Beibele ya Kgale ya Sejeremane e Diriša Leina la Modimo

LEINA la Modimo le le mo hlaolago e lego Jehofa, le tšwelela ka makga a dikete ka go New World Translation of the Holy Scriptures, yeo e gatišitšwego ka leleme la Sejeremane ka 1971. * Lega go le bjalo, ye e be e se Beibele ya mathomo ya Sejeremane ya go diriša leina la Modimo. Go bonagala go e-na le kgonagalo ya gore Beibele ya mathomo ya Sejeremane yeo leina Jehofa le tšweletšego ka go yona e gatišitšwe nywageng e ka bago 500 e fetilego ke Johann Eck, rathutatumelo yo a tumilego wa Roma Katholika.

Johann Eck o belegwe ka 1486 kua borwa bja Jeremane. Ge a e-na le nywaga e 24, e be e le moprofesara wa thutatumelo yunibesithing ya Ingolstadt, e lego boemo bjoo a ilego a ba go bjona go fihlela lehung la gagwe ka 1543. Eck o phetše mehleng ya Martin Luther, gomme bobedi bja bona e bile bagwera ka nako e itšego. Lega go le bjalo, Luther ka morago o ile a ba moetapele wa Mpshafatšo mola Eck yena e bile molwedi wa Kereke ya Katholika.

Mokgomana wa Bavaria o ile a laela Eck gore a fetolele Beibele lelemeng la Sejeremane, gomme phetolelo yeo e ile ya gatišwa ka 1537. Go ya ka Kirchliches Handlexikon, phetolelo ya gagwe e ile ya kgomarela ka potego tabeng e ngwadilwego ya setlogo gomme “e swanelwa ke tlhompho e kgolo go feta yeo e e amogetšego go fihla ga bjale.” Phetolelo ya Eck ya Ekisodo 6:3 e balega ka gore: “Ke nna Morena, yo a ilego a tšwelela go Aborama, Isaka, le Jakobo ke le Modimo yo Matla ohle: gomme leina la-ka e lego Adonai, ga se ka ba utollela lona.” Eck o ile a oketša ka mongwalo wa ka thoko temaneng yeo, o rego: “Leina Adonai Jehoua.” Diithuti tše dintši tša Beibele di dumela gore le e be e le lekga la mathomo leina la Modimo le le mo hlaolago le dirišwa ka Beibeleng ya Sejeremane.

Lega go le bjalo, leina la Modimo le le mo hlaolago le be le dutše le tsebja le go dirišwa ka nywaga e dikete. Leina “Jehofa” le ngwadilwe la mathomo ka leleme la Sehebere, moo le dirišwago bakeng sa go hlaola Modimo a nnoši wa therešo. (Doiteronomio 6:4, PK) Mo e nyakilego e ka ba nywaga e 2 000 e fetilego, polelo ya Jesu ya gore o tsebaditše leina la Modimo e ile ya ngwalwa ka leleme la Segerika. (Johane 17:6) Ga e sa le go tloga ka nako yeo, leina leo le gatišitšwe ka maleme a mantši gomme kgaufsinyane, phethagatšong ya Psalme 83:18 (83:19, PK), batho ka moka ba tla tseba gore yoo a bitšwago Jehofa ke Yo Godimo-dimo, godimo ga lefase ka moka.

[Mongwalo wa ka tlase]

[Seswantšho go letlakala 32]

Kgatišo ya 1558 ya Beibele ya Eck, yeo e nago le mongwalo wa ka thoko woo o dirišago leina Jehofa go Ekisodo 6:3