Dithuto tša Therešo—O ka di Hwetša Kae?

MONNA yo mongwe kua Tibet o dikološa leotwana la thapelo, e lego moropa wo o nago le dithapelo tše di ngwadilwego. O dumela gore dithapelo tša gagwe di boeletšwa nako le nako ge leotwana le dikologa. Legaeng leo le nago le sekgoba se segolo kua India, phapoši e nyenyane e beetšwe ka thoko bakeng sa go direla puja—borapedi bjo bo akaretšago go iša dibego tša diorelo, matšoba le dilo tše dingwe go diswantšho tša medimo le medimogadi e fapa-fapanego. Bokgoleng bja dikhilomithara tše dikete kua Italy, mosadi yo a lego ka kerekeng e kgabišitšwego ka tsela e feteletšego o khunama pele ga seswantšho sa Maria, mmago Jesu, gomme o rapela a dutše a swere pheta ya rosari.

Mohlomongwe o bone ka noši tutuetšo yeo bodumedi bo nago le yona maphelong a batho. Puku ya The World’s Religions—Understanding the Living Faiths e re: “Bodumedi . . . bo be bo dutše bo kgatha tema ya bohlokwa ditšhabeng ka moka tša lefase gomme bo sa dutše bo dira bjalo.” Ka pukung ya God—A Brief History, mongwadi John Bowker o re: “Ga se gwa ka gwa ba le lekoko la batho leo Modimo a sego a ka a ba karolo ya lona, kudu-kudu karolo ya go laola le ya go bopa. Seo ke sa therešo gaešita le bathong bao ka boomo ba kgethago go se be badumedi.”

Ka kgonthe, bodumedi bo tutueditše maphelo a batho ba dimilione. Na bjo ga se bohlatse bjo bo tiilego bja gore motho o na le senyakwa gotee le tlhologelo ya moya? Ka pukung ya sona ya The Undiscovered Self, setsebi se se tumilego sa tša monagano e lego Dr. Carl G. Jung se šupa go senyakwa sa batho sa go kganyoga go rapela matla a phagamego gomme se bolela gore “dipontšho tša sona di ka bonwa historing ka moka ya batho.”

Lega go le bjalo, batho ba bantši ga ba ipolele ba dumela go Modimo goba ba e-na le kgahlego le ge e le efe bodumeding. Ba bangwe bao ba belaelago goba ba ganago gore Modimo o gona ba dira bjalo kudu-kudu ka gobane madumedi ao ba a tlwaetšego  a paletšwe ke go kgotsofatša senyakwa sa bona sa moya. Bodumedi bo hlalositšwe e le “go ineela melaong ya motheo e itšego; go botega ka go tia; go ba yo a elago hloko; maikwelo a borutho a botegago goba a lerato.” Go ya ka tlhaloso ye, mo e nyakilego go ba motho yo mongwe le yo mongwe o bonagatša mohuta o itšego wa boineelo bja bodumedi bophelong bja gagwe. Seo se akaretša le baila-Modimo.

Nywageng e dikete ya histori ya batho, go leka ga batho go kgotsofatša senyakwa sa bona sa moya go ba lebišitše mehuteng e mentši ya borapedi. Se se feleleditše ka go arogana mo gogolo ga dikgopolo tša bodumedi moo go hwetšwago lefaseng ka bophara. Ka mohlala, gaešita le ge mo e nyakilego go ba madumedi ka moka a kgothaletša batho gore ba dumele go matla a phagamego, a na le dikgopolo tše di sa swanego tša gore motho yoo ke mang goba gore selo seo ke eng. Le gona, ditumelo tše dintši di gatelela bohlokwa bja phološo goba tokologo. Eupša dithuto tša tšona di a fapana ge e le mabapi le seo phološo e lego sona le kamoo e hwetšwago ka gona. Ka ge go e-na le ditumelo tše dintši tše di fapa-fapanego, re ka hlaola bjang dithuto tša therešo tšeo di thabišago Modimo?