Dipotšišo tše Tšwago go Babadi

Go na le motheo ofe wa go bolela gore dipolelwana tše bjalo ka “Yo a nago le go se hwe a nnoši” le yo “go sego motho yo mongwe yo a kilego a mmona, le ga e le yo a ka kgonago go mmona” di šupa go Jesu go e-na le go šupa go Jehofa Modimo?

Moapostola Paulo o ngwadile gore: “[“Ponagalo ye,” NW] e tlog’o bonatšwa lebakeng la ntshe ke Yo lehlogonolo, yo e lego Mmuši [“yo a nago le taolo e feletšego,” NW] a nnoši, le Kgoši ya dikgoši, le Morena wa marena. Yo a nago le go se hwe a nnoši, yo a agilego seetšeng se se sa fihlelwego, yo go sego motho yo mongwe yo a kilego a mmona, le ga e le yo a ka kgonago go mmona.”—1 Timotheo 6:15,16, PK.

Bahlalosi ba Beibele ka kakaretšo ba nea mabaka ka gore: ‘Ke bjang dipolelwana tše bjalo ka “Yo a nago le go se hwe a nnoši,” ‘Mmuši a nnoši yo a nago le taolo e feletšego’ le “yo go sego motho yo mongwe yo a kilego a mmona, le ga e le yo a ka kgonago go mmona” di ka šupago go motho le ge e le ofe yo mongwe ka ntle le yo Matla ohle?’ Ke therešo gore dipolelwana tše bjalo di ka dirišetšwa go hlalosa Jehofa. Lega go le bjalo, taba e dikologilego e bontšha gore go 1 Timotheo 6:15, 16, Paulo o be a bolela ka Jesu ka mo go kgethegilego.

Mafelelong a temana 14, Paulo o bolela ka ‘go bonagala ga Yena Mong wa rena Jesu Kriste.’ (1 Timotheo 6:14) Ka baka leo, ge Paulo a ngwala go temana 15 gore “[“ponagalo ye,” NW] e tlog’o bonatšwa lebakeng la ntshe ke Yo lehlogonolo, yo e lego Mmuši a nnoši,” o bolela ka ponagalo ya Jesu e sego ya Jehofa Modimo. Ka gona, ke mang yo e lego ‘Mmuši a nnoši yo a nago le taolo e feletšego’? Go bonagala e le mo go kwagalago go phetha ka gore Jesu ke Mmuši yoo Paulo a bolelago ka yena. Ka baka la’ng? Taba e dikologilego e dira gore go be molaleng gore Paulo o bapiša Jesu le babuši ba e lego batho. Go etša ge Paulo a ngwadile, ka kgonthe Jesu ke “Kgoši ya dikgoši [tše e lego batho] le Morena wa marena [ao e lego batho].” * Ee, ge a bapišwa le bona, Jesu ke ‘Mmuši a nnoši yo a nago le taolo e feletšego.’ Jesu o neilwe ‘bogoši le kgodišo le mmušo e le gore ditšhaba ka moka le merafo le maleme e be bahlanka ba gagwe.’ (Daniele 7:14) Ga go mmuši yo e lego motho yo a ka ipolelago ka mantšu a bjalo!

Go thwe’ng ka polelwana “Yo a nago le go se hwe a nnoši”? Le mo go sa dutše go bapišwa Jesu le dikgoši tšeo e lego batho. Ga go babuši ba mo lefaseng bao ba ka bolelago gore ba neilwe go se hwe, eupša Jesu a ka bolela bjalo. Paulo o ngwadile gore: “Xobane re ba ba tsebaxo, xore Kriste Mo-tsoxa-bahung xa a sa hwa, lehu xa le sa mmuša.” (Ba-Roma 6:9) Ka baka leo, Jesu ke motho wa mathomo yoo a hlaloswago ka Beibeleng e le yo a amogelago mpho ya go se hwe. Ka kgonthe, nakong ya ge Paulo a be a ngwala mantšu a, Jesu e be e le yena feela yo a bego a neilwe bophelo bjo bo sa senyegego.

Le gona re swanetše go gopola gore e be e tla ba phošo gore Paulo a bolele gore ke Jehofa Modimo a nnoši yo a bego a e-na le bophelo bja go se hwe, ka ge Jesu le yena a be a e-na le bophelo bja go se hwe nakong ya ge Paulo a be a ngwala mantšu ao. Eupša Paulo o be a ka bolela gore ke Jesu a nnoši yo a bego a e-na le bophelo bja go se hwe ge a bapišwa le babuši ba lefaseng.

Go oketša moo, ka kgonthe ke therešo gore ka morago ga tsogo ya Jesu le go rotogela ga gagwe legodimong, a ka hlaloswa e le “yo go sego motho yo mongwe yo a kilego a mmona, le ga e le yo a ka kgonago go mmona.” Ke therešo gore barutiwa ba gagwe ba ba tloditšwego ba tla bona Jesu ka morago ga lehu la bona le tsogo yeo e tlago ka morago ya go tsošetšwa legodimong e le dibopiwa tša moya. (Johane 17:24) Eupša ga go motho mo lefaseng yo a tlago go bona Jesu a le boemong bja gagwe bja letago. Ka baka leo, go ka bolelwa ka mo go nepagetšego gore go tloga tsogong ya gagwe le go rotogeleng ga gagwe legodimong, ‘ga go motho’ yoo a ilego a bona Jesu e le ka kgonthe.

Ka kgonthe, ka go fo gaša mahlo feela tabeng ye, go ka bonagala eka ditlhaloso tšeo di hwetšwago go 1 Timotheo 6:15, 16 di šupa go Modimo. Eupša taba e dikologilego mantšu a Paulo—gotee le bohlatse bja mangwalo a mangwe—e bontšha gore Paulo o be a bolela ka Jesu.

[Mongwalo wa ka tlase]