Dipotšišo tše Tšwago go Babadi

Kua Isiraeleng ya bogologolo, ke’ng seo se bego se swantšhetšwa ke seetša sa mohlolo seo ka dinako tše dingwe se bego se bitšwa Shechinah seo se bego se tšwelela Sekgethwa-kgethweng sa tabarenakele le sa tempele?

Jehofa e lego Tate yo lerato le Mošireletši wa batho ba gagwe, o ile a dira gore go ba gona ga gagwe go bonagale gabotse kua Isiraele. Tsela e nngwe yeo a dirilego seo ka yona e be e le ka leru le le phadimago leo le bego le tswalana kudu le lefelo la gagwe la borapedi.

Seetša seo se se phadimago se be se swantšhetša go ba gona ga Jehofa mo go sa bonagalego. Se be se bonagala Sekgethwa-kgethweng sa tabarenakele le sa tempele yeo Salomo a bego a e agile. Seetša seo sa mohlolo se be se sa bontšhe gore Jehofa o be a le moo ka tsela ya kgonthe. Modimo a ka se dule moagong le ge e le ofe wo o agilwego ke batho. (2 Koronika 6:18; Ditiro 17:24) Seetša se se se sa tlwaelegago sekgethweng sa Modimo se be se ka nea moperisita yo mogolo kholofelo gomme ka yena ba-Isiraele ka moka ba be ba tla hwetša kholofelo ya gore go ba gona ga Jehofa mo go šireletšago e be e le go hlokomela bona le dinyakwa tša bona.

Ka morago ga go ngwalwa ga Beibele ka se-Arama, seetša se se be se bitšwa gore ke Shechinah (shekhi·nahʹ), e lego lentšu le le bolelago gore “seo se dulago” goba “bodulo.” Lentšu le ga le tšwelele ka Beibeleng eupša le hwetšwa diphetolelong tša se-Arama tša Mangwalo a Sehebere, ao gape a tsebjago e le di-Targum.

Ge a be a nea ditaelo tša go aga tabarenakele, Jehofa o boditše Moše gore: “Sekhurumêlô O khurumêlê polokêlô ka sôna; mo polokelong O bolokê melaô ye ke tl’o xo Xo nea yôna. Xôna-moo xodimo xa sekhurumêlô, mo xare xa Bakerubi ba babedi ba ba lexo xodimo xa polokêlô ya molaô, ké mo ke tl’o xo xahlana le wêna ka bolêla le wêna kè le moo.” (Ekisodo 25:21, 22) Polokelo goba Areka ye go boletšwego ka yona e be e le lepokisi leo le khupeditšwego ka gauta Sekgethwa-kgethweng. Go be go e-na le bakerubi ba babedi ba gauta sekhurumelong sa Areka.

Jehofa o be a tla bolela a le kae? O neile karabo ge a be a botša Moše gore: “Xôna-moo sekhurumelong ké mo ke ipônatšaxo kè le lerung.” (Lefitiko 16:2) Leru le le be le akaletše godimo ga Areka e kgethwa magareng ga bakerubi ba babedi ba gauta. Beibele ga e bolele gore leru leo le be le le godimo gakaakang goba bokgoleng bjo bokaakang ka godimo ga bakerubi.

Leru le leo le phadimago le be le bonega Sekgethwa-kgethwa. Ge e le gabotse, e be e le mothopo o nnoši wa seetša phapošing yeo. Moperisita yo mogolo o be a tla kgona go bona ka baka la seetša seo ge a be a tsena phapošing yeo ya ka gare-gare ka Letšatši la Poelano. O be a ema moo Jehofa a lego gona.

Na seetša se sa mohlolo se bolela selo se sengwe go Bakriste? Moapostola Johane ponong o bone motse wo go wona ‘go ka se kego gwa ba le bošego.’ Motse wo ke Jerusalema e Mpsha, ye e bopšago ke Bakriste ba tloditšwego bao ba tsošitšwego gore ba yo buša le Jesu. Seetša sa motse wo wa seswantšhetšo ga se tšwe letšatšing goba ngweding. Letago la Jehofa Modimo le bonega mokgatlo wo ka go lebanya, go fo swana le ge leru la Shechinah le be le bonega Sekgethwa-kgethwa. Le gona, Kwana e lego Jesu Kriste ke “lebônê” la motse. Ka lehlakoreng le lengwe, “motse” wo o bonega seetša sa wona sa moya le go bonegela batho bao ba phološitšwego go tšwa ditšhabeng ka moka bakeng sa gore ba hlahlwe.—Kutollo 21:22-25.

Ka baka la gore ba hwetša ditšhegofatšo tše dintši go tšwa go Modimo, barapedi ba Jehofa ba ka kgodišega gore Jehofa ke Modiši wa bona yo a ba šireletšago le Tate yo lerato.