Phihlelo

Go Kgotlelela Bjalo ka Mohlabani wa Kriste

KA GE GO ANEGA YURII KAPTOLA

“Ga bjale ke kgodišegile gore ruri o na le tumelo!” Mantšu ao a be a e-tšwa mothong yo ke bego ke sa mo nagana—mohlankedi yo a lego sehlopheng sa madira a Soviet—gomme a ile a nnea kgothatšo ka nako e swanetšego. Ke be ke golegilwe ka nako e telele gomme ke ile ka kgopela Jehofa ka go se kgaotše gore a nnee thekgo. Ke be ke lebeletšane le bothata bjo bogolo bjoo bo bego bo tla nyaka kgotlelelo le boikemišetšo.

KE BELEGWE ka October 19, 1962, gomme ke goletše karolong ya ka bodikela ya Ukraine. Ngwageng wona woo, tate, yo le yena a bego a bitšwa Yurii, o ile a gahlana le Dihlatse tša Jehofa. Go se go ye kae o ile a ba morapedi wa mathomo wa Jehofa motsaneng wa gabo rena. Modiro wa gagwe o ile wa lemogwa ke bahlankedi bao ba bego ba ganetša Dihlatse tša Jehofa.

Lega go le bjalo, baagišani ba rena ba bantši ba be ba hlompha batswadi ba-ka ka baka la dika tša bona tša Bokriste le ka baka la go tshwenyega ga bona ka batho ba bangwe. Batswadi ba-ka ba ile ba diriša sebaka se sengwe le se sengwe go nweletša lerato la go rata Modimo go nna le go dikgaetšedi tša-ka tše tharo go tloga re sa le ba banyenyane, gomme se se ile sa nthuša go lebeletšana le ditlhohlo tše dintši tšeo ke bego ke gahlana le tšona sekolong. E nngwe ya ditlhohlo tše bjalo e ile ya rotoga ge morutwana yo mongwe le yo mongwe a be a swanetše go hloma petšhe yeo e bego e mo hlaola e le setho sa mokgatlo wa Bana wa Lenin’s October. Ka baka la boema-gare bja-ka bja Bokriste, ga se ka ka ka hloma petšhe yeo gomme ka go rialo ke be ke sa swane le bana ba bangwe.—Johane 6:15; 17:16.

Ka morago ge ke be ke le go grade 3, barutwana ka moka ba be ba swanetše go tsenela mokgatlo wa bafsa wa Bokomanisi wo o bitšwago Young  Pioneers. Ka letšatši le lengwe klase ya rena e ile ya ntšhwa jarateng ya sekolo gore e ye tirelong ya go ngwadišwa. Ke be ke tšhogile kudu, ke letetše go kwerwa le go rogakwa. Barutwana ka moka ka ntle le nna ba be ba tlile le sekhafo se sefsa se sehwibidu sa mokgatlo wa ma-Pioneer go tšwa gae, gomme ba be ba eme mothaladi o motelele ka pele ga hlogo ya sekolo, barutiši le barutwana ba bagolo sekolong. Ge barutwana ba bagolo sekolong ba be ba botšwa gore ba bofe dikhafo melaleng ya rena, ke ile ka inamiša hlogo gomme ka lebelela fase, ka kholofelo ya gore go be go se na motho le ge e le ofe yo a tlago go ntšhetša.

Go Išwa Dikgolegong tša Kgole

Ge ke be ke e-na le nywaga e 18, ke ile ka ahlolelwa nywaga e meraro kgolegong ka baka la go kgomarela boema-gare bja Bokriste. (Jesaya 2:4) Ke feditše ngwaga wa mathomo ke golegilwe toropong ya Trudovoye, yeo e lego Seleteng sa Vinnitskaya sa Ukraine. Ge ke le moo, ke ile ka gahlana le Dihlatse tše dingwe tša Jehofa tše ka bago 30. Re be re abja ka babedi ka babedi gomme re išwa dihlopheng tše di sa swanego tša bašomi, ka ge balaodi ba be ba nyaka go re thibela gore re se ke ra ba gotee.

