Jehofa o Badile “Meriri ya Dihlôxô tša Lena”

“Le e tee ya tšôna [dithaga] e ka se wêle fase xe Tata-weno à sa rate. Ešita le meriri ya dihlôxô tša lena e badilwe ka moka!”—MATEO 10:29, 30.

1, 2. (a) Ke ka baka la’ng Jobo a ile a ikwa a lahlilwe ke Modimo? (b) Na dipolelo tša Jobo di be di bontšha gore o be a furaletše Jehofa? Hlalosa.

“KE A Xo bitša, ’me xa O arabe; xe ke êma, O nape O nkxetla. O mphetoxetše yo šoro, O lwa le nna ka matla a ’atla tša xaxo.” Monna yo a boletšego mantšu ao o be a le tlalelong e kgolo, gomme seo ga se makatše! O be a lahlegetšwe ke dilo tša gagwe tša go iphediša, kotsi e sa tlwaelegago e be e bolaile bana ba gagwe, gomme mo nakong ye o be a swerwe ke bolwetši bjo bo mo fokodišago. Leina la monna yo e be e le Jobo, gomme tlalelo ya gagwe e gateletšago e begilwe ka Beibeleng bakeng sa go re hola.—Jobo 30:20, 21.

² Dipolelo tša Jobo di ka dira gore go bonagale eka o be a furaletše Modimo, eupša go be go se bjalo. Jobo o be a fo bolela ka bogolo bja manyami ao a bego a le pelong ya gagwe. (Jobo 6:2, 3) O be a sa tsebe gore Sathane ke yena a bego a mmakela diteko, ka gona ka phošo o ile a phetha ka gore Modimo o be a mo tlogetše. Ka nako e nngwe, Jobo o ile a ba a botša Jehofa gore: “O re’ng O nkxerula? O re’ng O nthsema lenaba la xaxo?” *—Jobo 13:24.

3. Ge re welwa ke mathata, re ka nagana’ng?

³ Lehono, batho ba Jehofa ba bantši ba tlaišwa ke mathata ao a sa kgaotšego ka baka la dintwa, dikhuduego tša tša dipolitiki goba tša setšhaba, dikotsi tša tlhago, botšofadi, bolwetši, bodiidi bjo bošoro le dithibelo tša mmušo. Mohlomongwe le wena o lebeletšane le diteko tša mohuta o itšego. Ka dinako tše dingwe o ka nagana gore Jehofa o a go gerula. O tseba gabotse mantšu a Johane 3:16 a rego: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši.” Lega go le bjalo, ge o tlaišega o sa hwetše kimollo, o ka ipotšiša gore: ‘Na ruri Modimo o a nthata? Na o bona tlaišego yeo ke lebeletšanego le yona? Na o tshwenyega ka nna?’

4. Ke boemo bofe bjo bo sa kgaotšego bjoo Paulo a ilego a swanelwa ke go bo kgotlelela, gomme boemo bjo bo bjalo bo ka re kgoma ka ditsela dife?

⁴ Ela hloko seo se diragaletšego moapostola Paulo. O ngwadile gore: “Ke neilwe phatša nameng, morongwa wa Sathane wa xo nthsetla ka matswele,” A oketša ka gore: “Ka ’baka la xaxwe ke rapetše Modimo xa-raro, xore a ntloxêlê.” Jehofa o kwele dikgopelo tša gagwe. Lega go le bjalo, o ile a botša Paulo gore o be a ka se tsene ditaba gare ka go mo nea tharollo ya mohlolo. Go e na le moo, Paulo o be a tla swanelwa ke go ithekga ka matla a Modimo gore a mo thuše go lebeletšana ka katlego le “phatša nameng” ya gagwe. * (2 Ba-Korinthe 12:7-9) Go etša Paulo, o ka ba o lebeletšane le teko e itšego yeo e sa kgaotšego. Mohlomongwe o ipotšiša gore, ‘Na taba ya gore Jehofa o bonagala a sa dire selo le ge e le sefe ka teko ya-ka e bolela gore ga a bone boemo bja-ka goba gore ga a tshwenyege ka nna?’ Ga go bjalo le gatee! Go tshwenyega ga Jehofa ka mo go tseneletšego ka yo mongwe le yo mongwe wa bahlanka ba gagwe ba botegago go gatelelwa ke seo Jesu a se boditšego baapostola  ba gagwe kapejana ka morago ga ge a ba kgethile. Anke re boneng kamoo mantšu a gagwe a ka re kgothatšago ka gona lehono.

“Se Boifeng”—Ka Baka La’ng?

