Jehofa ‘ke Moputsi wa ba mo Nyakago’
Jehofa ‘ke Moputsi wa ba mo Nyakago’
“E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.”—BA-HEBERE 11:6.
1, 2. Ke ka baka la’ng bahlanka ba bangwe ba Jehofa ba ka ba ba lwantšhana le maikwelo a fošagetšego?
BARBARA * o ntšha sa mafahleng ka gore: “Ke bile Hlatse ya Jehofa ka nywaga e ka bago 30, eupša ga se ka ka ka ikwa ke swanelwa ke go bitšwa Hlatse. Gaešita le ge ke ile ka bula madibogo gomme ka ba le ditokelo tše dingwe tše dintši, ga go le e tee ya tšona yeo e ilego ya bonagala e lekane bakeng sa go ntira gore ke dumele ka pelong ya-ka gore ke Hlatse.” Keith le yena o tšweletša dikgopolo tše di swanago. O re: “Ka dinako tše dingwe ke be ke ikwa ke sa swanelege ka gobane bahlanka ba Jehofa ba na le mabaka a mantši a go thaba, eupša nna ke be ke sa thaba. Se se ile sa ntira gore ke ikwe ke le molato, e lego seo se ilego sa fo mpefatša dilo.”
2 Bahlanka ba Jehofa ba bantši ba ba botegago, ba nakong e fetilego le ba mo nakong ye, ba ile ba lwantšhana le maikwelo a swanago. Na le wena ka dinako tše dingwe o kile wa lwantšhana le ona? O ka ba o tshwenywa ke mathata a mantši, mola badumedi-gotee le wena ba bonagala ba thabela bophelo, ba se na taba e bile ba kgotsofetše. Ka baka leo, o ka ikwa o sa amogelwe ke Jehofa goba o sa swanelwe ke tlhokomelo ya gagwe. O se ke wa akgofela go phetha ka gore go bjalo. Beibele e re kgonthišetša gore: “[Jehofa] mohlakô wa mohlaki xa’ o nyatše, xa, o nyênye, xa a mo utêle ’fahloxô sa xaxwe. Xe a xoeletša ó a mo kwa.” (Psalme 22:24) Mantšu ao a boporofeta a mabapi le Mesia a bontšha gore Jehofa ga a kwe feela batho ba gagwe ba botegago eupša gape o a ba putsa.
3. Ke ka baka la’ng le rena re hlaselwa ke dikgateletšo tša tshepedišo ye ya dilo?
3 Ga go na motho yo a sa hlaselwego ke dikgateletšo tša tshepedišo ye ya dilo—go akaretša le batho ba Jehofa. Re phela lefaseng leo le bušwago ke lenaba la Jehofa le legolo, e lego Sathane Diabolo. (2 Ba-Korinthe 4:4; 1 Johane 5:19) Go e na le gore ba šireletšwe ka mohlolo, ge e le gabotse bahlanka ba Jehofa ke bahlaselwa ba bagolo ba Sathane. (Jobo 1:7-12; Kutollo 2:10) Ka gona, go fihla nakong yeo Modimo a e beilego, re swanetše go ‘kgotlelela tlaišegong’ gomme re ‘tiišeng thapelong,’ re kgodišegile gore Jehofa o tshwenyega ka rena. (Ba-Roma 12:12) Ga se ra swanela go itumelela go nagana gore Modimo wa rena Jehofa ga a re rate!