Ka August 1982, nna le Eduard—e lego Hlatse e nngwe—re ile ra tšewa ka setimela re tsentšwe ka matorokising a kgolego ra išwa ka leboa la Dithaba tša Ural re e-na le sehlopha sa bagolegwa ba bangwe. Re ile ra kgotlelela phišo e šoro gotee le go pitlagana ka matšatši a seswai go ba go fihla ge re goroga Kgolegong ya Solikamsk, yeo e lego Seleteng sa Permskaya. Nna le Eduard re ile ra išwa diseleng tše di sa swanego. Dibekeng tše pedi ka morago, ke ile ka išwa ka leboa la kgole kua Vels, yeo e lego tikologong ya Krasnovishersky.

Senamelwa sa rena se fihlile bošego-gare, le gona e be e le kgampi ya lefsifsi. Go sa šetšwe lefsifsi leo, mohlankedi o ile a laela sehlopha sa rena gore se tshele noka ka seketswana. Re be re sa kgone go bona noka goba seketswana! Lega go le bjalo, re ile ra phopholetša go ba go fihla re hwetša seketswana go sa letelwa, gomme le ge re be re tšhogile re ile ra kgona go tshela noka. Ge re šetše re fihlile ka mošola wa noka, re ile ra leba mo re bego re bona seetša mmotong wa kgaufsi, moo re ilego ra hwetša ditente tše sego kae. Ditente tše e be e tla ba legae la rena le lefsa. Ke be ke dula tenteng e kgolo ge e bapetšwa le tše dingwe, ke e-na le bagolegwa ba bangwe ba ka bago 30. Marega, re be re kgotlelela dithempheretšha tšeo ka dinako tše dingwe di bego di theogela go -40°C, gomme tente e be e sa re ruthetše ka mo go lekanego. Modiro o mogolo woo bagolegwa-gotee le nna ba bego ba o dira e be e le go rema dihlare, eupša nna modiro wa-ka e be e le go agela bagolegwa mekutwana.

Dijo tša Moya di Fihla Lefelong la Rena la Bodulo Leo le Lego Lekatana

Ke be ke le Hlatse ke nnoši lefelong leo la bodulo; lega go le bjalo Jehofa ga se a ka a ntahla. Ka letšatši le lengwe go ile gwa fihla sephuthelwana seo se tšwago go mma, yo a bego a sa dutše a dula ka bodikela bja Ukraine. Ge mohlapetši a be a bula sephuthelwana se, selo sa pele seo a ilego a se bona e be e le Beibele e nyenyane. O ile a e tšea gomme a thoma go e bula. Ke ile ka leka go nagana ka selo seo ke bego ke tla se bolela e le go mo thibela gore a se ke a nkamoga lehumo le la moya. Mohlapetši o ile a botšiša ka go akgofa gore: “Ke’ng se?” Pele ga ge nka nagana ka karabo, mohlahlobi yo a bego a eme kgaufsi le yena o ile a araba ka gore: “Seo ke pukuntšu.” Ke ile ka homola. (Mmoledi 3:7) Mohlahlobi o ile a phuruphutša sephuthelwana ka moka gomme ka morago a nnea sona gotee le Beibele ye ya bohlokwa. Ke be ke tloga ke thabile kudu moo ke ilego ka mo nea dikoko tše di tšwago ka sephuthelwaneng sa-ka. Ge ke be ke hwetša sephuthelwana se, ke ile ka lemoga gore Jehofa ga se a ntebala. O ile a nthuša ka botho gomme a hlokomela dinyakwa tša-ka tša moya.—Ba-Hebere 13:5.

