Beibele e ka go Thuša Gore o Hwetše Lethabo

GAEŠITA le ge e se puku ya ditaelo tša tša kalafo, Beibele e bolela ka mafelelo ao maikwelo—a nepagetšego goba a fošagetšego—a ka bago le ona monaganong le mmeleng wa motho. Beibele e re: “Pelo e thabilexo ké sehlare-hlare; ma-ja-pelo a otiša mmele.” Re bala ka mo go tšwelago pele gore: “X’O nôlêxa môkô mohla wa tlalêlô, xôna matla ’axo xa se a selô.” (Diema 17:22; 24:10) Maikwelo a go nyama a ka re fetša matla, a re dira gore re fokole le go hlaselega gabonolo gomme re sa nyake go dira diphetogo goba go tsoma thušo.

Le gona go nyama go ka kgoma boemo bja motho bja moya. Batho bao ba ikwago ba se na mohola gantši ba nagana gore ba ka se tsoge ba bile le tswalano e botse le Modimo le go amogelwa ke yena. Simone, yo go boletšwego ka yena sehlogong se se fetilego o be a belaela gore ke “mohuta wa motho yo Modimo a ka mo amogelago.” Lega go le bjalo, ge re lebelela ka Lentšung la Modimo e lego Beibele, re hwetša gore Modimo o amogela bao ba katanelago go mo kgahliša.

Modimo o Tshwenyega ka Rena

Beibele e re botša gore “Morêna ó kxaufsi le ba ’pelo di rôbexilexo; ó phološa meôya e kxobetsi.” Modimo ga a nyatše “pelo xe e rôbêxile, xe e setlêxile,” eupša o holofetša go ‘phediša moya o kokobetšego le pelo e setlegilego.’—Psalme 34:18; 51:17; Jesaya 57:15.

Tiragalong e nngwe, Morwa wa Modimo e lego Jesu o ile a bona go le bohlokwa gore a hlalosetše barutiwa ba gagwe taba ya gore Modimo o bona dilo tše dibotse go bahlanka ba Gagwe. E le papišo, o ile a bolela gore Modimo o lemoga ge thaga e wela fase—selo seo batho ba bantši ba ka se se lebelelego e le sa bohlokwa. O ile a ba a gatelela gore Modimo o tseba le ditaba tše dinyenyane kudu ka batho, gaešita  le palo ya meriri ya dihlogo tša bona. Jesu o phethile papišo ya gagwe ka gore: “Ké xôna, se boifeng; Le feta dithaxa è le tše ntši.” (Mateo 10:29-31) * Jesu o bontšhitše gore go sa šetšwe seo batho ba ka se naganago ka bona ka noši, batho bao ba nago le tumelo ke ba bohlokwa mahlong a Modimo. Ge e le gabotse, moapostola Petro o re gopotša gore “Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.”—Ditiro 10:34, 35.

Kgomarela Pono e Leka-lekanego

Lentšu la Modimo le re kgothaletša gore re hlagolele teka-tekano tseleng yeo re itebelelago ka yona. Moapostola Paulo o ngwadile a le ka tlase ga pudulelo gore: “Xe ke bôna kxauxêlô ye e ntirexetšexo, ke botša lena bohle ke re: Xo se kê xwa ba le e a ithsemaxo a fetiša moo xo mo swanetšexo. Ithsemeng ka xo ya ka kêlêlô; mang le mang a yê ka mo Modimo a mo lekanyeditšexo tumêlô.”—Ba-Roma 12:3.

Ka kgonthe, re ka se rate go itebelela re le ba bohlokwa kudu go fihla bokgoleng bja go ba bao ba ikgantšhago; goba go nyaka go ba le pono e fapanego le yeo ka mo go feteletšego gomme ra nagana gore ga re na mohola. Go e na le moo, boikemišetšo bja rena e swanetše go ba go hlagolela pono e leka-lekanego ka rena ka noši, e lego ya go lemoga bokgoni bja rena gotee le mafokodi a rena. Mosadi yo mongwe wa Mokriste o bea taba ka tsela ye: “Ga ke motho yo mobe; e bile ga ke motho yo kaone go feta ba bangwe. Ke na le dika tše dibotse le tše mpe, go fo swana le motho yo mongwe le yo mongwe.”