Mehlala ya Bogologolo ya ba Ilego ba Kgotlelela
4. Nea mehlala e mengwe ya bahlanka ba Jehofa ba botegago bao ba ilego ba kgotlelela maemo a gateletšago.
4 Bahlanka ba Jehofa ba bantši ba bogologolo ba ile ba swanelwa ke go kgotlelela maemo a gateletšago. Ka mohlala, Hanna o be “à nyamile pelo” ka gobane o be a se na bana—boemo bjoo a bego a bo lebelela bo swana le go lebalwa ke Modimo. (1 Samuele 1:9-11) Ge Eliya a be a hlomerwe ke Kgošigadi ya mmolai e lego Isebele, o ile a thoma go boifa gomme a rapela Jehofa gore: “Xo hwetše byalo; Morêna tšea môya wa-ka, ka xobane xa ke fete bôtate ka bothakxa.” (1 Dikxoši 19:4) Moapostola Paulo le yena o swanetše go ba a ile a ikwa a gateleditšwe kudu ke go se phethagale ga gagwe ge a be a dumela gore: “Mola kè rata xo dira tše botse, ke xomarêlwa ke bobe.” O okeditše ka gore: “Joo, nna motho wa madi-mabe!”—Ba-Roma 7:21-24.
5. (a) Hanna, Eliya le Paulo ba ile ba putswa bjang? (b) Ke khomotšo efe yeo re ka e hwetšago ka Lentšung la Modimo ge e ba re lwantšhana le maikwelo a fošagetšego?
5 Ee, re a tseba gore Hanna, Eliya le Paulo ka moka ga bona ba ile ba kgotlelela tirelong ya Jehofa, gomme O ile a ba putsa ka mo go humilego. (1 Samuele 1:20; 2:21; 1 Dikxoši 19:5-18; 2 Timotheo 4:8) Lega go le bjalo, ba ile ba lwantšhana le mehuta ka moka ya maikwelo ao batho ba nago le ona, go akaretša manyami, tlalelo le poifo. Ka gona, ga se ra swanela go tlabega ge ka dinako tše dingwe re e-ba le maikwelo a fošagetšego. Lega go le bjalo, o ka dira’ng ge dipelaelo tša bophelo di go dira gore o ipotšiše ge e ba Jehofa a go rata e le ka kgonthe? O ka hwetša khomotšo ka Lentšung la Modimo. Ka mohlala, sehlogong se se fetilego, re ahla-ahlile mantšu a Jesu a gore Jehofa o badile ‘meriri ya dihlogo tša rena.’ (Mateo 10:30) Mantšu ao a kgothatšago a bontšha gore Jehofa o kgahlegela yo mongwe le yo mongwe wa bahlanka ba gagwe kudu. Gopola gape seswantšho sa Jesu sa dithaga. Ge e ba go se na le e tee ya dinonyana tšeo tše dinyenyane yeo e welago fase Jehofa a sa tsebe, o tla ba a go hlokomologela’ng ge o tlaletšwe?
6. Ke bjang Beibele e ka bago mothopo wa kgothatšo go bao ba lwantšhanago le maikwelo a fošagetšego?
6 Na go a kgonega e le ruri gore rena batho ba sa phethagalago re be ba bohlokwa mahlong a Mmopi yo matla ka moka, e lego Jehofa Modimo? Go a kgonega! Ge e le gabotse, go na le ditemana tše mmalwa tša Beibele tšeo di re kgonthišetšago ka se. Ge re naganišiša ka ditemana tše, le rena re ka bolela mantšu a swanago le a mopsalme yo a boletšego gore: “Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.” (Psalme 94:19) Anke re ahla-ahleng a mangwe a mantšu a ao a homotšago a tšwago ka Lentšung la Modimo ao a tlago go re thuša go kwešiša ka mo go feletšego gore Modimo o re lebelela re le ba bohlokwa le gore o tla re putsa ge re dutše re tšwela pele re dira thato ya gagwe.
