“Nkabe ba ile ba Lokollwa Gatee-tee”

GENEVIÈVE DE GAULLE, yo e lego setlogolo sa Charles de Gaulle, yo e kilego ya ba mopresidente wa Fora, o ile a tsebana le Dihlatse tša Jehofa kampeng ya tshwenyo ya Nazi kua Ravensbrück, ka leboa la Jeremane. O ngwadile mantšu ao a lego ka mo godimo lengwalong leo le ngwadilwego ka August 1945.

Batho ba ile ba lokollwa ka January 27, 1945, kampeng ya tshwenyo kua Auschwitz, Poland. Ga e sa le go tloga ka 1996, letšatši-kgwedi le e bile letšatši la segopotšo kua Jeremane bakeng sa bahlaselwa ba Pušo ya Boraro ya Hitler.

Nakong ya polelo ya semmušo ya segopotšo ka January 27, 2003, mopresidente wa Palamente ya Mmušo wa Baden-Württemberg, e lego Peter Straub, o hlalositše gore: “Bohle bao ba ilego ba tlaišwa ka baka la bodumedi bja bona goba ditumelo tša dipolitiki le bao ba bego ba ikemišeditše go hwa go e na le go ikokobeletša pušo ya Hitler ba swanelwa ke tlhompho ya rena e kgolo, tlhompho e bjalo go thata go e hlalosa. Dihlatse tša Jehofa e be e le bodumedi bo nnoši bjo bo ilego bja gana ka mo go feletšego go dira dilo tše pušo ya Hitler e bego e di nyaka: Ga se tša ka tša emiša matsogo a tšona bakeng sa go lotšha Hitler. Di ile tša gana go ikana go ‘Moetapele le Mmušo,’ go fo etša ge di ile tša gana go tsenela ditiro tša tša bohlabani le go dira tirelo ya kgapeletšo. Le gona bana ba tšona ga se ba ka ba tsenela Mokgatlo wa Bafsa wa Hitler.”

Jesu Kriste o boletše mabapi le balatedi ba gagwe gore: “Bôná xa se ba lefase, byalo ka Nna kè se wa lefase.” (Johane 17:16) Ka gona, boemo bja Dihlatse tša Jehofa bo be bo theilwe bodumeding ka mo go feletšego. Straub o tšwetše pele ka gore: “Dihlatse tša Jehofa, tšeo di bego di swanetše go rokelela khutlo-tharo e phepolo diaparong tša tšona bjalo ka bagolegwa ba kampeng ya tshwenyo, e be e le tšona feela tšeo ka noši di bego di ka fediša go bolaelwa tumelo ga tšona. Go saena tsebišo ya gore di latola tumelo ya tšona e be e tla ba mo go lekanego.”

Go Dihlatse tše dintši, go latola tumelo ya tšona e be e le selo seo se ka se diregego. Ka baka leo, tše ka bago tše 1 200 tša tšona di ile tša hwa nakong ya Nazi. Go ile gwa bolawa tše 270 e le tšeo di ilego tša gana ka baka la letswalo. Di ile tša dira se se fetago go fo bolela ka molomo gore: “Mo xo batho le Modimo, wa xo kwešešwa ke Modimo.”—Ditiro 5:29.

Dihlatse tša Jehofa e be e le batho ba tlwaelegilego, go etša ge seo se lemogilwe ke Ulrich Schmidt, yo e lego mopresidente wa Palamente ya Mmušo ya ka Leboa la Rhine-Westphalia. Ge e šupa polelong ya gagwe, poroutšha ya Landtag Intern e boletše ka tšona e le “batho ba tlwaelegilego bao ka go latela matswalo a bona ba ilego ba ema ba tiile bakeng sa ditumelo tša bona tša bodumedi, bao ba ilego ba bontšha sebete setšhabeng le bao ba ilego ba ganetša dikgopolo tša Nazi ka tsela e kwagalago ka baka la ge e le Bakriste ba kgodišegilego.” Re ka kgonthišega gore Jehofa Modimo o thabela bohle bao ba mo kgomarelago ka go se kwanantšhe ka tlase ga maemo a thata. Go Diema 27:11 re bala gore: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.”

[Mothopo wa Seswantšho go letlakala 30]

Courtesy of United States Holocaust Memorial Museum