Ke therešo gore ga go bonolo go ba le pono e leka-lekanego. Go ka nyakega boiteko bjo bogolo kudu gore re fediše pono e fošagetšego kudu mabapi le rena ka noši yeo re ka bago re ile ra ba le yona ka nywaga e mentši. Lega go le bjalo, ka thušo ya Modimo re ka kgona go fetoša semelo sa rena gotee le pono ya rena ka bophelo. Ge e le gabotse, se ke seo Lentšu la Modimo le re kgothaletšago go se dira. Re bala gore: “Ké xôna apolang tše e lexo tša tsela ya kxalê, tša motho e motála, e a senyêxaxo à forilwe ke dikxanyoxô. Sa lena a e bê xo mphsafatšwa moyeng wa dipelo tša lena [“matla ao a tutuetšago menagano ya lena,” NW]. Le aparê motho e mofsa, e a bopetšwexo xo etša Modimo xo lokeng le kxethexong ya makxonthe.”—Ba-Efeso 4:22-24.

Ka go dira boiteko bja go fetoša ‘matla ao a tutuetšago menagano ya rena,’ e lego, tshekamelo e kgolo ya menagano ya rena, re ka fetoša semelo sa rena go tloga go seo se fošagetšego le go feta go ya go seo se nepagetšego. Lena, yo go boletšwego ka yena sehlogong se se fetilego, o ile a thoma go lemoga gore go ba go fihla ge a tla be a lahlile kgopolo ya gore ga go na motho yo a ka mo ratago goba yo a ka mo thušago, ga go na selo seo se ka fetošago kamoo a ikwago ka gona ka yena ka noši goba seo se tla dirago bjalo. Ke keletšo efe e šomago ye e hwetšwago ka Beibeleng yeo e ilego ya thuša Lena, Simone le ba bangwe gore ba dire diphetogo tše bjalo?

 Melao ya Motheo ya Beibele Yeo e Oketšago Lethabo

“Lahlêla Morêna morwalô wa xaxo; Yêna ó tlo Xo babalêla.” (Psalme 55:22) Sa bohlokwa kudu ke gore thapelo e ka re thuša gore re hwetše lethabo la kgonthe. Simone o re: “Nako le nako ge ke ikwa ke nyamile, ke retologela go Jehofa gomme ka mo kgopela thušo. Ga se ka ka ka tsoga ke bile boemong bjo go bjona ke bego ke sa kwe a mmatlafatša le go ntlhahla.” Ge mopsalme a re kgothaletša go lahlela morwalo wa rena go Jehofa, ge e le gabotse o re gopotša gore Jehofa ga a tshwenyege feela ka rena eupša gape o re lebelela ka o tee ka o tee re le batho bao ba swanelwago ke thušo ya gagwe le thekgo. Bošegong bja Paseka ya 33 C.E., barutiwa ba Jesu ba ile ba nyamišwa ke seo Jesu a se boletšego mabapi le go tloga ga gagwe mo go bego go le kgaufsi. Jesu o ile a ba kgothaletša go rapela Tate, gomme a oketša ka gore: “Kxopêlang, xomme Le tlo tšea, xore lethabô la lena e bê le le tletšexo.”—Johane 16:23, 24.

