Bakriste ba Bonagatša Letago la Jehofa
Bakriste ba Bonagatša Letago la Jehofa
“A lena mahlô ké a lehlôxônôlô, xobane a a bôna; le ditsêbê tša lena, xobane di a kwa.”—MATEO 13:16.
1. Ke potšišo efe yeo re naganago ka yona mabapi le kamoo ba-Isiraele ba arabetšego ka gona go Moše kua Thabeng ya Sinai?
BA-ISIRAELE bao ba bego ba bokane Thabeng ya Sinai ba be ba e-na le mabaka a kwagalago a go batamela kgaufsi le Jehofa. Ka godimo ga moo, o be a ba phološitše Egipita ka seatla se matla. O be a hlokomela dinyakwa tša bona, a ba nea dijo le meetse lešokeng. Se se latelago, o ile a dira gore ba fenye madira a ba-Amaleke ao a bego a ba hlasela. (Ekisodo 14:26-31; 16:2–17:13) Ge ba dutše ba hlomile mešaša lešokeng ka pele ga Thaba ya Sinai, batho ba be ba tšhošitšwe kudu ke modumo le magadima moo ba ilego ba thothomela. Ka morago, ba ile ba bona Moše a theoga Thabeng ya Sinai, sefahlego sa gagwe se bonagatša letago la Jehofa. Lega go le bjalo, go e-na le gore ba makale le gore ba lemoge letago la Jehofa, ba ile ba mo katoga. Ba be ‘ba boifa go batamela Moše.’ (Ekisodo 19:10-19; 34:30) Ke ka baka la’ng ba be ba boifa go bona ponagatšo ya letago la Jehofa, yo a ba diretšego dilo tše dintši gakaakaa?
2. Ke ka baka la’ng ba-Isiraele ba ka ba ba be ba boifa go bona letago la Modimo leo le bego le bonagatšwa ke Moše?
2 Go na le kgonagalo ya gore poifo e kgolo ya ba-Isiraele mo nakong ye e be e bakilwe ke seo se diregilego pejana. Ge ba be ba sa kwe Jehofa ka boomo ka go itirela namane ya gauta, Ekisodo 32:4, 35) Na ba ile ba ithuta tayong ya Jehofa gomme ba e tšeela godimo? Aowa, ba bantši ga se ba ka ba dira bjalo. Go ya mafelelong a bophelo bja gagwe, Moše o ile a gopola tiragalo ya namane ya gauta gotee le dinako tše dingwe tšeo ka tšona ba-Isiraele ba ilego ba se kwe. O boditše batho ba gore: “La xanetša molomo wa Morêna, la se kê la mmôta, la se ke la theetša se a se boletšexo. E sa le mola kè Le tseba, Le ba xo nganga-ngangana le Morêna.”—Doiteronomio 9:15-24.
o ile a ba laya. (3. Moše o ile a dira’ng bakeng sa go šira sefahlego sa gagwe?
3 Ela hloko kamoo Moše a ilego a ikwa ka gona ge ba-Isiraele ba be ba bontšha poifo yeo. Pego e balega ka gore: “Xe a feditše xo bolêla nabô’, a šira sefahloxô sa xaxwe ka lešira. Xomme xe a tlile [tabarenakeleng] pele xa sefahloxô sa Morêna xo bolêla naê’, a tloše lešira xo fihla xe a e-tšwa. Xe a e-tšwa, a botša Ba-Isiraele tše a di laetšwexo; Ké mo Ba-Isiraele ba bonexo xore letlalô la sefahloxô sa Mošê le a phadima. Mošê a bušetša lešira sefahloxong sa xaxwe, a le tloša xe a e-ya xo bolêla le [Jehofa].” (Ekisodo 34:33-35) Ke ka baka la’ng Moše ka dinako tše dingwe a be a šira sefahlego sa gagwe? Re ka ithuta’ng go se? Dikarabo tša dipotšišo tše di ka re thuša go hlahloba tswalano ya rena ka noši le Jehofa.
