Na o tla Bonagatša Letago la Modimo?
Na o tla Bonagatša Letago la Modimo?
“Re bonagatša letago la Jehofa bjalo ka diipone.”—2 BA-KORINTHE 3:18, NW.
1. Moše o ile a bona’ng, gomme go ile gwa direga’ng ka morago?
E BE e le e nngwe ya dipono tše di makatšago kudu yeo motho le ge e le ofe a kilego a e bona. Ge Moše a le noši godimo ga Thaba ya Sinai, kgopelo ya gagwe e sa tlwaelegago e ile ya phethagatšwa. O ile a dumelelwa go bona seo go se nago motho yo a kilego a se bona—letago la Jehofa. Ke therešo gore Moše ga se a ka a bona Jehofa ka go lebanya. Ponagalo ya Modimo ke e makatšago kudu moo e lego gore ga go motho yo a ka mmonago gomme a phela. Go e na le moo, Jehofa o ile a šireletša Moše ka “seatla” sa gagwe go ba go fihla ge A šetše a fetile, gomme go bonagala a be a diriša moemedi wa gagwe yo e lego morongwa. Ke moka Jehofa o ile a dumelela Moše gore a bone seetša feela sa ponagatšo ye ya letago la Gagwe. Le gona, Jehofa o ile a bolela le Moše ka morongwa. Beibele e hlalosa seo se diregilego ka morago ge e re: “Mošê xe a foloxa thabeng ya Sinai, . . . ó be a sa tsebe xore letlalô la sefahloxô sa xaxwe le phadima ka xe a be a bolêla le Modimo.”—Ekisodo 33:18–34:7, 29.
2. Moapostola Paulo o ngwadile’ng mabapi le letago leo Bakriste ba le bonagatšago?
2 Akanya o le thabeng yeo o e-na le Moše. E be e tla ba mo go kgahlišago gakaakang go bona letago le le makatšago la yo Matla ohle le go mo theetša ge a bolela! E be e tla ba tokelo e kgolo gakaakang go theoga Thabeng ya Sinai o sepela le Moše, e lego mmoelanyi wa kgwerano ya Molao! Lega go le bjalo, na o be o tseba gore ka ditsela tše itšego Bakriste ba therešo ba bonagatša letago la Modimo ka tsela e fetago le yeo Moše a ilego a le bonagatša ka yona? Therešo yeo ye e šišinyago kgopolo e hwetšwa ka lengwalong leo le ngwadilwego ke moapostola Paulo. O ngwadile gore Bakriste ba tloditšwego ba “bonagatša letago la Jehofa bjalo ka diipone.” (2 Ba-Korinthe 3:7, 8, 18, NW) Ka kgopolo e itšego, Bakriste bao ba nago le kholofelo ya go phela lefaseng le bona ba bonagatša letago la Modimo.
Kamoo Bakriste ba Bonagatšago Letago la Modimo
3. Re tseba Jehofa bjang ka ditsela tšeo Moše a sa kago a kgona go mo tseba ka tšona?
3 Re ka kgona bjang go bonagatša letago la Modimo? Ga se ra bona goba go kwa Jehofa ka tsela yeo Moše a dirilego ka yona. Lega go le bjalo, re tseba Jehofa ka ditsela tšeo Moše a sa kago a kgona go mo tseba ka tšona. Jesu ga se a ka a tšwelela e le Mesia go ba go fihla mo e nyakilego go ba nywageng e 1 500 ka morago ga ge Moše a hwile. Ka baka leo, Moše o be a ka se kgone go tseba kamoo Molao o bego o tla phethagatšwa ka gona go Jesu, yo a hwilego bakeng sa go lopolla batho kgateletšong e šoro ya sebe le lehu. (Ba-Roma 5:20, 21; Ba-Galatia 3:19) Ka godimo ga moo, Moše o be a bone feela ka tsela e lekanyeditšwego bogolo bja morero wa Jehofa, wo o theilwego Mmušong wa Mesia le Paradeiseng ya lefaseng yeo o tlago go e tliša. Ka gona re bona letago la Jehofa, e sego ka mahlo a rena a kgonthe, eupša ka mahlo a tumelo yeo e theilwego dithutong tša Beibele. Go oketša moo, re kwele lentšu la Jehofa, e sego a diriša morongwa, eupša ka Beibele, kudu-kudu ka Diebangedi tšeo di hlalosago gabotse kudu dithuto tša Jesu le bodiredi bja gagwe.
