‘Lerumo la Jehofa le la Gideoni!’

KE BA bantši bjalo ka ditšie tšeo di senyago mašemo a nonnego. Ke nakong ya ge baahlodi ba buša Isiraele, gomme ba-Isiraele ba lahlegetšwe ke kholofelo. Ka nywaga e šupago, gatee-tee ka morago ga ge peu e bjetšwego e thomile go mela, sehlopha sa bahlakodi se se sepelago ka dikamela sa ba-Midiane, ba-Amaleke le ba-Bohlabela se hlasela naga. Mehlape ya bahlakodi e a phatlalala e tsoma mafulo, gomme e-ja selo se sengwe le se sengwe se setala. Eupša ba-Isiraele ga ba na gaešita le pokolo, pholo goba nku. Ba-Midiane ba be ba buša ka molamo wa tšhipi mo e lego gore ba-Isiraele bao ba hlasetšwego ke bodiidi ba ile ba gapeletšega go boloka dilo lefelong la sephiri dithabeng, maweng le mafelong ao go lego thata go a fihlelela.

Go tlile bjang gore ba be boemong bjo bjalo bjo thata? Ba-Isiraele ba bahlanogi ba hlankela medimo ya maaka. Ka baka leo, Jehofa o ba tlogetše diatleng tša bagateledi. Ge bana ba Isiraele ba se sa hlwa ba kgona go kgotlelela, ba kgopela thušo ya Jehofa. Na o tla theetša? Phihlelo ya Isiraele e ka re ruta’ng?—Baahlodi 6:1-6.

Na ke Molemi yo a Lego Šedi Goba ke “Monna yo Boxale”?

Balemi ba ba-Isiraele ka tlwaelo ba fola mabele ka pholo le selei lefelong leo e lego molala leo le nago le moya e le gore moya o ka hlokola mooko mabeleng. Eupša tšhošetšo ya bahlakodi bao ba ikemišeditšego go amoga naga dilo tšohle tšeo e nago le tšona e dira gore seo se direlwe ka sephiring. A sa bonwe ke ba-Midiane, Gideoni o fola mabele ka bofotlelong—e ka ba e le lefelo le legolo, leo le šireletšegilego leo le epilwego lefsikeng. (Baahlodi 6:11) Gona moo, go bonagala mabele a ka folwa ka ditekanyo tše dinyenyane feela. Ka tlase ga maemo a, Gideoni o diriša seo se lego gona.

Anke o nagane kamoo Gideoni a ilego a makala ka gona ge morongwa wa Jehofa a be a tšwelela go yena gomme a re: “Morêna ó na naxô’, wêna monna yo boxale.” (Baahlodi 6:12) E le monna yo ka sephiring a folago mabele bofotlelong, ruri Gideoni ga a ikwe a e-na le sebete. Lega go le bjalo, mantšu ao a bontšha gore Modimo o kgodišegile gore Gideoni e ka ba moetapele yo a nago le sebete wa Isiraele. Le ge go le bjalo, yena ka noši o swanetše go kgolwa.

Ge Jehofa a be a mo laela gore a “namolêlê Isiraele diatleng tša Ba-Midiani,” Gideoni o bolela ka boikokobetšo gore: “Aowii Mong’a-ka! Ke tlo namolêla Isiraele ka’ng? Etšwe leloko lešo è le lôna le lenyenyane mo xo Ba-Manase, le nna kè le yêna e monyenyane mo kxorong ya Tata wešo!” Gideoni yo a lego šedi o kgopela pontšho ya gore Modimo o tla ba le yena ge a fediša ba-Midiane, gomme Jehofa o ikemišeditše go phethagatša kgopelo e kwagalago ya Gideoni ya go nyaka go kgonthišetšwa. Ka gona Gideoni o nea moeng wa gagwe yo e lego morongwa mpho ya dijo, mollo o rotoga go tšwa lefsikeng, gomme o fiša sehlabelo. Ka morago ge Jehofa a fokoditše poifo ya Gideoni, Gideoni o aga aletare lefelong leo.—Baahlodi 6:12-24.

“Baali a a lwê”

Bothata bjo bogolo kudu bja Isiraele ga se kgateletšo ya ba-Midiane. Ke bokgoba borapeding bja Baali. Jehofa ke “Modimo wa lehufa,” le gona ga go na motho yo a ka mo hlankelago ka tsela e amogelegago a dutše a rapela medimo e mengwe. (Ekisodo 34:14, PK) Ka gona, Jehofa o laela Gideoni gore a fediše aletare ya tatagwe ya Baali le go wiša kota e kgethwa. Ka baka la ge a boifa tsela yeo tatagwe le ba bangwe ba tlago go arabela ka yona ge a ka dira se mosegare, Gideoni o dira bjalo bošego, a thušwa ke bahlanka ba lesome.

