Re tla Sepela Leineng la Jehofa Modimo wa Rena

“Rena re tlo fêla rè e-ya ka tsela ya Morêna Modimo wa rena ka mehla le xo ya xo ile.”—MIKA 4:5.

1. Boemo bja boitshwaro e be e le bofe mehleng ya Noage, gomme ke bjang Noage e bego e le yo a fapanego?

MOTHO wa pele yo go bolelwago ka yena ka Beibeleng e le yo a ilego a sepela le Modimo e be e le Henoge. Wa bobedi e be e le Noage. Pego e re botša gore: “Noaxe e be e le monna wa xo loka, à se na bosodi mo xo ba mehleng ya xaxwe, é le wa xo sepela à na le Modimo.” (Genesi 6:9) Mehleng ya Noage, batho ka kakaretšo ba be ba arogile borapeding bjo bo sekilego. Boemo bjo bobe bo ile bja mpefatšwa ke barongwa bao ba sa botegego bao ba ilego ba kopana ka mo go sa swanelago le basadi gomme ba ba le bana bao ba bitšwago ba-Nefilimi, e lego “baxale” goba “banna ba maina a a tumilexo,” ba mehleng yeo. Ga go makatše gore lefase le ile la tlala ka bošoro! (Genesi 6:2, 4, 11) Lega go le bjalo, Noage o ile a itlhatsela a se na bosodi le gona e be e le “sexoeledi sa tokô.” (2 Petro 2:5) Ge Modimo a be a mo laela gore a age areka bakeng sa go phološa maphelo, Noage ka go kwa “a dira tšôna-tšeo tšohle, a di dira ka mo Modimo a mo laetšexo ka xôna.” (Genesi 6:22) Ka kgonthe, Noage o be a sepela le Modimo.

2, 3. Noage o beile mohlala ofe o mobotse bakeng sa rena lehono?

² Paulo o akareditše Noage lelokelelong la gagwe la dihlatse tše di botegago ge a be a ngwala gore: “Ké ka tumêlô xe Noa a dirile polokêlô à laetšwe ke Modimo, a botšwa tše di bexo di sešo tša bônwa, a phološa ba lapá la xaxwe. Ké ka yôna xe a sôla lefase; xomme ya ba yêna mo-ja-bohwa ka tokô ye e tšwilexo tumêlong.” (Ba-Hebere 11:7) A mohlala o mobotse gakaakang! A kgodišegile gore mantšu a Jehofa a tla phethagala, Noage o ile a diriša nako, matla le dilo tša bohlokwa bakeng sa go phethagatša ditaelo tša Modimo. Ka tsela e swanago, batho ba bantši lehono ba gana dibaka tša mošomo lefaseng le gomme ba diriša nako ya bona, matla le dilo tša bohlokwa ka go kwa ditaelo tša Jehofa. Tumelo ya bona e a lemogega gomme e tla feleletša ka go phološwa ga bona ka noši le ga ba bangwe.—Luka 16:9; 1 Timotheo 4:16.

³ Go bontšha tumelo go swanetše go ba go ile gwa ba thata go Noage le lapa la gagwe go etša ge go be go le bjalo go Henoge, e lego rakgolokhukhu wa Noage, yo go boletšwego ka yena sehlogong se se fetilego. Mehleng ya Noage go swana le mehleng ya Henoge, barapedi ba therešo ba be ba balega—ke batho ba seswai feela bao ba ilego ba itlhatsela ba botega gomme ba phologa Meetse-fula. Noage o ile a tsebatša toko lefaseng le šoro le le le gobogilego. Go oketša moo, yena le lapa la gagwe ba ile ba aga areka e kgolo ya dikota e le go itokišeletša meetse-fula a lefase ka bophara, gaešita le ge go be go sa ka gwa ba le motho yo a kilego a bona meetse-fula a bjalo. Seo se ka ba se ile sa bonagala se sa tlwaelega go bao ba bego ba ba lebeletše.