4. (a) Bakriste ba tloditšwego ba bonagatša bjang letago la Modimo? (b) Ke ka ditsela dife bao ba nago le kholofelo ya go phela lefaseng ba ka bonagatšago letago la Modimo?
4 Gaešita le ge Bakriste ba sa bonagatše letago la Modimo ka mahlasedi ao a phadimago difahlegong tša bona, difahlego tša bona di phadima kudu ge ba botša ba bangwe ka semelo sa Jehofa se se kgahlišago le merero ya Gagwe. Moporofeta Jesaya 66:19) Go oketša moo, go 2 Ba-Korinthe 4:1, 2 re bala gore: “Byale, xe re na le botseta byoo, . . . Re kxaoxane le mamênêmênê a masêmê; xa re tle ka tsela ya maanô; xa re retole Lentšu la Modimo; re sekišana le matswalô a batho ka moka pele xa Modimo rè bola therešô.” Paulo o be a bolela ka mo go kgethegilego ka Bakriste ba tloditšwego, bao e lego “batseta ba Kxwêranô e mphsa.” (2 Ba-Korinthe 3:6) Eupša bodiredi bja bona bo kgomile ba bantši kudu bao ba nago le kholofelo ya go phela ka mo go sa felego lefaseng. Bodiredi bja dihlopha tše tše pedi bo akaretša go bonagatša letago la Jehofa e sego feela ka seo di se rutago eupša gape le ka tsela yeo di phelago ka yona. Ke boikarabelo bja rena e bile ke tokelo ya rena go bonagatša letago la Modimo yo a Phagamego Kudu!
Jesaya o boletše e sa le pele mabapi le mehla ya rena gore batho ba Modimo ba be ba tla “anêxêla ba-ntlê ’taxô [la Jehofa].” (5. Katlego ya rena ya moya e nea bohlatse bofe?
5 Lehono, ditaba tše dibotse tše di kgahlišago tša Mmušo wa Modimo di bolelwa lefaseng ka moka leo go agilwego go lona, go etša ge Jesu a boletše e sa le pele. (Mateo 24:14, NW) Batho ba tšwago ditšhabeng, melokong, merafong le malemeng ka moka ba arabetše ka mafolofolo ditabeng tše dibotse gomme ba fetotše maphelo a bona e le gore ba dire thato ya Modimo. (Ba-Roma 12:2; Kutollo 7:9) Go etša Bakriste ba pele, ba ka se lese go bolela ka dilo tšeo ba di bonego le tšeo ba di kwelego. (Ditiro 4:20) Batho ba ka godimo ga dimilione tše tshela ba bonagatša letago la Modimo lehono, go feta nakong le ge e le efe historing ya batho. Na o gare ga bona? Katlego ya moya ya batho ba Modimo e nea bohlatse bjo bo kgodišago bja tšhegofatšo ya Jehofa le tšhireletšo ya gagwe. Taba ya gore moya wa Jehofa o na le rena ke bohlatse bjo bongwe bjo bo oketšegilego bja gore go na le meoya e matla yeo e itokišeleditšego go re lwantšha. Ga bjale anke re boneng lebaka leo ka lona go lego bjalo.
