Re ka Lebeletšana ka Katlego le Teko le ge e le Efe!

NA MO nakong ye o lebeletšane le teko bophelong bja gago? Na o ikwa o nyamile, gomme o sa kgone go lebeletšana le yona ka katlego? Na ka dinako tše dingwe o boifa gore bothata bja gago ke bja moswana-noši le gore bo ka se rarollege? Ge e ba go le bjalo, tia matla! Beibele e re kgonthišetša gore diteko le ge e le dife tšeo re ka lebeletšanago le tšona, Modimo a ka re thuša go lebeletšana le tšona ka katlego.

Beibele e dumela gore bahlanka ba Modimo ba tla “wêla melekong ya mehuta-huta.” (Jakobo 1:2) Ela hloko polelwana “ya mehuta-huta” (yeo ka Segerika e lego poi·kiʹlos). Go ya ka tirišo ya bogologolo, lentšu la mathomo la Segerika le bolela “tše di fapa-fapanego” goba “tša mebala e mentši” gomme le gatelela “go se swane ga diteko.” Ge e le gabotse, polelong ya letšatši le letšatši, lentšu le le bolela “tša mebala-bala.” Ka gona, ‘diteko tša mehuta-huta’ ke diteko tšeo ka tsela ya seswantšhetšo re ka rego ke tša mebala-bala. Lega go le bjalo, Jehofa o re thuša gore re kgone go lebeletšana ka katlego le e nngwe le e nngwe ya tšona. Ke ka baka la’ng re ka kgonthišega ka seo?

‘Botho bjo bo sa Swanelago bja Modimo bo Bontšhwa ka Ditsela tše di Fapa-fapanego’

Moapostola Petro o bolela gore Bakriste ba ‘hlokofatšwa ke diteko tša mehuta-huta.’ (1 Petro 1:6) Ka morago lengwalong la gagwe leo le buduletšwego, o bolela gore “botho bjo bo sa swanelago bja Modimo” bo ‘bontšhwa ka ditsela tše di fapa-fapanego.’ (1 Petro 4:10, bapiša le NW.) Polelwana e rego “ka ditsela tše di fapa-fapanego” e-na le kwešišo e swanago le ya lentšu la mathomo la Segerika. Ge seithuti se sengwe sa Beibele se hlalosa polelwana ye se re: “Ye ke kgopolo e kgahlišago kudu. . . . Go bolela ka kgaugelo [goba, botho bjo bo sa swanelago] ya Modimo e le poikilos go bolela gore ga go na boemo le ge e le bofe bja batho bjoo kgaugelo ya Modimo e ka palelwago ke go ba thuša go bo fenya.” Se tšwela pele ka gore: “Ga go na maemo le ge e le afe a ka bago gona, bothata le ge e le bofe bjo bo ka bago gona, boemo bja tšhoganetšo goba senyakwa se se akgofilego seo kgaugelo ya Modimo e ka se kgonego go thuša motho go lebeletšana le sona ka katlego, seo kgaugelo ya Modimo e ka se kgonego go thuša motho go swaragana le sona ka katlego gomme a se fenya. Ga go na boemo le ge e le bofe bophelong bjoo kgaugelo ya Modimo e ka se kgonego go thuša motho go lebeletšana le bjona ka katlego. Lentšu le leo le kwagalago gabotse e lego poikilos le lebiša dikgopolo tša rena kgaugelong yeo ya Modimo ya mebala-bala yeo ge e le gabotse e lekanego bakeng sa go re thuša dilong tšohle.”

Diteko Tšeo di Fenywago ka Botho

Go ya ka Petro, tsela e nngwe yeo botho bjo bo sa swanelago bja Modimo bo bontšhwago ka yona ke ka batho ba fapa-fapanego bao ba bopago phuthego ya Bokriste. (1 Petro 4:11) Mohlanka yo mongwe le yo mongwe wa Modimo o na le dimpho tša moya, goba bokgoni, tšeo di ka šomago e le mothopo wa kgothatšo go bao ba lebeletšanego le diteko. (Ba-Roma 12:6-8) Ka mohlala, ba bangwe bao e lego ditho tša phuthego ke barutiši ba Beibele bao ba nago le bokgoni. Mantšu a bona a tletšego temogo a kgothatša ba bangwe le go ba tutueletša gore ba kgotlelele. (Nehemia 8:1-4, 8, 12) Ba bangwe ba dira diketelo tša ka mehla tša bodiši magaeng a bao ba nyakago thušo. Diketelo tše di bjalo ke dinako tša kgothatšo, e lego  ‘go tiišwa ga dipelo.’ (Ba-Kolose 2:2, bapiša le PK.) Ge balebeledi ba dira diketelo tše di bjalo tše di tiišago tumelo, ba ruta ba bangwe ka mpho ya moya. (Johane 21:16) Lega go le bjalo, ba bangwe ka phuthegong ba tsebja ka borutho bja bona, kwelobohloko ya bona le botho bja bona ge ba dirišana le badumedi-gotee le bona bao ba nyamišitšwego ke diteko. (Ditiro 4:36; Ba-Roma 12:10; Ba-Kolose 3:10) Kwelobohloko le thušo e atlegago yeo e bontšhwago ke bana babo rena le dikgaetšedi ba bjalo ba lerato ke pontšho e kgolo, goba “mmala,” ya botho bjo bo sa swanelago bja Modimo.—Diema 12:25; 17:17.

“Modimo wa Khomotšô Yohle”

Go feta tšohle, Jehofa o nea khomotšo. Ke “Modimo wa khomotšô yohle, E a re homotšaxo mahlokong a rena ohle.” (2 Ba-Korinthe 1:3, 4) Bohlale bjo bo hwetšwago ka Lentšung la Modimo le le buduletšwego le matla ao a a neago ka moya wa gagwe o mokgethwa ke ditsela tše dikgolo tšeo ka tšona Jehofa a arabago dithapelo tša rena tša ge re kgopela thušo. (Jesaya 30:18, 21; Luka 11:13; Johane 14:16) Re ka kgothatšwa ke kholofetšo e buduletšwego yeo e holofeditšwego ke moapostola Paulo. O itše: “Modimo ké Mmotexi; a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.”—1 Ba-Korinthe 10:13.

Ee, go sa šetšwe “mmala”, goba sebopego, woo teko ya rena e ka tlago ka wona, go tla dula go e-na le “mmala,” goba pontšho, wa botho bjo bo sa swanelago bja Modimo woo o tla re thušago go e fenya. (Jakobo 1:17) Thušo ya Jehofa e tlago ka nako le e swanetšego yeo a e neago bahlanka ba gagwe—go sa šetšwe go se swane ga diteko goba ditlhohlo tša bona—ke bohlatse bjo bongwe bja “bohlale bya Modimo bya mehuta-huta.” (Ba-Efeso 3:10) Na ga go bjalo?

[Diswantšho go letlakala 31]

Jehofa o re thuša gore re lebeletšane le diteko tša rena ka katlego