Dibaka Tšeo di sa Kago tša Dirišwa
4. Moapostola Paulo o ile a utolla tlhaloso efe mabapi le go apara ga Moše seširo?
4 Moapostola Paulo o ile a hlalosa gore go apara ga Moše seširo go be go akaretša boemo bja monagano le bja pelo bja ba-Isiraele ka bobona. Paulo o ngwadile gore: “Ba-lsiraele ba bá ba šitwa xo boxêla sefahloxô sa Mošê ka letaxô la sefahloxô sa xaxwe, . . . . ’Me mexopolô ya bôná ya thatafala.” (2 Ba-Korinthe 3:7, 14) A boemo bjo bo nyamišago gakaakang! Ba-Isiraele e be e le batho bao ba kgethilwego ke Jehofa, gomme o be a nyaka gore ba batamele kgaufsi le yena. (Ekisodo 19:4-6) Lega go le bjalo, ba be ba dika-dika go lebeledišiša ponagatšo ya letago la Modimo. Go e na le go retollela dipelo tša bona le menagano ya bona go Jehofa ka go ineela go yena ka lerato, ka kgopolo e itšego ba ile ba mo furalela.
5, 6. (a) Ke go swana gofe mo go lego gona magareng ga ba-Juda ba lekgolong la pele la nywaga le ba-Isiraele ba mehleng ya Moše? (b) Ke phapano efe yeo e bego e le gona magareng ga bao ba ilego ba theetša Jesu le bao ba sa kago ba mo theetša?
5 Taba ye e swana le ya lekgolong la pele la nywaga C.E. Nakong ya go sokologela ga Paulo Bokristeng, Molao wa kgwerano o be o tšeetšwe legato ke kgwerano e mpsha, yeo mmoelanyi wa yona e bego e le Jesu Kriste, Moše yo Mogolo. Ka mantšu le ka ditiro, Jesu o ile a bonagatša letago la Jehofa ka mo go phethagetšego. Paulo o ngwadile mabapi le Jesu yo a tsošitšwego gore: “[Ke] Yêna seetša sa xo tšwa letaxong la Modimo, è lexo Yêna swanthšô sa lebopô le Modimo a lexo ka lôna.” (Ba-Hebere 1:3) A sebaka se sebotse gakaakang seo ba-Juda ba bego ba e-na le sona! Ba be ba kgona go theetša dipolelo tša bophelo bjo bo sa felego tše di tšwago go Morwa wa Modimo ka noši! Se se nyamišago ke gore ba bantši ba bao Jesu a bego a dira boboledi go bona ga se ba ka ba theetša. Mabapi le bona, Jesu o tsopotše boporofeta bja Jehofa ka Jesaya bjo bo rego: “’Pelo tša sethšaba sé di retetše; ’tsêbê tša bôná di thibetše; ba foufetše mahlô. Ba ka se hlwê ba bôna ka mahlô, ba ka se hlwê ba e-kwa ka ditsêbê, ba ka se hlaloxanye ka dipelo, ba ka se kê ba sokoloxa ka ba phološa.”—Mateo 13:15; Jesaya 6:9, 10.
6 Go be go e-na le phapano e kgolo magareng ga ba-Juda le barutiwa ba Jesu, bao Jesu a boletšego ka bona gore: “A lena mahlô ké a lehlôxônôlô, xobane a a bôna; le ditsêbê tša lena, xobane di a kwa.” (Mateo 13:16) Bakriste ba therešo ba hlologelwa go tseba Jehofa le go Mo hlankela. Ba thabela go phetha thato ya gagwe, go etša ge e utollwa ka Beibeleng. Ka baka leo, Bakriste ba tloditšwego ba bonagatša letago la Jehofa bodireding bja bona bja kgwerano e mpsha, gomme ba dinku tše dingwe ba dira se se swanago.—2 Ba-Korinthe 3:6, 18.
Lebaka Leo ka Lona Ditaba tše Dibotse di Širegilego
7. Ke ka baka la’ng e se mo go makatšago gore ba bantši ba gana ditaba tše dibotse?
7 Go etša ge re bone, mehleng ya Jesu le mehleng ya Moše, ba-Isiraele ba bantši ba ile ba gana sebaka sa moswana-noši seo se bego se ba bulegetše. Go bjalo le mehleng ya rena. Batho ba bantši ba gana ditaba tše dibotse tšeo re di bolelago. Se ga se re makatše. Paulo o ngwadile gore: “Xe Ebangedi ya rena è sa le phihlô, e fihletšwe bao ba lahlêxaxo. Ké ba ba sa dumelexo, ba modimo wa lefase lé o foufaditšexo dipelo tša bôná.” (2 Ba-Korinthe 4:3, 4) Go oketša maitekong a Sathane a go leka go fihla ditaba tše dibotse, batho ba bantši ba šira difahlego tša bona ka noši ka gobane ba sa nyake go bona.