Go ba šedi ga Gideoni go lokafaditšwe, ka gobane  ge barapedi ba Baali ba lefelong leo ba se na go lemoga tiro ya gagwe yeo go thwego ke ya go se hlomphe dilo tše kgethwa, ba nyaka gore a bolawe. Lega go le bjalo, ka bohlale bjo bo sa ganetšegego, tatago Gideoni e lego Joase o nea batho mabaka ka gore ge e ba Baali e be e le Modimo, gona o be a tla kgona go itšhireletša. Ka nako yona yeo, Joase ka mo go swanetšego o bitša morwa wa gagwe gore ke Jerubaali, yeo e bolelago gore: “Baali a a lwê.”—Baahlodi 6:25-32.

Modimo ka mehla o šegofatša bahlanka ba gagwe ka baka la go emela borapedi bja therešo ka sebete. Ge ba-Midiane le bagwera ba bona ba be ba hlasela gape tikologo ya ba-Isiraele, ‘moya wa Jehofa o swara Gideoni.’ (Baahlodi 6:34) Ka tlase ga tutuetšo ya moya wa Modimo, goba matla a šomago, Gideoni o rapa madira go tšwa molokong wa Manase, wa Asere, wa Sebulone le wa Nafutali.—Baahlodi 6:35.

Go Itokišeletša Ntwa

Gaešita le ge Gideoni ga bjale a e-na le madira a banna ba 32 000, o kgopela pontšho e tšwago go Modimo. Ge e ba mokgopa wo o tlogetšwego mobung o omilego o ka kolobišwa ke phoka mola mobu o šala o omile, se se tla bontšha gore Modimo o tla phološa Isiraele ka yena. Jehofa o dira mohlolo wo, gomme Gideoni o tsoma kgonthišetšo le go e hwetša ge pontšho e be e fapane le ya pele—go kolobe mobu gomme mokgopa o šale o omile. Na Gideoni o be a le šedi go feta tekanyo? Ga go bonagale go le bjalo, ka gobane Jehofa o mo nea tšeo a di kgopelago e le kgonthišetšo. (Baahlodi 6:36-40) Ga re a letela mehlolo e bjalo lehono. Lega go le bjalo, re ka hwetša tlhahlo ya Jehofa le kgonthišetšo go tšwa Lentšung la gagwe.

Modimo ga bjale o bolela gore madira a Gideoni ke a mantši kudu. Ge e ba ba fenya manaba a bona e le ba bantši ka tsela yeo, ba-Isiraele ba ka ikgantšha ka gore ba iphološitše. Eupša tumišo e swanetše go ya go Jehofa bakeng sa phenyo e tlago. Tharollo ke efe? Gideoni o swanetše go diriša tokišetšo ya Molao wa Moše ka go kgopela ba boi gore ba boele gae. Gona moo, banna ba gagwe ba 22 000 ba boela gae, gomme go šala ba 10 000 feela.—Doiteronomio 20:8; Baahlodi 7:2, 3.

Go ya ka pono ya Modimo, go sa na le banna ba bantši kudu. Gideoni o botšwa gore a ba iše nokeng. Radihistori wa mo-Juda e lego Josephus o bolela gore Modimo o ile a botša Gideoni gore a gwantiše madira a gagwe go ya nokeng phišong ya letšatši. Go sa šetšwe gore boemo ke bofe, Gideoni o lebelela tsela yeo banna ba nwago meetse ka yona. Ke ba 300 feela bao ba nwago meetse ka seatla setee mola ba dutše ba lebeletše tlhaselo ya lenaba le le ka tlago. Ke banna ba ba 300 feela bao ba ntšhitšego mahlo dinameng bao ba tla sepelago le Gideoni. (Baahlodi 7:4-8) Inagane o le boemong bja bona. Ka ge manaba a gago e le a 135 000, ruri o tla phetha ka gore go tla fenywa ka matla a Jehofa feela, e sego a gago!

Modimo o botša Gideoni gore a sepele le mohlokomedi gomme ba yo hlola kampa ya ba-Midiane. Ge ba dutše ba le moo, Gideoni o kwa monna yo a laodišago toro go mogwera wa gagwe yo ka ntle le go dika-dika a e hlathollago e le e bolelago gore Modimo o ikemišeditše go dira gore  Gideoni a fenye ba-Midiane. Seo e tloga e le selo seo Gideoni a nyakago go se kwa. O kgodišegile gore Jehofa o tla dira gore yena le banna ba gagwe ba 300 ba fenye ba-Midiane.—Baahlodi 7:9-15.

Leano la Ntwa

Banna ba ba 300 ba arolwa ka dihlopha tše tharo tša ba 100. Monna yo mongwe le yo mongwe o newa phalafala le legapa le legolo le le se nago selo. Ka gare ga legapa go fihlilwe serumula. Taelo ya pele ya Gideoni še: ‘Le ntebelele, gomme le dire seo ke se dirago. Ge ke letša phalafala, le letše tša lena, gomme le goeletše ka gore “Lerumo la Jehofa le la Gideoni!”’—Baahlodi 7:16-18, 20.