Batho ba Modimo ba ka se ke ba Tswalelwa Melomo
6. Ke ka baka la’ng go nyakega tumelo le sebete e le gore o be ka lehlakoreng la Jehofa?
6 Anke re re o biditšwe gore o yo nea bohlatse kgorong ya tsheko kgahlanong le sesenyi se šoro. O a tseba gore sesenyi se se na le mokgatlo o matla le gore se tla diriša dilo tšohle tšeo se nago le tšona bakeng sa go go thibela gore o se ke wa se pepentšha. E le gore o nee bohlatse kgahlanong le sesenyi se se bjalo, o tla swanelwa ke gore o be le sebete gotee le kholofelo ya gore bao ba lego matleng a taolo ba tla go šireletša go sona. Re boemong bjo bo swanago. Ge re nea bohlatse ka Jehofa le ka merero ya gagwe, re nea bohlatse kgahlanong le Sathane Diabolo, gomme re mo pepentšha e le mmolai le moaketši yo a timetšago lefase ka moka leo go agilwego go lona. (Johane 8:44; Kutollo 12:9) Go nyakega tumelo le sebete e le gore o be ka lehlakoreng la Jehofa gomme o be kgahlanong le Diabolo.
7. Sathane o na le tutuetšo e kaaka’ng, gomme o leka go dira’ng?
7 Ka kgonthe Jehofa ke Yo a Phagamego. Matla a gagwe ke a magolo kudu ge a bapetšwa le a Sathane. Re ka kgonthišega gore Jehofa ga a kgone feela go re šireletša eupša gape o fišegela go re šireletša ge re dutše re mo hlankela ka potego e sa kwanantšhego. (2 Koronika 16:9) Lega go le bjalo, Sathane ke mmuši wa batemona le lefase la batho bao ba furaletšego Modimo. (Mateo 12:24, 26; Johane 14:30) Ka ge Sathane a lahletšwe lefaseng e bile a “tuka boxale ka kudu,” o ganetša bahlanka ba Jehofa o šoro gomme o diriša lefase leo a le laolago go leka go tswalela melomo ya bohle bao ba bolelago ditaba tše dibotse. (Kutollo 12:7-9, 12, 17) O dira se bjang? Bonyenyane ka ditsela tše tharo.
8, 9. Sathane o diriša bjang lerato le le fošagetšego, gomme ke ka baka la’ng re swanetše go kgetha bagwera ba rena ka kelohloko?
8 Tsela e nngwe yeo ka yona Sathane a lekago go re šitiša ke ka dipelaelo tša bophelo. Batho mehleng ye ya bofelo ke barati ba tšhelete, ba go ithata le ba go rata maipshino. Ga ba rate Modimo. (2 Timotheo 3:1-4) Ka ge batho ba bantši ba swaregile ka ditaba tša letšatši le letšatši tša bophelo, ‘ga ba šetše’ ditaba tše dibotse tšeo re ba tlišetšago tšona. Ba fo ba ba sa kgahlegele go ithuta therešo ya Beibele. (Mateo 24:37-39) Boemo bjo bo bjalo bja kgopolo e ka ba bjo bo fetelago, gomme bja re lebiša boemong bja moya bja go se šetše. Ge e ba re itumelela gore re hlagolele lerato la go rata dilo tše di bonagalago le maipshino a lefase, lerato la rena go Modimo le tla fola.—Mateo 24:12.
9 Ka lebaka le, Bakriste ba kgetha bagwera ba bona ka kelohloko. Kgoši Salomo o ngwadile gore: “Šika le bahlale O hlalefê; mokxônana-le-mašilo ó tlo thsereana.” (Diema 13:20) Eka re ka “šika” le bao ba bonagatšago letago la Modimo. Ke mo go thabišago gakaakang go dira bjalo! Ge re dutše re bokane gotee le bana babo rena le dikgaetšedi ba moya dibokeng tša rena le ka dinako tše dingwe, re kgothatšwa ke lerato la bona, tumelo ya bona, lethabo la bona le bohlale bja bona. Segwera se se bjalo se se agago se matlafatša boikemišetšo bjo re nago le bjona bja go tšwela pele bodireding bja rena.
