Dipotšišo tše Tšwago go Babadi

Na lentšu “mohlomongwê” leo le lego go Tsefanya 2:3 le bolela gore bahlanka ba Modimo ba ka se kgonthišege gore ba tla amogela bophelo bjo bo sa felego?

Lengwalo le le balega ka gore: “Nyakang Morêna, lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.” Ke ka baka la’ng temana ye e re “mohlomongwê”?

E le gore re kwešiše kamoo Jehofa a tlago go dirišana le bahlanka ba gagwe ba botegago ka Haramagedone, ke mo go holago gore re gopole se Beibele e se rutago mabapi le seo Modimo a tlago go se direla bao ba hwago pele ga nako yeo ya kahlolo. Ba bangwe ba tla tsošetšwa bophelong bja go se hwe e le dibopiwa tša moya legodimong, mola ba bangwe ba tla tsošetšwa lefaseng ka tebelelo ya go phela ka mo go sa felego Paradeiseng. (Johane 5:28, 29; 1 Ba-Korinthe 15:53, 54) Ge e ba Jehofa a gopola le go putsa batho ba gagwe ba ba mmotegelago ka go se kwanantšhe bao ba hwago pele ga Haramagedone, ka kgonthe o tla dira se se swanago go bahlanka ba gagwe bao ba phelago letšatšing la bogale bja gagwe.

Mantšu a buduletšwego a moapostola Petro le ona ke a kgothatšago. O ngwadile gore: “[Modimo] a phološa batho ba seswai ka Noaxe sexoeledi sa tokô mola lefase la banyatši à le ribexetša ka meetse-fula. Le metse yela ya Sodoma le Gomora ó e lahlile ya ba molôra, . . . A phonyokxiša Loto moloki, . . . Ké mo xo bônalaxo xore Modimo, ba ba mmoifaxo ó ba hlakodiša melekong; bakxôpô ó ba bolokêla kôtlô ya ’tšatši la kahlolô.” (2 Petro 2:5-9) Le ge Jehofa a fedišitše batho ba kgopo nakong e fetilego, o ile a phološa Noage le Lota bao ba bego ba mo hlankela ka potego. Le gona, Jehofa o tla phološa batho bao ba mmoifago ge a tlo fediša ba kgopo ka Haramagedone. “Lešaba le lexolo” la baloki le tla phologa.—Kutollo 7:9, 14.

Ka gona, go bonagala lentšu “mohlomongwê” leo le lego go Tsefanya 2:3 le sa dirišwa ka baka la go se kgonthišege le ge e le gofe mabapi le bokgoni bja Modimo bja go phološa bao a ba amogelago. Go e na le moo, go phološwa ga motho letšatšing la bogale bja Jehofa go ka kgonega ge feela a thoma go tsoma toko le boikokobetšo. Go phološwa go tla ithekga ka go tšwela pele ga motho a tsoma boikokobetšo le toko.—Tsefanya 2:3.

[Seswantšho go letlakala 31]

“Modimo, ba ba mmoifaxo ó ba hlakodiša melekong”