Sepela Le Modimo Dinakong tše tša Khuduego
Sepela Le Modimo Dinakong tše tša Khuduego
“Henoxe e be e le wa xo sepela à na le Modimo; xomme a se kê a hlwa à e-ba xôna, ka xobane Modimo ó mo tlošitše.”—GENESI 5:24.
1. Ke dibopego dife tše dingwe tšeo di dirago gore mehla ya rena e be ya mathata?
DINAKO tša khuduego! Mantšu ao a hlalosa gabotse nywaga ya moferefere le bošoro yeo batho ba phetšego go yona ga e sa le go tloga go tswalweng ga Mmušo wa Mesia ka 1914. Nakong yeo ka moka, batho ba be ba le “mehleng ya bofêlô.” Mathata a bjalo ka ditlala, malwetši, ditšhišinyego tša lefase le dintwa a ba hlasetše ka tekanyo yeo e sa kago ya ba gona pele. (2 Timotheo 3:1; Kutollo 6:1-8) Bao ba rapelago Jehofa le bona ba bile mathateng. Go fihla bokgoleng bjo itšego, ka moka ga rena re swanetše go lebeletšana le mathata le go se tsepame ga dinako tše re phelago go tšona. Dikgateletšo tša tša boiphedišo, moferefere wa tša dipolitiki, bosenyi le malwetši di gare ga dilo tšeo di dirago gore bophelo bo be thata kudu.
2. Ke ditlhohlo dife tšeo bahlanka ba Jehofa ba ilego ba lebeletšana le tšona?
2 Go oketša moo, bahlanka ba Jehofa ba bantši ba kgotleletše go tlaišwa o šoro leboelela ge Sathane a be a dutše a e-lwa le bao “ba xomaretšexo melaô ya Modimo, ba ba naxo le bohlatse bya Jesu.” (Kutollo 12:17) Le gona, gaešita le ge e se ka moka ga rena bao re ilego ra tlaišwa ka go lebanya, Bakriste ba therešo ka moka ba swanetše go lwa le Sathane Diabolo le moya wo a o tsenyago bathong. (Ba-Efeso 2:2; 6:12) Go nyakega gore re phafoge ka mo go feletšego e le gore re se ke ra tutuetšwa ke moya woo, ka ge re kopana le wona mošomong, sekolong le lefelong le ge e le lefe moo re swanetšego go kopana le bao ba sa kgahlegelego borapedi bjo bo sekilego.
Sepela le Modimo, e Sego le Ditšhaba
3, 4. Bakriste ba fapana le lefase ka tsela efe?
3 Morago kua lekgolong la pele la nywaga, Bakriste ka mo go swanago ba ile ba lwa ka matla malebana le moya wa lefase le, gomme seo se dirile gore e be ba fapanego kudu le bao ba sego ka phuthegong ya Bokriste. Paulo o ile a hlalosa phapano ye ge a be a ngwala gore: “Byale, se ke se bolêlaxo, se ke se tiišaxo Moreneng ké xo re: Ba-Efeso 4:17-19.
Le se kê la etša ba-ntlê ba ba swerexo tsela bà šilofetše dipelong tša bôná. Ba fifetše thlaoloxanyô, ba tloxêlane le bophelô bya Modimo, è le ba xo se tsebe, dipelo tša bôná dì thatafetše. Ba reteletše ba ineêla bohlôtlôlô, ba dira tša dithšila bà ile le dikxanyoxô.”—4 Ruri mantšu ao a hlalosa gabotse kudu lefsifsi le le tseneletšego la moya le la boitshwaro la lefase le—mehleng ya Paulo le mehleng ya rena! Go swana le lekgolong la pele la nywaga, Bakriste lehono ga ba ‘sepele ka go etša ba-ntle.’ Go e na le moo, ba thabela tokelo e botse kudu ya go sepela le Modimo. Ke therešo gore batho ba bangwe ba ka belaela ge e ba go kwagala go bolela gore batho ba tlasana bao ba sa phethagalago ba sepela le Jehofa. Lega go le bjalo, Beibele e bontšha gore ba ka kgona. Go oketša moo, Jehofa o letetše gore ba dire bjalo. Lekgolong la seswai la nywaga pele ga Mehla ya rena e Tlwaetšwego, moporofeta Mika o ile a ngwala mantšu a buduletšwego ao a latelago: “Se Morêna a se nyakaxo xo wene: Ké xo dira tokô, ké xo rata botho; ké xo sepela le Modimo w’axo Ò n’e boipoetšô.” (Mongwalo o sekamego ke wa rena.)—Mika 6:8.
Re Sepela le Modimo Bjang le Gona ka Baka La’ng?