4. Ke phošo efe ya batho ba mehleng ya Noage yeo Jesu a ilego a e gatelela?

⁴ Se se thabišago ke gore ge Jesu a be a bolela ka mehla ya Noage, ga se a ka a bolela ka bošoro, bodumedi bja maaka goba boitshwaro bjo bo gobogilego—gaešita le ge dilo tše e be e le diphošo tše dikgolo kudu. Phošo yeo Jesu a ilego a e gatelela e be e le go gana ga batho go kwa temošo yeo e bego e newa. O boletše gore ba be “ba-e-ja, bà e-nwa, bà nyala, bà nyadiša, xwa bá xwa tla ’tšatši le Noaxe a tsenexo polokelong ka lôna.” Go ja, go nwa, go nyala, go nyadiša—ke’ng se se fošagetšego ka seo? Ba be ba fo ba  ba phela bophelo bjo go thwego bo tlwaelegile! Eupša meetse-fula a be a e-tla, gomme Noage o be a goelela toko. Mantšu a gagwe le boitshwaro bja gagwe e be e swanetše go ba temošo go bona. Lega go le bjalo, “ba be ba sa šetše selô; meetse-fula a bá a tla, a ba tšea ka moka.”—Mateo 24:38, 39.

5. Noage le lapa la gagwe ba be ba swanetše go ba le dika dife?

⁵ Ge re lebelela morago dinakong tšeo, re bona bohlale bja tsela ya Noage ya go phela. Lega go le bjalo, mehleng ya pele ga Meetse-fula, go ba yo a fapanego le batho ka moka go be go nyaka sebete. Go be go nyakega kgodišego e matla go Noage le lapa la gagwe gore ba age areka e kgolo le go e tlatša ka mehuta e fapa-fapanego ya diphoofolo. Na ba bangwe ba batho bao ba sego kae ba botegago ka dinako tše dingwe ba ile ba duma eka ba ka swana le batho ba bangwe gomme ba phela bophelo bjo go thwego bo tlwaelegile? Gaešita le ge ba ka ba ba ile ba ba le dikgopolo tše bjalo, ga se ba ka ba fokola potegong ya bona. Ka morago ga nywaga e mentši kudu—e mentši go feta yeo motho le ge e le ofe wa rena a tla e phelago tshepedišong ye ya dilo—tumelo ya Noage e dirile gore a phološwe Meetse-fuleng. Lega go le bjalo, Jehofa o ile a ahlola bohle bao ba bego ba phela bophelo bjo go thwego bo tlwaelegile gomme ba sa šetše seo se bolelwago ke dinako tšeo ba bego ba phela go tšona.

Bošoro bo Tlaiša Batho Gape

6. Ka morago ga Meetse-fula, ke boemo bofe bjo bo bego bo sa dutše bo le gona?

⁶ Ka morago ga ge meetse a Meetse-fula a pšhele, batho ba ile ba thoma bophelo lefsa. Lega go le bjalo, batho ba be ba dutše ba sa phethagala, gomme “diakanyô tša pelo ya motho” di ile tša tšwela pele “è le tše mpe xo tloxa byaneng bya xaxwe.” (Genesi 8:21) Ka ntle le moo, gaešita le ge batemona ba be ba ka se sa hlwa ba kgona go fetoša mebele ya bona gore e be ya nama, ba be ba sa dutše ba le mafolofolo kudu. Lefase la batho bao ba sa boifego Modimo le ile la bontšha ka pela gore le be le “rapaletše bobeng,” gomme go fo swana le lehono, barapedi ba therešo ba ile ba swanelwa ke go lwa malebana le “dipoxo tša Diabolo.”—1 Johane 5:19; Ba-Efeso 6:11, 12.

