“Go Thabile Bao ba Lemogago Dinyakwa tša Bona tša Moya”

GE DINONYANA di tsoga mesong, gantši di letša melodi ka nakwana gomme tša fofa gore di yo tsoma dijo. Mantšiboa, di boela dihlageng tša tšona, di letše melodi kutšwanyana gomme di ye go robala. Ka dihla tše dingwe, di a kopana, tša beela mae, gomme tša godiša mafotwana a tšona. Diphoofolo tše dingwe di latela mokgwa o swanago wo o sa fetogego.

Rena batho re ba fapanego. Ke therešo gore re a ja, re a robala le go ba le bana, eupša bontši bja rena ga re kgotsofatšwe ke dilo tšeo feela. Re nyaka go tseba lebaka leo ka lona re phelago. Re nyaka go tseba morero maphelong a rena. E bile re kganyoga go ba le kholofelo ka bokamoso. Dinyakwa tše tše di tseneletšego di šupa sekeng seo e lego sa moswana-noši sa batho—boemo bja moya, goba senyakwa sa moya le go ba le bokgoni dilong tša moya.

Re Bopilwe ka Seswantšho sa Modimo

Beibele e hlalosa lebaka leo ka lona motho a nago le senyakwa sa moya sa tlhago, ge e re: “Ké mo Modimo a bopilexo motho, a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.” (Genesi 1:27) Go bopša ga rena “ka xo swanthša ka Yêna Modimo” go bolela gore gaešita le ge re šilafaditšwe ke sebe le go se phethagale, re na le bokgoni bja go bonagatša dika tše dingwe tša Modimo. (Ba-Roma 5:12) Ka mohlala, re kgona go hlama dilo. Le gona re na le tekanyo e itšego ya bohlale, tekanyo e itšego ya toka le bokgoni bja go ratana ka lerato la boikgafo. Go feta moo, re ka naganišiša ka dilo tša nakong e fetilego gomme ra rulaganyetša bokamoso.—Diema 4:7; Mmoledi 3:1, 11; Mika 6:8; Johane 13:34; 1 Johane 4:8.

Bokgoni bja rena dilong tša moya bo bontšhwa gabotse kudu ke kganyogo ya rena ya tlhago ya go nyaka go rapela Modimo. Ge e ba re sa kgotsofatše senyakwa sa gore re be le tswalano e botse le Mmopi wa rena, re ka se ke ra hwetša lethabo la kgonthe le le le swarelelago. Jesu o itše: “Go  thabile bao ba lemogago dinyakwa tša bona tša moya.” (Mateo 5:3, NW) Lega go le bjalo, re swanetše go ela hloko gore re kgotsofatše senyakwa seo ka therešo ya moya—ditherešo mabapi le Modimo, ditekanyetšo tša gagwe le morero wa gagwe bakeng sa batho. Ke kae moo re ka hwetšago therešo ya moya? Ke ka Beibeleng.

“Lentšu la Xaxo ké Yôna Therešô”

Moapostola Paulo o ngwadile gore: “Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong.” (2 Timotheo 3:16) Mantšu a Paulo a dumelelana le a Jesu, yo ge a be a rapela Modimo a ilego a re: “Lentšu la xaxo ké yôna therešô.” Lehono, re tseba Lentšu leo e le Beibele e Kgethwa, gomme e tla ba gabohlale ge re lekodišiša ditumelo le ditekanyetšo tša rena ka go dumelelana le lona.—Johane 17:17.

Ka go bapetša ditumelo tša rena le Lentšu la Modimo, re ekiša ba-Berea ba bogologolo, bao ba ilego ba kgonthišetša gore dithuto tša Paulo di be di dumelelana le Mangwalo. Go e na le go sola ba-Berea, Luka o ile a ba reta mabapi le tsela yeo ba bego ba nagana ka yona. O ngwadile gore ba “amoxetše Lentšu ka xo rata; ba hlwa bà bala mangwalô ka mehla bà nyaka mo a kwanaxo le tšeo ba bexo ba di kwa.” (Ditiro 17:11) Ka baka la go thulana ga dithuto tša bodumedi le tša boitshwaro mo go apareditšego lehono, go bohlokwa gore re ekišeng mohlala wa ba-Berea ba dikgopolo tše dibotse.

Tsela e nngwe yeo ka yona re lemogago therešo ya moya ke go bona kamoo e tutuetšago maphelo a batho. (Mateo 7:17) Ka mohlala, go phela ka go dumelelana le therešo ya Beibele go swanetše go dira gore motho e be monna yo mokaone, tate yo mokaone, mosadi yo mokaone goba mma yo mokaone, ka go rialo gwa kaonefatša lethabo la lapa le go oketša kgotsofalo ya motho. Jesu o itše: “Wa lehlôxônôlô ké eo a kwaxo Lentšu la Modimo ’me a le lôtôla.”—Luka 11:28.

