Dumelela “Lentšu” la Jehofa Gore le go Šireletše

KA 490 B.C.E. ntweng e Kgolo e tumilego kudu historing, ba-Athene ba ka bago dikete tše 10 go ya go dikete tše 20 ba ile ba lwa le madira a Peresia ao a bego a ba feta kudu ka palo. Selo sa bohlokwa maanong a ntwa a ba-Gerika e be e le sehlopha sa bahlabani bao ba gwantago ba ipopile ngatana e tee. Dikotse tša bona di be di bonagala eka ke leboto leo le tiilego la go itšhireletša, e le leo le nago le marumo a hlabago. Sehlopha se sa bahlabani bao ba gwantago ba ipopile ngatana e tee se ile sa dira gore ba-Athene ba fenye ka tsela e tumilego kgahlanong le madira ao a bego a ba feta kudu ka palo a Peresia.

Bakriste ba therešo ba ntweng ya moya. Ba lwa le manaba a matla—babuši ba sa bonagalego ba tshepedišo ya gona bjale e kgopo ya dilo, bao ba hlaloswago ka Beibeleng e le “balaola-mafase ba lefsifsi; . . . meôya ya bobe e lexo sebakeng sa xodimo.” (Ba-Efeso 6:12; 1 Johane 5:19) Batho ba Modimo ba tšwela pele ba fenya—eupša e sego ka matla a bona. Theto ka moka e ya go Jehofa, yo a ba šireletšago le go ba hlahla, go etša ge go boletšwe go Psalme 18:30 e rego: “Lentšu la Morêna ké seetša; ké Yêna kôtsê ya bohle ba ba mmotilexo.”

Ee, Jehofa o diriša “lentšu” la gagwe le le sekilego, leo le lego ka Mangwalong a Makgethwa, go šireletša bahlanka ba gagwe ba botegago ka go se kwanantšhe kotsing ya moya. (Psalme 19:7-11; 119:93) Salomo o ngwadile mabapi le bohlale bjoo bo bontšhwago ka Lentšung la Modimo gore: ‘Se bo tlogele, bo go lotole, bo rate, bo go diše.’ (Diema 4:6; Mmoledi 7:12) Bohlale bjo bo tšwago go Modimo bo re šireletša bjang kotsing? Ela hloko mohlala wa ba-Isiraele ba bogologolo.

Batho Bao ba Šireleditšwego ke Bohlale bjo bo Tšwago go Modimo

Molao wa Jehofa o ile wa šireletša le go hlahla ba-Isiraele dibopegong ka moka tša bophelo. Ka mohlala, melao e lego mabapi le dijo, mekgwa ya tša maphelo le go tswalelelwa ga bao ba swerwego ke malwetši a fetelago e ile ya ba šireletša malwetšing a mantši ao a bego a fediša ditšhaba tše dingwe. E bile feela ka morago ga go lemogwa ga paketheria lekgolong la bo-19 la nywaga moo thutamahlale  e ilego ya thoma go fihlelela ditekanyetšo tša Molao wa Modimo. Melao e lego mabapi le go ba le naga, thekollo, go phumolwa ga sekoloto le kokeletšo e ile ya tliša mehola ya tša leago Isiraeleng ka go dira gore setšhaba e be se se tsepamego le se se leka-lekanego go tša boiphedišo. (Doiteronomio 7:12, 15; 15:4, 5) Molao wa Jehofa o ile wa ba wa thuša go šireletša boemo bjo bobotse bja mabu a Isiraele! (Ekisodo 23:10, 11) Melao e lego kgahlanong le borapedi bja maaka e ile ya šireletša batho moyeng, ya ba šireletša tlaišong ya batemona, go direng dihlabelo ka bana le ditirong tše dingwe tše dintši tše mpe, go sa balwe tiro e nyatšegago ya go khunamela ga batho medimo ya diswantšho e sa phelego.—Ekisodo 20:3-5; Psalme 115:4-8.

Go molaleng gore “lentšu” la Jehofa le ile la ipontšha e se ‘lentšu la lefela’ go ba-Isiraele; go e na le moo, le be le bolela bophelo le go telefala ga matšatši go bohle bao ba bego ba le kwa. (Doiteronomio 32:47) Selo se se swanago ke sa therešo lehono ka bao ba kwago mantšu a Jehofa a bohlale, gaešita le ge Bakriste ba se sa le ka tlase ga kgwerano ya Molao. (Ba-Galatia 3:24, 25; Ba-Hebere 8:8) Ge e le gabotse, go e na le go diriša melao, Bakriste ba na le melao e mentši ya motheo ya Beibele e fapa-fapanego yeo e ba hlahlago le go ba šireletša.

