Na go Botega go Bohlokwa?
Na go Botega go Bohlokwa?
KARL, e lego mmoleledi wa inšuranse o itše: “Wena o lefa tšhelete e ntši kudu bakeng sa inšuranse ya tša maphelo. * Ge o ka tla khamphaning ya-ka, o tla ipolokela diranta tše 120 ka kgwedi, e lego tšhelete e ntši kudu.”
Jens o fetotše ka gore: “Seo e ka ba e le therešo. Eupša ke bile le inšuranse ya tša maphelo khamphaning ye ka nywaga e mmalwa. E nthušitše kudu nakong e fetilego, gomme ke nyaka go dula ke e botegela.”
Karl o arabile ka gore: “Go botega ke seka se sebotse. Lega go le bjalo, go botega go dira gore o lahlegelwe ke tšhelete!”
Karl o be a nepile. Gantši go botegela motho yo mongwe go ka dira gore o lahlegelwe ke tšhelete. Le gona go nyaka nako, matla le boikarabelo. Na go botega go bohlokwa?
Go Retwa Kudu Gohle Eupša ga go Dirišwe
Nyakišišong yeo e dirilwego kua Jeremane ke Lekgotla la Nyakišišo ya Dikgopolo la Allensbach, 96 lekgolong ya bao ba arabetšego ba be ba lebelela go botega e le seka se se rategago. Nyakišišo ya bobedi ya Allensbach yeo e dirilwego bathong ba nywaga e 18 go ya go e 24 e bontšhitše gore batho ba 2 go ba 3 bao ba arabetšego ba be ba lebelela go botega e le “selo se se lego nakong,” seo se bolelago gore ba be ba go lebelela e le selo se sebotse.
Gaešita le ge go botega go retwa gohle, boemo bo fapane kudu ge go tliwa tabeng ya go botega e le ka kgonthe. Ka mohlala, dinageng tše mmalwa tša Yuropa gantši banyalani goba ditho tša lapa ga ba botegelane. Gantši bagwera ga ba botegelane. Le gona go botega moo nakong e fetilego go bego go gweranya mothwadi le mothwalwa goba kgwebo le barekedi ba yona go tloga go nyameletše. Ka baka la’ng?
Ka dinako tše dingwe bophelo bja leema-ema bo dira gore motho a be le nako e nyenyane goba matla a manyenyane maikwelong bakeng sa go phetha boikarabelo bjo bo nyakago gore a botege. Batho bao ba ilego ba nyamišwa ditswalanong tšeo ba bego ba e-na le tšona le batho ba bangwe mohlomongwe mo nakong ye ga ba botegele motho le ge e le ofe. Ba bangwe ba ka kgetha bophelo bja nakwana bjoo bo sa nyakego gore motho a botege.
Go sa šetšwe gore lebaka ke lefe, go botega ke seka seo se retwago kudu eupša ga go dirišwe. Ka gona, dipotšišo ke tše: Na go botega go bohlokwa? Ge e ba go le bjalo, ke mang yo re swanetšego go mmotegela, gomme ka ditsela dife? Mehola ya go botega ke efe?
[Mongwalo wa ka tlase]
^ ser. 2 Maina a mangwe a fetotšwe sehlogong se le se se latelago.
[Seswantšho go letlakala 3]
Go botega ke seka se se retwago kudu eupša ga go dirišwe