Mantšu a Jesu a re gopotša a Tatagwe wa legodimong yo a boditšego ba-Isiraele ba bogologolo gore: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara. Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.” (Jesaya 48:17, 18) Ruri bohle bao ba ratago botho le toko ba tla kgongwa ke boipiletšo bjo bjalo bjo borutho!

Ba Bangwe ba Kgetha go ‘Kweša Ditsebe tša Bona Bose’

Modimo o dirile boipiletšo bjo bo tšwago pelong go ba-Isiraele ka gobane ba be ba forwa ka maaka a bodumedi. (Psalme 106:35-40) Le rena re swanetše go itiša malebana le maaka. Mabapi le Bakriste bao go boletšwego ka bona e sa le pele, Paulo o ngwadile gore: “Xo tlo tla lebaka le ba ka se kexo ba kxôna xo theetša thutô ye e phedilexo; ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose. Xobane ditsêbê tša bôná di tlo hlala therešô.”—2 Timotheo 4:3, 4.

Baetapele ba bodumedi ba kweša ditsebe tša batho bose ka go kgothaletša mekgwa yeo e ka kgotsofatšago dikganyogo tše mpe, tše bjalo ka go ba le dikopano tša botona le botshadi ka ntle ga lenyalo, bosodoma le botagwa. Beibele e bolela ka mo go kwagalago gore bao ba amogelago dilo tše bjalo le bao ba di dirago “ba ka se bê le kabêlô mmušong wa Modimo.”—1 Ba-Korinthe 6:9, 10; Ba-Roma 1:24-32.

 Ka ntle le pelaelo, go phela ka go dumelelana le ditekanyetšo tša Beibele go nyaka sebete, kudu-kudu ge re lebeletšane le go kwerwa, eupša re ka kgona. Go na le batho ba bantši gare ga Dihlatse tša Jehofa bao e kilego ya ba balemaledi ba dihlare-tagi, matagwa, diotswa, bo-mphenyašilo, mahodu le ba maaka. Lega go le bjalo, ba ile ba tšeela Lentšu la Modimo godimo gomme ka thušo ya moya o mokgethwa ba dira diphetogo maphelong a bona e le gore ba “swarê ka tsela ye e loketšexo ba Morêna.” (Ba-Kolose 1:9, 10; 1 Ba-Korinthe 6:11) Ka ge ba dirile khutšo le Modimo, ba bile ba hweditše khutšo ya ka gare gomme go etša ge re tla bona, ba hweditše le kholofelo ya kgonthe bakeng sa bokamoso.

Kholofelo ya Mmušo

Kholofelo ya Beibele mabapi le khutšo ya sa ruri bakeng sa batho bao ba kwago e tla phethagatšwa ka Mmušo wa Modimo. Jesu o boletše thapelong ya gagwe ya mohlala gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Ee, ke Mmušo wa Modimo feela wo o ka kgonthišetšago gore thato ya Modimo e a dirwa lefaseng. Ka baka la’ng? Ka gobane Mmušo woo wa legodimong—pušo ya Jesu Kriste—ke tsela yeo ka yona Modimo a bontšhago bogoši bja Gagwe bjo bo swanetšego lefaseng.—Psalme 2:7-12; Daniele 7:13, 14.

Ka ge e le Kgoši ya Mmušo woo wa legodimong, Jesu Kriste o tla lokolla batho bao ba kwago bokgobeng bja mehuta ka moka, go akaretša le go ba lokolla sebeng sa Adama seo ba kgakgetšwego ka gare ga sona le ditla-morago tša sona tša bolwetši le lehu. Kutollo 21:3, 4 e re: “Šoo ngwakô wa Modimo mo xare xa batho; . . . ’Me Yêna [Jehofa] Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”

Go tla ba le khutšo ya sa ruri lefaseng ka bophara. Ke ka baka la’ng re ka kgonthišega ka seo? Lebaka le utollwa go Jesaya 11:9, e rego: “Xo ka se hlwê xo dirwa dibe [ke balata ba Mmušo], xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.” Ee, motho yo mongwe le yo mongwe lefaseng o tla ba le tsebo e nepagetšego ka Modimo gomme a mo kwa. Na tebelelo e bjalo e a go thabiša? Ge e  ba go le bjalo, ye ke nako ya gore o thome go monya ‘tsebo e bohlokwa ya go tseba Jehofa.’

Na o tla Theetša Molaetša wa Mmušo?

