“O Ile a Tlaišetšwa Tumelo ya Gagwe”
“O Ile a Tlaišetšwa Tumelo ya Gagwe”
TOROPONG ya Cernobbio e lego ka leboa la Italy go hlomilwe lefelo la kgopotšo phakeng ya moo bakeng sa go gopola batho bao ditshwanelo tša bona di ilego tša gatakelwa. Le lengwe la mafsika ao a ilego a bulwa bakeng sa go ba gopola le neetšwe go Narciso Riet. Riet yo a belegetšwego kua Jeremane yo batswadi ba gagwe e lego Mataliana, e bile yo mongwe wa Dihlatse tša Jehofa ka bo-1930. Nakong ya pušo ya Hitler, Dihlatse tša Jehofa di be di tlaišwa ka gobane di be di gana go lebelela Hitler e le wa bohlokwa kudu go feta Modimo wa therešo e lego Jehofa.
Riet o ile a tšhabela Cernobbio ge ma-Gestapo a be a lemoga gore o be a tšea karolo go tlišeng dikopi tša Morokami dikampeng tša tshwenyo. Ge a le moo, o ile a kgopelwa gore a fetolele Morokami ka polelo ya Setaliana le go o aba go badumedi-gotee le yena ba kgaufsi. Go šoma ga gagwe ka mafolofolo go ile gwa lemogwa. Yo mongwe wa bahlankedi ba ma-SS le banna ba gagwe ba ile ba šwahlela legaeng la Riet, ba mo swara gomme ba tšea seo go thwego ke bohlatse bja bosenyi—Dibeibele tše pedi le mangwalo a mmalwa! Riet o ile a hudušetšwa Jeremane, a golegwa kampeng ya tshwenyo ya Dachau gomme a bolawa pejana ga ge Ntwa ya II ya Lefase e fela. Mongwalo o lego lefsikeng la Cernobbio o balega ka gore, “o ile a tlaišetšwa tumelo ya gagwe.”
Tumelo ya Narciso Riet le Dihlatse tše dingwe tše makgolo tšeo di ilego tša tlaišwa ke Nazi ke kgothatšo go Bakriste lehono gore ba dule ba botegela Jehofa, e lego Motho a nnoši legohleng yo a swanelwago ke borapedi bja bona. (Kutollo 4:11) Jesu o itše: “Ba lehlôxônôlô ké ba ba tlaišetšwaxo tokô.” Modimo o tla gopola mediro ya bona le go ba šegofatša ka baka la go bontšha ga bona sebete.—Mateo 5:10; Ba-Hebere 6:10.