“Ga se ba ka ba Kwanantšha”

JESU KRISTE o boditše barutiwa ba gagwe gore: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka.” (Mateo 5:11) Dihlatse tša Jehofa lehono di thabile ka gobane, ka go dumelelana le dithuto tša Kriste le mohlala wa gagwe, di dula di se ‘karolo ya lefase’ e bile di kgomarela ka go tia boema-gare bja tšona go tša dipolitiki le potego ya tšona go Modimo ka tlase ga maemo a mehuta ka moka.—Johane 17:14; Mateo 4:8-10.

Mabapi le go ema ga Dihlatse tša Jehofa ka go se kwanantšhe go seo e kilego ya ba Soviet Union, go akaretša le Estonia, ra-thutatumelo wa mo-Luthere le mofetoledi wa Beibele e lego Toomas Paul o ngwadile ka pukung ya gagwe ya Kirik keset küla (Kereke e Lego Bogareng bja Motse) gore: “Ke ba sego kae bao ba ilego ba kwa ka seo se diregilego diiring tša mesong ya April 1, 1951. Go ile gwa rulaganywa lesolo la go raka Dihlatse tša Jehofa le bohle bao ba di thekgago—batho ba 279 ba ile ba swarwa gomme ba hudušetšwa Siberia . . . Ba ile ba newa sebaka sa gore ba saene fomo e tlwaelegilego ya gore ba latola tumelo ya bona e le gore ba se ke ba hudušwa goba go swarwa. . . . Ge go balwa bona gotee le bao ba bego ba swerwe pejana, go be go golegilwe batho ba 353, go akaretša le bonyenyane batho ba 171 feela bao ba bego ba kopanela le diphuthego tša gabo bona. Ga se ba ka ba kwanantšha—gaešita le ge ba le kua Siberia. . . . Go be go se na ditho tše dintši tša Kereke [Luthere ya Estonia] tšeo di bego di e-na le tumelo e swanago le ya Dihlatse tša Jehofa.”

Dihlatse tša Jehofa lefaseng ka bophara di kgodišegile gore Modimo o tla di thuša gore di dule di botega le gore di mo kwe go sa šetšwe tlaišo. Di thabela go tseba gore moputso wa tšona wa go botega ke o mogolo.—Mateo 5:12.