gomme morutišigadi o ile a bolela ka boitshwaro bja yo e kilego ya ba morutwana wa gagwe. Ka baka leo, go ile gwa thongwa thuto ya Beibele, gomme mosadi yo o ile a amogela therešo ya Beibele. Ee, boitshwaro bja gago e ka ba tsela e matla kudu ya go reta Jehofa!
18. Ke’ng seo mofsa a ka se dirago ge e ba a dika-dika go thoma dipoledišano ka Beibele le ka Jehofa Modimo?
18 Na ka dinako tše dingwe o hwetša go le thata go thoma poledišano sekolong mabapi le tumelo ya gago? Ga se wena o nnoši o ikwago ka tsela yeo. Lega go le bjalo, o ka dira gore ba bangwe ba kgone go go botšiša ka tumelo ya gago. Ka mohlala, ge e ba go le molaong e bile go dumelelwa go dira bjalo, ke ka baka la’ng o sa sepele le dikgatišo tšeo di theilwego Beibeleng le go di bala nakong ya matena goba ka dinako tše dingwe ge go dumeletšwe go dira bjalo? Barutwana-gotee le wena ba ka go botšiša mabapi le seo o se balago. Ka go ba araba le go ba botša dilo tšeo o hwetšago di kgahliša mabapi le sehlogo goba puku yeo o e balago, o ka ikhwetša o šetše o thomile poledišano e botse. Gopola go ba botšiša dipotšišo, gomme o nyakišiše mabapi le seo barutwana-gotee le wena ba se dumelago. Theetša ka tlhompho, gomme o boledišane le bona mabapi le seo o ithutilego sona Beibeleng. Go etša ge diphihlelo tšeo di lego go letlakala 29 di bontšha, bafsa ba bantši ba reta Modimo sekolong. Se se ba tlišetša lethabo kudu gomme se thuša ba bantši gore ba tsebe Jehofa.
19. Bafsa ba ka atlega bjang ka mo go oketšegilego bodireding bja ntlo le ntlo?
19 Bodiredi bja ntlo le ntlo ke tsela e atlegago kudu ya go reta Jehofa. Ge e ba o se wa tšwa o 1 Timotheo 4:15) Ge o dutše o reta Jehofa ka ditsela tšeo, o tla ba yo a atlegago kudu, gomme ka go rialo wa thabela bodiredi bja gago ka mo go oketšegilego.
tšea karolo go bjona, ke ka baka la’ng o sa ipeele pakane ya go dira bjalo? Ge e ba o tšea karolo go bjona, na go na le dipakane tše dingwe tše di oketšegilego tšeo o ka ipeelago tšona? Ka mohlala, go e na le go bolela selo se se swanago ntlong e nngwe le e nngwe, nyaka ditsela tšeo ka tšona o ka kaonefatšago, ka go kgopela batswadi ba gago le ba bangwe bao ba nago le phihlelo gore ba go nee ditšhišinyo tše di šomago. Ithute tsela ya go diriša Beibele ka mo go oketšegilego, bakeng sa go dira maeto a go boela a atlegago le go thoma thuto ya Beibele. (O Swanetše go Thoma Neng go Reta Jehofa?
20. Ke ka baka la’ng go se na lebaka la gore bafsa ba ikwe e le ba banyenyane kudu gore ba ka reta Jehofa?
20 Dipotšišong tše tharo tšeo di botšišitšwego sehlogong se, karabo ya potšišo ye ya mafelelo ke e bonolo kudu. Ela hloko karabo ya Beibele e lebanyago e rego: “Xopola Mmopi wa xaxo Ò sa le yo mofsa.” (Mmoledi 12:1) Ee, nako ya go thoma go reta Jehofa ke gona bjale. Go ka ba bonolo kudu go bolela gore: “Ke sa le yo monyenyane kudu gore nka reta Jehofa. Ga ke na phihlelo. Ke swanetše go leta go fihlela ge ke gotše.” O tla ba o se wa pele go nagana ka tsela yeo. Ka mohlala, Jeremia yo mofsa o boditše Jehofa gore: “Joo Morêna Mong ’a-ka! Hleng xa ke tsebe xo bolêla ka xe kè sa le ngwana!” Jehofa o ile a mo kgonthišetša gore o be a se na lebaka la go boifa. (Jeremia 1:6, 7) Ka mo go swanago, ga go na selo se re ka se boifago ge re reta Jehofa. Ga go na kotsi yeo e ka re welago yeo Jehofa a ka se kgonego go e lokiša ka mo go feletšego.—Psalme 118:6.
21, 22. Ke ka baka la’ng bafsa bao ba retago Jehofa ba swantšhwa le marothodi a phoka, gomme ke ka baka la’ng papišo ye e le e kgothatšago?
21 Ka gona, re kgothaletša lena bafsa gore: Le se ke la dika-dika go reta Jehofa! Ga bjale ge le sa dutše le le bafsa ke nako e kaone-kaone ya gore le tšee karolo modirong wa bohlokwa kudu woo o dirwago lefaseng lehono. Ge le dira bjalo, le ba karolo ya selo se sengwe se se kgahlišago—lapa la legohleng la batho bao ba retago Jehofa. Jehofa o thabišwa ke gore le karolo ya lapa le. Ela hloko mantšu a a buduletšwego ao mopsalme a a boditšego Jehofa a rego: “Mohla Ò e-tšwa dirá, sethšaba sa xaxo se tlo ithapa; ba bafsa ba xaxo ba tlo thšêpa ka tše kxêthwa bo-ka phoka ngwana wa mahuba.”—Psalme 110:3.
22 Marothodi a phoka ao a phadimago seetšeng sa mesong a a kgahliša, na ga go bjalo? Ke ao a lapološago, ao a phadimago le ao ge e le gabotse a sa balegego. Ke kamoo Jehofa a lebelelago lena bafsa bao ba mo retago ka potego mehleng ye yeo e hlobaetšago. Go tloga go le molaleng gore kgetho yeo le e dirilego ya go reta Jehofa e thabiša pelo ya gagwe. (Diema 27:11) Ka gona, lena bafsa dirang sohle seo le ka se kgonago, retang Jehofa!
O tla Araba Bjang?
• Ke mabaka afe a mangwe a bohlokwa a gore le rete Jehofa?
• Ke mehlala efe ya ka Beibeleng yeo e bontšhago gore bafsa ba ka atlega kudu tabeng ya go reta Jehofa?
• Bafsa ba ka reta Jehofa bjang lehono?
• Bafsa ba swanetše go thoma go reta Jehofa neng, gomme ka baka la’ng?
[Dipotšišo tša Thuto]
[Diswantšho go letlakala 25]
Ge e ba mogwera wa gago a be a e-na le bokgoni bjo bo makatšago, na o be o ka se botše ba bangwe ka se?
[Seswantšho go letlakala 27]
Barutwana-gotee le wena ba ka kgahlegela go tseba ditumelo tša gago
[Seswantšho go letlakala 28]
Ge e ba o nyaka go kaonefatša bodireding bja gago, kgopela Hlatse e nago le phihlelo e ntši gore e go nee ditšhišinyo tše di šomago