5. Motho yo a sa phethagalago a ka sepela bjang le Modimo?
5 Ke bjang re ka sepelago le Modimo yo matla ka moka le yo a sa bonagalego? Go molaleng gore ga re sepele le yena ka tsela yeo re sepelago le batho bao ba swanago le rena. Ka Beibeleng, polelwana e rego “go sepela” e ka bolela “go latela tsela e itšego ya go phela.” * Re nagana ka seo, re kwešiša gore motho yo a sepelago le Modimo o latela tsela ya bophelo yeo e beilwego ke Modimo le yeo e mo kgahlišago. Go kgomarela tseleng e bjalo go dira gore re be ba fapanego le batho ba bantši bao re phelago le bona. Lega go le bjalo, ke kgetho e nnoši e swanetšego bakeng sa Bakriste. Ka baka la’ng? Go na le mabaka a mantši.
6, 7. Ke ka baka la’ng go sepela le Modimo e le tsela e di phalago tšohle?
6 Sa pele, Jehofa ke Mmopi wa rena, e lego Mothopo wa bophelo bja rena le Monei wa dilo tšohle tše re di hlokago bakeng sa gore re phele. (Kutollo 4:11) Ka baka leo, ke yena feela yo a nago le tshwanelo ya go re botša kamoo re swanetšego go sepela ka gona. Go oketša moo, go sepela le Modimo ke tsela e holago kudu go phala tšohle. Bakeng sa bao ba sepelago le yena, Jehofa o dirile tokišetšo ya go lebalela dibe gomme o nea kholofelo e kgonthišeditšwego ya bophelo bjo bo sa felego. Le gona, Tatago rena yo lerato kudu wa legodimong o nea keletšo e bohlale yeo e thušago bao ba sepelago le yena go atlegiša maphelo a bona gona bjale, go sa šetšwe go se phethagale ga bona le go phela ga bona lefaseng leo le lego matleng a Sathane. (Johane 3:16; 2 Timotheo 3:15, 16; 1 Johane 1:8; 2:25; 5:19) Lebaka le lengwe leo ka lona re sepelago le Modimo ke gore go rata ga rena go dira bjalo go tlaleletša khutšong le boteeng bja phuthego.—Ba-Kolose 3:15, 16.
7 Sa mafelelo le sa bohlokwa kudu, ge re sepela le Modimo, re bontšha moo re emego gona mabapi le kgang e kgolo yeo e ilego ya tsoga morago kua tšhemong ya Edene—kgang ya bogoši. (Genesi 3:1-6) Re bontšha ka tsela ya rena ya go phela gore re eme ka mo go feletšego ka lehlakoreng la Jehofa, gomme re tsebatša ka ntle le poifo gore ke yena a nnoši e lego Mmuši yo a swanetšego. (Psalme 83:18) Ka baka leo, re dira ka go dumelelana le thapelo ya rena ya gore leina la Modimo le kgethagatšwe le gore thato ya gagwe e dirwe. (Mateo 6:9, 10) Bao ba kgethago go sepela le Modimo ba bohlale e le ruri! Ba ka kgonthišega gore ba sepela tseleng e nepagetšego, ka ge Jehofa a le ‘bohlale a nnoši.’ Ga a dire phošo.—Ba-Roma 16:27.
8. Mehla ya Henoge le ya Noage e be e swana bjang le ya rena?
8 Lega go le bjalo, go kgonega bjang go phela ka tsela yeo Bakriste ba swanetšego go phela ka yona mola ba le dinakong tša khuduego e bile batho ba bantši ba sa kgahlegele go hlankela Jehofa? Re hwetša karabo ge re ela hloko banna ba botegago ba mehleng e fetilego bao ba ilego ba kgomarela potego ya bona dinakong tše thata kudu. Ba babedi ba banna bao ke Henoge le Noage. Bobedi bja bona ba phetše dinakong tšeo di swanago tlwaa le tša rena. Bokgopo bo be bo apareditše.
