Go Reta Jehofa Sekolong

GO DIKOLOGA lefase, bafsa ba Dihlatse tša Jehofa ba hwetša ditsela tša go reta Modimo sekolong—ka polelo ya bona gotee le boitshwaro bja bona. Ela hloko diphihlelo tšeo di bontšhago phišego ya bona ya bofsa.

Mofsa yo mongwe wa Hlatse kua Gerika o ile a abelwa go ngwala pego ka tšhilafatšo ya lefaufau. Ka morago ga go lebelela ka go Watch Tower Publications Index, o ile a hwetša taba yeo a kago e diriša go tšwa makasineng wa Phafoga!, gomme mafelelong a taodišo ya gagwe a bolela gore makasine woo ke wona mothopo wa tsebišo ya gagwe. Morutiši wa gagwe o ile a mmotša gore ye e be e le e nngwe ya ditaodišo tše botse kudu tšeo a kilego a di bala. Ka morago morutiši o ile a diriša tsebišo yeo seminaring gomme a ba le mafelelo a mabotse. Ka gona kgaetšedi yo monyenyane o ile a dira phetho ya gore a nee morutiši dikgatišo tše oketšegilego tša Phafoga! go akaretša le e nngwe yeo e nago le lelokelelo la dihlogo le le rego, “Barutiši—Re be re tla Dira’ng ka Ntle le Bona?” Ka morago morutiši o ile a reta makasine wa Phafoga! a le ka klaseng gomme barutwana ba bangwe ba ile ba kgopela dikopi. Kgaetšedi o ile a swanelwa ke go tla le dikopi tša makasine sekolong e le gore ba ka bala ditokollo tše dingwe.

Kua Benin, Afrika, mofsa wa Mokriste o ile a lebeletšana le kgateletšo yeo e sego ya tlwaelega. Go ya ka setlwaedi, batswadi ba barutwana bao a tsenago le bona sekolo ba ile ba kopana, gomme ba thwala bahlahli bakeng sa dithuto tše thata e le gore ba hlame bafsa bakeng sa ditlhahlobo. Lega go le bjalo, bahlahli ba ile ba kgetha nako ya mesong ya Mekibelo bakeng sa mananeo ao a dithuto. Mofsa yo wa Hlatse o ile a gana ka gore: “Mokibelo mesong ke nako yeo phuthego ka moka e bago bodireding e kopane. Go nna yeo ke nako e thabišago kudu mo bekeng gomme nka se e ananye ka selo!” Tatagwe, yoo e lego motswadi yo a se nago molekane e bile e le Hlatse, o ile a dumela gomme a leka go boledišana le sehlopha se sengwe sa batswadi le bahlahli gore ba fetole nako. Lega go le bjalo, ka moka ba ile ba gana. Ngwanenyana yo yo monyenyane o ile a phetha ka gore a tšwele pele ntle le tlhahlo yeo. Go e-na le moo, o ile a kopanela le phuthego modirong wa boboledi. Barutwana-gotee le yena ba ile ba mo kwera gomme ba mo kgothaletša gore a tlogele taba ye ya gagwe ya go nea bohlatse le gore a lahle Modimo wa gagwe. Ba be ba kgodišegile e le ruri gore o tla palelwa ditlhahlobong. Lega go le bjalo, mafelelong e bile sehlopha seo sa barutwana bao ba hlahlilwego se se ilego sa palelwa, mola kgaetšedi wa rena yo monyenyane yena a ile a atlega. Go molaleng gore ba ile ba kgaotša go mo kwera. Ga bjale barutwana ba mmotša gore, “O tšwele pele go hlankela Modimo wa gago.”

Kua Repabliking ya Czechoslovakia, ngwanenyana wa nywaga e 12 o be a swanetše go lokišetša pego ka puku e itšego. Mmagwe o ile a mo kgothaletša go diriša puku ya Motho yo a Phagamego Kudu yo a Kilego a Phela. O ile a thoma pego ya gagwe ka dipotšišo tše rego: “Le nagana’ng? Ke mang yo e lego motho yo a phagamego kudu yo a kilego a phela?” O ile a hlalosa Jesu, bophelo bja gagwe bja mo lefaseng le dithuto tša gagwe. Ke moka, a ahla-ahla kgaolo e nago le sehlogo se se rego: “Thuto Mabapi le go Lebalela.” Morutišigadi wa gagwe o ile a kgotsa ka gore, “Ye ke pego e di phalago tšohle yeo nkilego ka go kwa o e nea!” gomme ka tebogo a amogela kopi ya puku. Ba bangwe ba barutwana-gotee le yena le bona ba ile ba nyaka kopi. Letšatšing le latelago ngwanenyana yo o ile a thabela go aba dikopi tše 18.

Bafsa ba bjalo ba hwetša lethabo le legolo ka go reta Jehofa sekolong. Ka moka re swanetše go ekiša phišego ya bona ya bofsa.