7. Bošoro bo ile bja oketšega bjang lefaseng la ka morago ga Meetse-fula?

⁷ Bonyenyane go tloga mehleng ya Nimirode, lefase la ka morago ga Meetse-fula le ile la tlala gape ka bošoro bja batho. Ka baka la go oketšega ga badudi le tšwelopele ya tša thekinolotši, bošoro bjoo bo ile bja oketšega ge nako e dutše e e-ya. Nywageng ya pejana, go be go e-na le tšhoša, lerumo, bora le mosebe gotee le koloi ya ntwa. Dinakong tša moragonyana bjale, go ile gwa ba le dithunya le dikanono, ke moka gwa ba le dibetša tša maemo a godimo mathomong a lekgolo la bo-20 la nywaga. Ntwa ya I ya Lefase e ile ya tšweletša dibetša tše di tšhošago kudu, tše bjalo ka difofane, dikoloi tša ntwa, dikepe tša ka tlase ga meetse le kgase e nago le mpholo. Ntweng yeo, dibetša tše di fetile ka maphelo a dimilione. Na seo se be se sa letelwa? Se be se letetšwe.

8. Kutollo 6:1-4 e phethagaditšwe bjang?

⁸ Ka ngwaga wa 1914, Jesu o ile a bewa setulong sa bogoši e le Kgoši ya Mmušo wa Modimo wa legodimong, gomme “letšatši la Morêna” le ile la thoma. (Kutollo 1:10) Ponong e begilwego ka pukung ya Kutollo, Jesu o bonwa e le Kgoši e nametšego pere e tšhweu e lebile phenyong. Banamedi ba bangwe ba dipere ba a mo latela, yo mongwe le yo mongwe o swantšhetša mathata a fapa-fapanego ao a welago batho. Yo mongwe wa bona o nametše pere e khulong gomme o be  a neilwe matla a “xo amoxa lefase khutšô, xore batho ba bolayanê; yêna a nêwa lerumô le lexolo.” (Kutollo 6:1-4) Pere ye le monamedi wa yona ba swantšhetša ntwa, gomme lerumo le legolo le swantšhetša tshenyo yeo e sa kago ya bonwa ya ntwa ya sebjale-bjale ka dibetša tša yona tše matla. Dibetša tšeo lehono di akaretša didirišwa tša nuclear, tšeo se sengwe le se sengwe se kgonago go bolaya batho ba dikete tše masome; dirokhethe tšeo di kgonago go thuntšhetša didirišwa tšeo mafelong ao a korotšwego ao a lego bokgoleng bja dimaele tše dikete; gotee le dibetša tša maemo a godimo tša dikhemikhale le dibetša tša diphedi tše di bakago tshenyo e kgolo.

Re Ela Hloko Ditemošo tša Jehofa

9. Lefase la lehono le bapišwa bjang le leo le bego le le gona pele ga Meetse-fula?

⁹ Mehleng ya Noage, Jehofa o ile a fediša batho ka baka la bošoro bjo bogolo bja batho ba kgopo bjo bo bego bo hlohleleditšwe ke ba-Nefilimi. Go thwe’ng ka lehono? Na bošoro bja lefase bo fokotšegile go feta kamoo bo bego bo le ka gona mehleng yela? Ga go bjalo le gatee! Go oketša moo, go fo swana le mehleng ya Noage, batho lehono ba dira mediro ya bona ya letšatši le letšatši, ba leka go phela maphelo ao go thwego ke a tlwaelegilego, gomme ba gana go kwa ditemošo tšeo di goeletšwago. (Luka 17:26, 27) Ka gona, na go na le lebaka le ge e le lefe la go belaela gore Jehofa o tla fediša moloko wa batho gape? Aowa.

10. (a) Ke temošo efe yeo e newago leboelela ka boporofeteng bja Beibele? (b) Tsela e nnoši ya bohlale lehono ke efe?