“Lehumô” la Jehofa
7. Ke boporofeta bofe bjo bo kgothatšago bjoo Jehofa ka Maleaki a ilego a bo botša setšhaba se se gobogilego?
7 Ngwaga-kgolong wa bohlano B.C.E. ba-Juda ba be ba le boemong bjo bo nyamišago kudu. Baperisita ba be ba amogela diphoofolo tše di golofetšego gomme ba di neela e le dihlabelo aletareng ya Jehofa. Baahlodi ba be ba beba sefahlego. Boloi, maaka, bohwirihwiri le bootswa di be di atile. (Maleaki 1:8; 2:9; 3:5) Maleaki o ile a bolela boporofeta bjo bo makatšago a bo botša setšhaba se seo se gobogilego ka mo go feletšego. Ge nako e dutše e e-ya, Jehofa o be a tla bušetša batho ba gagwe boemong bja gore e be bao ba amogelegago gape. Re bala gore: “E tlo ba batho ba-ka!—Ó r’yalo Morêna.—Ka lôna ’tšatši leo ke le beilexo ba tlo ba lehumô la-ka; ke tlo ba setša bo-ka motho xe a setša morwa w’axwe a mo dirêlaxo.”—Maleaki 3:17.
8. Ke ka baka la’ng Maleaki 3:17 e ka dirišwa le go lešaba le legolo?
8 Boporofeta bja Maleaki bo na le phethagalo ya bjona ya mehleng yeno yeo e tswalanago le Bakriste ba ba tloditšwego ka moya, bao ba bopago setšhaba sa moya sa ba 144 000. Setšhaba seo ka kgonthe ke “lehumô” goba “sethšaba se sekxêthwa” go Jehofa. (1 Petro 2:9) Le gona, boporofeta bja Maleaki e ka ba bjo bo kgothatšago go ba “lešaba le lexolo,” bao ba ‘emego pele ga setulo sa bogoši sa Kwana, ba apere dikobo tše ditšhweu.’ (Kutollo 7:4, 9) Ba ba fetoga mohlape o tee le batlotšwa, ka tlase ga Modiši o tee, e lego Jesu Kriste.—Johane 10:16.
9. Ke ka baka la’ng batho ba Jehofa e le “lehumô” go yena?
9 Jehofa o lebelela bjang bao ba kgethago go mo hlankela? Go etša ge go boletšwe go Maleaki 3:17, o ba lebelela ka tsela yeo tate yo lerato a lebelelago morwa wa gagwe ka yona. Ela hloko gape tsela e borutho yeo a hlalosago batho ba gagwe ka yona—“lehumô.” Diphetolelo tše dingwe di fetoletše lentšu leo e le “ba-ka ka noši,” “lehumo la-ka la bohlokwa kudu” le “mabenyabje a-ka.” Ke ka baka la’ng Jehofa a be a tla lebelela bao ba mo hlankelago e le ba bohlokwa gakaalo? Lebaka le lengwe ke gore ke Modimo yo a nago le tebogo. (Ba-Hebere 6:10) O batamela kgaufsi le bao ba mo hlankelago go tšwa pelong gomme o ba lebelela e le ba bohlokwa.
10. Jehofa o šireletša batho ba gagwe bjang?
10 Na o ka nagana ka selo seo o nago le sona se se bitšago tšhelete e ntši seo o se lebelelago e le lehumo? Na ga o gate megato ya go se šireletša? Jehofa o dira se se swanago ka “lehumô” la gagwe. Ke therešo gore ga a šireletše batho ba gagwe ditekong le mathateng ka moka a bophelo. (Mmoledi 9:11) Eupša Jehofa a ka šireletša bahlanka ba gagwe ba botegago moyeng gomme o tla dira bjalo. O ba nea matla ao ba a nyakago e le gore ba kgotlelele teko le ge e le efe. (1 Ba-Korinthe 10:13) Ka gona, Moše o ile a botša batho ba Modimo ba bogologolo e lego ba-Isiraele gore: “Tiišang, Le dirê senna; . . . xobane e a sepelaxo le lena ké Yêna Morêna Modimo wa lena. A ka se kê a Xo lahletša, a ka se kê a Xo tloxêla.” (Doiteronomio 31:6) Jehofa o dirišana le batho ba gagwe ka tsela e putsago. O ba lebelela e le “lehumô.”