5, 6. (a) Jesu o ile a thuša baapostola ba gagwe bjang gore ba se ke ba boifa seo se bego se tla ba diragalela? (b) Paulo o ile a bontšha bjang kholofelo tabeng ya gore Jehofa o a mo hlokomela?

⁵ Jesu o ile a nea baapostola matla a fetago a tlhago, go akaretša le “matla a xo lêlêka meôya ya dithšila, le a xo fodiša malwetši ka moka le mefôkôlô ka moka.” Lega go le bjalo, se se be se sa bolele gore ba be ba ka se lebeletšane le diteko le mathata. Ka mo go fapanego, Jesu o ile a hlalosa ka botlalo tše dingwe tša dilo tšeo di bego di tla ba diragalela. Go sa šetšwe seo, o ile a ba kgothaletša gore: “Le se boifê ba ba bolayaxo mmele, bà sa kxone xo bolaya môya; xaxolo Le boifê Eo a kxônaxo xo senya mmele le môya moleteng wa mollô.”—Mateo 10:1, 16-22, 28.

⁶ E le gore a thuše baapostola ba gagwe go kwešiša lebaka leo ka lona ba bego ba sa swanela go boifa, Jesu o ile a ba nea diswantšho tše pedi. O itše go bona: “A dithaxa tše pedi xa di rekwe ka peni? Xomme le e tee ya tšôna e ka se wêle fase xe Tata-weno à sa rate. Ešita le meriri ya dihlôxô tša lena e badilwe ka moka! Ké xôna, se boifeng; Le feta dithaxa è le tše ntši.” (Mateo 10:29-31) Ela hloko gore Jesu o ile a tswalanya go se boife ge re lebeletšane le mathata le go holofela gore Jehofa o a re hlokomela re le motho ka noši. Go molaleng gore moapostola Paulo o be a e-na le kholofelo e bjalo. O ngwadile gore: “Modimo xe a na le rena, re sa tlo šiteletšwa ke mang? Yêna, e a sa kaxo a tsebafa Morwa wa xaxwe wa ruri, a mo xafa ka ’baka la rena ka moka, a ka lesa bya’ng xo re nea tšohle ka Yêna!” (Ba-Roma 8:31, 32) Go sa šetšwe gore o lebeletšana le ditlhohlo dife, le wena o ka kgonthišega gore Jehofa o a go hlokomela ge feela o dula o mmotegela ka go se kwanantšhe. Se se tla bonagala gabotse kudu ge re lebeledišiša keletšo yeo Jesu a e neilego baapostola ba gagwe.

Theko ya Dithaga

7, 8. (a) Dithaga di be di lebelelwa bjang mehleng ya Jesu? (b) Go bonagala lebaka e le lefe leo ka lona Mateo 10:29 e dirišago nyenyefatšo bakeng sa mohuta wa lentšu la Segerika leo le fetoletšwego e le “dithaxa”?

⁷ Diswantšho tša Jesu di hlalosa gabotse go tshwenyega ga Jehofa ka yo mongwe le yo mongwe wa bahlanka ba Gagwe. Sa pele, ela hloko taba ya dithaga. Mehleng ya Jesu, dithaga di be di jewa, eupša ka baka la gore di be di senya mabele, di be di lebelelwa kudu e le diji. Dithaga di be di atile kudu e bile di bitša tšhelete ya tlasana moo tše pedi di bego di ka rekwa ka tšhelete ya mehleng yeno ya ka tlase ga mo e ka bago disente tše 30. Tšhelete yeo ge e okeditšwe ka makga a mabedi e be e sa reke dithaga tše nne eupša e be e reka tše hlano—nonyana ya bohlano e be e okeletšwa bjalo ka ge eka e be se ya bohlokwa le gatee!—Luka 12:6.

 ⁸ Nagana gape ka bogolo bja nonyana ye yeo e tlwaelegilego. Ge thaga e gotšego ka mo go feletšego e bapišwa le dinonyana tše dingwe tše dintši, ke e nyenyane kudu. Lega go le bjalo, lentšu la Segerika leo le fetoletšwego e le “dithaxa” go Mateo 10:29 le bolela ka mo go kgethegilego ka dithaga tše dinyenyane. Go bonagala Jesu a be a nyaka gore baapostola ba gagwe ba nagane ka nonyana yeo e bego e tloga e se ya bohlokwa. Go etša ge puku e nngwe ya ditšhupetšo e bolela, “Jesu o bolela ka nonyana e nyenyane kudu e bile o diriša nyenyefatšo bakeng sa go e hlalosa!”

