Leeto le Letelele le a Putswa

GO NA le pego e tšwago Democratic Republic of Congo ya basadi ba babedi ba e lego bana ba motho bao ba ilego ba dira phetho ya go tšea leeto le letelele lefelong leo le hlagaditšwego ke ntwa go yo ba gona Kopanong ya Selete ya “Neang Modimo Letago” kua Lisala. Ka ntle le thuto ya moya le bogwera bja Bokriste tšeo ba bego ba holofetše go yo di thabela kopanong, ba be ba fagahletše go yo kopana le baemedi ba ofisi ya lekala ya Dihlatse tša Jehofa ba Kinshasa. Ka baka la ntwa ya selegae ka nageng, ba be ba sa ka ba bona motho le ge e le ofe yo a tšwago lekaleng ka nywaga e mentši, gomme ba be ba nyaka go diriša sebaka se go dira bjalo.

Bana ba ba motho ba ile ba sepela ka seketswana seo se dirilwego ka kota go tloga toropong ya gabo bona ya Basankusu go ya Lisala, e lego leeto la dikhilomithara tše 300 go phatša sethokgwa le go sesa ka dinokeng tše pedi. Leeto leo le ba tšere dibeke tše tharo. Ka ge bobedi bja bona ba le tirelong ya nako e tletšego, yo mongwe a hlanketše ka nywaga e 3 gomme yo mongwe ka e 19, ba ile ba lebelela leeto la bona e le sebaka se sebotse sa go phatlalatša ditaba tše dibotse tša Mmušo. Ba feditše diiri tše ka bago 110 ba dira boboledi go bao ba gahlanago le bona tseleng, gomme ba sepediša dipampišana tše 200 le dimakasine tše 30.

Ka nokeng, ba ile ba sesa gare ga dikubu le dikwena tšeo di tlwaelegilego kudu tikologong yeo. Ba be ba ka se sese ka nokeng bošego—go be go se bonolo go sesa ge go šetše go fsifetše! Le gona, ba ile ba feta mafelong a mantši ao mašole a phuruphutšago batho go ona.

Gaešita le ge leeto le e be e le letelele kudu e bile e le le le lapišago, bana ba ba motho ba be ba thabetše go dira boiteko. Bobedi bja bona ba be ba tletše tebogo e bile ba thabetše go ba gona kopanong kua Lisala. Dipelo tša bona di be di tloga di fišegela therešo, gomme ba be ba kgothaditšwe ke go ba gare ga bana babo rena le dikgaetšedi ba 7 000 bao ba bego ba le gona. Ka morago ga kopano, ba ile ba lebeletšana le ditlhohlo tše di swanago leetong la bona la go boela gae, moo ba ilego ba hwetša malapa a bona a bolokegile e bile a phetše gabotse.