8. Ke ka tsela efe ba bantši ba foufaditšwego ke go se šetše, gomme re ka phema bjang go kgongwa ka tsela e swanago?
8 Mahlo a seswantšhetšo a ba bantši a foufaditšwe ke go se šetše. Beibele e bolela ka ditšhaba e le tšeo di ‘fsifetšego tlhaologanyo, di tlogelane le bophelo bja Modimo, ka baka la go se šetše ga tšona.’ (Ba-Efeso 4:18) Pele ga ge e e ba Mokriste, Paulo e lego monna yo a tsebago Molao, o be a foufaditšwe ke go se šetše moo a ilego a tlaiša phuthego ya Modimo. (1 Ba-Korinthe 15:9) Lega go le bjalo, Jehofa o ile a mo utollela therešo. Paulo o hlalosa gore: “Ke xauxetšwe, xore ka nna ke lexo thwadi ya ba-dira-dibe Jesu Kriste a bônaxatšê xôna xo se fêle pelo xa paala, xore bohle ba ba tl’o xo dumêla ba swanthšetšwê ka nna, ba išwê bophelong byo bo sa felexo.” (1 Timotheo 1:16) Go etša Paulo, ba bantši bao ba kilego ba ganetša therešo ya Modimo mo nakong ye ba a Mo hlankela. Le ke lebaka le le kwagalago la gore re tšwele pele re nea bohlatse gaešita le go bao ba re ganetšago. Go sa dutše go le bjalo, ka go ithuta Lentšu la Modimo ka mehla le go le kwešiša, re šireletšwa go direng dilo ka go se šetše ka tsela yeo e sa thabišego Jehofa.
9, 10. (a) Ba-Juda ba lekgolong la pele la nywaga ba ile ba ipontšha bjang gore ga ba ikemišetša go rutwa le gore ba swareletše ka go tia diponong tša bona? (b) Na go na le go swana mo go lego gona magareng ga bona le Bojakane lehono? Hlalosa.
9 Go ba bantši, pono ya moya e širilwe ka gobane ga ba ikemišetša go rutwa e bile ba swareletše ka go tia diponong tša bona. Ba-Juda ba bantši ba ile ba gana Jesu le dithuto tša gagwe ka gobane ba be ba kgomaretše Molao wa Moše ka manganga. Ke therešo gore go be go e-na le ba bangwe ba ba fapanego. Ka mohlala, ka morago ga ge Jesu a tsošitšwe, “lešaba le lentši la baperisita la bušwa ke tumêlô.” (Ditiro 6:7) Lega go le bjalo, Paulo o ile a ngwala mabapi le ba-Juda ba bantši gore: “Le lehono xe xo balwa mangwalô a Mošê, seširô seo se dutše sè apešitše dipelo tša bôná.” (2 Ba-Korinthe 3:15) Go na le kgonagalo ya gore Paulo o be a tseba seo Jesu a ilego a se botša baetapele ba bodumedi ba ba-Juda nakong e fetilego ge a re: “Latišang mangwalong, ka xobane lena Le re Le na le bophelô byo bo sa felexo ka ôna; xomme ké ôna-xê a a hlatsêlaxo Nna.” (Johane 5:39) Mangwalo ao ba bego ba a latišiša ka kelohloko kudu a be a swanetše go ba thuša go tseba gore Jesu e be e le Mesia. Lega go le bjalo, ba-Juda ba be ba e-na le dikgopolo tša bona ka noši, gomme gaešita le Morwa wa Modimo yo a bego a dira mehlolo ga se a ka a kgona go ba kgodiša gore ba di fetole.
10 Selo se se swanago ke sa therešo ka ba bantši bao ba lego Bojakaneng lehono. Go etša ba-Juda ba lekgolong la pele la nywaga, “ba fišexetšwe Modimo; fêla, ba hlôka temoxô.” (Ba-Roma 10:2) Gaešita le ge ba bangwe ba ithuta Beibele, ga ba nyake go dumela seo e se bolelago. Ba gana go amogela gore Jehofa o ruta batho ba gagwe ka sehlopha sa gagwe sa molaki yo a botegago le yo bohlale sa Bakriste ba tloditšwego. (Mateo 24:45) Lega go le bjalo, rena re kwešiša gore Jehofa o ruta batho ba gagwe le gore kwešišo ya therešo ya Gagwe e be e dutše e kaonefala. (Diema 4:18) Ka go itumelela gore re rutwe ke Jehofa, re šegofaditšwe ka tsebo ya go tseba thato ya gagwe le morero wa gagwe.