9. Ke ntlha efe e matla yeo e tšweletšwago ke seswantšho sa Jesu sa dithaga?

⁹ Seswantšho sa Jesu sa dithaga se tšweletša ntlha e matla: Selo seo se bonagalago e se sa bohlokwa bathong ke sa bohlokwa go Jehofa Modimo. Jesu o tšwetše pele ka go gatelela therešo ye ka go oketša ka gore thaga e nyenyane e be e ka se “wêle fase” Jehofa a sa e bone. * Thuto ye e a kwagala. Ge e ba Jehofa Modimo a hlokomela nonyana e nyenyane kudu le yeo e tlogago e se ya bohlokwa, gona o swanetše go ba a tshwenyega kudu gakaakang ka mathata a motho yo a kgethilego go mo hlankela!

10. Polelwana e rego: “Meriri ya dihlôxô tša lena e badilwe ka moka” e bontšha’ng?

¹⁰ Go oketša seswantšhong sa gagwe sa mabapi le dithaga, Jesu o itše: “Meriri ya dihlôxô tša lena e badilwe ka moka!” (Mateo 10:30) Polelwana ye e kopana eupša e le ya bohlokwa kudu e tiišetša ntlha ya seswantšho sa Jesu mabapi le dithaga. Nagana ka se: Hlogo ya motho e na le meriri e ka bago 100 000. Gantši, moriri o tee o bonagala o swana tlwaa le o mongwe, gomme ga go na moriri le o tee woo o bonagalago e le wa bohlokwa gore re ka o nea tlhokomelo e kgethegilego. Lega go le bjalo, Jehofa Modimo o bona moriri o mongwe le o mongwe gomme o o badile. Ka ge go le bjalo, na go na le selo le ge e le sefe maphelong a rena seo Jehofa a ka se se tsebego? Ka kgonthe, Jehofa o kwešiša gore mohlanka yo mongwe le yo mongwe wa gagwe ke motho wa moswana-noši. Ee, o “bôna pelo.”—1 Samuele 16:7.

11. Dafida o ile a bontšha bjang kgodišego ya gagwe ya gore Jehofa o tshwenyega ka yena?

¹¹ Dafida yo a ilego a lebeletšana le mathata a mantši, o be a kgodišegile gore Jehofa o be a mmona. O ngwadile gore: “Morêna, O a nthlaoloxanya, O a ntseba. O ntseba xe ke dula, le xe ke tsoxa; O ntemoxa tša pelong, xe di sa le kxolê.” (Psalme 139:1, 2) Le wena o ka kgodišega gore Jehofa o a go tseba. (Jeremia 17:10) O se ke wa akgofela go nagana gore o tloga o se wa bohlokwa gore o ka bonwa ke mahlo a Jehofa ao a bonago tšohle!

‘Megokgo Ya-ka e Boloke Legapaneng la Gago Leo le Dirilwego ka Letlalo’

12. Re tseba bjang gore Jehofa o tloga a tseba mathata ao batho ba gagwe ba lebeletšanago le ona?

¹² Ga se feela gore Jehofa o tseba bahlanka ba gagwe e le motho ka o tee ka o tee eupša gape o tloga a tseba mathata ao yo mongwe le yo mongwe wa bona a lebeletšanago le ona. Ka mohlala, ge ba-Isiraele ba be ba gatelelwa e le makgoba, Jehofa o ile a botša Moše gore: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla ka ’baka la baxapeletši ba bôná; ruri, ditlaišêxô tša bôná ke a di tseba.” (Ekisodo 3:7) Ke mo go homotšago  gakaakang go tseba gore ge re kgotlelela teko, Jehofa o bona seo se diregago gomme o a re kwa ge re kgopela thušo! Ka kgonthe, ga a hlokomologe ditlaišego tša rena.

13. Ke’ng se se bontšhago gore Jehofa o tloga a kwela bahlanka ba gagwe bohloko?

¹³ Go tshwenyega ga Jehofa ka bao ba tsenego tswalanong le yena go bonwa gape maikwelong a gagwe go ba-Isiraele. Gaešita le ge go tlaišega ga bona gantši go be go bakwa ke bohlogo-thata bja bona ka noši, Jesaya o ile a ngwala mabapi le Jehofa gore: “Mehlakong ya bôná yohle, ó be a hlaka le Yêna.” (Jesaya 63:9) Ka gona, bjalo ka mohlanka wa Jehofa yo a botegago o ka kgodišega gore ge o e-kwa bohloko, Jehofa le yena o kwa bohlokwa. Na seo ga se go tutueletše gore o lebeletšane le mathata o sa boife le gore o tšwele pele o dira sohle seo o ka se kgonago gore o mo hlankele?—1 Petro 5:6, 7.