Batho Bao ba Šireleditšwego ke Melao ya Motheo

Melao e ka ba e lekanyeditšwe tseleng yeo e dirišwago ka yona e bile e ka fo ba ya nakwana. Lega go le bjalo, ka ge melao ya motheo ya Beibele e le ditherešo tša motheo, gantši e dirišwa ka tsela e nabilego le ya sa ruri. Tšea ka mohlala molao wa motheo wo o lego go Jakobo 3:17, yeo karolwana ya yona e rego: “Bohlale byo bo tšwaxo xodimo, sa pele mo xo byôna ké xo ila thšila, sa bobedi ké kaxišô.” Therešo yeo ya motheo e ka šireletša batho ba Modimo bjang lehono?

Go ila tšhila go bolela go ba yo a hlwekilego boitshwarong. Ka gona, bao ba lebelelago bohlweki e le bja bohlokwa ga ba katanele go phema feela boitshwaro bjo bo gobogilego eupša gape ba phema le dilo tšeo di lebišago go bjona, tšeo di akaretšago go nagana ka dikopano tša botona le botshadi le diswantšho tšeo di kgothaletšago bootswa. (Mateo 5:28) Ka mo go swanago, baratani bao ba lego lefereyong bao ba tšeelago godimo molao wa motheo o lego go Jakobo 3:17 ba phema go swarana ka tsela yeo e ka dirago gore ba palelwe ke go itshwara. Bjalo ka barati ba molao wa motheo, ga ba aroge bohlweking, mohlomongwe e le ge ba nagana gore ge feela ba sa robe molao o ngwadilwego, boitshwaro bja bona bo amogelwa ke Jehofa. Ba a tseba gore Jehofa “ó bôna pelo” gomme o arabela ka tsela e swanetšego. (1 Samuele 16:7; 2 Koronika 16:9) Batho ba bjalo ba bohlale ba šireletša mebele ya bona malwetšing a mantši a a fetetšwago ka dikopano tša botona le botshadi ao a atilego lehono gotee le go šireletša boemo bja bona bjo bobotse bja monagano le bja maikwelo.

Jakobo 3:17 e re, bohlale bjo bo tšwago go Modimo gape bo na le “kaxišô.” Re a tseba gore Sathane o leka go dira gore re furalele Jehofa ka go bjala moya wa bošoro ka dipelong tša rena, bonyenyane ka dipuku tše di belaetšago, difilimi, mmino le dipapadi tša computer—tšeo tše dingwe tša tšona di tutueletšago babapadi go ekiša bošoro le polao tšeo di feteletšego! (Psalme 11:5) Go atlega ga Sathane go bonagatšwa ke tekanyo e golago ya bosenyi bjo šoro. Mabapi le bosenyi bjo bo bjalo, nywageng e mentši e fetilego kuranta ya Australia ya The Sydney Morning Herald e ile ya tsopola Robert Ressler, yo e lego mothomi wa polelwana “mmolai wa batho ka bontši.” Ressler o boletše gore babolai bao a boledišanego le bona ka bo-1970 ba be ba tutuetšwa ke diswantšho tše di kgothaletšago bootswa tšeo “e bego e se tše di gobogilego gakaalo ge di bapetšwa le tša lehono.” Ka gona, Ressler o boletše ka “pono e nyamišago ka bokamoso—ngwaga-kgolo o mofsa woo go ona babolai bao ba bolayago batho ka bontši ba oketšegago.”

Ee, dikgwedi feela ka morago ga ge sehlogo seo sa ditaba se tšweletše, monna yo a itlhamilego ka sethunya o ile a bolaya bana ba 16 le morutišigadi wa bona sekolong sa bo-mapimpana kua Dunblane, Scotland, pele ga ge a ka ipolaya. Kgweding e latelago monna yo mongwe wa segafsi yo a itlhamilego ka sethunya o ile a bolaya batho ba 32 toropong e homotšego ya Tasmania ya Port Arthur, kua Australia. Nywageng ya morago bjale United States e ile ya hlaselwa ke dipolao tše dintši tšeo di diregago dikolong, tša dira gore ma-Amerika a botšiše gore, Ka baka la’ng? Ka June 2001, go ile gwa bolelwa kudu ka Japane dihlogong tše dikgolo tša ditaba tša lefaseng ka moka nakong ya ge monna yo a sa tšeego gabotse a be a tsena sekolong  gomme a bolaya bana ba 8 bao ba balago grade 1 le grade 2 ka go ba hlaba ka thipa le go segakanya batho ba bangwe ba 15. E le gore re kgonthišege ka se, mabaka ao a dirago gore go be le bobe bjo bo bjalo ga a kwešišege, eupša bošoro bjoo bo bontšhwago mekerong ya ditaba bo tšwela pele bo lebelelwa e le se sengwe sa dibaki tša bjona. Mongwadi wa Kuranta wa kua Australia e lego Phillip Adams o ngwadile gore: “Ge e ba papatšo ya metsotso e 60 e ka tloga e oketša thekišo mebarakeng, o se ke wa mpotša gore filimi ya diiri tše pedi yeo e jelego dimilione tše dintši tša ditšhelete ga e fetole dikgopolo tša batho.” Se se kgahlišago ke gore ka legaeng la monna yo a itlhamilego ka sethunya wa kua Port Arthur, maphodisa a ile a thopa dibidio tše 2 000 tšeo di bontšhago bošoro le diswantšho tše di kgothaletšago bootswa.