10. Ke ka ditsela dife Sathane a dirišitšego dikwero kgahlanong le bao ba bonagatšago letago la Modimo?
10 Tsela ya bobedi yeo ka yona Sathane a lekago go thibela Bakriste ka moka gore ba se ke ba bonagatša letago la Modimo ke ka go ba kwera. Leano le ga se la swanela go re makatša. Nakong ya bodiredi bja gagwe bja lefaseng, Jesu Kriste o ile a kwerwa—a segwa, a nyatšwa, a gobošwa, a tlaišwa a ba a tshwelwa ka mare. (Mareka 5:40; Luka 16:14; 18:32) Bakriste ba pele le bona ba be ba kwerwa. (Ditiro 2:13; 17:32) Bahlanka ba Jehofa ba mehleng yeno ba lebeletšana le tshwaro e bjalo e mpe. Go ya ka moapostola Petro, ba be ba tla bitšwa “baporofeta ba maaká.” Petro o boletše e sa le pele gore: “Mehleng ya bofêlô xo tlo tsoxa bakweri ka dikwêrô, ba xo ya ka tsela ya dikxanyoxô tša bôná. E tlo ba ba ba rexo: Di kae tša xe xo thwe Morêna ó tlo boa? xobane . . . le lehono dilô ka moka di sa dutše di swana le tša mathomong a thlôlô!” (2 Petro 3:3, 4) Batho ba Modimo ba kwerwa ka gore ke bao ba sa lebelelego dilo ka tsela e leka-lekanego. Ditekanyetšo tša Beibele tša boitshwaro di lebelelwa e le tšeo di šiilwego ke nako. Go ba bantši, molaetša wo re o bolelago ke wa bošilo. (1 Ba-Korinthe 1:18, 19) Re le Bakriste, re ka kwerwa sekolong, mošomong gomme ka dinako tše dingwe ra kwerwa le ke ditho tša malapa a rena. Ka ge re sa nyamišwe ke seo, re tšwela pele re bonagatša letago la Modimo ka modiro wa rena wa boboledi, gomme go etša Jesu re tseba gore Lentšu la Modimo ke therešo.—Johane 17:17.
11. Sathane o dirišitše tlaišo bjang bakeng sa go leka go tswalela Bakriste melomo?
11 Leano la boraro leo Diabolo a le dirišago bakeng Mateo 24:9) Ee, ka ge re le Dihlatse tša Jehofa, re lebeletšana le tlaišo e šoro dikarolong tše dintši tša lefase. Re a tseba gore kgale-kgale Jehofa o ile a bolela e sa le pele gore go be go tla ba le lehloyo, goba bonaba, gare ga bao ba hlankelago Modimo le bao ba hlankelago Sathane Diabolo. (Genesi 3:15) Le gona re a tseba gore ka go tšwela pele re botega ka tlase ga teko, re nea bohlatse bja go swanelega ga bogoši bja Jehofa bja legohle. Go tseba se go ka re matlafatša gaešita le ge re le ka tlase ga maemo a šoro ka go fetišiša. Ga go na tlaišo yeo e ka re tswalelago melomo sa ruri ge e ba re tšwela pele re ikemišeditše go bonagatša letago la Modimo.
sa go leka go re tswalela melomo ke kganetšo goba tlaišo. Jesu o ile a botša balatedi ba gagwe gore: “Ba tlo Le xafêla tlaišong; ba tlo Le bolaya; Le tlo ba ba xo hloiwa ke dithšaba tšohle ka ’baka la Leina la-ka.” (12. Ke ka baka la’ng re swanetše go thaba ge re tšwela pele re botega ka tlase ga kganetšo ya Sathane?