14. Psalme 56 e hlamilwe ka tlase ga maemo afe?

¹⁴ Go kgolwa ga Kgoši Dafida gore Jehofa o be a mo hlokomela le gore o be a mo kwela bohloko go bonagatšwa gabotse go Psalme 56, yeo Dafida a e hlamilego ge a be a tšhaba Kgoši ya mmolai e lego Saulo. Dafida o ile a tšhabela Gathe, eupša o be a boifa go swarwa ge ba-Filisita ba be ba lemoga gore ke yena mang. O ngwadile gore: “Ke hlwa kè šwahlêlwa ke bahlomaredi, xobane ké ba bantši ba ba lwaxo le nna ba nnamela.” Ka ge a be a le boemong bjo kotsi, Dafida o ile a retologela go Jehofa. O itše: “Ba hlwa ba nthsenyetša ’taba tša-ka; maanô ba loxa a xo nthlokofatša.”—Psalme 56:2, 5.

15. (a) Dafida o be a bolela’ng ge a be a kgopela Jehofa gore a boloke megokgo ya gagwe ka legapaneng leo le dirilwego ka letlalo goba ka pukung? (b) Ge re kgotlelela boemo bjo bo lekago tumelo, re ka kgonthišega ka’ng?

¹⁵ Ke moka, go etša ge go begilwe go Psalme 56:8, Dafida o bolela mantšu a a kgahlišago a rego: “Methšabô ya-ka O a e bala; mexôkxô ya-ka e bolokê sebyaneng sa xaxo [“legapaneng la gago leo le dirilwego ka letlalo,” NW]; a xa ke re: Di pukung ya xaxo?” A tlhaloso e kgomago pelo gakaakang ya tlhokomelo ya Jehofa e lerato! Ge re gateletšegile, re ka llela go Jehofa. Gaešita le monna yo a phethagetšego e lego Jesu o ile a dira bjalo. (Ba-Hebere 5:7) Dafida o be a kgodišegile gore Jehofa o be a mmona le gore o be a tla gopola tlalelo ya gagwe, bjalo ka ge eka o be a bolokile megokgo ya gagwe ka legapaneng leo le dirilwego ka letlalo goba a e ngwadile ka pukung. * Mohlomongwe o nagana gore megokgo ya gago e be e tla tlatša legapana leo le le dirilwego ka letlalo wa go falala goba e be e tla tlatša matlakala a mantši a puku e bjalo. Ge e ba go le bjalo, o ka rola pelo. Beibele e re kgonthišetša gore: “Morêna ó kxaufsi le ba ’pelo di rôbexilexo; ó phološa meôya e kxobetsi.”—Psalme 34:18.

Go ba Mogwera wa Modimo wa Kgaufsi

16, 17. (a) Re tseba bjang gore Jehofa ga a hlokomologe mathata ao batho ba gagwe ba lebeletšanago le ona? (b) Jehofa o dirile’ng bakeng sa go dumelela batho gore ba thabele segwera sa kgaufsi le yena?

¹⁶ Taba ya gore Jehofa o badile ‘meriri ya dihlogo tša rena’ e re nea kgopolo e itšego ka mohuta wa Modimo yo a lego šedi le yo lerato yoo re nago le tokelo ya go mo rapela. Gaešita le ge re tla swanelwa ke go leta go fihlela lefase le lefsa leo le holofeditšwego gore mahlaba a rena ka moka gotee le tlaišego di fele, Jehofa o dira selo se sengwe se se kgahlišago bakeng sa batho ba gagwe mo nakong ye. Dafida o ngwadile gore: “Morêna ó kwana [“o ba le segwera sa kgaufsi,” NW] le ba ba mmoifaxo; kxwêranô ya xaxwe ké ya xo tsebišwa bôná-bao.”—Psalme 25:14.

¹⁷ ‘Go ba le segwera sa kgaufsi le Jehofa.’ Ee, kgopolo yeo ka boyona e bonagala e sa kgonege go batho bao ba sa phethagalago! Lega go le bjalo, Jehofa o laletša bao ba mmoifago gore e be baeng tenteng ya gagwe. (Psalme 15:1-5) Le gona, ke’ng seo Jehofa a se direlago baeng ba gagwe? Go ya ka Dafida, o ba tsebiša kgwerano ya gagwe. Jehofa o ba ntšhetša sa mafahleng, o utollela baporofeta “thopa” ya gagwe e le gore ba kgone go tseba merero ya gagwe le seo ba  swanetšego go se dira e le gore ba phele ka go dumelelana le yona.—Amosi 3:7.