Mehleng ya Noage, lefase le be le tletše ka bošoro le boitshwaro bjo bo gobogilego. Lega go le bjalo, Henoge le Noage ba ile ba lwantšha moya wa lefase wa mehleng ya bona gomme ba sepela le Jehofa. Ba ile ba kgona bjang go dira seo? E le gore re arabe potšišo yeo, re tla bolela ka mohlala wa Henoge sehlogong se. Sehlogong se se latelago, re tla bolela ka Noage.Henoge o Sepetše le Modimo Dinakong tša Khuduego
9. Ke tsebišo efe yeo re nago le yona mabapi le Henoge?
9 Henoge e be e le motho wa pele yo a hlalositšwego ka Mangwalong e le wa go sepela le Modimo. Pego ya Beibele e re: “Xe e le Henoxe yêna e be e le wa xo sepela à na le Modimo. Xe xo belexwe Methusala.” (Genesi 5:22) Ke moka, ka morago ga go bega ka tekanyo ya bophelo bja Henoge—bjoo gaešita le ge bo bapetšwa le tekanyo ya bophelo bja rena e bego e le bjo bokopana mehleng yeo—pego e re: “Henoxe e be e le wa xo sepela à na le Modimo; xomme a se kê a hlwa à e-ba xôna, ka xobane Modimo ó mo tlošitše.” (Genesi 5:24) Go molaleng gore Jehofa o ile a tloša Henoge lefaseng la ba ba phelago gomme a mo robatša lehung pele ga ge baganetši ba ka mo gobatša. (Ba-Hebere 11:5, 13) Ka ntle le ditemana tšeo tše dikopana, go bolelwa ka Henoge ka makga a mmalwa ka Beibeleng. Lega go le bjalo, go tšwa tsebišong ye re nago le yona le go tšwa ditšhupong tše dingwe, re na le lebaka le lebotse la go bolela gore mehla ya Henoge e be e le ya khuduego.
10, 11. (a) Kgobogo e ile ya aparetša bjang ka morago ga borabele bja Adama le Efa? (b) Ke molaetša ofe wa boporofeta wo Henoge a o boletšego, gomme ke karabelo efe yeo ge e le gabotse a ilego a e hwetša?
10 Ka mohlala, ela hloko kamoo kgobogo e ilego ya aparetša ka lebelo ka gona molokong wa batho ka morago ga ge Adama a dirile sebe. Beibele e re botša gore morwa wa leitšibulo wa Adama e lego Kaine e bile mmolai wa pele ge a be a bolaya morwarragwe e lego Abele. (Genesi 4:8-10) Ka morago ga lehu le šoro la Abele, Adama le Efa ba ile ba ba le morwa yo mongwe, gomme ba ile ba mo rea leina la Sethe. Re bala ka yena gore: “Le Sethe a bêlêxêlwa morwa a mo reêla la Enose. Mehleng yeo ba thomile xo rapêla leina la Morêna.” (Genesi 4:25, 26) Ka manyami, go “rapêla leina la Morêna” mo go bjalo e be e le ga bohlanogi. * Nywaga e mentši ka morago ga go belegwa ga Enose, setlogolo sa Kaine se se bitšwago Lamege se ile sa hlamela basadi ba sona ba babedi kopelo ya gore se bolaile lesogana leo le se gobaditšego. Se ile sa ba sa lemoša ka gore: “Xe ya Kaine tefetšô è e-ba xa-šupa Xôna ya Lamexe ké masome a šupaxo le metšô e šupaxo.”—Genesi 4:10, 19, 23, 24.
11 Ditherešo tšeo tše dikopana go swana le ye go sa tšwago go bolelwa ka yona, di bontšha gore kgobogo ye e tšweleditšwego ke Sathane kua tšhemong ya Edene e ile ya dira gore bokgopo bo aparetše ka go akgofa ditlogolong tša Adama. Lefaseng le bjalo, Henoge e be e le moporofeta wa Jehofa yo mantšu a gagwe ao a buduletšwego a šomago le lehono. Juda o bega gore Henoge o porofetile ka gore: “Tsebang, Morêna ó e-tla à na le Bakxêthwa ba xaxwe ba diketekete; Ó tla xo sekiša bohle; ba ba sa dumelexo ó tlo ba lahla bohle ka ’baka la medirô ya bôná ka moka ya xo se dumele, ye ba sentšexo ka yôna, le ka ’baka la dipolêlô tše thata ka moka tše ba-dira-dibe bao ba mmoletšexo ka tšôna.” (Juda 14, 15) Mantšu ao a tla phethagatšwa ka botlalo ka Haramagedone. (Kutollo 16:14, 16) Lega go le bjalo, re ka kgonthišega gore gaešita le mehleng ya Henoge, go be go e-na le ‘badiradibe ba bantši bao ba sa boifego Modimo’ bao ba ilego ba tšhoga ge ba e-kwa boporofeta bja Henoge. Ruri go bontšha lerato le legolo kudu gore Jehofa o ile a tloša moporofeta yo pele ga bona!
Ke’ng Seo se Ilego sa Matlafatša Henoge Gore a Sepele le Modimo?