“Lešexo la monei le phala la monewa.” (Ditiro 20:35) Go etša ge Jesu a rutile, go nea ke senotlelo sa go hwetša lethabo la kgonthe bophelong. Go diriša therešo ye ya Beibele go re thuša gore re lebiše tlhokomelo dinyakweng tša ba bangwe go e na le go e lebiša tabeng ya go palelwa ga rena. Ge re thuša ba bangwe gomme re bona tsela e botse yeo ba arabelago ka yona, re ikwa re kgotsofetše. Lena o kgodišegile gore go tšea karolo ka mehla go boledišaneng le baagišani ba gagwe ka ditaba tše dibotse go tšwa Beibeleng go mo thuša ka ditsela tše pedi. O re: “Sa pele, go nnea mohuta wa lethabo le kgotsofalo tšeo Jesu a boletšego ka tšona. Sa bobedi, ke hwetša karabelo e botse kudu go tšwa go ba bangwe, e lego seo se nthušago go hwetša lethabo.” Ge re ikgafa ka go rata, re tla lemoga therešo ya Diema 11:25 e rego: “Mo-xêla-bang’ le yêna ó tlo xêlwa.”

“Go yo madimabe matšatši ka moka ke a mabe; eupša pelo e thabilego ke monyanya wa ka mehla.” (Diema 15:15, PK) Ka moka ga rena re na le kgetho mabapi le kamoo re itebelelago ka gona le kamoo re lebelelago maemo a rena ka gona. Re ka ba bjalo ka motho yo a lebelelago selo se sengwe le se sengwe ka tsela e fošagetšego gomme a ikwa a tshwenyegile, goba re ka kgetha go nagana ka tsela e nepagetšego, gomme ra ba le “pelo e thabilego” le go thaba bjalo ka ge eka re monyanyeng. Simone o re: “Ke leka go dula ke e-na le pono e nepagetšego ka mo go kgonegago. Ke dula ke swaregile thutong ya motho ka noši le bodireding, e bile ke phegelela thapelong. Le gona ke leka go ba gare ga batho bao ba nago le pono e nepagetšego, gomme ke leka go thekga ba bangwe maikwelong.” Go ba le boemo bjo bjalo bja pelo go lebiša lethabong la kgonthe, go fo swana le ge Beibele e re kgothaletša gore: “Thabêlang Morêna! Baloki, hlalalang! Kwatšang mekxolokwane lena ba dipelo tša xo loka.”—Psalme 32:11.

“Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Diema 17:17) Go ntšha sa mafahleng go motho yo re mo ratago goba go moeletši yo a botegago go ka re thuša gore re lebeletšane ka katlego le  maikwelo a fošagetšego gomme ra a rarolla pele ga ge a ka re imela. Go bolela le ba bangwe go ka re thuša gore re bone dilo ka tsela e leka-lekanego le e nepagetšego. Simone o dumela ka gore: “Go ntšha sa mafahleng go thuša kudu. O swanetše go botša yo mongwe mabapi le kamoo o ikwago ka gona. Gantši go nyakega go fo botša motho yo mongwe.” Go dira bjalo go tla go thuša gore o lemoge therešo ya seema se se rego: “Ma-ja-pelo ma-rôba-motho; ó thabišwa ke lentšu la botho.”—Diema 12:25.

Seo o ka se Dirago

Re ahla-ahlile melao ya motheo e mmalwa feela gare ga e mentši e mebotse le e šomago go tšwa Beibeleng yeo e ka re thušago go fenya maikwelo a fošagetšego le go hwetša lethabo la kgonthe. Ge e ba o le gare ga bao ba tshwenywago ke go ikwa ba palelwa, re go kgothaletša gore o hlahlobe Lentšu la Modimo e lego Beibele ka kelohloko. Ithute go hlagolela maikwelo a leka-lekanego mabapi le wena ka noši le ka tswalano ya gago le Modimo. Re holofela e le ka kgonthe gore ka tlhahlo e tšwago Lentšung la Modimo, o tla kgona go hwetša lethabo la kgonthe dilong ka moka tšeo o di dirago.

[Mongwalo wa ka tlase]

[Seswantšho go letlakala 7]

Go phela ka go dumelelana le melao ya motheo ya Beibele go oketša lethabo