12 Na o lwa le kgoketšo ya lefase gomme wa ipontšha o botega go sa šetšwe dikwero le tlaišo? Gona, o na le lebaka la go thaba. Jesu o kgonthišeditše bao ba bego ba tla mo latela gore: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka. Thabang Le hlalalê, xobane moputsô wa lena ké o moxolo maxodimong. Hleng le baporofeta ba Le etilexo pele, ba ba tlaišitše ka mokxwa woo.” (Mateo 5:11, 12) Go kgotlelela ga gago go nea bohlatse bja gore moya wa Jehofa o mokgethwa o matla o na le wena, gomme o go matlafaletša gore o bonagatše letago la gagwe.—2 Ba-Korinthe 12:9.
Kgotlelelo e tšwa go Jehofa
13. Ke lebaka lefe le legolo leo ka lona re kgotlelelago bodireding bja rena bja Bokriste?
13 Lebaka le legolo leo ka lona re kgotlelelago bodireding ke ka gobane re rata Jehofa e bile re thabela go bonagatša letago la gagwe. Batho ba sekametše tabeng ya go ekiša bao ba ba ratago le go ba hlompha, gomme ga go na motho yo a swanetšego go ekišwa go feta Jehofa Modimo. Ka baka la lerato la gagwe le legolo, o romile Morwa wa gagwe lefaseng gore a tlo hlatsela therešo le gore a lopolle batho bao ba kwago. (Johane 3:16; 18:37) Go etša Modimo, re kganyoga gore batho ba mehuta ka moka ba sokologe gomme ba phološwe; ke ka baka leo re dirago boboledi go bona. (2 Petro 3:9) Kganyogo ye, gotee le go ikemišetša ga rena go ekiša Modimo di re tutueletša gore re tšwele pele re bonagatša letago la gagwe ka bodiredi bja rena.
14. Jehofa o re matlafatša bjang gore re kgotlelele bodireding bja rena?
14 Lega go le bjalo, ge e le gabotse matla a rena a go kgotlelela bodireding bja Bokriste a tšwa go Jehofa. O a re thekga le go re matlafatša ka moya wa gagwe, ka mokgatlo wa gagwe le ka Lentšu la gagwe, e lego Beibele. Jehofa o ‘tiiša’ bao ba ikemišeditšego go bonagatša letago la gagwe. O araba Ba-Roma 15:5; Jakobo 1:5) Go oketša moo, Jehofa ga a re dumelele gore re lekwe ka teko le ge e le efe yeo re ka se kgonego go e kgotlelela. Ge e ba re bota Jehofa, o tla re bulela tsela e le gore re kgone go tšwela pele re bonagatša letago la gagwe.—1 Ba-Korinthe 10:13.
dithapelo tša rena gomme o re nea bohlale bja gore re lebeletšane le diteko ka katlego. (15. Ke’ng seo se re thušago gore re kgotlelele?
15 Go kgotlelela bodireding bja rena go nea bohlatse bja gore moya wa Modimo o na le rena. Ka mohlala: Anke re re motho yo mongwe o go kgopetše gore o abe mohuta o itšego wa borotho ka ntlo le ntlo, ka ntle le tefo. O laetšwe gore o dire se ka tšhelete ya gago le ka nako ya gago. Go oketša moo, go se go ye kae o lemoga gore ke batho ba sego nene bao ge e le gabotse ba nyakago borotho bja gago; e bile ba bangwe ba tla ganetša maiteko a gago a go bo aba. Na o nagana gore o tla tšwela pele o šoma mošomong woo kgwedi le kgwedi, ngwaga le ngwaga? Mohlomongwe o ka se dire bjalo. Lega go le bjalo, o ka ba o ile wa šoma ka thata go tsebatšeng ditaba tše dibotse ka nako ya gago le ka tšhelete ya gago ka nywaga e mentši, gaešita le ka nywaga-some. Ka baka la’ng? Na ga se ka gobane o rata Jehofa le gore ka moya wa gagwe o mokgethwa o šegofaditše maiteko a gago ka go go thuša gore o kgotlelele? Go tloga go le bjalo!