11. Ke tema efe yeo kganyogo e e kgathilego tabeng ya go fihla therešo?
11 Ba bangwe ba foufaditšwe ke kganyogo ya bona. Go boletšwe e sa le pele gore ba bangwe ba be ba tla kwera batho ba Modimo le molaetša wo ba o tsebatšago mabapi le go ba gona ga Jesu. Moapostola Petro o ngwadile gore: ‘Ba dira ka boomo ge ba sa hlathe therešo ye,’ ya gore Modimo o tlišitše meetse-fula lefaseng la mehleng ya Noage. (2 Petro 3:3-6) Ka mo go swanago, ba bantši bao ba ipolelago gore ke Bakriste ba amogela ka pelo e tšhweu gore Jehofa o bontšha kgaugelo, botho le tebalelo; lega go le bjalo ba hlokomologa goba ba gana taba ya gore ga a tlogele motho a sa otlwa. (Ekisodo 34:6, 7) Bakriste ba therešo ba ba šedi gore ba kwešiša seo Beibele e se rutago e le ka kgonthe.
12. Batho ba foufaditšwe bjang ke metlwae?
12 Batho ba bantši bao ba tsenago kereke ba foufaditšwe ke metlwae. Jesu o boditše baetapele ba bodumedi ba mehleng ya gagwe gore: “Le lahla Molaô wa Modimo, Lè e-ya ka metlwaê ya lena.” (Mateo 15:6) Ba-Juda ka mafolofolo ba ile ba tsošološa borapedi bjo bo sekilego ka morago ga go boa bothopša Babele, lega go le bjalo baperisita ka noši ba ile ba ikgantšha ba ba ba ipona e le baloki. Menyanya ya bodumedi e ile ya ba selo sa tlwaelo, gomme e be e sa bontšhe tlhompho ya kgonthe go Modimo. (Maleaki 1:6-8) Mehleng ya Jesu, bamangwalo le Bafarisei ba be ba okeditše metlwae e mentši Molaong wa Moše. Jesu o ile a pepentšha banna bao e le baikaketši ka gobane ba be ba se sa lemoga melao ya motheo ya go loka yeo Molao o bego o theilwe go yona. (Mateo 23:23, 24) Bakriste ba therešo ba swanetše go ba šedi gore ba se ke ba dumelela metlwae ya bodumedi yeo e hlamilwego ke batho gore e ba aroše borapeding bjo bo sekilego.
‘Go Bona e a sa Bonwego’
13. Ke ka ditsela dife tše pedi tšeo ka tšona Moše a ilego a bona tekanyo e itšego ya letago la Modimo?
13 Moše o ile a kgopela go bona letago la Modimo thabeng, gomme o ile a bona seetša sa letago la Jehofa. Ge a be a tsena ka tabarenakeleng, o be a sa apare seširo. Moše e be e le monna wa tumelo e kgolo yoo a bego a kganyoga go dira thato ya Modimo. Le ge a ile a šegofatšwa ka go bona karolo e itšego ya letago la Jehofa ponong, ka kgopolo e itšego Ba-Hebere 11:27; Ekisodo 34:5-7) Le gona ga se a bonagatša letago la Modimo ka mahlasedi feela ao a bego a phadima sefahlegong sa gagwe ka nako yeo eupša gape le ka maiteko ao a ilego a a dira bakeng sa go thuša ba-Isiraele gore ba tsebe Jehofa le go mo hlankela.
o be a šetše a bone Modimo ka mahlo a tumelo. Beibele e bolela gore Moše o ile “a xomarêla Eo a sa bonwexo byalo ka e ke ó a mmôna.” (14. Jesu o ile a bona letago la Modimo bjang, gomme o be a thabišwa ke’ng?
14 Legodimong, Jesu o ile a bona letago la Modimo ka go lebanya ka nywaga e mentši, gaešita le pele ga ge legohle le ka bopša. (Diema 8:22, 30) Nakong yeo ka moka, tswalano e tiilego e lerato le e nago le maikwelo a borutho e ile ya gola. Jehofa Modimo o ile a bontšha lerato le botho kudu le maikwelo a borutho go leitšibulo le la tlholo ka moka. Jesu le yena o ile a bontšha lerato le le tseneletšego le maikwelo a borutho go Modimo yo e lego Monei-Bophelo wa gagwe. (Johane 14:31; 17:24) Lerato la bona e be e le le le phethagetšego magareng ga Tate le Morwa. Go etša Moše, Jesu o be a thabišwa ke go bonagatša letago la Jehofa dilong tšeo a bego a di ruta.