Jehofa ke ‘Moputsi’
11, 12. Go kwešiša tema yeo Jehofa a e kgathago bjalo ka Moputsi wa rena go ka re thuša bjang go lwantšhana le dipelaelo?
11 Bohlatse bjo bongwe bja gore Jehofa o lebelela bahlanka ba gagwe e le ba bohlokwa ke gore o a ba putsa. O boditše ba-Isiraele gore: “Napang Le ntekê ka xo dira byalo;—ó r’yalo Morêna wa mašaba,—Le bônê xe ke bula nthoba tša lexodimo ka Le thšollêla thšexofatšô wa xo tlo Le xolêla.” (Maleaki 3:10) Ke therešo gore mafelelong Jehofa o tla putsa bahlanka ba gagwe ka bophelo bjo bo sa felego. (Johane 5:24; Kutollo 21:4) Moputso wo wa bohlokwa kudu o bonagatša bogolo bja lerato la Jehofa le go nea ga gagwe ka seatla se se bulegilego. Le gona o bontšha gore ka kgonthe o lebelela bao ba kgethago go mo hlankela e le ba bohlokwa. Go ithuta go lebelela Jehofa e le Moputsi yo a neago ka seatla se se bulegilego go ka re thuša go lwantšhana le dipelaelo le ge e le dife mabapi le boemo bja rena pele ga Modimo. Ge e le gabotse, Jehofa o re kgothaletša gore re mo lebelele e le Moputsi! Paulo o ngwadile gore: “E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.”—Ba-Hebere 11:6.
12 Ee, re hlankela Jehofa ka gobane re mo rata—e sego feela ka gobane a holofetša go re putsa. Lega go le bjalo, go dula re gopola kholofelo ye ya moputso ga se selo seo re sa swanelago go se dira goba se se bontšhago boithati. (Ba-Kolose 3:23, 24) Ka baka la lerato la gagwe go bona le go ba lebelela e le ba bohlokwa, Jehofa o gata mogato wa pele gomme o putsa bao ba mo tsomago e le ka kgonthe.
13. Ke ka baka la’ng tokišetšo ya topollo e le bohlatse bjo bogolo bja gore Jehofa o a re rata?
13 Selo se segolo seo se bontšhago gore batho ba ka kgona go ba ba bohlokwa mahlong a Jehofa ke tokišetšo ya topollo. Moapostola Johane o ngwadile gore: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Tokišetšo ya sehlabelo sa Jesu Kriste sa topollo e ganetšana le kgopolo ya gore ga re bohlokwa mahlong a Jehofa le gore ga a re rate. Ee, ge e ba Jehofa a re lefeletše ka tefo e kaakaa—ka go neela bophelo bja Morwa wa gagwe yo a tswetšwego a nnoši—ruri o swanetše go ba a re rata kudu.
14. Ke’ng seo se bontšhago kamoo Paulo a bego a lebelela topollo ka gona?
14 Ka gona, ge e ba o e-ba le maikwelo a fošagetšego, naganišiša ka topollo. Ee, e lebelele e le mpho yeo Jehofa a go neago yona. Ke seo moapostola Paulo a ilego a se dira. Gopola gore o itše: “Joo, nna motho wa madi-mabe!” Eupša Paulo o ile a tšwela pele ka gore: “Ke leboxa Modimo ka Jesu Kriste Mong ’a rena,” yo “a nthatilexo, a ikxafa ka ’baka la-ka.” (Ba-Roma 7:24, 25; Ba-Galatia 2:20, mongwalo o sekamego ke wa rena.) Ka go rialo, Paulo o be a sa ikgantšhe. O be a fo ba a kgodišegile gore Jehofa o mo lebelela e le wa bohlokwa. Go etša Paulo, le wena o swanetše go ithuta go lebelela topollo e le mpho yeo Modimo a go neilego yona. Jehofa ga se Mophološi yo a nago le matla a magolo feela eupša gape ke Moputsi yo lerato.
