Go Kgahlegela Beibele go Tšeelwa Godimo

MARIANNA, e lego yo mongwe wa Dihlatse tša Jehofa ka borwa bja Italy, o na le nywaga e 18 gomme wo ke ngwaga wa gagwe wa mafelelo sekolong se se phagamego. O sekolong setee le bafsa ba bangwe bao e lego Dihlatse.

Marianna o ngwala gore: “E šetše e le nywaga e mmalwa ba bangwe ba rena re dutše re bala temana ya letšatši ya Beibele go tšwa pukwaneng ya Go Hlahloba Mangwalo ka Mehla nakong ya rena ya go khutša. Lefelo le nnoši leo re bego re ka dira bjalo go lona e be e le go e nngwe ya ditsejana tša kgaufsi le phapoši ya barutiši. E be e tloga e se lefelo le le homotšego. Barutiši ba bantši ba be ba re bona ge ba dutše ba feta, gomme ba bangwe ba be ba ema e le gore ba bone seo re bego re se dira. Gantši se se be se re nea sebaka sa go araba dipotšišo tša bona. Ge re akanyetša, go be go e-ba le morutiši yo a emago letšatši le lengwe le le lengwe. Ba mmalwa ba ile ba dula e le gore ba theetše ge re ahla-ahla temana ya Beibele gomme ba ile ba bontšha go thabela tsela yeo rena Dihlatse re kgahlegelago dilo tša moya ka yona. Ka letšatši le lengwe, motlatša-hlogo ya sekolo o ile a re laletša gore re tle re sware poledišano ya rena ka phapošing ya barutiši.

“Ka morago ga go bona moo re bego re ahla-ahla temana, morutiši wa-ka o ile a kgopela hlogo ya sekolo ge e ba re ka boledišana ka yona go e nngwe ya diphapoši, moo go bego go tla ba go homotše. Hlogo ya sekolo e ile ya re dumelela, gomme morutiši wa-ka o ile a re reta pele ga klase ka moka bakeng sa mohlala o mobotse wo re o beago. Ka moka ga rena re thabela kudu tokelo e kgolo yeo Jehofa a re neilego yona.”