Go Dira Boboledi ke sa Langwe

Dikgweding tše sego kae ka morago, ke ile ka makatšwa ke ge ke amogela lengwalo le le tšwago go ngwanabo rena wa Mokriste yo a bego a golegilwe bokgoleng bja dikhilomithara tše ka bago 400. O ile a nkgopela gore ke nyake monna yo a ilego a bontšha kgahlego yo ga bjale a ka bago a le kampeng ye ke lego go yona. Go ngwala lengwalo le le bjalo leo le ka kwešišwago ke mang le mang e be e se gabohlale, ka ge mangwalo a rena a be a seka-sekwa. Ga go makatše ge yo mongwe wa bahlankedi a ile a ntaela gore ke tle ofising ya gagwe gomme a ntemoša ka go tia gore ke se ke ka dira boboledi. Ke moka o  ile a ntaela gore ke saene lengwalo leo le bolelago gore ke tla lesa go boledišana le ba bangwe ka ditumelo tša-ka. Ke ile ka araba ka gore ke be ke sa kwešiše lebaka leo ka lona ke bego ke swanetše go saenela tsebišo e bjalo, ka ge batho ka moka ba be ba šetše ba tseba gore ke yo mongwe wa Dihlatse tša Jehofa. Ke ile ka bolela gore bagolegwa ba bangwe ba be ba nyaka go tseba lebaka leo ka lona ke golegilwego. Ke swanetše go ba botša go re’ng? (Ditiro 4:20) Mohlankedi o ile a lemoga gore o be a ka se kgone go ntšhošetša, ka gona o ile a phetha ka go nthaka. Ke ile ka išwa kampeng e nngwe.

Ke ile ka hudušetšwa motsaneng wa Vaya wo o lego bokgoleng bja dikhilomithara tše 200. Gona moo balaodi ba be ba hlompha boemo bja-ka bja Bokriste gomme ba ile ba nnea mošomo wo o sa tswalanego le tša bohlabani—mathomong ke ile ka šoma ke le mmetli, gomme ka morago ka šoma ke le ramohlagase. Eupša mediro ye e be e e-na le ditlhohlo tša yona ka noši. Tiragalong e nngwe, ke ile ka botšwa gore ke tšee ditlabakelo tša-ka gomme ke ye pareng ya moo motseng. Ge ke fihla, bahlabani bao ba lego ka pareng ba be ba thabetše go mpona. Ba be ba sa kgone go lokiša mabone ao a bego a kgabiša dika tše di fapa-fapanego tša tša bohlabani. Ba be ba nyaka gore ke ba thuše go a lokiša ka gobane ba be ba lokišeletša moletlo wa ngwaga le ngwaga wa Red Army Day. Ka morago ga go naganišiša ka thapelo mabapi le seo ke swanetšego go se dira, ke ile ka ba botša gore nka se kgone go dira modiro wa mohuta woo. Ke ile ka ba nea ditlabakelo tša-ka gomme ka sepela. Ke ile ka begwa go motlatša-molaodi, gomme seo se ilego sa mmakatša ke gore o ile a theetša ge ba ngongorega ka nna gomme a araba ka gore: “Ke a mo hlompha ka baka la seo. Ke monna yo a phelago ka go dumelelana le melao ya motheo.”

Kgothatšo e Tšwago Mothong yo ke Bego ke sa mo Nagana

Ka June 8, 1984, ka morago ga nywaga e meraro ya go golegwa, ke ile ka lokollwa. Ka morago ga go boela Ukraine, ke ile ka swanelwa ke go ingwadiša go tša bohlabani ke le yo a kilego a golegwa. Balaodi ba ile ba mpotša gore ke be ke tla sekišwa gape nakong ya dikgwedi tše tshela e bile go be go tla ba kaone gore ke tloge seleteng se ke se sa boa. Ka gona, ke ile ka tloga Ukraine gomme mafelelong ka hwetša mošomo kua Latvia. Ka nakwana ke ile ka kgona go dira boboledi le go kopanela le sehlopha se senyenyane sa Dihlatse tšeo di bego di dula motseng-mošate wa Riga le ditikologong tša kgaufsi. Lega go le bjalo, ka morago ga ngwaga o tee feela, ke ile ka bitšwa gape gore ke tlo tsenela tirelo ya bohlabani. Ofising yeo re bego re ngwadišwa go yona, ke ile ka botša mohlankedi gore nakong e fetilego ke ile ka gana go dira tirelo ya bohlabani. Ge a araba, o ile a goeletša ka gore: “Na ruri o tseba seo o se dirago? Anke re bone gore o tla reng go motlatša-mokolonele!”