¹⁰ Nywageng e lekgolo pele ga Meetse-fula, Henoge o ile a porofeta ka phedišo yeo e swanetšego go tla mehleng ya rena. (Juda 14, 15) Jesu le yena o boletše ka “ma-setla-pelo a . . . maxolo” ao a tlago. (Mateo 24:21) Baporofeta ba bangwe ba lemošitše mabapi le nako yeo. (Hesekiele 38:18-23; Daniele 12:1; Joele 2:31, 32) Le gona, pukung ya Kutollo re bala ka tlhaloso e kwagalago gabotse ya phedišo yeo ya mafelelo. (Kutollo 19:11-21) Re le batho, re ekiša Noage le gona re baboledi ba mafolofolo ba toko. Re ela hloko ditemošo tša Jehofa gomme ka lerato re thuša baagišani ba rena gore ba dire se se swanago. Ka gona, re sepela le Modimo go etša Noage. Ka kgonthe, go bohlokwa gore motho le ge e le ofe yo a kganyogago go phela a tšwele pele a sepela le Modimo. Re ka dira seo bjang go sa šetšwe dikgateletšo tšeo re lebeletšanago le tšona letšatši le letšatši? Re swanetše go hlagolela go ba le tumelo e matla phethagatšong ya morero wa Modimo.—Ba-Hebere 11:6.

Tšwela Pele o Sepela le Modimo Dinakong tša Khuduego

11. Ke bjang re ekišago Bakriste ba lekgolong la pele la nywaga?

¹¹ Lekgolong la pele la nywaga, go ile gwa bolelwa ka Bakriste ba tloditšwego e le ba “Tsela.” (Ditiro 9:2, PK) Tsela ya bona ka moka ya bophelo e be e theilwe go dumeleng ga bona go Jehofa le Jesu Kriste. Ba ile ba sepela tseleng yeo  Mong wa bona a ilego a sepela go yona. Lehono, Bakriste ba botegago ba dira ka mo go swanago.

12. Go diregile’ng ka morago ga ge Jesu a fepile lešaba ka tsela ya mohlolo?

¹² Bohlokwa bja tumelo bo bonwa tiragalong yeo e diregilego nakong ya bodiredi bja Jesu. Tiragalong e nngwe, Jesu o ile a fepa lešaba la banna ba 5 000 ka mohlolo. Batho ba be ba maketše e bile ba thabile. Lega go le bjalo, ela hloko seo se ilego sa direga ka morago ga moo. Re bala gore: “Byale batho xe ba bôna mohlôlô woo Jesu a o dirilexo, ba re: Ka kxonthe ké Yêna Moporofeta wa xo tla lefaseng. Xomme Jesu, ka xe a tseba xore ba tlo tla ba mo xôxa xore ba mmeê kxoši, a ba ngwêxêla a boêla thabeng à nnoši.” (Johane 6:10-15) Bošegong bjoo, o ile a ya lefelong le lengwe. Mohlomongwe go gana ga Jesu gore a be kgoši go ile gwa nyamiša ba bantši. Le gona, o be a bontšhitše gore ke yo bohlale ka mo go lekanego gore a ka ba kgoši le gore o be a e-na le matla a go kgotsofatša dinyakwa tša batho tša nama. Lega go le bjalo, e be e se ya hlwa e e-ba nako ya Jehofa ya gore Jesu a buše e le Kgoši. Ka ntle le moo, Mmušo wa Jesu e be e tla ba wa legodimong, e sego wa lefaseng.

13, 14. Ke pono efe yeo ba bantši ba ilego ba e bontšha, gomme tumelo ya bona e ile ya lekwa bjang?