Phafogelang “Maano a Bohwirihwiri” a Sathane
15-17. (a) Ke ka tsela efe Diabolo a dirišago gampe maikwelo a fošagetšego? (b) Ke kgothatšo efe yeo re ka e hwetšago phihlelong ya Jobo?
15 Lega go le bjalo, o ka hwetša go le thata go dumela gore dikhomotšo tše di buduletšwego tše di hwetšwago ka Lentšung la Modimo di tloga di šoma go wena. O ka ba o nagana gore moputso wa go phela ka mo go sa felego lefaseng le lefsa la Modimo ke selo seo ba bangwe ba ka se hwetšago, eupša wena o fo ba o sa swanelwe ke go o hwetša. Ge e ba o ikwa ka tsela ye, o ka dira’ng?
16 Ga go pelaelo gore o tlwaelane le keletšo ya Paulo e yago go ba-Efeso e rego: “Aparang dithlamô tšohle tša Modimo, xore Le kxônê xo fenya dipoxo [“maano a bohwirihwiri,” NW] tša Diabolo.” (Ba-Efeso 6:11) Ge re nagana ka maano a Sathane, dilo tše bjalo ka go rata dilo tše di bonagalago le boitshwaro bjo bo gobogilego di ka tla monaganong ka go akgofa gomme seo ke se se swanetšego kudu. Diteko tše di ile tša tanya batho ba Modimo ba bantši ba mehleng ya bogologolo le ba mehleng yeno. Lega go le bjalo, ga se ra swanela go hlokomologa leano le lengwe la Sathane la bohwirihwiri—go leka ga gagwe go kgodiša batho gore Jehofa Modimo ga a ba rate.
17 Diabolo ke sekgwari tabeng ya go diriša gampe maikwelo a bjalo e le ge a leka go dira gore batho ba furalele Modimo. Gopola mantšu ao Bilidada a ilego a a botša Jobo a rego: “Motho a ka loka bya’ng pele xa Modimo? Ngwana wa mosadi a ka sekêxa bya’ng? Hleng le kxwedi pel’a xaxwe xa y’a taxa. Le dinaledi xa tša sêka pel’a xaxwe. Byale motho,—mo-ka-seboko,—le ngwana wa motho,—mo-etša-sebokwana—?” (Jobo 25:4-6; Johane 8:44) Na o ka kgona go bona kamoo mantšu ao e swanetšego go ba e bile a nyamišago ka gona? Ka gona, o se ke wa dumelela Sathane gore a go nyamiše. Ka lehlakoreng le lengwe, phafogela maano a Sathane e le gore o tle o be le sebete le matla a go lwela ka thata go dira se se lokilego. (2 Ba-Korinthe 2:11) Gaešita le ge Jobo a ile a swanelwa ke go phošollwa, Jehofa o ile a mo putsa bakeng sa kgotlelelo ya gagwe ka go mmušetša gabedi dilo ka moka tšeo di bego di mo lahlegetše.—Jobo 42:10.
Jehofa “ó Feta Dipelo tša Rena”
18, 19. Ke bjang Modimo ‘a fetago dipelo tša rena,’ gomme ke ka tsela efe a ‘tsebago dilo tšohle’?
18 Ke therešo gore go ka ba thata go fediša maikwelo a go nyama ge e ba a šetše a tsemile medu. Lega go le bjalo, moya wa Jehofa o ka go thuša gore o tšwele pele o šwalalanya “dibô . . . le xo iphaxamiša xohle xo šiteletšaxo tsebô ya Modimo.” (2 Ba-Korinthe 10:4, 5) Ge dikgopolo tše di fošagetšego di bonagala di nyaka go go fenya, naganišiša ka mantšu a moapostola Johane a rego: “Ké sôna se re tl’o xo tseba ka sôna xe re le ba therešô; ’me re tlo rola pelo pele xa xaxwe, Ra re, xe pelo e re bexa, ra re: E Moxolo ké Modimo, ó feta dipelo tša rena, ’me ó tseba tšohle.”—1 Johane 3:19, 20.