12. Ke’ng seo se ilego sa dira gore Henoge e be yo a fapanego le batho ba mehleng ya gagwe?
12 Morago kua tšhemong ya Edene, Adama le Efa ba ile ba theetša Sathane gomme Adama o ile a rabela malebana le Jehofa. (Genesi 3:1-6) Morwa wa bona e lego Abele o ile a latela tsela e fapanego, gomme Jehofa o ile a mo amogela. (Genesi 4:3, 4) Ka manyami, ditlogolo tše dintši tša Adama di be di sa swane le Abele. Lega go le bjalo, Henoge yo a ilego a belegwa ka morago ga nywaga e makgolo o be a swana le yena. Phapano e be e le efe magareng ga Henoge le ditlogolo tše dingwe tše dintši tša Adama? Moapostola Paulo o arabile potšišo yeo ge a be a ngwala gore: “Tumêlô ké ka yôna xe Henoxe a tlošwa a se bône lehu; xobane mola à sešo a tlošwa ó hlatsetšwe xore ó be a kxahla Modimo.” (Ba-Hebere 11:5) Henoge e be e le karolo ya “leru [la pele ga Bokriste] . . . la dihlatse,” tšeo e bego e le mehlala e mebotse kudu ya tumelo. (Ba-Hebere 12:1) Ke tumelo yeo e ilego ya thuša Henoge gore a tšwele pele a itshwere gabotse bophelong bja gagwe ka moka bja nywaga e fetago 300—e lego nywaga ya bophelo e fetago ya bontši bja rena lehono ka makga a fetago a mararo!
13. Henoge o be a e-na le tumelo ya mohuta ofe?
13 Paulo o ile a hlalosa tumelo ya Henoge le ya dihlatse tše dingwe ge a be a ngwala gore: “Tumêlô ké kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” (Ba-Hebere 11:1) Ee, tumelo ke go ba le kholofelo e tiilego, e theilwego dikgonthišetšong tša gore dilo tšeo re di holofelago di tla direga. E akaretša kholofelo e matla mo e lego gore e kgoma tebelelo ya rena bophelong. Tumelo ya mohuta woo e ile ya thuša Henoge gore a sepele le Modimo gaešita le ge batho bao a bego a phela le bona ba sa ka ba dira bjalo.
14. Tumelo ya Henoge e ka ba e be e theilwe motheong wa tsebo efe e nepagetšego?
14 Tumelo ya kgonthe e theilwe tsebong e nepagetšego. Ke tsebo ya mohuta ofe yeo Henoge a bego a e-na le yona? (Ba-Roma 10:14, 17; 1 Timotheo 2:4) Ka ntle le pelaelo, o be a tseba ka ditiragalo tša kua Edene. Le gona, mohlomongwe o kwele mabapi le kamoo bophelo bo bego bo le ka gona kua tšhemong ya Edene—yeo mohlomongwe e bego e sa le gona, gaešita le ge batho ba be ba thibetšwe go tsena go yona. (Genesi 3:23, 24) Le gona o be a tseba ka morero wa Modimo wa gore bana ba Adama ba be ba tla tlatša lefase le go dira polanete ka moka gore e swane le Paradeise ya pele. (Genesi 1:28) Go oketša moo, ruri Henoge o ile a tšeela kholofetšo ya Jehofa godimo ya go tšweletša Peu yeo e bego e tla pšhatla hlogo ya Sathane le go fediša mathata ao a bakilwego ke bofora bja Sathane. (Genesi 3:15) Ka kgonthe, boporofeta bja Henoge ka noši bjo bo buduletšwego, bjo bo bolokilwego ka pukung ya Juda bo be bo le mabapi le go fedišwa ga peu ya Sathane. Ka ge Henoge a be a e-na le tumelo, re a tseba gore o ile a rapela Jehofa ka ge e le yo a ‘putsago bao ba mo nyakago.’ (Ba-Hebere 11:6) Ka gona, gaešita le ge Henoge a se a ka a ba le tsebo ka moka yeo re nago le yona, o bile le e lekanego bakeng sa go thea motheo wa tumelo e tiilego. Ka tumelo e bjalo, o ile a kgomarela potego ya gagwe dinakong tša khuduego.
Ekiša Mohlala wa Henoge
15, 16. Re ka latela mohlala wa Henoge bjang?
15 Ka ge go swana le Henoge re nyaka go thabiša Jehofa dinakong tša khuduego tšeo di lego gona lehono, re swanetše go latela mohlala wa Henoge. Re swanetše go hwetša tsebo e nepagetšego le go dula re e-na le yona mabapi le Jehofa le morero wa gagwe. Eupša go nyakega gore re be le se oketšegilego. Re swanetše go dumelela tsebo yeo e nepagetšego gore e hlahle tsela ya rena. (Psalme 119:101; 2 Petro 1:19) Re swanetše go hlahlwa ke tsela ya Modimo ya go nagana, ka mehla re katanela go mo kgahliša ka dilo ka moka tšeo re di naganago le dikgato tše re di tšeago.