18. Re tseba bjang gore Jehofa o nyaka gore re be le tswalano ya kgaufsi le yena?

¹⁸ Ke therešo gore ke mo go thabišago go tseba gore rena batho ba sa phethagalago re ka ba bagwera ba kgaufsi ba Yo a Phagamego Kudu e lego Jehofa Modimo. Ge e le gabotse, o re kgothaletša gore re dire sona seo. Beibele e re: “Batamêlang Modimo, le Yêna a Le batamêlê.” (Jakobo 4:8) Jehofa o nyaka gore re be le tswalano ya kgaufsi le yena. Ge e le gabotse, o šetše a gatile megato ya go dira gore tswalano e bjalo e kgonege. Sehlabelo sa topollo sa Jesu se re buletše mojako e le gore re kgone go ba le segwera le Modimo yo Matla ohle. Beibele e re: “Rena a re Mo rateng, xobane ó re ratile pele.”—1 Johane 4:19.

19. Kgotlelelo e ka matlafatša bjang tswalano ya rena le Jehofa?

¹⁹ Tswalano yeo ya kgaufsi e matlafatšwa ke ge re kgotlelela maemo a thata. Morutiwa Jakobo o ngwadile gore: “Kxôtlêlêlô yôna a e bê le modirô wo o tletšexo, xore Le bê ba-boló-ka-tlalô ba ba se naxo senyalô, Le se bê le mo Le hlaetšaxo.” (Jakobo 1:4) Ke “modirô” ofe wo o fihlelelwago ka go kgotlelela mathata? Gopola “phatša nameng” ya Paulo. Kgotlelelo e ile ya fihlelela’ng boemong bjo? Paulo o boletše mabapi le diteko tše a ilego a lebeletšana le tšona gore: “Ké xôna ke rexo xo kaone xe nka kxahlwa ke xo kxanthša diphôkôlô tša-ka, xore matla a Kriste a axê mo xo nna. Ké ka ’baka leo ke thabaxo diphokolong le mabothateng le thšexong le ditlaišexong, kè le tlalelong ka ’baka la Kriste; xobane xe ke fôkôla ké mo ke naxo le matla.” (2 Ba-Korinthe 12:9, 10) Phihlelo ya Paulo e be e le gore Jehofa o be a tla mo nea matla ao a nyakegago—‘matla a fetago a tlwaelegilego’ ge e ba go nyakega—e le gore a kgone go kgotlelela. Ka baka leo, seo se ile sa mmatametša kgaufsi le Kriste le Jehofa Modimo.—2 Ba-Korinthe 4:7; Ba-Filipi 4:11-13.

20. Re ka kgodišega bjang gore Jehofa o tla re thekga le go re homotša ge re lebeletšane le mathata?

²⁰ Mohlomongwe Jehofa o dumeletše gore diteko tšeo o lebeletšanego le tšona di tšwele pele. Ge e ba go le bjalo, gopola kholofetšo ya gagwe go bao ba mmoifago e rego: “Nka se kê ka Xo lahla; nka se kê ka Xo tloxêla.” (Ba-Hebere 13:5) O ka hwetša thekgo e bjalo le khomotšo. Jehofa o badile ‘meriri ya hlogo ya gago.’ O bona kgotlelelo ya gago. O kwa bohloko bjoo o bo kwago. O tshwenyega ka wena e le ka kgonthe. Le gona, le ka mohla ‘a ka se lebale mediro ya gago le lerato leo o itapišitšego ka lona leineng la gagwe.’—Ba-Hebere 6:10.

[Mengwalo ya ka tlase]

Na o a Gopola?

• Ke dilo dife tšeo di ka dirago gore motho a ikwe a lahlilwe ke Modimo?

• Ke thuto efe yeo re ithutago yona seswantšhong sa Jesu sa dithaga le sa go balwa ga meriri ya dihlogo tša rena?

• Go bolokwa ga megokgo ya motho ka ‘legapaneng la Jehofa leo le dirilwego ka letlalo’ goba ka “pukung” ya gagwe go bolela’ng?

• Ke bjang re ka bago le ‘segwera sa kgaufsi le Jehofa’?

[Dipotšišo tša Thuto]

[Seswantšho go letlakala 22]

Ke ka baka la’ng Jehofa a se a ka a tloša “phatša nameng” ya Paulo?

[Seswantšho go letlakala 23]

Re ka ithuta’ng seswantšhong sa Jesu sa dithaga?

[Mothopo]

© J. Heidecker/VIREO

[Seswantšho go letlakala 25]

Ka go bala Beibele ka mehla, re ka hwetša kgonthišetšo ya gore Modimo o tshwenyega ka rena re le motho ka noši