O ile a nkiša phapošing yeo e lego lebatong la bobedi moo motlatša-mokolonele a bego a dutše ka morago ga tafola e telele. O ile a ntheetša ka kelohloko ge ke be ke dutše ke mo hlalosetša boemo bja-ka gomme ka morago a mpotša gore ke sa dutše ke e-na le nako ya go naganišiša ka phetho ya-ka pele nka ya go komiti ya go ngwadiša. Ge re tloga ofising ya motlatša-mokolonele, mohlankedi yoo mathomong a ilego a nkgadimola o ile a dumela ka gore: “Ga bjale ke kgodišegile gore ruri o na le tumelo!” Ge ke tšwelela pele ga komiti ya tša bohlabani, ke ile ka e botša gape ka boema-gare bja-ka, gomme e ile ya ntlogela ka sepela.

Ka nako yeo, ke be ke dula hosetele. Mantšiboeng a mangwe, ke ile ka kwa motho a kokota  ganyenyane lebating. Ke ile ka bula gomme ka hwetša monna yo a aperego sutu e bile a swere mokotla wa dipuku. O ile a itsebiša ka gore: “Ke wa mokgatlo wa Tšhireletšo ya Mmušo. Ke a tseba gore o na le mathata le gore o tlile go sekišwa kgorong ya tsheko.” Ke ile ka araba ka gore: “O nepile.” Monna yo o ile a tšwela pele ka gore: “Re ka go thuša ge e ba o dumela go dirišana le rena.” Ke ile ka re: “Aowa, go ka se kgonege. Ke tla dula ke botegela ditumelo tša-ka tša Bokriste ka go se kwanantšhe.” O ile a se sa dira maiteko a mangwe a go nkgodiša, gomme a sepela.

Go Boela Kgolegong, go Boela Modirong wa Boboledi

Ka August 26, 1986, Kgoro ya Tsheko ya Setšhaba ya Riga e ile ya nkahlolela nywaga e mene modirong wa kgapeletšo, gomme ke ile ka išwa Kgolegong e Kgolo ya Riga. Ke ile ka tsenywa ka seleng e kgolo ke e-na le bagolegwa ba bangwe ba 40, gomme ka leka go dira boboledi go mogolegwa yo mongwe le yo mongwe ka seleng yeo. Ba bangwe ba be ba bolela gore ba dumela go Modimo; ba bangwe ba be ba fo sega. Ke ile ka lemoga gore banna ba ba be ba bokane ka dihlopha, gomme ka morago ga dibeke tše pedi baetapele ba dihlopha tše ba ile ba mpotša gore ga se ka dumelelwa go dira boboledi, ka ge ke be ke sa dire dilo ka go dumelelana le melao ya bona yeo e sa ngwalwago. Ke ile ka hlalosa gore ke be ke golegilwe ka lona lebaka leo—ke be ke phela ka go dumelelana le melao e fapanego.

Ke ile ka tšwela pele ke dira boboledi ka bohlale, gomme ge ke be ke hwetša ba bangwe bao ba bego ba sekametše dilong tša moya, ke ile ka kgona go ithuta Beibele le ba bane ba bona. Nakong ya dipoledišano tša rena, ba ile ba ngwala dithuto tša motheo tša Beibele ka pukung ya go ngwalela dintlha. Dikgweding tše sego kae ka morago, ke ile ka romelwa kampeng e hlapeditšwego kudu ya Valmiera, moo ke ilego ka šoma ke le ramohlagase. Gona moo ke ile ka kgona go ithuta Beibele le ramohlagase yo mongwe yoo nywageng e mene ka morago a ilego a ba yo mongwe wa Dihlatse tša Jehofa.