16 Ga re na pego ya motho yo mongwe mehleng ya Henoge yo a bego a hlankela Jehofa, eupša go molaleng gore a ka ba a be a le noši goba e be e le karolo ya sehlopha se senyenyane seo se bego se le gona. Le rena re sehlopha se senyenyane lefaseng, eupša seo ga se re nyamiše. Jehofa o tla re thekga go sa šetšwe motho yo a ka bago a le kgahlanong le rena. (Ba-Roma 8:31) Ka sebete, Henoge o ile a lemoša mabapi le go fedišwa mo go tlago ga batho bao ba sa hlomphego Modimo. Le rena re na le sebete ge re bolela “ditaba tše tše dibotse tša mmušo” go sa šetšwe go kwerwa, kganetšo le tlaišo. (Mateo 24:14, NW) Henoge ga se a ka a phela nako e telele kudu go swana le batho ba bantši ba mehleng ya gagwe. Lega go le bjalo, kholofelo ya gagwe e be e se lefaseng leo. O ile a tsepamišetša mahlo a gagwe selong se segolo kutšwanyana. (Ba-Hebere 11:10, 35) Le rena re tsepamišeditše mahlo a rena phethagatšong ya morero wa Jehofa. Ka baka leo, ga re diriše lefase le ka botlalo. (1 Ba-Korinthe 7:31) Go e na le moo, re diriša matla a rena le dilo tša rena tša bohlokwa ka mo go kgethegilego tirelong ya Jehofa.
17. Re na le tsebo efe yeo Henoge a sa kago a ba le yona, ka gona re swanetše go dira’ng?
17 Henoge o be a e-na le tumelo ya gore Peu e holofeditšwego ke Modimo e be e tla tšwelela ka nako ya Gagwe. Ga bjale, go šetše go fetile nywaga e ka bago e 2 000 Peu yeo—Jesu Kriste—e tšweletše, e neile topollo, gomme ya re bulela tsela gotee le go e bulela dihlatse tša bogologolo tše di botegago go etša Henoge gore di hwetše bophelo bjo bo sa felego. Peu yeo, ye ga bjale e dutšego setulong sa bogoši e le Kgoši ya Mmušo wa Modimo, e rakile Sathane legodimong gomme ya mo lahlela mo lefaseng, gomme re bona mafelelo a tlaišego yeo e re dikologilego. (Kutollo 12:12) Ee, re na le tsebo e ntši kudu go feta yeo Henoge a bego a e-na le yona. Ka gona, anke re beng le tumelo e tiilego go swana le yena. Anke kholofelo ya rena phethagatšong ya dikholofetšo tša Modimo e tutuetše selo se sengwe le se sengwe seo re se dirago. Ka go swana le Henoge, anke re sepeleng le Modimo, gaešita le ge re phela dinakong tša khuduego.
[Mengwalo ya ka tlase]
^ ser. 5 Bona Bolumo 1, letlakala 220, serapa 6, go Insight on the Scriptures, yeo e gatišitšwego ke Dihlatse tša Jehofa.
^ ser. 10 Pele ga mehla ya Enose, Jehofa o ile a bolela le Adama. Abele o diretše Jehofa sehlabelo se se amogelegago. Modimo o ile a ba a boledišana le Kaine pele ga ge kgalefo ya lehufa e dira gore Kaine a bolaye. Ka baka leo, mathomo a a “go rapêla leina la Morêna” a swanetše go ba a ile a ba ka tsela e fapanego, e sego ka tsela ya borapedi bjo bo sekilego.
O be o tla Araba Bjang?
• Go sepela le Modimo go bolela’ng?
• Ke ka baka la’ng go sepela le Modimo e le tsela e di phalago tšohle?
• Ke’ng seo se ilego sa thuša Henoge gore a sepele le Modimo go sa šetšwe gore o be a phela dinakong tša khuduego?
• Re ka ekiša Henoge bjang?
[Dipotšišo tša Thuto]
[Seswantšho go letlakala 15]
Ka tumelo, “Henoxe e be e le wa xo sepela à na le Modimo”
[Seswantšho go letlakala 17]
Re dumela ka go tia gore dikholofetšo tša Jehofa di tla phethagala
[Methopo ya Diswantšho go letlakala 13]
Woman, far right: FAO photo/B. Imevbore; collapsing building: San Hong R-C Picture Company