Go Tsoma Khutšo ya ka Gare

ALBERT e be e le monna yo a thabilego lenyalong e bile a e-na le bana ba babedi bao ba kgahlišago. Eupša o ile a ikwa eka go na le selo seo se hlaelago bophelong bja gagwe. Nakong ya ge a be a katanela go hwetša mošomo, o ile a tsena dipolitiking gomme o ile a thekga bosošalise. O ile a ba a fetoga setho se mafolofolo sa mokgatlo wa Bokomanisi wa lefelong la gabo.

Lega go le bjalo, go se go ye kae, Albert o ile a lahlegelwa ke kholofelo mabapi le Bokomanisi. O ile a kgaotša go tšea karolo dipolitiking gomme a fetša nako ya gagwe e ntši le ba lapa la gagwe. Morero wa gagwe bophelong e ile ya ba go kgonthišetša gore lapa la gagwe le dula le thabile. Lega go le bjalo, Albert o be a sa dutše a ikwa a hlaelwa ke selo se itšego bophelong; o ile a tšwela pele a palelwa ke go hwetša khutšo ya kgonthe ya ka gare.

Ruri phihlelo ya Albert ga se ya moswana-noši. E le gore ba hwetše morero o bohlokwa bophelong, batho ba dimilione ba ile ba leka dikgopolo tše di fapa-fapanego, difilosofi le madumedi. Lefaseng la ka Bodikela, go tšwelela ga mokgatlo wa mahiphi ka bo-1960 e be e le go rabela malebana le ditekanyetšo tša setšo tša boitshwaro le tša setšhaba. Bafsa ka mo go kgethegilego ba ile ba tsoma lethabo le morero wa bophelo ka go diriša dihlare-tagi tšeo di fetošago kgopolo le difilosofi tša bao go thwego ke barutiši ba mokgatlo le baruti ba phagamego. Lega go le bjalo, mokgatlo wa mahiphi o ile wa palelwa ke go tliša lethabo la kgonthe. Go e na le moo, o dirile gore go be le bafsa bao ba lemaletšego dihlare-tagi le bao ba nago le boitshwaro bjo bo hlephilego, wa dira gore setšhaba se wele ka go akgofa kgakanegong ya mabapi le boitshwaro.

 Ka nywaga-kgolo e mentši, batho ba bantši ba ile ba tsoma lethabo ka mahumo, matla goba thuto. Ditsela tše di ile tša feleletša di lebiša manyaming. Jesu o itše: “Bophelô bya motho xa bo tšwe lehumong le xo tše a di ruilexo.” (Luka 12:15) Go e na le moo, go ikemišetša go phegelela mahumo gantši go baka manyami. Beibele e re: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong. Xobane mexabaru ké wôna modu wa bobe ka moka; xomme ba bangwê ba xo kêkêla xo tšôna . . . ba ikôbêla mehlakô e mentši.”—1 Timotheo 6:9, 10.

Ka gona, motho a ka hwetša bjang khutšo ya ka gare le morero bophelong? Na ke taba ya go lekela hlogong, go swana le go betša mosebe selong seo o sa se bonego gabotse lefsifsing? Se se thabišago ke gore ga go bjalo. Go etša ge re tla bona sehlogong se se latelago, tharollo e tlišwa ke go kgotsofatša senyakwa sa batho se bohlokwa kudu le sa moswana-noši e le ka kgonthe.

[Seswantšho go letlakala 3]

Na go phegelela lehumo, matla goba thuto go tla go thuša gore o hwetše khutšo ya ka gare?