Modimo o tla diriša Mmušo go dirolla mediro ka moka ya Sathane gomme a ruta batho ditsela tša Gagwe tše di lokilego. Ka gona, ga go makatše gore Mmušo e be e le taba e kgolo yeo Jesu a bego a ruta ka yona. O itše: “Le metse e mengwê ke swanetše xo e botša ditaba tše botse tša mmušô wa Modimo, ké sôna se ke rometšwexo sôna.” (Luka 4:43) Kriste o ile a laela barutiwa ba gagwe gore ba botše ba bangwe molaetša wona woo. (Mateo 28:19, 20) O boletše e sa le pele gore: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:14, NW) Bofelo bjoo bo batamela ka lebelo kudu. Ka gona, ruri e tloga e le gabohlokwa gore batho ba dipelo tše di botegago ba theetše ditaba tše dibotse tše di phološago bophelo!

Albert, yo go boletšwego ka yena sehlogong se se fetilego, o kwele molaetša wa Mmušo ge mosadi wa gagwe le morwa ba be ba thoma go ithuta Beibele le Dihlatse tša Jehofa. Mathomong, Albert o be a e-na le dipelaelo. O ile a ba a kgopela moruti wa lefelong la gabo gore a etele mosadi wa gagwe le morwa bakeng sa go ba bontšha maaka a Dihlatse. Eupša moruti ga se a ka a nyaka go akaretšwa. Ka gona Albert o ile a phetha ka go theetša poledišano ya Beibele e le gore a tle a kgone go swaya diphošo le ge e le dife tšeo a bego a tla di hwetša. Ka morago ga go ba gona gatee feela, o ile a ba le bona thutong, a ikemišeditše go ithuta mo go oketšegilego. Ka morago o ile a hlalosa lebaka leo ka lona a ilego a fetoša kgopolo ya gagwe. O itše: “Se e be e le seo ka mehla ke bego ke se nyaka.”

Mafelelong, Albert o ile a thoma go kgotsofatša senyakwa sa gagwe sa moya, gomme ga se a ka a itshola. Therešo ya Beibele e mo neile seo a bego a dutše a se tsoma bophelong bja gagwe ka moka—tharollo ya bothata bja go hloka toka le kgobogo tšeo di apareditšego bathong le kholofelo ya bokamoso. Therešo ya Beibele e mo neile khutšo ya ka gare. Na senyakwa sa gago sa moya se a kgotsofatšwa? Ke ka baka la’ng o sa tšee metsotso e sego kae o bala dipotšišo tše di lokeleditšwego lepokising le le lego go letlakala 6? Ge e ba o rata go hwetša tsebišo e oketšegilego, Dihlatse tša Jehofa di tla thabela go go thuša.

[Lepokisi/Seswantšho go letlakala 6]

Na Senyakwa Sa Gago Sa Moya Se A Kgotsofatšwa?

Na o kgotsofetše ka dijo tša moya tšeo o di hwetšago? Re go laletša gore o bale dipotšišo tše di latelago gomme o swaye tšeo o ka di arabago ka mo go nepagetšego.

□ Modimo ke mang, gomme leina la gagwe ke mang?

□ Jesu Kriste ke mang? Ke ka baka la’ng a ile a swanelwa ke go hwa? Lehu la gagwe le ka go hola bjang?

□ Na Diabolo o gona? Ge e ba go le bjalo, o tšwa kae?

□ Go direga’ng go rena ge re e-hwa?

□ Morero wa Modimo ke ofe ka lefase le ka batho?

□ Mmušo wa Modimo ke’ng?

□ Ditekanyetšo tša Modimo mabapi le boitshwaro ke dife?

□ Ka lapeng, ke dikarolo dife tšeo Modimo a di abetšego monna le mosadi? Ke melao efe e mengwe ya motheo ya Beibele yeo e godišago lethabo la lapa?

Ge e ba o sa kgonthišege ka dikarabo tša dipotšišo le ge e le dife tša tše, o ka kgopela kopi ya poroutšha ya Ke Eng Seo Modimo a se Nyakago go Rena? Poroutšha ye yeo e gatišitšwego ke Dihlatse tša Jehofa ka maleme ao e nyakilego go ba a 300, e ahla-ahla dihlogo tša Beibele tše 16 tša motheo gomme e nea karabo ya Mangwalo dipotšišong ka moka tše di lokeleditšwego ka mo godimo.

[Diswantšho go letlakala 4]

Ka go se swane le diphoofolo, batho ba na le dinyakwa tša moya

[Seswantšho go letlakala 5]

“Ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose.”—2 Timotheo 4:3

[Seswantšho go letlakala 7]

Khutšo e swarelelago e tla tlišwa ke Mmušo wa Modimo wa Mesia