15. Ke ka tsela efe Bakriste ba fišegelago go bonagatša letago la Modimo?
15 Go etša Moše le Jesu, Dihlatse tša Modimo tša mehleng yeno tšeo di lego lefaseng di fišegela go bonagatša letago la Jehofa. Ga se tša gana ditaba tše dibotse tše di kgahlišago. Moapostola Paulo o ngwadile gore: “Seširô seo se tlošwa xe ba sokoloxêla xo Morêna [gore ba dire thato ya gagwe].” (2 Ba-Korinthe 3:16) Re ithuta Mangwalo ka gobane re nyaka go dira thato ya Modimo. Re kgahlwa ke letago leo le phadimago sefahlegong sa Morwa wa Jehofa le Kgoši e tloditšwego, e lego Jesu Kriste, gomme re ekiša mohlala wa gagwe. Go etša Moše le Jesu, re šegofaditšwe ka bodiredi, gomme re ruta ba bangwe ka Modimo wa rena yo a kgahlišago yo re mo rapelago.
16. Ke ka baka la’ng re le ba šegofetšego ge re tseba therešo?
16 Jesu o rapetše ka gore: “Ke a Xo rêta, Wene Tate . . . ka xobane tšeo O di fihletše ba bohlale le ba thlaloxanyô ’me wa di utollêla ba e lexo bana.” (Mateo 11:25) Jehofa o nea kwešišo ya merero ya gagwe le semelo sa gagwe go bao ba botegago le bao ba ikokobeditšego pelong. (1 Ba-Korinthe 1:26-28) Re ka tlase ga tlhokomelo ya gagwe e lerato, gomme o re ruta gore re ikhole—re dire sohle seo re ka se kgonago gore re holege bophelong. Eka re ka diriša sebaka se sengwe le se sengwe ka mo go holago gore re batamele kgaufsi le Jehofa, gomme re tšeele godimo ditokišetšo tša gagwe tše dintši e le gore re mo tsebe ka mo go tseneletšego kudu.
17. Ke bjang re kgonago go tseba dika tša Jehofa ka mo go feletšego?
17 Paulo o ngwaletše Bakriste ba tloditšwego gore: “Rena . . . ba re boxêlaxo letaxô la Morêna ra le bôna byalo ka seiponeng [“ba re bonagatšago letago la Jehofa bjalo ka diipone,” NW] mahlô à tlošitšwe seširô, re bopya lefsa . . . ra tla ra swana le Yêna rè fêla re tšwêlêla pele xo taxafaleng.” (2 Ba-Korinthe 3:18) Go sa šetšwe gore kholofelo ya rena e legodimong goba e lefaseng, ge re tšwela pele re tseba Jehofa—dika le semelo sa gagwe go etša ge di utollwa ka Beibeleng—ke mo re tšwelago pele re swana le yena. Ge e ba re thabela go naganišiša ka bophelo, bodiredi le dithuto tša Jesu Kriste, re tla bonagatša dika tša Jehofa ka mo go feletšego. Ke mo go thabišago kudu gakaakang go tseba gore re tliša theto go Modimo wa rena, yoo re nyakago go bonagatša letago la gagwe!
Na o a Gopola?
• Ke ka baka la’ng ba-Isiraele ba be ba boifa go bona letago la Modimo leo le bego le bonagatšwa ke Moše?
• Ke ka ditsela dife ditaba tše dibotse ‘di bego di širegile’ lekgolong la pele la nywaga? mehleng ya rena?
• Re bonagatša letago la Modimo bjang?
[Dipotšišo tša Thuto]
[Seswantšho go letlakala 19]
Ba-Isiraele ba be ba sa kgone go lebelela sefahlego sa Moše
[Diswantšho go letlakala 21]
Go etša Paulo, ba bantši bao ba kilego ba ganetša therešo ya Modimo mo nakong ye ba a Mo hlankela
[Diswantšho go letlakala 23]
Bahlanka ba Jehofa ba thabišwa ke go bonagatša letago la Gagwe