19 Polelwana e rego “Modimo, ó feta dipelo tša rena” e bolela’ng? Ka dinako tše dingwe, dipelo tša rena di ka re sola, kudu-kudu ge re lemoga go se phethagale ga rena le mafokodi a rena a kwešago bohloko. Goba mohlomongwe ka baka la setlogo sa rena re na le tshekamelo e feteletšego ya go itebelela gampe, bjalo ka ge eka ga go na selo le setee se re se dirago seo Jehofa a ka se amogelago. Mantšu a moapostola Johane a re kgonthišetša gore Jehofa ke yo mogolo go feta seo! Ga a dule a lebeletše diphošo tša rena, eupša o bona bokgoni bja rena bja kgonthe. Le gona, o tseba maikemišetšo a rena le merero ya rena. Dafida o ngwadile gore: “Yena ó tseba lebopô le re lexo ka lôna, xa a lebale xe re le lerole.” (Psalme 103:14) Ee, Jehofa o re tseba gakaone go feta kamoo re itsebago ka gona!
“Mphapahlôxô wa Bothakxa” le “Seala sa Boxoši”
20. Boporofeta bja Jesaya bja tsošološo bo utolla’ng mabapi le kamoo Jehofa a lebelelago bahlanka ba gagwe ka gona?
20 Ka moporofeta Jesaya, Jehofa o ile a nea batho ba gagwe ba bogologolo kholofelo ya tsošološo. Le ge ba be ba tla išwa bothopša Babele, khomotšo ye gotee le go kgonthišetšwa lefsa e be e tloga e le seo batho ba ba nyamilego ba bego ba tla se nyaka! Ge ba letetše nako yeo ka yona ba bego ba tla boela nageng ya gabo bona, Jehofa o ile a re: “O tlo ba mphapahlôxô wa bothakxa ’atleng tša Morêna, le seala sa boxoši sa xo swarwa ke Modimo wa xaxo.” (Jesaya 62:3) Ka mantšu a, Jehofa o ile a nea batho ba gagwe seriti le letago. O dirile se se swanago go setšhaba sa gagwe sa Isiraele ya moya lehono. Go bjalo ka ge eka o se godišitše bakeng sa gore bohle ba se hlomphe.
21. O ka kgodišega bjang gore Jehofa o tla putsa go kgotlelela ga gago ka potego?
21 Le ge boporofeta bjo bo phethagatšwa kudu go bao ba tloditšwego, bo bontšha seriti seo Jehofa a se neago batho ka moka bao ba mo hlankelago. Ka gona, ge o gateleditšwe ke dipelaelo, gopola gore le ge o sa phethagala, o ka ba yo bohlokwa go Jehofa go swana le “mphapahlôxô wa bothakxa” le “seala sa boxoši.” Ka gona tšwela pele o thabiša pelo ya gagwe ka go tsoma go dira thato ya gagwe go tšwa pelong. (Diema 27:11) Ka go dira bjalo, o ka kgodišega gore Jehofa o tla putsa go kgotlelela ga gago ka potego!
[Mongwalo wa ka tlase]
^ ser. 1 Maina a mangwe a fetotšwe.
Na o a Gopola?
• Ke bjang re lego “lehumô” go Jehofa?
• Ke ka baka la’ng e le gabohlokwa go lebelela Jehofa e le Moputsi?
• Ke ‘maano afe a bohwirihwiri’ a Sathane ao re swanetšego go a phafogela?
• Ke ka tsela efe Modimo ‘a fetago dipelo tša rena’?
[Dipotšišo tša Thuto]
[Seswantšho go letlakala 26]
Paulo
[Seswantšho go letlakala 26]
Eliya
[Seswantšho go letlakala 26]
Hanna
[Seswantšho go letlakala 28]
Lentšu la Modimo le na le dikgopolo tše dintši tše di homotšago