Dipotšišo tše Tšwago go Babadi

Doiteronomio 14:21 e balega ka gore: “Le se kê la ja nama ya setoto.” Na seo se ganetšana le Lefitiko 11:40, yeo e balegago ka gore: “E a jaxo nama ya setoto seo, a hlatswê diaparô tša xaxwe; ó thšilafetše xo fihla mantšibua”?

Ditemana tše tše pedi ga di ganetšane. Temana ya pele e boeletša thibelo ya go ja phoofolo yeo e hweditšwego e hwile, mohlomongwe yeo e bolailwego ke dibata tša naga. (Ekisodo 22:30; Lefitiko 22:8) Ya bobedi e hlalosa seo mo-Isiraele a bego a ka se dira ge e ba a tshetše thibelo yeo, mohlomongwe ka phošo.

Taba ya gore selo se itšego se be se thibetšwe ke Molao e be e sa bolele gore thibelo yeo e ka se hlokomologwe ka nako e nngwe. Ka mohlala, go be go e-na le melao yeo e bego e thibela go utswa, go bolaya, go nea bohlatse bja maaka, bjalo-bjalo. Ka nako e swanago, go be go e-na le dikotlo bakeng sa go roba melao yeo e neilwego ke Modimo. Dikotlo tše bjalo di be di tiiša melao gomme di bontšha kamoo e lego ya bohlokwa ka gona.

Motho yo a tshetšego thibelo ya go ja nama ya phoofolo yeo e hweditšwego e hwile o be a tla ba yo sa hlwekago mahlong a Jehofa gomme o be a tla swanelwa ke go gata megato e swanetšego ya tlhwekišo. Ge e ba a paletšwe ke go itlhwekiša ka mo go swanetšego, o be a tla “rwala molato wa gagwe.”—Lefitiko 17:15, 16, PK.