Ka March 24, 1988, ke ile ka hudušwa kampeng e hlapeditšwego kudu gomme ka išwa lefelong la bodulo le lego kampeng ya kgaufsi le moo. Ye ruri e be e le tšhegofatšo, ka ge ke be ke e-na le tokologo e oketšegilego. Ke be ke abetšwe go šoma mafelong a fapa-fapanego ao go bego go agwa go ona, gomme ka mehla ke be ke nyaka dibaka tša go dira boboledi. Gantši, ke be ke le kgole le kampa, ke dira boboledi go fihla bošego kudu, eupša le ka mohla ga se ka ka ka ba le mathata le ge e le afe ge ke boela lefelong la bodulo.

Jehofa o ile a šegofatša maiteko a-ka. Dihlatse tše sego kae di be di dula kgaufsi le kampa, eupša toropong go be go e-na le Hlatse e tee feela, e lego Vilma Krūmin̗a—kgaetšedi yo a tšofetšego. Nna le kgaetšedi Krūmin̗a re ile ra thoma go swara dithuto tše dintši tša Beibele le bafsa. Ka dinako tše dingwe, bana babo rena le dikgaetšedi ba be ba sepela go tloga Riga e le gore ba yo tšea karolo bodireding, gomme babulamadibogo ba bangwe ba ka mehla ba be ba e-tšwa Leningrad (yeo ga bjale e lego St. Petersburg). Ka thušo ya Jehofa, re ile ra thoma dithuto tše mmalwa tša Beibele, ke moka kapejana ke ile ka ingwadiša tirelong ya bobulamadibogo, ke fetša diiri tše 90 ka kgwedi ke le modirong wa boboledi.

Ka April 7, 1990, molato wa-ka o ile wa seka-sekwa gape ke Kgoro ya Tsheko ya Batho ya Valmiera. Ge theetšo ya molato e be e thoma, ke ile ka tseba mosekiši. E be e le lesogana leo ke ilego ka ahla-ahla Beibele le lona nakong e fetilego! Le ile la ntseba gomme la myemyela eupša la se ke la bolela selo. Ke sa dutše ke gopola seo moahlodi a ilego a mpotša sona tshekong ya letšatšing leo, o itše: “Yurii, phetho ya gore o golegwe nywageng e mene e fetilego e be e se molaong. Ba be ba sa swanela go go golega.” Ke ile ka lokollwa go sa letelwa!

Mohlabani wa Kriste

Ka June 1990, ke ile ka swanelwa ke go ingwadiša gape ofising ya go ngwadiša e le gore ke hwetše tumelelo ya go ba modudi wa Riga. Ke ile ka tsena ka ofising e swanago e nago le tafola e telele yeo nywageng e mene pejana ke ilego ka botša motlatša-mokolonele gore nka se šome go tša bohlabani. Mo nakong ye, o ile a emelela gore a ntumediše, o ile a mpha letsogo, gomme a re: “Go a nyamiša gore o ile wa swanelwa ke go lebeletšana  le dilo tše ka moka. Ke kwešwa bohloko ke gore dilo di diregile ka tsela yeo.”