A khukhuna, madira a 300 a ba-Isiraele a ya mo kampa ya manaba a ona e felelago gona. E šetše e le mo e ka bago iri ya lesome bošego—gatee-tee ka morago ga gore go tsene mohlapetši yo mongwe. Ye e bonagala e le nako e swanetšego bakeng sa go hlasela, ka gobane go tla tšea nako pele mahlo a mohlapetši yo a sa tšwago go tsena a tlwaela lefsifsi.

Ga bjale ba-Midiane ba a thothomela ka poifo! Ka ponyo ya leihlo, setu se senywa ke go thubja ga magapa a 300, go letšwa ga diphalafala tše 300 le mašata a banna ba 300. Ba gakanegile, kudu-kudu ka baka la kgoeletšo ya gore ‘lerumo la Jehofa le la Gideoni!,’ ba-Midiane le bona ba oketša lešata ka go goeletša. Ka gare ga tlhakantswiki ye, ga go kgonege go bona gore mang ke mang. Banna ba 300 ba ema ba sa šuthe maemong ao ba abetšwego ona ge Modimo a dutše a dira gore manaba a bona a bolayane ka marumo. Kampa e a fenywa, ga go kgonege go tšhaba, gomme go ba le bao ba swarago manaba ao a šetšego go akaretša le modiro o thata wa go fediša tšhošetšo ya ba-Midiane ka mo go feletšego. Modiro o tšerego nako e telele wa polao o fihlile mafelelong.—Baahlodi 7:19-25; 8:10-12, 28.

Gaešita le ka morago ga phenyo ye, Gideoni o sa dutše a ikokobeditše. Ge ba-Efuraimi, bao go bonagalago ba be ba kgopišegile go se nene ka ge ba sa ka ba bitšwa ntweng, ba leka go mo galefela, o arabela ka tsela e boleta. Karabo ya gagwe e boleta e fokotša go galefa ga bona gomme ba theoša matswalo.—Baahlodi 8:1-3; Diema 15:1.

Ka ge ga bjale go šetše go e-na le khutšo, ba-Isiraele ba hlohleletša Gideoni gore e be kgoši ya bona. Yeo ke teko e le ruri! Eupša Gideoni o a gana. Ga se a ka a hlokomologa taba ya gore ke mang yo a fentšego ba-Midiane. O re: “Nna nka se bê kxoši ya lena; le morwa wa-ka a ka se bê kxoši ya lena. Kxoši ya lena ké Morêna.”—Baahlodi 8:23.

Lega go le bjalo, ka ge a sa phethagala, ga se ka mehla Gideoni a ahlolago ka tsela e botse. Ka lebaka le itšego leo le sa bolelwego, o dira seaparo sa moperisita ka dithebola tša ntwa gomme o se bea e le pontšho motseng. Pego e bontšha gore ba-Isiraele ka moka ba thoma go ba le “modimo o šele” wa seaparo sa moperisita. Ba a se rapela, gomme e ba moreo le go Gideoni gaešita le go lapa la gagwe. Lega go le bjalo, ga se a ka a ba morapedi wa medimo ya diswantšho ka mo go feletšego, ka gobane Mangwalo a bolela ka yena e le monna yo a nago le tumelo go Jehofa.—Baahlodi 8:27, PK; Ba-Hebere 11:32-34.

Seo re Ithutago Sona

Kanegelo ya Gideoni e ruta dithuto tše di neago temošo le kgothatšo. E re lemoša gore ge Jehofa a ka tloša moya wa gagwe gomme a se sa re amogela ka baka la go se kwe ga rena, boemo bja rena bja moya bo tla swana le bja badudi ba naga e hlasetšwego ke bodiidi yeo e sentšwego ke ditšie. Re phela dinakong tše di hlobaetšago gomme ga se ra swanela go tsoga re lebetše gore tšhegofatšo ya Jehofa ke “khumišô . . . ; xa e tlale ka xo itapiša.” (Diema 10:22) Re šegofatšwa ke Modimo ka gobane re ‘mo hlankela ka pelo yohle le ka moya o mafolofolo.’ Ge nkabe go se bjalo, o be a tla re lahla.—1 Koronika 28:9.

Re ka kgothatšwa ke pego ya mabapi le Gideoni, ka gobane e hlatsela gore Jehofa a ka phološa batho ba gagwe kotsing le ge e le efe, gaešita le ka go diriša bao ba bonagalago ba fokola goba ba se na mohola. Taba ya gore Gideoni le banna ba gagwe ba 300 ba ile ba kgona go fenya ba-Midiane ba 135 000 e bontšha matla a Modimo ao a sa felego. Re ka ikhwetša re le mathateng gomme go ka bonagala manaba a rena e le a mantši kudu go re feta. Lega go le bjalo, pego ya Beibele yeo e akaretšago Gideoni e re kgothaletša gore re bote Jehofa, yo a tlago go šegofatša le go phološa bohle bao ba nago le tumelo go Yena.