Mošomo wo o Swanetšwego go Gopolwa
16. Go kgotlelela bodireding bja rena go bolela’ng go rena le go bao ba re theetšago?
16 Bodiredi bja kgwerano e mpsha ke mpho yeo e sa bapišwego le selo. (2 Ba-Korinthe 4:7) Ka mo go swanago, bodiredi bja Bokriste bjo bo phethagatšwago ke dinku tše dingwe go dikologa lefase ke lehumo. Ge o tšwela pele o kgotlelela bodireding bja gago, go etša ge Paulo a ile a ngwalela Timotheo, o ka “iphološa, wa phološa le bao ba Xo kwaxo.” (1 Timotheo 4:16) Nagana ka seo se bolelwago ke taba yeo. Ditaba tše dibotse tšeo o di bolelago di nea ba bangwe sebaka sa go phela ka mo go sa felego. O ka aga tlemo e tiilego ya bogwera le bao o ba thušago moyeng. Akanya gore e tla ba lethabo le legolo gakaakang go phela ka mo go sa felego Paradeiseng le bao o ba thušitšego go ithuta ka Modimo! Ka kgonthe ba ka se ke ba lebala maiteko a gago a go ba thuša. Seo ruri e tla ba se se kgotsofatšago!
17. Ke ka baka la’ng mehla ya rena e le ya moswana-noši historing ya batho?
17 O phela nakong ya moswana-noši historing ya batho. Ditaba tše tše dibotse di ka se sa bolelwa gape lefaseng la batho bao ba furaletšego Modimo. Noage o phetše lefaseng le le bjalo, gomme o ile a le bona le fedišwa. O swanetše go ba a ile a thabišwa gakaakang ke go tseba gore o phethile thato ya Modimo ka potego tabeng ya go aga areka, yeo e ilego ya mo phološa ya ba ya phološa le ba lapa la gagwe! (Ba-Hebere 11:7) Le wena o ka thaba ka tsela e swanago. Nagana kamoo o tla ikwago ka gona lefaseng le lefsa ge o lebelela morago modirong wo o o dirilego mehleng ye ya bofelo, gomme o tseba gore o dirile sohle seo o ka se kgonago go tšwetša pele mediro ya Mmušo.
18. Jehofa o nea bahlanka ba gagwe kgonthišetšo efe le kgothatšo efe?
18 Ka gona, anke re tšweleng pele re bonagatša letago la Modimo. Go dira ga rena bjalo e tla ba selo seo re tlago go se gopola ka mo go sa felego. Jehofa le yena o gopola mediro ya rena. Beibele e re nea kgothatšo ye e rego: “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe mola Lè dirêla bakxêthwa, Lè ba dirêla le byale. Se re se dumaxo ké xore ka moka xa lena Le bônwê Lè na le phišêxô e byalo, xo fêlê xo phêthêxa se re se holofetšexo, xo bê xo fihlê bofêlô, Xore Le se kê la ba ba botšwá, eupya ka tumêlô Le kxôtlêlêlê Le bê baetši ba bao ba ruilexo tše di holofedišitšwexo.”—Ba-Hebere 6:10-12.
Na o ka Hlalosa?
• Bakriste ba bonagatša bjang letago la Modimo?
• A mangwe a maano ao Sathane a a dirišago bakeng sa go leka go tswalela batho ba Modimo melomo ke afe?
• Ke bohlatse bofe bjo bo lego gona bja gore moya wa Modimo o na le rena?
[Dipotšišo tša Thuto]
[Seswantšho go letlakala 15]
Sefahlego sa Moše se ile sa bonagatša letago
[Diswantšho go letlakala 16, 17]
Re bonagatša letago la Modimo bodireding bja rena