¹³ Lega go le bjalo, mašaba ka boikemišetšo a ile a šala Jesu morago a ba a mo hwetša ka “mošono wa lewatlê,” bjalo ka ge Johane a bolela. Ke ka baka la’ng a ile a mo latela ka morago ga gore a pheme maiteko a ona a go mo dira kgoši? Batho ba bantši ba ile ba bonagatša pono ya nama, ba bolela ka go lebanya ka ditokišetšo tša dijo tša nama tšeo Jehofa a ilego a di dira lešokeng mehleng ya Moše. Seo ba bego ba se kgothaletša e be e le gore Jesu o swanetše go tšwela pele a ba nea dijo tša nama. Ka go lemoga maikemišetšo a bona a fošagetšego, Jesu o ile a thoma go ba ruta ditherešo tša moya tšeo di bego di tla thuša go fetoša dikgopolo tša bona. (Johane 6:17, 24, 25, 30, 31, 35-40) Ge ba arabela, ba bangwe ba ile ba ngongorega ka yena, kudu-kudu ge a be a nea seswantšho se: “Ruri, ruri, ke a Le botša, xe Le sa je nama ya Morwa-motho la nwa madi a xaxwe, Le ka se bê le bophelô mo teng xa lena. E a naxo le bophelô byo bo sa felexo ké eo a jaxo nama ya-ka a nwa madi a-ka, ’me Nna ke tlo mo tsoša ka ’tšatši la mafêlêlô.”—Johane 6:53, 54.

¹⁴ Diswantšho tša Jesu gantši di be di tutuetša batho gore ba bontšhe ge e ba ba be ba kganyoga e le ruri go sepela le Modimo. Seswantšho se le sona se be se le bjalo. Se ile sa dira gore batho ba arabele ka maikwelo a matla. Re bala gore: “Byale barutiwa ba bantši ba xaxwe xe ba e-kwa a r’yalo, ba re: Polêlô yé ké e thata; e ka kowa ke mang?” Jesu o ile a tšwela pele a hlalosa gore ba swanetše go ba le kwešišo ya moya ya seo se bolelwago ke mantšu a gagwe. O itše: “Se se phedišaxo ké Môya, nama xa e thuše selô. Mantšu a ke Le botšaxo ôna ké Môya le bophelô.” Lega go le bjalo, ba bantši ga se ba ka ba theetša, gomme pego e re: “Xo tloxa moo ba bantši ba barutiwa ba xaxwe ba xomêla moraxo, ba se hlwe ba sepela le Yêna.”—Johane 6:60, 63, 66.

15. Ba bangwe ba balatedi ba Jesu ba bile le pono efe e botse?

¹⁵ Lega go le bjalo, ga se barutiwa ba Jesu ka moka bao ba ilego ba arabela ka tsela yeo. Ke therešo gore barutiwa ba bao ba botegago ka go se kwanantšhe ga se ba ka ba kwešiša ka botlalo seo Jesu a bego a se boletše. Lega go le bjalo, go mo holofela ga bona go ile gwa dula go le matla kudu. Petro, e lego yo mongwe wa barutiwa bao ba botegago ka go se kwanantšhe o ile a bolela maikwelo a bohle bao ba bego ba šetše ge a  be a re: “Morêna! Re tlo tloxa rè leba xo mang? O na le mantšu a bophelô byo bo sa felexo.” (Johane 6:68) A boemo bjo bobotse bja kgopolo le mohlala o mobotse e le ruri!

16. Re ka lekwa bjang, le gona re swanetše go hlagolela pono efe e nepagetšego?

¹⁶ Le rena lehono re ka lekwa ka tsela e swanago le yeo barutiwa ba pele ba ilego ba lekwa ka yona. Boemong bja rena, re ka nyamišwa ke gore dikholofetšo tša Jehofa ga di phethagatšwe ka pela go ya ka mo re ka nyakago ka gona. Re ka nagana gore ditlhaloso tša Mangwalo ka dikgatišong tša rena tšeo di theilwego Beibeleng di thata go di kwešiša. Boitshwaro bja Mokriste-gotee le rena bo ka re nyamiša. Na e ka ba mo gobotse go kgaotša go sepela le Modimo ka baka la mabaka a goba ao a swanago le ona? Ruri go ka se be bjalo! Barutiwa bao ba ilego ba tlogela Jesu ba ile ba bonagatša tsela ya go nagana ya nama. Re swanetše go phema go dira se se swanago.

