Dipotšišo tše Tšwago go Babadi

Na go bapala dipapadi tša bošoro tša computer go ka kgoma tswalano ya motho le Jehofa?

Kgoši Dafida wa Isiraele ya bogologolo o ngwadile gore: “Morêna ó šetša ba ba lokilexo le ba babe; xomme ó hloile ba ba rataxo bosenyi.” (Psalme 11:5) Lentšu la leleme la mathomo bakeng sa “hloya” le ka ba le kgopolo ya “motho yo e lego lenaba.” Ka baka leo, motho le ge e le ofe yo a ratago bošoro o itira lenaba la Modimo. Ka gona, potšišo ye re swanetšego go e ela hloko ke e rego: Na go bapala dipapadi tše itšego tša computer go ka dira gore motho a rate bošoro?

Dipapadi tša bošoro tša computer di kgothaletša tirišo ya dibetša. Gantši di tlwaetša motho yo a di šomišago gore a be le bokgoni ntweng. Makasine wa The Economist o boletše gore: “Bahlabani ba Amerika ba ithekgile kudu ka dipapadi tša computer e le mekgwa ya tlwaetšo. Dipapadi tše dingwe tšeo bahlabani ba di dirišago ke tšeo di rekišwago mebarakeng.”

Ke therešo gore bao ba bapalago dipapadi tša computer tša bošoro ga ba gobatše batho ba kgonthe. Eupša kgetho ye ya boithabišo e bontšha’ng mabapi le seo se ka bago se direga ka dipelong tša bona? (Mateo 5:21, 22; Luka 6:45) O be o ka phetha ka go re’ng mabapi le motho yo a bego a thabela go hlaba, go thuntšha, go golofatša le go bolaya batho ba boikgopolelo? Go thwe’ng ge e ba motho yo a fetša diiri tše dintši beke le beke a nweletše dikgopolong tše bjalo tšeo e sego tša kgonthe tša bošoro, mohlomongwe a feleletša a lemaletše dipapading tše bjalo? Bonyenyane, o be o tla phetha ka gore o be a hlagolela lerato la go rata bošoro, go fo swana le ge motho yo a bogelago diswantšho tše di kgothaletšago bootswa a hlagolela dikganyogo tše di gobogilego.—Mateo 5:27-29.

Ke ka tekanyo e kaaka’ng yeo ka yona Jehofa a hloilego motho yo a ratago bošoro? Dafida o boletše gore Jehofa o mo “hloile [“e le ka kgonthe,” NW].” Mehleng ya Noage, Jehofa o ile a bontšha tekanyo yeo ka yona a hloilego bao ba ratago bošoro. Jehofa o boditše Noage gore: “Bofêlô bya nama ka moka bo tlile, ka xobane mo batho ba tlaxo xôna, lefase le tlala tša sehloxo. Byale Nna ke tlo ba senya xo-tee le lefase.” (Genesi 6:13) Modimo wa therešo o fedišitše lefase ka moka la batho ka baka la ditsela tša bona tša bošoro. O phološitše Noage le lapa la gagwe feela—batho ba seswai bao ba sa kago ba rata bošoro.—2 Petro 2:5.

Batho bao ba nyakago go ba bagwera ba Jehofa “ba . . . tšea dithšoša ba rula mexomá ka tšôna, ba tšea marumô ba rula maxwêtla ka ôna.” Go e na le gore ba ithute go rata bošoro, ga ba sa “ithuta xo hlabana.” (Jesaya 2:4) E le gore re dule re le bagwera ba Modimo go e na le go ba manaba a gagwe, re swanetše go ‘kgaogana le tše mpe gomme re dire tše botse.’ Re swanetše go ‘tsoma khutšo le go e kganyelela.’—1 Petro 3:11.

Go thwe’ng ge e ba re be re šetše re tšea karolo tabeng ya go bapala dipapadi tša bošoro tša bidio? Gona re swanetše gore re ikemišetše ka go tia go kgahliša Jehofa ka go tlogela go dira selo seo a se hloilego. Ka kgonthe, re swanetše go rapelela thušo ya moya o mokgethwa wa Modimo e le gore re kgaotše mokgwa wo o senyago boemo bja rena bja moya. Re ka kgona go o kgaotša ge e ba re dumelela dika tše di swanago le khutšo, botho le boitshwaro go dira gore maphelo a rena e be ao a dumelelanago le ditsela tša Modimo.—Luka 11:13; Ba-Galatia 5:22, 23.