Ke ile ka araba ka gore: “Ke nna mohlabani wa Kriste, gomme ke swanetše go phelela thomo ya-ka. Ka thušo e tšwago Beibeleng, le wena o ka thabela seo Kriste a se holofeditšego balatedi ba gagwe—bophelo bjo bo thabišago le bokamoso bja ka mo go sa felego.” (2 Timotheo 2:3, 4) Mokolonele o ile a araba ka gore: “E sego kgale ke ile ka reka Beibele, gomme ga bjale ke a e bala.” Ke be ke swere puku ya O ka Phela ka mo go sa Felego Paradeiseng mo Lefaseng. * Ke ile ka bula go kgaolo ye e bolelago ka pontšho ya mehla ya bofelo gomme ka mmontšha kamoo boporofeta bja Beibele bo tswalanago ka gona le mehla ya rena. Mokolonele o ile a nteboga kudu gomme a mpha letsogo gape a ba a ntakaletša katlego modirong wa-ka.

Mo nakong ye mašemo a be a tloga a šweufaletše go bunwa kua Latvia. (Johane 4:35) Ka 1991, ke ile ka thoma go hlankela ke le mogolo ka phuthegong. Go be go e-na le bagolo ba babedi feela bao ba kgethilwego nageng ka moka! Ngwaga ka morago, phuthego e nnoši ya Latvia e ile ya arolwa ka diripa tše pedi—e nngwe e be e le ya bao ba bolelago se-Latvia gomme e nngwe e le ya bao ba bolelago se-Russia. Ke ile ka ba le tokelo ya go hlankela phuthegong ya se-Russia. Batho ba be ba oketšega ka go akgofa moo ngwageng o latelago phuthego ya rena e ilego ya arolwa ka dihlopha tše tharo! Ge ke lebelela morago, go molaleng gore Jehofa ka boyena o be a hlahla dinku tša gagwe gore di tle ka mokgatlong wa gagwe.

Ka 1998, ke ile ka kgethwa gore ke hlankele ke le mmulamadibogo yo a kgethegilego kua Jelgava, e lego toropo yeo e ka bago dikhilomithara tše 40 ka borwa-bodikela bja Riga. Ngwageng wona woo, ke ile ka ba yo mongwe wa batho ba pele ba tšwago Latvia bao ba ilego ba laletšwa go ba gona Sekolong sa Tlwaetšo ya Bodiredi seo se bego se swarwa ka leleme la se-Russia kua Solnechnoye, kgaufsi le St. Petersburg, Russia. Ge ke le sekolong, ke ile ka thoma go kwešiša gore ke gabohlokwa gakaakang go ba le boemo bja kgopolo bja go rata batho e le gore o atlege bodireding. Seo se ilego sa tloga se nkgahla kudu go feta dilo tšeo re bego re di rutwa sekolong, e be e le lerato le tlhokomelo tšeo re bego re di newa ke lapa la Bethele le bahlahli ba sekolo.

Ka 2001 ke ile ka fihlelela pakane e nngwe ya bohlokwa bophelong ge ke be ke nyala Karina, mosadi yo mobotse wa Mokriste. Karina o ile a ntlatša tirelong e kgethegilego ya nako e tletšego, gomme letšatši le lengwe le le lengwe ke a kgothala ge ke bona mosadi wa-ka a boa tirelong ya tšhemo a bonagala a tloga a thabile. Ka kgonthe, go hlankela Jehofa go tloga go thabiša. Diphihlelo tše šoro tšeo ke bilego le tšona ka tlase ga pušo ya Bokomanisi di nthutile gore ke mmote ka mo go feletšego. Go ikgafa mo gongwe le mo gongwe ke gabohlokwa go motho yo a nyakago go dula e le mogwera wa Jehofa le go thekga bogoši bja gagwe. Go thuša ba bangwe go ithuta ka Jehofa go dirile gore ke be le morero bophelong. E bile tokelo e kgahlišago go nna go hlankela Jehofa ke le “mohlabani o botse wa Jesu Kriste.”—2 Timotheo 2:3.

[Mongwalo wa ka tlase]

[Seswantšho go letlakala 10]

Ke ile ka ahlolelwa go dira modiro wa kgapeletšo ka nywaga e mene gomme ka golegwa Kgolegong e Kgolo ya Riga

[Seswantšho go letlakala 12]

Ke e-na le Karina bodireding