Bao ba kgomarelago melao ya motheo ya Beibele ba šireletša menagano ya bona le dipelo tša bona mehuteng ka moka ya boithabišo bjoo bo tsošago kganyogo ya go rata bošoro. Ka gona, “môya wa lefase” ga o amogelwe menaganong ya bona le dikganyogong tša bona. Go e na le moo, ba ‘rutwa ke moya wa Modimo,’ gomme ba katanela go hlagolela lerato la go rata dienywa tša wona, tšeo di akaretšago khutšo. (1 Ba-Korinthe 2:12, 13; Ba-Galatia 5:22, 23) Ba dira se ka go ithuta Beibele ka mehla, go rapela le go naganišiša ka tsela e agago. Le gona ba phema go gwerana le batho bao ba sekametšego bošorong, gomme ba kgetha go gwerana le batho ba ba swanago le bona bao ba hlologetšwego lefase le lefsa la Jehofa la khutšo. (Psalme 1:1-3; Diema 16:29) Ee, ruri ye ke tšhireletšo e kgolo yeo bohlale bo e neago!

Dumelela “Lentšu” la Jehofa Gore le Šireletše Pelo ya Gago

Ge a be a lekwa lešokeng, Jesu o ile a ganetša Sathane ka go tsopola ka mo go nepagetšego go tšwa Lentšung la Modimo. (Luka 4:1-13) Lega go le bjalo, ga se a ka a lwa le Diabolo e le feela go bona gore wa bohlale kudu ke mang. Ka go iphemela ka Mangwalo, Jesu o be a bolela go tšwa pelong ya gagwe gomme ke ka baka leo leano la Diabolo le le bego le šomile gabotse kudu kua Edene le ilego la palelwa boemong bja Jesu. Maano a Sathane a bohwirihwiri a tla palelwa le go rena ge e ba re tlatša dipelo tša rena ka mantšu a Jehofa. Ga go na selo seo se ka bago bohlokwa kudu go feta seo, ka gobane “bophelô bo hlaxa [pelong].”—Diema 4:23.

Go oketša moo, re swanetše go tšwela pele re šireletša dipelo tša rena, le ka mohla re se ke ra lesetša. Le ge Sathane a ile a palelwa kua lešokeng, ga se a ka a lesa go leka Jesu. (Luka 4:13) Le rena o tla re hlomara, a leka maano a fapa-fapanego e le go dira gore re robe potego ya rena. (Kutollo 12:17) Ka gona, anke re ekišeng Jesu ka go hlagolela lerato le le tseneletšego la go rata Lentšu la Modimo, gomme ka nako e swanago re tšwele pele re rapelela moya o mokgethwa le bohlale. (1 Ba-Thesalonika 5:17; Ba-Hebere 5:7) Jehofa o holofetša bohle bao ba itšhireletšago ka yena gore ba ka se welwe ke kotsi le ge e le efe ya moya.—Psalme 91:1-10; Diema 1:33.

Lentšu la Modimo le Šireletša Phuthego

Sathane a ka se thibele “lešaba le lexolo” leo go boletšwego ka lona e sa le pele gore le se ke la phologa masetla-pelo a magolo. (Kutollo 7:9, 14) Lega go le bjalo, o sa dutše a leka ka matla go goboša Bakriste e le gore bonyenyane batho ba bangwe ba se sa amogelwa ke Jehofa. Leano leo le ile la šoma Isiraeleng ya bogologolo gomme la feleletša ka gore go hwe batho ba 24 000 mollwaneng wa Naga ya Kholofetšo. (Numeri 25:1-9) Ee, Bakriste ba fošago bao ba bontšhago gore ba itshola e le ka kgonthe ba amogela thušo e lerato e le gore ba tsošološwe moyeng. Eupša badiradibe bao ba sa itsholego, ba swanago le Simiri wa bogologolo, ba bea boemo bjo bobotse bja boitshwaro le bja moya bja ba bangwe kotsing. (Numeri 25:14) Ka go swana le bahlabani bao ba lego sehlopheng sa madira a a gwantago a ipopile ngatana e tee ao a lahlilego dikotse tša ona, ga ba ipee kotsing ba nnoši eupša ba dira se se swanago go bahlabani-gotee le bona.