“Xa re ba xo Xomêla Moraxo”

17. Re ka thušwa bjang gore re tšwele pele re sepela le Modimo?

¹⁷ Moapostola Paulo o ngwadile gore: “Mangwalô ka moka ké ma-hebetšwa-ke-Modimo.” (2 Timotheo 3:16) Ka Beibele, Jehofa o re botša ka mo go kwagalago gore: “Tsela šé! Tšeang ka yôna!” (Jesaya 30:21) Go kwa Lentšu la Modimo go re thuša gore re ‘šetše ka go tia tsela yeo re sepelago ka yona.’ (Ba-Efeso 5:15, PK) Go ithuta Beibele le go naganišiša ka seo re ithutago sona go re thuša gore re be ba “swerexo ka tsela ya therešô.” (3 Johane 3) Ke therešo gore bjalo ka ge Jesu a boletše, “se se phedišaxo ké Môya, nama xa e thuše selô.” Tlhahlo e nnoši yeo e ka botwago yeo re ka hlahlago dikgato tša rena ka yona ke tlhahlo ya moya, yeo e tlago ka Lentšu la Jehofa, moya wa gagwe le mokgatlo wa gagwe.

18. (a) Ke’ng seo ba bangwe ka go hloka bohlale ba se dirago? (b) Re hlagolela tumelo ya mohuta ofe?

¹⁸ Lehono, bao ba befelwago ka baka la go nagana ka tsela ya nama goba ka baka la dikholofelo tše di sa phethagatšwego gantši ba tsoma go ikhola kudu ka dilo tšeo lefase le le di neago. Ka go lahlegelwa ke pono ya bona ya go akgofa ga nako, ba bona go se bohlokwa gore ba ‘phakgame,’ gomme ba kgetha go phegelela dipakane tša boithati go e na le go bea mediro ya Mmušo pele. (Mateo 24:42) E tloga e se gabohlale go sepela ka tsela yeo. Ela hloko mantšu a moapostola Paulo a rego: “Rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.” (Ba-Hebere 10:39) Ka go swana le Henoge le Noage, re phela dinakong tša khuduego, eupša ka go swana le bona, re na le tokelo ya go sepela le Modimo. Ka go dira bjalo, re na le kholofelo e tiilego ya gore re tla bona dikholofetšo tša Jehofa di phethagatšwa, bokgopo bo fedišwa, gomme go tlišwa lefase le lefsa la go loka. A tebelelo e botse gakaakang!

19. Mika o hlalosa tsela ya barapedi ba therešo bjang?

¹⁹ Moporofeta yo a buduletšwego e lego Mika o boletše ka ditšhaba tša lefase gore ‘se sengwe le se sengwe se be se tla ya ka tsela ya modimo wa sona.’ Ke moka o boletše ka yena le barapedi ba bangwe bao ba botegago gomme a re: “Rena re tlo fêla rè e-ya ka tsela ya Morêna Modimo wa rena ka mehla le xo ya xo ile.” (Mika 4:5) Ge e ba boikemišetšo bja gago bo swana le bja Mika, dula o le kgaufsi le Jehofa go sa šetšwe kamoo mehla ye e tšwelago pele e huduega ka gona. (Jakobo 4:8) Anke kganyogo e tšwago pelong ya yo mongwe le yo mongwe wa rena e be gore ga bjale re sepele le Jehofa Modimo wa rena ka mehla, le ka mo go sa felego!

O be o tla Araba Bjang?

• Ke go swana gofe mo go lego gona magareng ga mehla ya Noage le lehono?

• Ke tsela efe yeo Noage le lapa la gagwe ba ilego ba e latela, gomme re ka ekiša tumelo ya bona bjang?

• Ke pono efe e fošagetšego yeo e ilego ya bontšhwa ke ba bangwe ba balatedi ba Jesu?

• Bakriste ba therešo ba ikemišeditše go dira’ng?

[Dipotšišo tša Thuto]

[Diswantšho go letlakala 20]

Go fo swana le mehleng ya Noage, batho lehono ba swaregile ka mediro ya bona ya letšatši le letšatši

[Seswantšho go letlakala 21]

Bjalo ka baboledi ba Mmušo, “xa re ba xo xomêla moraxo”