Ka gona, Beibele e laela gore: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru, a ba wa medimo e šele, a ba wa maroxa, a ba letaxwa, a ba mohlakodi. Motho wa mohuta woo, le xo ja Le se kê la ja le yêna. . . . Lena tlošang motho-mobe mo xare xa lena.” (1 Ba-Korinthe 5:11, 13) Na ga o dumele gore “lentšu” le le bohlale le thuša go šireletša bohlweki bja phuthego ya Bokriste bja boitshwaro le bja moya?

Ka mo go fapanego kudu, dikereke tše dintši tša Bojakane gotee le bahlanogi ba bantši ba lebelela dikarolo tšeo tša Beibele e le tše di šiilwego ke  nako le tše di ganetšanago le dipono tša mehleng yeno tše di bulegilego tša mabapi le boitshwaro. Ka gona, di lokafatša mehuta ka moka ya dibe tše dikgolo, gaešita le tšeo di dirwago ke baruti. (2 Timotheo 4:3, 4) Lega go le bjalo, ela hloko gore Diema 30:5, yeo gape e bolelago ka “mantšu” a Jehofa a swanago le kotse, e latelwa ke taelo yeo e lego go temana 6 e rego: “Mantšu a [Modimo] O se a eketšê ka a xaxo, a se tlo Xo hwetša Ò le moaketši, a Xo ôtla.” Ee, bao ba fetolago Beibele ge e le gabotse ke baaketši moyeng—baaketši bao ba lego molato kudu go feta ba bangwe ka moka! (Mateo 15:6-9) Ka gona, anke re lebogeng e le ka kgonthe go ba karolo ya mokgatlo woo o hlomphago Lentšu la Modimo ka mo go tseneletšego.

Ba Šireleditšwe ke “Monkgo o Mobose”

Ka ge batho ba Modimo ba kgomarela Beibele e bile ba boledišana le ba bangwe ka molaetša wa yona o homotšago, ba hema “monkgo o mobose” o swanago le seorelo wa bophelo bjoo bo thabišago Jehofa. Eupša barwadi ba molaetša woo ba ikarola bathong ba sa lokago, bao go ya ka phetolelo ya J. B. Phillips e lego “monkgo o bolayago wa tshenyego.” Ee, sekwi sa seswantšhetšo sa go dupa sa ba babe se kgopamišitšwe ke tshepedišo ya Sathane ya dilo moo e lego gore ba ikwa ba sa dudišege goba gaešita le go ba le bonaba ge ba le gare ga bao ba hemago “monkgo o mobose wa Kriste.” Ka lehlakoreng le lengwe, bao ba phatlalatšago ditaba tše dibotse ka mafolofolo e ba “seôrêlô sa Kriste [“monkgo o mobose wa Kriste,” NW] mo xo ba ba phološwaxo.” (2 Ba-Korinthe 2:14-16) Batho ba bjalo ba dipelo tše di botegago gantši ba šišimišwa ke boikaketši le maaka a bodumedi ao a hlaolago bodumedi bja maaka. Ka gona, ge re bula Lentšu la Modimo e bile re boledišana le bona ka molaetša wa Mmušo, ba ikwa ba rata Kriste gomme ba nyaka go ithuta mo go oketšegilego.—Johane 6:44.

Ka gona, o se ke wa nyama ge ba bangwe ba sa arabele gabotse molaetšeng wa Mmušo. Go e na le moo, lebelela “monkgo o mobose wa Kriste” e le mohuta wa tšhireletšo ya moya yeo e rakago batho ba bantši bao ba bego ba ka re gobatša lefelong la moya leo le dulwago ke batho ba Modimo, mola o goketša ba dipelo tše dibotse.—Jesaya 35:8, 9.

Ka ge bahlabani ba Gerika bao ba bego ba le ntweng e Kgolo ba be ba gwanta ba ipopile ngatana e tee e bile ba swere dikotse tša bona ka go tia, ba ile ba fenya go sa šetšwe mathata a magolo ao ba bego ba lebeletšane le ona. Ka mo go swanago, Dihlatse tša Jehofa tšeo di botegago ka go se kwanantšhe di kgonthišetšwa gore di tla fenya ka mo go feletšego ntweng ya tšona ya moya, ka gobane bjoo “ké byôna bohwa” bja tšona. (Jesaya 54:17) Ka gona, anke yo mongwe le yo mongwe wa rena a tšwele pele a itšhireletša ka Jehofa ka go dula a “xomarêla Lentšu la bophelô.”—Ba-Filipi 2:16.

[Diswantšho go letlakala 31]

‘Bohlale bjo bo tšwago godimo bo ila tšhila, gomme bo na le kagišo’